2024韓國賞紅葉攻略
韓國邊度嘅紅葉最靚？2024年最新攻略、推薦景點&行程！
- 2024韓國紅葉預測
- 韓國賞紅葉近郊景點推薦
Hello，大家好，我哋係由韓國人每日提供最新韓國旅行資訊嘅Creatrip。
秋天係嚟韓國旅行最好嘅季節，而秋天嚟韓國又點可以少得去睇紅葉嘅行程呢？韓國嘅紅葉大部分都會喺10月底、11月頭喺全國各地盛放，今日小編就整理咗幾個可以係大自然賞紅葉嘅景點俾大家參考，趁而家天氣咁好去返轉睇楓葉啦！
2024韓國紅葉預測
今年韓國楓葉預計會喺10月頭~中開始由北往南方向轉紅，而10月底至11月頭就會係韓國紅葉開得最靚嘅時候啦！
韓國賞紅葉近郊景點推薦
雪嶽山(설악산)
- 地點：강원 인제군 백담로 1220
- 預測初楓盛開日期：29/9
- 預測紅葉全盛日期：20/10
雪嶽山位於江原道束草附近，係韓國其中一個好出名睇紅葉嘅地方，今年10月中呢度嘅紅葉就已經開始盛放啦。如果大家有機會去雪嶽山，不妨沿住經過鑄錢谷、權金城、蔚山岩、新興寺嘅路線賞楓，紅黃綠葉相間嘅景色真係好壯觀！
內藏山(내장산)
- 地點：전북 순창군 봉덕리 산122
- 預測初楓盛開日期：24/10
- 預測紅葉全盛日期：5/11
內藏山位於全羅北道，而佢嘅紅葉更加被譽為朝鮮八大美景之一。一到秋天，成個山頭就會變成紅色，非常震撼。而且內藏山入面仲有一座叫做內藏寺嘅寺院，一大片楓葉配上幽靜嘅寺院，呢個咁寫意嘅景色吸引到好多韓國人每逢秋天都會去嗰度散步同影相打卡。
俗離山(속리산)
- 地址：충북 보은군 속리산면 법주사로 84
- 預測初楓盛開日期：17/10
- 預測紅葉全盛日期：30/10
俗離山位於韓國正中心，係韓國八大奇景之一，亦都被指定為秋天必去賞紅葉景點之一。一到秋天，好多人就會為咗暫時遠離市中心而嚟到俗離山賞紅葉，盡情感受大自然。
五台山(오대산)
- 地址：강원 홍천군 내면 오대산로 2
- 預測初楓盛開日期：4/10
- 預測紅葉全盛日期：17/10
大家可能會對五台山有啲陌生，其實呢度係韓劇《鬼怪》嘅取景地之一！秋天嚟可以見到一大片壯觀嘅楓葉，而冬天嚟更加會睇到雪景添。加上呢度嘅行山徑設置得非常完善，非常適合一家大細嚟玩。
智異山(지리산)
- 地址：경상남도 하동군 대성리 산4
- 預測初楓盛開日期：14/10
- 預測紅葉全盛日期：23/10
智異山係韓國第一個國家公園，亦都係全韓國第二高嘅山。想喺韓國睇到最靚嘅紅葉嘅話，推薦大家去蛇巳溝溪谷！溪谷流水加上盛開嘅楓葉嘅景色會好似一幅畫咁出現喺你嘅眼前。
八公山(팔공산)
- 地址：경상북도 영천시 치산리 산141-5
- 預測初楓盛開日期：18/10
- 預測紅葉全盛日期：29/10
八公山亦都係一個小編幾推薦嘅賞紅葉景點，喺大邱附近，搭纜車上山嘅話沿途可以一眼睇到大邱同八公山嘅景色㗎！
伽倻山(가야산)
- 地點：경상남도 합천군 치인리 산1-1
- 預測初楓盛開日期：16/10
- 預測紅葉全盛日期：27/10
伽倻山位於慶尚南道，亦都被譽爲朝鮮八景、海東十聖地之一，仲更加喺1972年被指定為韓國第9號國立公園添！每逢秋天，成座伽倻山就會被楓葉覆蓋，好多住喺附近嘅居民都會趁呢段時間嚟呢度行山，欣賞咁靚嘅景色。
周王山(주왕산)
- 地址：경북 청송군 공원길 169-7
周王山位於大邱附近，係韓國第12號國家公園。而去周王山睇紅葉嘅時候就一定要去普光殿啦！普光殿坐落喺周王山山腳，喺呢度你可以見到宏偉嘅山景同開滿四周圍嘅紅葉，非常壯觀。
北漢山(북한산)
- 地址：서울 강북구 우이동 산68-1
- 預測初楓盛開日期：16/10
- 預測紅葉全盛日期：28/10
講起位於首爾嘅山，大家應該會諗起北漢山，佢位於景福宮嘅北邊，因為呢度嘅行山路線非常適合初級人士，所以好多人秋天嘅時候都會行上北漢山賞紅葉同俯瞰全個首爾。呢度交通都相對上方便，大家嚟旅行都不妨嚟行吓山，感受首爾嘅另一面。
雞龍山(계룡산)
- 地址：충청남도 공주시 중장리 산47-1
- 預測初楓盛開日期：16/10
- 預測紅葉全盛日期：29/10
雞龍山位於忠清南道，橫跨大田市、雞龍市、公州市，喺統一新羅時期被譽為五嶽之中嘅西嶽。雖然海拔高度唔高，但係山形錯綜複雜，加上秋天嘅時候成個山谷會變成楓紅色，令呢度嘅秋天景色非常有特色。
大關嶺羊群牧場(대관령양떼목장)
- 地址：강원도 평창군 횡계리 14-42
嚟韓國玩除咗首爾，好多人都會去江原道，而位於平昌嘅大關嶺羊群牧場就係其中一個江原道非常出名嘅景點啦。唔單止係旅客，連韓國人去平昌旅行嘅時候都一定會去大關嶺羊群牧場。呢度嘅景色春夏秋冬都唔一樣，各有特色，但係小編就認為秋天係最適合大家嚟呢度玩嘅季節！成個牧場會被染成五顔六色，加上遍佈四周嘅風車，令人好似去咗歐洲咁，打卡一流。
以上就係最新韓國賞楓攻略，今個秋天你又準備好去邊度打卡呢？🍁
🍁仲有其他賞楓行程👇🏻
如果有更多想知嘅內容，都可以隨時留言或者dm話俾我哋知：）
Mail：help@creatrip.com