2026仁川機場T2攻略 | 來回首爾交通、登機流程、退稅、設施等

Hello，大家好，我哋係由韓國人每日提供最新韓國旅行資訊嘅Creatrip。

如果由香港出發去首爾，而家所有航班都會係去仁川機場。但仁川機場分為T1同T2兩個客運大樓，尤其近年仁川機場設施同部分航空公司安排都有更新，如果出發前冇先確認清楚自己班機喺邊個terminal，真係好容易一去到機場就唔知點算好。

今次小編就幫大家整理咗仁川機場T2最實用資訊，由出發前要確認啲咩、去到T2之後應該點做、去首爾市區揀邊種交通最方便、退稅喺邊度做，入到禁區有咩等等，一次過話你知！無論你係第一次飛韓國、帶住大件行李、同行有長者小朋友，定係準備返香港前喺T2出境，都可以先睇定呢篇，到時就冇咁易亂啦！

※於2026年4月更新，資訊來源為仁川國際機場官方網站、AREX官方網站及各服務公告；實際安排可能因航空公司、航班時段及現場營運情況而有所調整，請以出發當日資訊為準

仁川機場T2客運大樓總整理

仁川機場T2同T1客運大樓有咩分別？

去仁川機場之前，第一件事唔係睇要搭咩車，而係先確認自己班機到底係喺T1定T2！雖然兩個客運大樓都係仁川機場，但實際上位置、兩邊使用嘅航空公司、check-in櫃檯、交通同設施都有分別。小編自己大部分時候都係去T1出入境，每次去T2都會覺得環境大好多又新淨！

雖然如果去錯terminal唔係完全冇得補救，但一定會花多咗時間轉返去另一邊；如果你本身已經接近check-in截止時間，或者仲要寄艙、退稅、拎免稅品，就會特別狼狽。所以最穩陣嘅做法，係出發前先透過機票或訂票確認電郵、航空公司官網航班資料、仁川機場官方航班查詢頁面等確認客運大樓。

如果你搭嘅係聯營航班就更加要小心。因為你買飛嗰間航空公司，未必等於實際營運航班嗰間，而terminal安排通常會跟返實際營運航班！

💡香港小編小貼士：香港人經常搭嘅大韓航空(KE)、真航空(LJ)以及部分外國航空公司都係喺T2出發/到達，而2026年1月起韓亞航空(OZ)都正式搬咗去仁川機場T2，大家記住要注意啦！

仁川機場T2客運大樓概覽

仁川機場T2客運大樓主要分為6層。B1/F係大家會去搭AREX機場快線、一般機場鐵路、機場巴士、高速巴士等交通工具嘅地方；而1樓就係入境大堂，大家到埗攞完行李就會喺一層出。

2樓主要係航空公司辦公室同部分轉機設施；3樓就係大家離開韓國出境之前，要去做check-in、寄行李、入禁區等手續嘅地方。4樓係餐廳，5樓就係展望台同展覽空間。

由首爾市區去仁川機場T2，揀咩交通最方便？

由首爾市區去仁川機場T2客運大樓最方便嘅方法，其實真係好睇你住邊區、同行有冇長者小朋友、行李多唔多等因素。如果想快同穩定，通常先考慮AREX；如果酒店附近就有機場巴士站，就當然搭機場巴士會更加方便；如果係凌晨機、行李多，或者幾個人一齊旅行，的士同機場包車接送服務會最慳錢慳力。

AREX機場快線

AREX連接仁川機場T2、T1客運大樓同仁川、首爾等主要地區。而AREX又會分為直通車同一般列車，直通車只會停靠仁川機場T2、T1同首爾站，需時大約43分鐘；一般列車就會停埋弘大入口站、數碼媒體城站、孔德站等，但就會慢過直通車。

大家如果住宿或者最後行程會喺首爾站附近，推薦大家可以搭AREX直通車（甚至乎仲可以使用埋都心機場服務，事先喺市區check-in、寄行李同過關，去到仁川機場唔需要再排隊入禁區）。但如果住宿位置唔近首爾站或者1、4號線地鐵站，咁一般列車應該會比較適合你。

調返轉如果係由仁川機場T2去首爾，大家就可以去位於B1/F交通中心嘅AREX售票處，跟住指示牌行到去中央地帶就會見到上圖呢個地方，附近亦都有自助售票機可以買車飛。提提大家AREX直通車先需要另外買飛同揀位，如果係搭一般列車直接嘟T-money等交通卡就可以入閘搭車！

更多相關資訊👇🏻

[블로그] 首爾去仁川機場AREX直通車攻略（2026最新版）

[스팟] 仁川機場快線AREX直通車票

機場巴士

如果你住喺 明洞、東大門、江南、蠶室 等地區，而附近又有機場巴士站，咁搭 機場巴士 會舒服好多。最大優點係唔使拖住行李轉幾次車，上車之後基本上可以一直坐到接近機場，對帶住大件行李、同行有長者小朋友，或者唔想搬行李上上落落嘅旅客特別方便。不過巴士車程始終會受路面交通影響，如果係繁忙時間、假期或者天氣唔穩定，建議預鬆多少少時間會比較穩陣。

💡香港小編小貼士：搭由首爾市區去仁川機場嘅機場巴士嘅時候唔需要另外買飛，上車嘅時候俾現金或者嘟T-money等交通卡就得！司機通常會問你去邊個terminal，用英文答one或者two佢就會聽得明！

如果係由仁川機場出發，大家就要事先去位於B1/F交通中心嘅售票處用現金俾錢買機場巴士車飛。附近其實都有自助售票處，不過就只接受用韓國信用卡付款，如果冇就要乖乖去人工櫃檯買車飛啦。

更多相關資訊👇🏻

[블로그] 2026仁川機場巴士路線、時間表、車費總整理

的士/機場接送

如果你班機時間比較早、比較夜，或者同行人數多、行李又多，其實直接搭的士或者機場接送會最方便。尤其如果你住嘅地方轉車唔方便，又或者唔想一早拖住行李趕車，點對點去機場會輕鬆好多。雖然車資通常會比AREX或者機場巴士高，不過如果幾個人一齊分擔，或者本身係家庭旅行，其實整體方便程度會高好多。

如果你係落地仁川機場冇耐，想搭的士出首爾市區，就要去到AREX同機場巴士反方向地方，行出室外地區之後根據需要去返正確地方等的士。如果你係去首爾就要去7C、如果行李比較多就可以去7D搭大型的士、怕溝通唔到就可以去3C坐國際的士，直接用英文同司機溝通就得。

💡香港小編小貼士：如果都係覺得好亂，的士上車位附近會有工作人員，同佢講想去嘅目的地，佢就會幫你安排車輛！

如果連呢一步都唔想煩，或者係一家大細嚟，顧唔到咁多嘢，推薦事先預約定機場接送服務，車輛夠大仲唔洗自己搵路，真係好方便！之前小編屋企人喺香港飛嚟探我，當時好彩有先叫定接送服務，如果唔係應該要喺的士站等成個幾兩個鐘！

仁川機場T2交通懶人包

仁川機場T2出境手續喺邊度搞？

去到仁川機場T2客運大樓之後，第一件事就係上3樓出境大堂。大部分國際線乘客嘅check-in、寄艙、出境前準備等等都係喺呢一層處理。一入到出境大堂，建議大家先睇顯示屏，睇下你班機個航空公司登記櫃枱喺A至G邊個Zone。

如果你唔想同旅遊團或者團體遊客一齊排隊等，建議大家可以去Zone E自助機器辦理相關手續同攞機票，如果有行李要寄艙就要去返人工櫃枱通知職員。

💡香港小編小貼士：如果你係旺季出發，例如櫻花季、暑假、紅葉季、聖誕前後，建議國際線至少提早2個半至3個鐘到機場；如果你仲要退稅、拎免稅品或者現場處理其他事務，時間記住唔好預太緊！

如果去錯仁川機場客運大樓可以點算？

機場03號接駁車(공항03) 仁川機場T2→仁川機場T1	機場04號接駁車(공항04) 仁川機場T1→仁川機場T2

小編記得好耐之前頭幾次飛韓國，因為真係太習慣去仁川機場T1出境，所以好自然地喺T1落咗車，去到搵check-in櫃檯發現冇先知原來自己去錯地方。

呢個時候大家可以有兩個方法：第一係去搭AREX一般列車，搭一個站就可以去返正確嘅terminal；第二係去搭仁川機場客運大樓接駁車，T2 3樓出境大堂外面6號同7號站牌附近就有機場03號接駁車嘅站牌，根據你需要去嘅閘口搭2-3個站就到仁川機場T1！

💡香港小編小貼士：雖然有接駁車可以來回T1/T2，不過因為兩個客運大樓都有啲距離，建議大家登機前一定要check清楚，如果唔係會浪費咗好多時間。

做好登機手續之後仲有咩一定要處理？

好多人以為check-in完就搞掂，但其實出境前通常仲有幾樣嘢要留意，尤其如果你係返香港前最後一站先處理，就更加唔可以唔記得去退稅！

仁川機場T2退稅

• 位置：3樓Zone F、G附近

如果你今次旅程買咗唔少嘢，出發前要記得預留時間處理退稅。大家可以用自助退稅機自行申請退稅，不過實際仲要睇你買嘅店舖、退稅方式，同埋有冇被抽查商品。

仁川機場T2退稅機有齊包括中文同英文、總共14國語言服務，只要跟住畫面上指示就可以輕鬆完成退稅申請。

💡香港小編小貼士：退稅時建議準備好護照、收據、退稅單據同商品，如果你買嘅商品要寄艙，記住先同定航空公司地勤職員講！

仁川機場手提行李違禁品&液體規定

過海關入禁區之前大家最容易唔記得check手提行李入面有冇唔合規格嘅物品，如果想手提水、飲料、泡菜、醬類（大醬、辣椒醬）、化妝品類（爽膚水、乳液、面霜）、牙膏等液體上機，每個容器限100毫升以下，總共1升內就可以，詳情請務必參考機場規定。

另外由2026年開始，每人只可以帶2個容量低於160Wh嘅行動電源（尿袋），而且唔可以喺飛機上面使用或者充電，大家記住登機前要check清楚。

💡香港小編小貼士：韓國有新聞報過話每年因為超過指定容量而被沒收嘅泡菜有成11噸咁多，大家如果唔肯定自己買嗰款包裝容量係幾多嘅話建議寄艙，好過直接被沒收！

仁川機場T2入境之後有咩可以先做定？

買SIM卡同租ＷiFi蛋

• Wide Mobile領取地點：1樓入境大堂3號出口附近

如果想去到機場之後就換SIM卡或者租WiFi蛋上網，建議大家可以先喺網上預約定，然後落機再去仁川機場T2指定櫃枱領取，會更加有效率！

小編以前自己嚟韓國旅行都習慣買本地SIM卡，所以貴嘅平嘅都有用過。如果大家想買價錢比較平、CP值高嘅韓國SIM卡，推薦大家可以買Wide Mobile嘅預付SIM卡，可以無限上網之餘速度快，大家可以透過Creatrip事先預約定！

[스팟] Wide Mobile 預付SIM卡（無限上網、機場/市區領取）

仁川機場T2換錢

如果想喺仁川機場T2客運大樓換錢，大家可以去韓亞、友利同新韓銀行換，現場亦都有提款機。不過根據小編觀察，通常仁川機場匯率都會差過市區找換店，所以建議大家換定少量韓幣用嚟買水、買嘢食、買機場巴士車票、買交通卡同增值等就夠，其他就出到明洞、弘大、東大門市區之後先再換會更抵。、

如果唔想出到市區再搵找換店咁麻煩，推薦大家可以使用Creatrip仁川機場換錢預約服務，匯率會靚過機場銀行之餘可以提早最多14日預約，如果最近要飛韓國，見到呢排匯率靚就可以預約定先，因為換算嘅時候會用預約當時匯率進行兌換。

[스팟] 仁川機場外幣→韓幣換錢服務（送BELLYGOM聯名交通卡）

行李寄存/托運

如果你有額外大件行李，或者需要寄送/暫存/托運服務，仁川機場T2都可以搵到相關服務櫃檯。不過T2就唔似T1咁有郵局，所以如果大家想寄嘢返香港可能會比較難。

仁川機場T2便利設施總整理

仁川機場T2顧客服務中心

• 位置：
  • 1樓西邊2號、5號出口
  • 3樓Zone B、G

如果去到機場有任何問題或者需要協助，都可以去1樓同3樓顧客服務中心搵現場職員幫手，而3樓服務中心隔離仲有免費影印機，如果離開前發現有文件漏咗冇print，都可以喺呢度補印。

仁川機場T2醫院

• 位置：B1西邊
• 營業時間：平日08:30 - 18:00

機場裡有附設醫院，韓國人或外國人都可以去接受治療，如果突然整親或者覺得身體唔舒服，記住唔好忍到上機！

仁川機場T2藥局

• 位置：B1/F 西邊、3/F 中央

如果今次旅行唔記得帶急救藥物，但突然需要用到，仁川機場入面都有藥房！

仁川機場T2膠囊酒店

• 位置：B1交通中心東邊
• 營業時間：24小時

同仁川機場T1一樣，T2都有膠囊酒店俾旅客可以暫時休息。呢間酒店由韓國知名酒店「Walker Hill Hotel」營運，日間費用由₩32,000起，如果想過夜費用就會係₩69,600起。如果係夜機或者凌晨機到，抑或係一大早嘅航班，怕交通唔方便預先去機場等，都可以考慮入住膠囊酒店，部分房型更加有埋淋浴間，大家可以沖埋涼更加舒服！

仁川機場T2休息&充電區

機場1樓、3樓同B1巴士等候座位區都有叉電位，支援無線同有線兩種方式，就算唔記得帶線都唔使擔心。

仁川機場T2有咩好食？

仁川機場T2客運大樓B1/F同4/F都有Food Court、餐廳同Cafe，今日小編想推薦嘅都係小編每次喺仁川機場T2離開韓國去其他國家玩嘅時候會去嘅餐廳同Cafe！

如果想醫飽個肚，小編會推薦大家去位於B1/F嘅韓食美談街Food Court！江陵校洞海鮮麵、北倉洞涓豆腐等出名嘅韓國美食都可以喺度搵到，小編自己就最鍾意飛之前食返碗泡菜鍋，夠韓得嚟暖笠笠夠飽肚。

而Cafe方面就推薦大家去位於1樓Gate 10附近嘅Coffee@Works，環境夠開揚，無論係自己定朋友一齊去都可以坐得舒服。重點係咖啡同其他餐點都好食，臨飛之前有時間不妨可以去！

仁川機場T2有咩特別設施？

展覽館&展望台

仁川機場T2 5樓有一個介紹韓國歷史嘅展覽館，想再深入了解韓國文化嘅朋友可以嚟呢度；附近仲有個展望台，可以俯瞰到停機坪同跑道。如果今次旅行會帶埋小朋友去，推薦大家可以提早少少去仁川機場T2 check-in，然後帶小朋友去呢度放電！

仁川機場T2常見問題FAQ

Q1. 國際線一般應該提早幾多到仁川機場T2？

A：一般建議最少提早2個半至3個鐘到會比較穩陣；如果你仲要寄艙、退稅、拎免稅品，或者係旺季出發，就更加建議早少少。

Q2. 點樣最快確認自己班機係喺仁川機場T2起飛/降落？

A：最直接係睇航空公司App、訂票確認電郵、航空公司官網，或者仁川機場官方航班頁面。聯營航班尤其要再確認一次。

Q3. 由仁川機場T2去弘大搭咩車最方便？

A：如果住喺弘大入口站附近，建議搭AREX機場鐵路一般列車；如果你行李多，亦可以考慮預約機場接送或搭的士。

Q4. 由明洞去仁川機場T2應該搭AREX定巴士？

A：如果你想快同穩定，可以搭4號線去首爾站，再轉AREX機場快線直通車；但如果你酒店附近本身有機場巴士站，而且行李較多，搭機場巴士會舒服啲。

Q5. 喺仁川機場T2可唔可以退稅？

A：可以，不過具體流程仍要視乎你購物店舖、退稅方式，以及商品係寄艙定手提而定。建議提早整理文件並預留時間。

Q6. 喺仁川機場T2換錢抵唔抵？

A：通常市區匯率會比機場更好，所以建議只喺機場換少量現金應急，大額換錢可留返市區。

Q7. T2禁區入面有咩設施？

A：一般會有免稅店、餐廳、Cafe、休息區、免費Wi-Fi、充電位同貴賓室，不過營業時間可能因時段而變動，建議參考現場資訊。

今次會去仁川機場T1客運大樓？

[블로그] 2026仁川機場T1攻略 | 交通、退稅、設施、出境流程總整理

如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！