釜山「西面地下街」介紹
2021最新！釜山西面地下街夏季款，款式選擇多，之後一定要嚟瘋狂Shopping！
Hello，大家好，我哋係由韓國人每日提供最新韓國旅行資訊嘅Creatrip。
講到要Shopping，如果想買到最平、最靚、最新嘅款式，又點可以唔行地下街呢？首爾可能都行得多，但釜山嘅西面地下街你又有冇行過？如果冇，咁你之後就要嚟啦！呢度款式多，而且夠闊落，行得都比較舒服！
釜山西面地下街
- 地址：부산광역시 부산진구 부전1동 573-1
- 時間：10:00至22:00（個別鋪頭營業時間可能會唔一樣）
去得首爾多有啲悶？不如就去下第二大城市釜山行吓啦！呢度同樣都有好多地下街，而今次小編去嘅係位於西面。
去地下街多數會有兩種方法，一係搭地鐵，出閘之後有通道穿過去地下街，另一種方法就係搭巴士，喺西面站落車之後，大家會見到好多上圖呢一種入口，隨便入一個都可以去到。
釜山地下街同首爾地下街基本上都係一樣，都係分咗兩條通道，大家可以行完一邊再行另一邊，小編個人覺得西面地下街夠闊落，行嘅時候都好輕鬆，而且舖頭多，有排可以行。
每一間舖頭擺放嘅衫都整齊，價錢一啲都唔算貴，而出名賣簡約風嘅Pigment連鎖店呢度都有！
小編私心幾推呢一間鋪頭，簡約得嚟又有淑女風，無論係返工定係約會，呢一間所有衫都可以襯。
相信大家都有聽講過，嚟韓國一定要買牛仔褲，因為每一次買完都會覺得好顯瘦同睇落有長腿，呢兩間小編每一次去西面地下街都一定會入去，唔單止價錢平！佢最大賣點係埋可以俾大家試，最平1萬won就有交易。
唔少人可能會覺得地下街都係專for賣女仔衫，但呢度就唔同，有好幾間男裝店！男士們都唔需要再等，可以自己行埋一份！
地下街真係應有盡有，無論係睡衣、衫、襪、帽、香水、手機配件等呢度都有。
同時呢度都有唔少鞋店，波鞋、皮鞋、高踭鞋等，呢度通通都有，每一對都係1萬won起。
另外小編仲發現到呢度有好幾間賣狗狗配件嘅舖頭，除咗衫之外，大家仲可以為自己嘅狗狗整一個獨一無二嘅名牌。
如果買太多冇晒現金，呢度都有ATM，另外行到攰，仲可以坐喺度休息吓。
呢度好多美妝品牌都有，例如Holika Holika、Innisfree、Etude House、Skin Food、Aritaum等。
最後如果大家想買啲飾物，小編建議大家可以去呢一間美女與野獸（미녀와야수），佢係喺地鐵站一出嚟通往地下街前會見到。
無論係戒指、頸鏈、手鍊，定係髮夾等呢度都有好多款俾大家揀，一個唔小心，可能會行到唔記得時間添
行地下街小Tips：
1. 最好用現金，雖然可以碌卡，但係會有手續費。
2. 每間鋪嘅角落頭，都會有佢哋嘅店Number，大家只要記住，就唔會蕩失路/搵唔返想買嘅嘢。
唔知大家睇完，大家又會鍾意行首爾地下街定係釜山地下街多呢？希望大家都會行得開心，之後嚟話唔定會有好多意外嘅收穫！
如果有更多想知嘅內容，都可以隨時留言或者dm話俾我哋知：）
Instagram：creatrip.hk