仁寺洞Cafe總整理
2023最新仁寺洞Cafe攻略，同時感受韓國現代同傳統魅力！
Hello，大家好，我哋係由韓國人每日提供最新韓國旅行資訊嘅Creatrip。
「仁寺洞」係其中一個韓國著名旅遊景點，呢度有好多的骰嘅鋪頭仔，亦都有好多環境靚氣氛好嘅Cafe同餐廳。雖然佢位於首爾呢個咁現代化嘅城市，但係嚟到「仁寺洞」就好似坐咗時光機，返到舊時嘅韓國咁，呢種古典美吸引唔少人慕名而來。
今日小編就為大家整理咗「仁寺洞」最hit最受歡迎嘅Cafe清單，plan住嚟玩嘅朋友們記住要睇落去啦！
仁寺洞Cafe總整理
1. Namusae Tea House（나무새찻집）
- 地址：서울 종로구 인사동길 47-9
- 營業時間：10:00 - 21:00
- 小Tips：安國站（안국역）6號出口行5分鐘
「Namusae Tea House」位於仁寺洞嘅一條小巷仔入面，係一間非常古典嘅韓屋Cafe。呢間茶館門口有個花園仔，好啱影相！
雖然冇啲咩好華麗嘅擺設，但呢度嘅裝修非常有韓國傳統風情，簡潔得嚟俾人一種溫暖嘅感覺。而且因為四周圍都有窗，所以好光猛，自然光底下影出嚟嘅相都靚啲啦！
特製雙和茶（특제쌍화차）₩9,000
柚子茶（유자차）₩7,000
合桃柿乾（곶감말이）₩8,000
「Namuesae Tea House」主要係賣韓國傳統飲品同甜品，最出名嘅係特製雙和茶，雖然非常健康，但未必個個人都可以接受到佢隻藥材味。如果想飲返啲香港人比較熟悉嘅味道，呢度都有賣柚子茶同其他飲品，啱曬冬天飲。除此之外，呢度嘅韓國傳統甜品同小食都好唔錯，小編推薦大家可以試吓合桃柿乾，甜甜哋又有咬口~
2. Ivy House（담쟁이집）
- 地址：서울 종로구 인사동11길 20
- 營業時間：星期一至五 11:00 - 19:00、星期六 12:30 - 21:00（逢星期日休息）
- 小Tips：安國站（안국역）6號出口行5分鐘
外牆爬滿常春藤同藤蔓嘅「Ivy House」係一間高兩層嘅Cafe，上面仲有個天台，空間非常大。而Cafe入面亦都有用好多植物做擺設，加埋本身可愛嘅裝修，令人好似行咗入童話世界咁。
鋪頭入面好多座位，每個角落都裝飾得好靚。呢度最受歡迎嘅係2樓窗邊位，可以睇到仁寺洞街景，非常寫意。天氣好又唔太凍嘅時候大家仲可以上埋3樓天台添！
迷彩鮮奶咖啡（밀리터리 라떼）₩6,500
抹茶鮮奶（말차 라떼）₩6,000
Oreo芝士蛋糕（오레오 치즈케이크）₩6,800
呢度嘅招牌飲品係迷彩鮮奶咖啡，其實就係牛奶咖啡加抹茶，苦苦哋嘅咖啡同抹茶嘅茶香味好夾！而唔飲咖啡嘅朋友們可以叫抹茶鮮奶，一樣咁好飲！小編個人就私心推薦大家食Oreo芝士蛋糕，cream cheese味好出，而且好軟滑，相信大家都會鍾意~
3. 新老茶館（신옛찻집）
- 地址：서울 종로구 인사동길 47-8
- 營業時間：星期一 10:00 - 20:00、星期二至五 10:00 - 21:00 、星期六至日 10:00 - 22:00
- 小Tips：安國站（안국역）6號出口行5分鐘
「新老茶館」係一間有30年歷史嘅茶館，佢身處嘅韓屋亦都已經有超過130年歷史，每個角落都充滿住傳統韓式風情，鍾意韓屋嘅朋友們一定唔可以錯過！
種植喺室內庭院嘅樹木，加上柔和嘅自然光，非常有詩情畫意，推薦想暫時放慢腳步嘅大家可以嚟呢度享受悠閒時光。
黃豆粉年糕（인절미）₩5,000
紅豆刨冰（팥빙수）₩12,000
小編上次同朋友去叫咗黃豆粉年糕同紅豆刨冰，傳統韓式口味真係冇得輸！而且老闆仲好好人咁送咗兩嚿韓式零食俾我哋添啊~
4. Le Franc（르프랑루프탑）
- 地址：서울 종로구 인사동길 34-1 인사아트프라자 5F&6F
- 營業時間：10:00 - 22:00
- 小Tips：鐘路3街站（종로3가역）5號出口行7分鐘
如果你想搵一間可以俯瞰仁寺洞全景嘅Cafe，咁就一定要嚟「Le Franc」啦！呢間Cafe位於仁寺藝術廣場5樓同6樓，空間非常大。
一出𨋢，居然會有店員喺門口serve客人，同平時嘅Cafe好唔同，令小編都不禁驚嘆。而環境方面，呢度檯同檯之間唔會話好近好逼，坐都坐得舒服啲。
奶昔（밀크셰이크）₩7,000
青提梳打（청포도에이드）₩6,500
Apple Crumble蛋糕（ 애플크럼블）₩13,000
因為呢度算係一間比較高級嘅Cafe，所以價錢都頗貴，但味道算唔上好好食，大家就當係俾錢睇靚景同影相打卡啦~
5. Cafe Gyeol（결）
- 地址：서울 종로구 우정국로 26 1F
- 營業時間：平日 07:30 - 20:30、週末 10:00 - 21:00
- 小Tips：鐘閣站（종각역）3-1號出口行1分鐘
「Cafe Gyeol」係韓國著名咖啡品牌“Bean Brothers”為數唔多嘅咖啡特許經營店之一。呢度樓底高，整體裝修以木調同現代風爲主，非常受韓國人歡迎。
如果大家鍾意覺得呢度咖啡好飲，仲可以買佢哋嘅咖啡豆返屋企，無論係自用定送禮都好唔錯！另外呢度都有賣各種甜品，可以一邊飲咖啡一邊食。
鮮奶咖啡（라떼）₩5,500
Flat White（플랫화이트）₩5,500
檸檬蛋糕（레몬케익）₩4,500
小編去嘅時候分別叫咗鮮奶咖啡同Flat White，兩款都好好飲，再配埋酸酸甜甜嘅檸檬蛋糕，真係一流！
6. Cafe True Us（카페트루어스）
- 地址：서울 종로구 인사동길 11 2F,3F
- 營業時間：08:30 - 23:00
- 小Tips：鐘路3街站（종로3가역）5號出口行5分鐘
「Cafe True Us」係韓國難得一見嘅復古歐洲風Cafe。
裝修以咖啡色原木家具同橙色日光燈為主，勁有去咗以前嘅歐洲嘅感覺。而且座位偏多，大家唔使擔心要等好耐。
香蕉共和國鬆餅（바나나 리퍼블릭 팬케이크）₩9,800
呢度最出名係食pancake，小編上次去嘅時候就叫咗一份香蕉共和國鬆餅，四塊鬆餅加埋香蕉、焦糖同肉桂粉，真係超滿足！呢度亦都有賣各種飲品，₩4,800至₩8,000不等，攞埋上面張coupon買嘢飲仲可以有8折優惠，唔好錯過啦！
7. Kotton Seoul（코튼서울）
- 地址：서울 종로구 인사동12길 17
- 營業時間：11:00 - 20:00（Last Order 19:30）
- 小Tips：安國站（안국역）5號出口行3分鐘
仁寺洞「Kotton Seoul」附近大部分都係傳統韓屋，所以呢間白色建築真係超顯眼！
呢度其中一個特色係有超多玻璃窗同玻璃門！加上裝修繼續保留韓屋風格，搭配埋白牆，有一種傳統同現代mix & match嘅感覺~
TARAE維也納咖啡 ￦7,500
呢款係Kotton Seoul嘅招牌咖啡！美式咖啡上面有一層雲呢拿忌廉，最頂仲放咗龍鬚糖，真係好特別！老闆建議大家用匙羹食咗龍鬚糖先，然後分別飲一啖忌廉同咖啡，最後再mix埋一齊飲，咁就可以有多重享受啦！
8. Starbucks仁寺店（스타벅스 인사점）
- 地址：서울 종로구 인사동길 14-3
- 營業時間：平日 07:30 - 18:00、週末 08:30 - 18:00
- 小Tips：鐘路3街站（종로3가역）5號出口行5分鐘
Starbucks
有時候行到攰，想求其搵間Coffee shop坐低，Starbucks一定係最安全嘅選擇。同其他分店唔同，為咗符合仁寺洞嘅傳統古典韓國風情，呢間Starbuck個招牌係用韓文寫㗎，超特別！
Starbucks
入面空間大，亦都非常乾淨，好啱俾大家坐低抖吓。相信有啲朋友好鍾意旅行嘅時候去勻每個國家嘅Starbucks，試吓個度嘅特別飲品同嘢食。嚟首爾玩嘅話，大家不妨可以嚟呢間分店！
以上就係小編為大家整理嘅仁寺洞Cafe攻略，下次嚟韓國玩plan住會去仁寺洞嘅朋友們不妨參考一吓！
如果有更多想知嘅內容，都可以隨時留言或者dm話俾我哋知：）
Instagram：creatrip.hk