韓國農曆新年食物
韓國過年食啲咩？平時大魚大肉，過年反而食得清淡？每道菜嘅意思係咩呢？
Hello，大家好，我哋係由韓國人每日提供最新韓國旅行資訊嘅Creatrip。
大家都應該知道，農曆新年對韓國人嚟講可以話係一個好重要嘅日子，因為呢啲時候佢哋都要準備祭祀、同屋企人一齊度過年等等。為咗迎接新一年佢哋仲會準備好多唔同美食，當中除咗年糕湯之外，仲有咩美食呢？我哋一齊嚟睇吓啦！
想食盡韓國美食？😋
韓國農曆新年食物
年糕湯
喺農曆新年一月一日嘅時候，韓國人都會食年糕湯，除咗係指大一歲之外，切成片裝之後就好似銅板咁，有代表財源滾滾嘅意思。年糕湯係用牛肉骨湯做湯底，除咗有年糕之外，當中仲會加雞蛋同牛肉一齊食。
煎餅
喺韓國只要係過節、有好事發生、慶祝宴都唔會少嘅一道料理就係煎餅。煎餅係由各式各樣食材製成，有鮮蝦、蔬菜、明太魚等多種口味，食嘅時候好多時仲會同米酒一齊食。
燉排骨
韓國人喺傳統節日或者生日嘅時候，絕對唔可以少咗燉排骨呢道菜。呢道菜除咗有排骨之外，仲會有唔同菜、韓式冬粉一齊煮。唔少韓國人仲會食完所有餸之後將湯汁撈飯嚟食！如果大家下次嚟韓國都可以試吓，因為真係超好味！
韓式炒粉絲
韓式炒粉絲亦都係韓國眾多節日入面，唔可以少咗嘅美食之一。大家可以當佢係主菜或拌菜亦都得，加上做法一啲都唔難，大家喺香港都可以跟住整！
煮法：
1. 先煮熟粉絲，煮嘅期間可以醃定牛肉同炒。
2. 其他材料都可以用慢火炒（蛋可以最後先炒，炒完要切絲）
3. 所有材料準備好哂之後，就一齊炒加少少麻油、醬油同糖鹽去調味就完成㗎啦。
韓菓
韓國嘅傳統點心「韓菓」，望要係有米菓麥芽、藥菓、油菓，呢三款都係甜甜哋而且又有煙韌嘅口感。米菓麥芽係用堅果類同穀類、麥芽糖製成，口感扎實；藥菓係麵粉、蜂蜜仲有麻油揉成麵糰，炸完之後再點麥芽或者蜂蜜凝固而製成；至於油菓係用糯米所做，程序亦都係繁複，不過咬落去嗰啖真係好酥。
甜米露
大家成日去汗蒸幕都會飲「甜米露」，佢係將糯米同麥芽喺水浸完之後，再加糖或者蜂蜜煮成。韓國人係大時大節都會飲佢，唔少家庭仲會自己煮，有時仲會當喺飯後甜品添！
以上係韓國新年嘅時候會食到嘅傳統飲食，唔知當中大家又有冇過呢？如果未試過，下次嚟韓國不妨都可以試吓！
如果有更多想知嘅內容，都可以隨時留言或者dm話俾我哋知：）
Instagram：creatrip.hk