韓國冬天必做7件事
韓國人喺冬天必做嘅7件事！脫離被竇，一齊體驗呢幾個活動啦！
Hello，大家好，我哋係由韓國人每日提供最新韓國旅行資訊嘅Creatrip。
韓國冬天好凍相信大家都知，不過就係因為咁凍，所以有七樣嘢只要一到冬天，韓國人都會去做，如果你想體驗韓國最地道嘅文化，咁就要跟住做啦！
韓國冬天必做7件事
1. 去汗蒸幕
雖然汗蒸幕一年四季都會開，不過喺寒冷嘅冬天，去嘅話特別爽！通常入場費₩10,000左右，就可以體驗各式各樣嘅汗蒸幕房，不過一到週末大家都放假，就會想去輕鬆吓，如果唔想同人逼，最好係平日去。
去得汗蒸幕當然唔可以錯過嘅就係食雞蛋同飲米水，呢一個set真係冇得輸，再肚餓啲加返個拉麵都唔錯！
2. 去溜冰場
喺韓國如果要溜冰真係好平，只要一到冬天，首爾市政府每年都會喺首爾廣場開放溜冰場，一人大約₩1,000就可以任踩。
首爾廣場溜冰場可以租借溜冰鞋，同有出售手套、襪、暖包同溜冰輔助工具等。
3. 參加冬季慶典
如果問到韓國冬天邊度睇雪靚？小編會想推薦大家去南怡島附近，當中最有代表性嘅就係加平嘅晨靜樹木園。呢度朝早同夜晚嘅feel好唔同。晨靜樹木園冬季慶典，會將入面園區嘅數萬棵以上嘅樹佈置唔同燈光，令到呢度超有氣氛，啲燈被雪覆蓋，變得好浪漫同溫馨。
- 地址：경기 가평군 상면 수목원로 432
- 營業時間：11:00 - 21:00（最後入場時間20:00）
- 入場費：成人₩11,000 / 青少年₩8,500 / 兒童₩7,500
4. 食街邊小食
天氣咁凍最容易成日口痕，呢個時候可以食街邊嘅小食！最有代表性嘅就係食糖餅、鯛魚燒、魚糕同辣炒年糕等。小編個人幾鍾意食糖餅，甜甜地好好味，因為夏天唔會成日見到佢嘅出現，只要一到冬天，經過見到真係忍唔住買返個食。
糖餅通常一個₩1,000、鯛魚燒兩個₩1,000（有啲地方會多啲）、魚糕一串₩700。
5. 去滑雪/玩雪橇
講到冬天一定要做嘅活動，又點可以唔滑雪或者玩雪橇呢？首爾同釜山周圍都有，唔少年青人都好鍾意去玩！滑雪可能一開始好難，不過只要學一兩個鐘，之後慢慢再練習，好快就會玩得好！
6. 釣冰魚
如果唔想玩得咁刺激，咁可以試吓釣冰魚，只要喺湖水水面穿窿，將魚竿擺入去，慢慢等魚就會上釣，呢個活動都係超多人鍾意玩。
不過始終自己開窿會有少少危險，最好有專業人士喺隔離幫手。
如果冇專業人士同行嘅話，建議大家可以直接參加冰魚慶典，相對會輕鬆好多。
7. 玩滑翔傘
最近越嚟越多韓國人鍾意挑戰玩滑翔傘，如果你係鍾意挑戰刺激嘅朋友，咁就好適合你！秋天去嘅話可以望到好多紅葉，而冬天就可以望到用白雪堆積嘅山景！
喺空中飛嘅感覺，就好似雀仔咁咁自由，因為有專業人士喺後面一齊飛，大家唔需要太擔心。
tvN 드라마-사랑의 불시착（헤럴드 경제）
2019年韓劇《愛的迫降》孫藝真都有玩到！不過大家如果真係想挑戰嘅話，最好去之前要check清楚天氣。
小Tips：
- Danyang Story（단양스토리）：全國最平，由首爾出發要2個半鐘
- Yeongwol Paragliding（영월패러글라이딩）：800m滑翔場、飛行距離係其他地區兩倍
- Yeosu National Paragliding （여수 국가대표 패러글라이딩）：可以喺海面上飛
- Daecheon National Paragliding（대천국가대표 패러글라이딩）： 如果係揀Naeillo（내일로）可以有優惠，適合初學者。
- Yangpyeong Paragliding Park（양평 패러글라이딩 파크）： 韓國最高滑翔場，有國家隊前任同現任專業教練，距離首爾最近，提供私人飛行培訓。
以上7個冬天必做嘅事，好多韓國人都會做，你之後會唔會想試呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk