建大貨櫃屋介紹
首爾地標「建大Common Ground」藍色貨櫃屋原來咁好行！唔好淨係打完卡就走啊！
Hello，大家好，我哋係由韓國人每日提供最新韓國旅行資訊嘅Creatrip。
建大貨櫃屋Common Ground係首爾知名景點之一，唔少人嚟到建大都會去打卡，不過除咗影相之外，其實裡面都幾好行，今日就等小編介紹吓啦！
建大貨櫃屋Common Ground
- 地址：서울 광진구 아차산로 200
- 營業時間：11:00 - 22:00
- 交通：首爾地鐵2號線、7號線建大入口站（건대입구역）6號出口
建大貨櫃屋Common Ground喺建大入口站6號出口，出嚟直行大約3分鐘就會見到。
建大貨櫃屋分成兩個部分，基本上係互通，裡面除咗有啲Cafe同頂樓有餐廳之外，大部分都係賣衫、潮牌、文具等鋪頭組成。
天氣好嘅話，真係好適合嚟呢度打卡，夜晚嚟嘅話會開波波燈，完全係唔同氣氛。
呢度有好多潮牌，甚至成日會舉辦大型促銷活動，所以一定要嚟睇睇。
平時去啲旺區未必搵到嘅鞋款，可以嚟呢度撞吓！因為有好大間Adidas同Foot Locker，無論男定女嚟到都會滿足到自己購物慾。
上二樓可以搵到一啲潮牌店，而家流行緊嘅都可以喺度搵到！
另外其他生活用品、家居用品、文具、配飾、寵物用品等都有。
不過小編都要提提大家，呢度好多鋪頭都係賣出之後唔會退款，所以買之前一定要check清楚。
行到攰之後仲可以去3樓嘅餐廳或Cafe。
頂樓主要係一個戶外用餐區，唔少韓國人都會嚟呢度約會，除咗要同藍色櫃打卡之外，呢度都係一個唔錯嘅打卡位。
之前小編就有去過呢間出名雞肉漢堡餐廳「Hot Bird」。
餐廳內部好有70、80年代美式氣氛。
漢堡嘅雞肉超厚，啖啖都係肉，好嫩好好味，大家仲可以根據自己個人口味去調整醬汁。
食完漢堡仲可以去「Index」休息，呢度除咗係一間書店，同時係一間Cafe。
簡約風格吸引唔少人嚟打卡，就算唔買書嚟行個圈都好文青。
或者大家可以拎本書，叫杯咖啡睇陣，休息吓。
點去「建大Common Ground」？
建大入口站6號出口出嚟之後直行。
直行大約3分鐘就會見到藍色建築物喺左手邊。
之後不妨嚟呢度尋吓寶啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk