仁川月尾島&中國城景點推薦
仁川到底有咩好玩？韓國人都鍾意去邊？一齊跟住韓國人腳步去月尾島&中國城啦！
Hello，大家好 ，我哋係由韓國人每日提供最新韓國旅行資訊嘅Creatrip。
平時嚟韓國旅行，除咗市中心之外，會唔會都想去吓唔同地區玩呢？今日想同大家介紹仁川月尾島同中國城景點，好多韓劇同韓綜都去過取景，想跟住打卡嘅朋友，快啲跟住小編腳步去睇吓嗰度有咩好食同玩啦！
仁川「中國城」景點介紹
1. 中國城（차이나타운）
- 地址：인천 중구 북성동2가 12-18
由仁川站1號出口嚟就可以望到呢塊超大牌坊，上面寫住中華街，跟住行就會係中國城。
只要上完斜坡就會見到呢度有好多中國餐廳同小食店，基本上呢度大部分餐廳嘅人都識講中文，唔需要春溝通上有問題。
雖然對華人旅客嚟講，「中國城」未必係一個好地道嘅韓國景點，不過對於韓國人嚟講，只要去開仁川就一定要去。食完飯大家可以順便去埋童話村同附近隱藏Cafe。
2. 炸醬麵博物館（짜장면박물관）
- 地址：인천광역시 중구 차이나타운로 56-14
- 營業時間：09:00 - 18:00、逢星期一、元旦、新年、中秋休息
- 門票：成人₩1,000（滿19歲以上）、青少年（13至18歲）₩700、兒童（滿12歲以下）免費
喺1883年仁川開港口後，唐人街一帶自然多咗好多中華料理餐廳，因為喺仁川港工作嘅碼頭工人成日都會去，所以就研發出一種又平又易煮嘅炸醬麵。
為咗迎合韓國人口味，商人改良中式炸醬麵味道，形成而家大家食到嘅「韓式炸醬麵」。不過大家知唔知炸醬麵博物館前身就係韓國炸醬麵發源地呢？韓國第一間中華料理餐廳「共和春」前址就係呢度。
博物館內部還原當時餐廳樣貌，再現過去共和春廚房同待客室。
另外仲展示咗好多韓國歷年來各式炸醬拉麵，同時亦有教大家唔同炸醬麵煮法。平時大家食炸醬麵又鍾意邊一種呢？
3. 共和春（공화춘）
- 地址：인천 중구 차이나타운로 43
- 營業時間：10:00 - 21:30
「共和春」係韓國第一間中華料理餐廳，亦係韓式炸醬麵始組。喺中國城主街遠望已經會見到佢大大個招牌，搭Lift之前有職員會同大家講去幾樓，只要跟住指示就可以。
小編今次係第二次去共和春，雖然價錢偏貴，但同平時食到嘅炸醬麵完全唔同，係一種令人食完一次會不斷諗起嘅味道。
共和春炸醬麵（공화춘 자장면）₩10,000
呢度嘅炸醬麵料好豐富，除咗有洋蔥之外，仲有蕃薯定係薯仔？同時加咗好多海鮮，真係好好味！
海鮮麵（해물짬뽕）₩10,000
海鮮麵放咗小章魚、洋蔥、蒜、櫛瓜、紅蘿蔔、白菜、魷魚等配料，辣辣哋食完會令人一直諗起。
三鮮炒飯（삼선 볶음밥）₩8,000
雖然三鮮炒飯都好多配料，味道都唔錯，不過就冇炸醬麵咁有驚喜，如果大家之後兩個都想試，可以留言話俾我哋知邊款好食啲。
4. 燕京大飯店（연경）
- 地址：인천 중구 차이나타운로 41
- 營業時間：10:30 - 21:30（Last Order 21:00）
「燕京大飯店」總共有4層，只要一到Lunch Time就超多人嚟，仲要排隊先入到，人氣相當高！
鋪頭裝修到好似秒去咗中國咁，就連韓綜《新西遊記7》環遊世界中國篇都喺度取景。
炸醬麵（짜장면）₩7,000
「燕京大飯店」炸醬麵有一個焦香味，裡面放咗洋蔥同碎豬肉，平時韓式炸醬麵普遍偏甜，但呢碗算偏鹹，小編個人幾鍾意。另外呢度仲有一個出名嘅Menu叫「白炸醬麵」，之前韓綜《Running Man》就有嚟取景，下次有機會，小編都會再去試！
麵包蝦（멘보샤）₩20,000
「燕京大飯店」麵包蝦價錢偏貴，不過都係好值得！蝦餅都夠厚同鮮，如果點埋沙律醬食簡直係完美！不過始終係用麵包做皮會好吸油，食到後面會覺得有啲膩。
5. 十里香（십리향）
- 地址：인천 중구 차이나타운로 50-2
- 營業時間：12:00 - 20:00
呢度每一間鋪頭都以紅色去裝修，當中小編見到一間好特別賣包嘅鋪頭。
豬肉口味（고기 맛）₩2,000
甕窯烤餅有豬肉、紅豆、蕃薯和甜南瓜四種口味！皮有啲厚，豬肉口味雖然唔多肉汁，但係料都夠足。
蕃薯口味（고구마 맛）₩2,000
餡都幾多，不過食落有啲似係月餅嘅奶黃豆沙味，唔太似食緊蕃薯。
6. 紅豆餅（홍두병）
- 地址：인천 중구 차이나타운로 48
- 營業時間：平日10:30 - 20:30、週末10:00 - 21:00
「紅豆餅」係當地一間超出夠嘅鋪頭，成日都要排隊先買到，佢哋總共有賣紅豆、朱古力、忌廉芝士、抹茶、芒果五個口味。
忌廉芝士（크림치즈）₩2,000
啱啱做好嘅紅豆餅熱辣辣，內餡好足，忌廉芝士口味鹹鹹甜甜，食落都唔錯，不過最穩陣一定係食紅豆味。
7. 開港場街（개항장 거리）
- 地址：인천광역시 중구 제물량로232번안길 27
穿過中國城往下面行就係「開港場街」，係一條充滿日式風格建築同街道，同中國城完全唔同風格。
呢一帶有好多博物館，其中最有代表性嘅係仁川開放港口博物館（인천개항박물관），係由日本第一銀行建築物改造而成，館內紀錄仁川開港所有歷史、展示近代文物。
呢度有唔少Cafe，同時亦有啲懷舊小店，相當復古。
有興趣嘅朋友仲可以試吓換上華麗又有年代感嘅洋裝喺日式街道行，好似轉眼間返留去開化時期。
8. wknd Lounge
- 地址：인천 중구 송학로 63
- 營業時間：12:00 - 20:00
如果大家去搵一間Cafe坐吓，小編推薦可以嚟「wknd」，喺度可以睇到仁川每一個角落，雖然要行一段路先去到，但只要去到望到個景，一切都覺得係值得！
喺2樓就可以俯瞰成個仁川市景，天氣好嘅話仲可以遠望到仁川港口，呢度氣氛好，喺IG成日都會見到佢嘅出現。
主要用純白、米色去裝修，俾人一種好舒服嘅感覺，令人覺得好療癮。
仁川站景點「月尾島」
1. 月尾島文化街（월미도문화의거리）
- 地址：인천 중구 월미문화로 36
由仁川站1號出口出嚟之後，搭45號巴士，就可以去到「月尾島文化街」，小編強烈推薦大家一定要喺就日落時去，咁就可以影到超靚嘅風景相。
只要一到黃昏，大家都會嚟手機出嚟影，真係隨便影都好靚！
望住呢個景真係好舒服，好似暫時將所有唔開心或壓力放底，超推薦大家一定要嚟睇一次！
2. 月尾主題樂園（월미테마파크）
- 地址：인천 중구 월미문화로 81
- 營業時間：平日10:00 - 21:00、週末10:00 - 23:00
月尾島文化街另一邊就係「月尾主題樂園」，大家喺度玩唔同機動遊戲。
韓綜《我們結婚了》、《兩天一夜》、《Running Man》都嚟過拍攝，無論係大人定細路一定都可以玩得開心。
入場費係免費，就算唔玩任何機動遊戲都可以入去打卡，特別係夜晚去影到嘅相特別有feel。
可以俾大家參考吓價錢：
- 大人3項設施：₩15,000（單買₩6,000）
- 兒童4項設施：₩15,000（單買₩4,000至5,000）
- 大人一日通行券：₩30,000
- 兒童一日通行券：₩30,000
幾乎睇唔到夜景
雖然夜晚喺可以影到好多靚相，但如果想坐摩天輪睇仁川全景嘅話，最好喺黃昏時候去，如果唔係太晏去會等於曬錢咩都睇唔到。
3. My Land（마이랜드）
- 地址：인천 중구 월미로 252
- 營業時間：平日10:00 - 22:00、週末10:00 - 01:00
除咗月尾主題樂園之外，呢度仲有一個好受眾人歡迎嘅主題公園「My Land」。
可以俾大家參考吓價錢：
- 大人3項設施：₩14,000
- 兒童4項設施：₩14,000
- 大人單項設施體驗券：₩5,000
呢度玩嘅相對會比較刺激，有海盜船、跳樓機、超速旋風等。
呢個係全韓國最斜嘅「海盜船」，佢可以垂直90度，25年嚟零事故，吸引唔少藝人同Youtuber去挑戰。
當中咁多遊戲之中，「Disco Pang Pang」更加係必玩！
當大家坐好之後，負責操控嘅大叔會先大概了解每個人嘅關係，如果係單身，會幫你將隔離嘅異性震過去身邊、如果係曖昧者或者情侶，大叔會諗辦法令兩人更加親近。加上大叔講嘢超搞gag，唔單止玩嘅人開心，就連台下嘅觀眾都忍唔住會大笑。
提提大家：玩嘅時候一定要捉住欄杆、小心手機或者眼鏡飛走，會頭暈嘅人要先評估自己狀況再決定玩唔玩。
4. 月尾島遊覽船（월미도 유람선）
- 地址：인천 중구 월미문화로 21
- 營業時間：週末12:40、14:40、16:40
- 票價：大人₩15,000、小童₩9,000
- 撳我預約
月尾島嘅遊覽船11月只係得週末航班，建議大家出發前先上官網確認時間（不過去到現場可能會有變），就好似小編原本預計搭12:40船，結果去到現場全部提早一個鐘...
觀光遊覽船分成A、B兩條路線，A路線包含月尾島、永宗大橋、京仁Ara運河西海閘門前、B路線係月尾島、永宗島、仁川大橋繞一圈。
另外大家可以先買一包蝦條，出海之後餵海鷗，船上仲有駐唱歌手同大家互動，等大家留底一個難忘回憶。
5. 月尾莊（호텔 월미여관）
- 地址：인천 중구 월미로 247-21
「月尾莊」係一間結合開化時期日本風建築同韓屋元素嘅室內裝修，由大廳入口就鋪上榻榻米地板。
行傳統風格，屋內設備、燈光、茶几都好有古色古香，洗手間仲有直髮夾，非常貼心。
價錢唔貴，交通又方便，無論係自己定同朋友去都好適合。
6. 月光烤貝（달빛조개）
- 地址：인천 중구 월미문화로 65
- 營業時間：平日17:00 - 24:00、星期六11:00 - 2:00、星期日11:00 - 24:00
月尾島文化街有好多間生魚片、烤貝、海鮮刀削麵等海產店，其中必食嘅一定係「烤貝」。
小編揀咗一間三層高，可以望到海景嘅「月光烤貝」。
戀人套餐（연인셋트）₩60,000
小編揀咗戀人套餐，當中包括有各種貝類、蝦同刀削麵。大家只要擺上爐到燒就可以。
元貝好鮮甜，同佢哋提供嘅芝士同蕃茄醬一齊食，可以去腥味，不過烤嘅時候大家一定要小心，啱啱烤好嘅殼好熱，大家一定要用手套去拎。另外有時火太大，貝殼會彈起，有少少危險。
就食完烤貝，職員就會送上一大碗刀削麵，裡面有幾粒蜆，湯底係用咗海鮮加蒜頭去煮，好濃味，推薦大家一定要試！
7. 藝殿（예전）
- 地址：인천 중구 월미문화로 43-2
- 營業時間：每日 11:30 - 22:00
唔鍾意食海鮮唔緊要，可以嚟試吓食西餐，之前韓劇《雖然是精神病但沒關係》喺第11集就嚟取過景。
店入面裝修好有古典西洋風，燈光偏暗再配埋呢度嘅古典樂零舍有氣氛。
tvN 《雖然是精神病但沒關係》
雖然現場座位同當時劇中兩兄弟坐嘅位擺設有啲唔太一樣，但二樓窗邊位仍然係最有人氣。
坐底落完單之後，職員會先送上麵包、沙律、湯同韓國西式餐廳特有嘅醃製小菜。
Lunch Special ₩22,000
「藝殿」主要賣牛排、炸蝦、炸海鮮、炸豬排等，如果係晏畫嚟，就可以試叫佢哋嘅「Lunch Special」，裡面有香蒜蠔、照燒醬豬排、沙律醬烤魚排、嫩肩牛排、水煮青菜同韓式拳頭飯。價錢都算合理、一次過可以食到唔同口味，想喺月尾浪島搵間有feel餐廳可以嚟到「藝殿」。
以上係小編為大家整理好嘅「中國城」同「月尾島」景點推薦，喺首爾玩厭，不妨就抽一日時間去仁川玩一轉啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
