韓國大學入學考試（수능）

Hello，大家好，我哋係由韓國人話你知每日最新韓國資訊嘅Creatrip。

亞洲學生嘅升學壓力大，唔係咩新鮮事。分數高低、入唔入到大學喺亞洲國家嚟講都睇得幾重。韓國同香港一樣每年都會舉行大學入學考試，原本叫做「大學修學能力考試」，因為個名太長，通常韓國人都會簡稱做「修能考試（수능 시험）」。每年考試都會喺11月中左右舉行，唔單止考生緊張，韓國成個國家都會嚴陣以待！

韓國大學入學試—修能考試

一年只有一次機會

韓國大學入學試一年只會舉行一次，錄取率大概係50%左右，要入到名門大學更家係難上加難。考得差嘅話就只可以重考，咁大壓力，令唔少學生應試個陣太過緊張，臨時失手。

除咗一年一度嘅考試，考試前某啲學系仲會透過面試、校內成續等方式評估學生，通過嘅話仲有機會可以提前入學（例如天空之城嘅劇情），令唔少考生壓力更大。

各式各樣嘅應援物

喺韓國，師弟妹會準備唔同禮物送俾應考嘅高三師兄姐，以示祝福。

#1 合格年糕

煙煙韌韌嘅年糕會黐住手或者嘴，寓意想考入嘅大學都可以十拿九穩。

#2 捲裝廁紙

就好似捲開捲裝廁紙咁，考生可以輕易咁解開考試難題。

#3 朱古力

集中注意力必備，可以補充糖分同體力。

打氣加油

學校師弟妹會為應試嘅師兄姐打氣，喺考場門口唱歌、拍手，好似校慶咁熱鬧，每個人都好似自己要考試咁著緊。

家長祈禱

충청메일

為咗仔女可以喺大學修能考試入面脫穎而出，唔少家長都會喺寺廟、教會、高山等地集體祈禱。有啲家長會好似韓劇《天空之城》一樣，雖然有啲瘋狂，但都係為咗自己仔女。

全韓國都會幫考生

為咗令住得偏遠嘅考生可以儘快去到考試會場，唔好遲到，有唔少警察會開警車送學生去考場，甚至出動埋直升機。

考英文listening個陣飛機仲會暫停起飛降落，大企業同公營機構會延後返工時間，股票仲會延後開市，都係為咗唔好影響到考生。就連經過考場附近嘅火車、巴士等交通工具，也要減速慢行、禁止響咹。

社會階級嘅差距

據統計，所有同年應試嘅考生入面，只有2%嘅人可以入到頂尖嘅SKY大學，而錄取嘅考生，唔少都係首爾人，或者係讀私立高中嘅考生。

雖然大家唔認，但實際上每個人都心知肚明，如果考生係讀學費超貴嘅私立高中，或者本身屋企有錢，可以俾佢哋一放學就去補習、學嘢，入到韓國名門大學嘅機率都會大大提高。

咁一般人呢？都有機會嘅，就要靠考好大學入學考試，一般嘅面試申請幾乎都冇機會。

歪曲現象

因為係一試定終身，所有家庭都非常重視大學修能考試。如果屋企有阿哥家姐係考生，就要忍一年：夜晚唔可以嘈到到考生、唔可以俾考生太大壓力、唔可以做啲唔好意頭嘅嘢……

好多人都話《天空之城》嘅劇情太過誇張，但其實或多或少都反映咗韓國社會嘅現實 —— 正正因為大家都太“重視”呢場考試，造就扭曲嘅價值觀+破碎家庭。

學業真係人生最重要嘅事？如果唔係嘅話，咁點解要咁重視呢場考試呢？

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購