2024首爾玫瑰花景點/玫瑰花慶典總整理
6個韓國春天必去玫瑰花景點，一齊嚟欣賞超靚玫瑰花同影相打卡啦！
- 首爾玫瑰節（서울장미축제）
- 首爾大公園（서울대공원）
- 奧林匹克公園（올림픽공원）
- 愛寶樂園（에버랜드）
- 延南洞玫瑰花牆
- 大峴山玫瑰花園（대현산 장미원）
Hello，大家好，我哋係由韓國人每日提供最新韓國旅行資訊嘅Creatrip。
講起韓國春天，一定唔少得各種各樣嘅花卉慶典！而每逢5、6月係韓國玫瑰花盛開嘅時期，就咁喺街度行都可以見到小花兩三朵XD 今日等小編介紹6個首爾玫瑰花景點，大家嚟旅行嘅時候記住plan埋落行程啦！
2024首爾玫瑰花景點總整理
首爾玫瑰節（서울장미축제）
- 地址：서울특별시 중랑구 묵동 375
- 日期：2024.05.18 ~ 2024.05.25
- 費用：免費
韓國最出名嘅玫瑰花慶典相信一定係首爾玫瑰節！今年首爾玫瑰節會由5月18號開始舉辦到25號，去到中浪玫瑰公園門口就可以見到有超靚玫瑰隧道同花壇，超有春天氣氛！
搭地鐵去到中浪站再行幾分鐘就可以去到中浪玫瑰公園，因為呢個公園真係比想像中大，而且活動期間人比較多，所以建議大家要預多少少時間！嚟到記住一定要去玫瑰隧道打卡啊~
除咗玫瑰花，大家仲可以睇到油菜花、紫色繡球蔥等等嘅花卉，五顏六色影相勁上鏡！
首爾大公園（서울대공원）
- 地址：경기도 과천시 막계동 산56-1
- 玫瑰花節日期：2024.05.26 ~ 2024.06.04
- 費用：
- 成人 ₩2,000
- 青少年（13-18歲）₩1,500
- 小童（6-12歲）₩1,000
首爾大公園呢個名就聽得多，但係大家又知唔知原來入面有個勁大嘅玫瑰花園呢？
大家可以沿著湖邊散步徑一邊漫步，一邊欣賞盛開嘅玫瑰花，超寫意！
天氣好嘅時候真係點影都咁靚！一場嚟到記住去埋首爾樂園同首爾動物園，同家人、朋友、另一半一齊玩返日啦~
奧林匹克公園（올림픽공원）
- 地址：서울 송파구 올림픽로 424
- 玫瑰花節日期：2024.05.18 ~ 2024.06.06
- 費用：免費
位於蠶室嘅奧林匹克公園都有一個玫瑰花園，呢度24小時開放，而且唔需要入場費，不過建議大家唔好太遲去，如果唔係熄曬燈就咩都睇唔到㗎啦！
每年5月中左右，呢度就會舉辦玫瑰花慶典，到時候會有各種演唱會同文化體驗等等嘅活動可以參加。
玫瑰花園隔離仲有一個開滿各種各樣鮮花嘅花園，小編最近去嘅時候發現啲花已經盛開，大家要去就趁早啦！
愛寶樂園（에버랜드）
- 地址：경기 용인시 처인구 포곡읍 에버랜드로 199
- 鮮花慶典日期：2024.03.22 ~ 2024.06.16
愛寶樂園係韓國最受歡迎嘅主題公園之一，一年四季都會舉辦各種主題展覽同慶典，而每逢春天就一定會搞鮮花展覽！
愛寶樂園本身就多打卡位，不過春天嘅時候四周圍都開滿花，影出嚟嘅效果會更加靚！
今年鮮花慶典仲係同Sanrio合作，就好似同緊卡通人物們一齊賞花野餐咁，成件事勁cute！
延南洞玫瑰花牆
- 地址：서울 마포구 동교로39길 11 대명아파트
每年一到玫瑰花盛開嘅時候，好多人都會專程嚟延南洞，因為呢度有個隱藏玫瑰花景點！
京義線林蔭公園附近嘅「大明公寓」有一個玫瑰花牆，上面爬滿鮮紅色同粉紅色嘅玫瑰花，大家如果會去弘大附近玩，不妨可以去影相打卡！
大峴山玫瑰花園（대현산 장미원）
- 地址：서울 성동구 독서당로 63길 60
- 鮮花慶典日期：2024.05.25
- 費用：免費
大峴山玫瑰花園位於東大門同往十里附近，每年5月尾嚟都可以睇到色彩鮮艷嘅玫瑰花！
今年玫瑰花慶典喺5月25號舉辦，不過就算唔係慶典當日大家都可以嚟參觀散步，推薦大家喺玫瑰花拱門下面影相留念！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com