釜山「白淺灘文化村」介紹
去厭甘川洞文化村，不如就去白淺灘文化村，嗰度有韓國版「聖托里尼島」之稱！
Hello，大家好，我哋係由韓國人每日提供最新韓國旅行資訊嘅Creatrip。
釜山除咗甘川洞文化村之外，其實仲有一個「白淺灘文化村」，呢度更加有韓國版「聖托里尼島」之稱，而家就等小編帶大家一齊睇吓呢度有咩特色啦！
釜山「白淺灘文化村」介紹
- 地址：부산 영도구 영선동4가 1044-6
- 小Tips：喺釜山站搭82或85號巴士，喺白淺灘文化村（흰여울문화마을）落車。
「白淺灘文化村」個名源自鳳來山上溪水流入大海時，互相拍打而濺起嘅浪花，因為好似白雪咁，所以就叫白淺灘。2013年電影《逆權大狀》、2011年電影《與犯罪的戰爭：壞傢伙的全盛時代》、2003年電影《瘋狂初戀》都有喺度取景。
呢度裝修以白色、藍色為主，有好多可愛cafe、餐廳同紀念品鋪頭。
呢度有好多特色小店，大家邊行嘅時候，可能會發現唔少新驚喜。
因為四周圍都係露天Area，夏天去嘅時候，記得要搽好防曬同戴太陽眼鏡。
呢度唔單止係一個旅遊觀光景點，同時都有好多人喺度住，所以大家嚟到講嘢千祈唔好太大聲。
呢度有兩條街道，一條係海濱長廊，一條係通往村里小巷嘅坡道。
呢度每個角落都好好影
每間屋都有油上唔同顏色，好靚。
雖然小編去嘅當日個天有啲陰，但如果之後大家去嘅時候係好天，一定可以影到好多靚相！
呢度有好多特色小店，每行一步都發現唔少新事物。
呢度有好多明信片賣，大家可以揀度買幾張寫完再寄俾朋友。
因為真係太可愛，小編都忍唔住買咗幾張！
沿途都會有好多指示牌，行嘅時候唔使怕蕩失路。
呢度嘅路比較斜，嚟嘅時候最好著運動鞋。
就算夜晚嚟都好有feel！
釜山「白淺灘文化村」餐廳&Cafe推介
1. 白淺灘超市（흰여울점빵）
- 地址：부산 영도구 흰여울길 121
- 營業時間：每日 12:00 - 賣哂所有材料為止
呢度雖然細細間，但係每一個人嚟到都會喺度打卡~ 餐廳有室內同室外位，不過可以坐嘅位唔算多，所以只要一到週末，就會有好多人嚟等位，天氣唔好嘅話老闆亦都唔會開室外位，建議大家揀一日天氣好嘅時候早啲去。
大家嚟到「白淺灘超市」可以坐喺度邊望海邊食公仔麵同多士，雖然只係普通味道，但可以邊望住海邊食都係另一番風味！
2. 白淺灘Beach（흰여울비치）
- 地址：부산 영도구 절영로 236
- 營業時間：星期一至五 11:00 - 20:00（Last Order 19:00）、星期六至日 11:00 - 21:00（Last Order 20:00）
「白淺灘Beach」成間cafe嘅外牆都係粉紅色，好容易就搵到。周圍都擺咗啲花花草草，好有度假feel嘅枱櫈，仲望到超靚海景，唔怪得呢間cafe喺韓國咁紅！
呢度隨便咁影一影都好靚，連飲品都顔值超高，啱曬想坐低休息同時影相打卡嘅朋友們！
3. 手腕書家（손목서가）
- 地址： 부산 영도구 흰여울길 307
- 營業時間：每日 11:00 - 19:00
「白淺灘文化村」呢度有唔少隱藏Cafe同餐廳，當中「手腕書店」係其中一個小編想介紹俾大家嘅地方。
一入到Cafe，大家會見到呢度有超多書，好多人都會喺度慢慢睇同嘆咖啡。不過除咗睇書，呢到仲有一個望海打卡位，大家下次去一定要坐喺前面影返幅留念啊！
4. Yeoulmarq（여울마크）
- 地址：부산 영도구 흰여울길97
- 營業時間：星期一至五 11:00 - 19:00、星期六 11:00 - 20:00（逢星期日休息）
- 優惠：下載優惠券，叫飲品即可免費獲得「See Sea with BOOK」2小時使用券
「Yeoulmarq」老闆話希望每位客人嚟到都可以透過咖啡香味去記住當下呢個瞬間，真係好浪漫~ 呢度室內同室外都有位可以坐，日頭去可以望到藍天白雲，黃昏去又可以見到日落，夜晚去更加可以睇到無敵夜景+海景，每個時段都各有各特色！
呢杯係「Yeoulmarq」嘅招牌咖啡，就好似將釜山嘅形象融入咗落去咁，顔色配搭好靚！呢款咖啡每日限量賣30杯，上面層cream可以揀要粉紅鹽焦糖味或者Valrhona可可粉味，小編就揀咗前者，鹹鹹甜甜超得意！
5. See Sea with BOOK（씨씨윗북）
- 地址：부산 영도구 흰여울길 99
- 營業時間：星期一至五 11:00 - 19:00、星期六 11:00 - 20:00（逢星期日休息）
「See Sea with BOOK」位於頭先介紹嘅「Yeoulmarq」隔離，雖然唔可以算係一間Cafe，不過都超多人會嚟呢間書店打卡！
上到3樓除咗可以睇到無敵海景之外，呢度仲有幾塊寫滿句子嘅玻璃窗，好多人都會喺度打卡！不過有少少可惜嘅係日頭去影嘅話會背光，所以比起正面，小編建議大家影背面會更加好睇~
釜山「白淺灘文化村」必影打卡位
望到上圖一個休息區，往左一直行，就會見到一個打卡位，好多人都會企喺中間呢度影相。
影完之後，大家一直直行，會見到一個路牌，跟住箭嘴方向行，會見到一個好長嘅彩虹色樓梯。
韓國真係有好多彩虹色打卡點，唔知大家又有冇去過其他景點影相呢？
呢度會有一個隧道，有留意開韓國人社交平台都應該會見過唔少人喺度打卡。
大家都記住要喺度影返幾張相啊！
嚟到隧道盡頭，又會發現另外一個打卡位！
有個相框框住喺中間，大家可以任意擺pose，影返張人生相。
釜山「白淺灘文化村」必做活動
1. 影海景個人形象照
Building Owen Morgen（삘딩 오왼몰겐）
- 地址：부산 영도구 절영로 226
- 營業時間：11:00 - 17:00
「Building Owen Morgen」係一間影相鋪嘅同時仲係一間海景Cafe，最出名就係以釜山影島蔚藍大海做背景影相，仲有黑白形象照、懷舊卡帶個人照等等嘅concept任君選擇！而且價錢唔貴，仲包埋修圖，有機會去釜山玩嘅話不妨都可以去影返輯相！
2. 著韓服
灘韓服（여울한복）
- 地址：부산 영도구 절영로 240 2F
- 營業時間：11:00 - 19:00
「灘韓服」雖然韓服款式睇落唔多，不過每款都超高質！而且一行出去就可以見到海，用無敵海景做背景影韓服相真係點影都咁上鏡！呢度其中一個特點係鋪頭入面有一塊可以睇到海嘅大玻璃窗，大家可以著住韓服喺度影相！
下次嚟釜山唔再只係去甘川洞文化村，白淺灘文化村一樣有好多嘢等住大家去發掘同體驗～
如果有更多想知嘅內容，都可以隨時留言或者dm話俾我哋知：）
Instagram：creatrip.hk