韓國社會嘅排他性
最團結嘅民族 = 最嚴重嘅排他？抗拒伊斯蘭難民、反日、到武漢肺炎排華...韓國排他文化
Hello，大家好，我哋係由韓國人每日提供最新韓國旅行資訊嘅Creatrip。
＃韓國文化＃韓國認同
＃外來＃伊斯蘭＃排華
前兩年，有大約500個為咗逃離政治迫害嘅葉門難民，向濟州島申請難民許可證。因為葉門係伊斯蘭國家，絕大多數嘅難民都係穆斯林，逃難去到韓國呢件事，對強調東方文化嘅韓國造成衝擊。
唔單止呢件事，隨住新冠狀肺炎（武漢肺炎）喺韓國越演越烈，前排韓國仲傳出所謂嘅「排華事件」，部分商店、人士拒絕講中文嘅旅客……
✨馬上Follow我哋IG
instagram.com/creatrip.hk
排「華」的衝突
라방TV
武漢肺炎喺韓國有零星病例嘅初期，唔少遊客都話，有啲商店貼咗「禁止中國人」入內嘅紙，即使係台灣人、香港人入去，都被叫番出去，唔接待佢哋。
部分商家選擇唔接待講中文嘅旅客，唔去了解語言背後嘅種族、地域差異，一味排除「華人（華語）」呢件事，可以視為韓國嘅排他性。
病毒並唔會因為你係某一個國家嘅人，而特別避開你，亦唔會因為你講嘅係中文，就一定帶有病毒。
雖然可以理解部分商家嘅恐懼，但呢類盲目嘅排華行動，反而傷透咗旅客嘅心。
而家嘅局勢，反而演變做韓國人感染嘅病例係亞洲第二……
伊斯蘭移民
一開始提到嘅伊斯蘭教移民者，同韓國嘅「排華事件」有啲唔同，但共同點都係所謂嘅「刻板印象」。
韓國大多數人仲抱住「穆斯林喺世界各地都有惡行」嘅印象。
呢種毫無常識嘅諗法，其他文化圈嘅人當然無法理解。
身為韓國人嘅小編都接受唔到呢啲帶有歧視嘅思想。
不過老實講，如果有500個移民者住喺自己嘅屋企前面，全世界又有邊個會鍾意呢？
所以小編對呢件事都唔敢妄下任何定論。
韓國有幾多外國人？
以2019年12月做基準，喺韓國滯留嘅外國人首創新高，突破250萬人（包含短期滯留、非法滯留、長期滯留）。
喺呢250萬人當中，中國人（含朝鮮族）佔咗110萬1,782名，越南排名第二（22萬4,518名），再嚟係泰國（20萬9,909名）、美國（15萬6,982名）、日本（8萬6,196名）、烏茲別克斯坦（7萬5,320名）。
外國人在韓人口
外國人居住人口近10年大幅增加，去到總人口數嘅4.9%，代表韓國即將迎接「多元化社會」嘅定義。
不過喺主要嘅外國人口入面，東方國家仍佔咗大多數，伊斯蘭教國家可以話係接近0。
隨住移民人口逐漸增加，尤其係結婚移民嘅人數迅速增長，加上韓國人出生率低，外國人同韓國人所生嘅混血BB，有機會喺2050年達到總小童人口嘅30%。
韓國叫呢個做「多文化家庭（다문화 가정）」。
韓國因為多文化家庭所面臨嘅問題，喺下面嘅部份會再仔細說明。
對外國人嘅負面諗法
對外國人嘅排他意識，喺韓國雖然改善緊，但其實仲有好多問題。
10年前，一半以上嘅韓國人對外國移民者，仲抱住「外國人對韓國經濟有幫助」嘅諗法，最近咁樣諗嘅人少咗好多。
點解呢？
韓國失業率居高不下，好多人會覺得職位都係被外國人搶走，因而改變咗佢哋對外國移民者嘅睇法。
韓國人認為職缺被外國人搶走嘅諗法，喺五年間，足足增加咗27%。
其實最近嚟韓國打工、搵工嘅人，應該都會有深刻體會，願意出長期簽證嘅公司越嚟越少。
即使外國工作者嘅能力明顯好過韓國人，好多公司都越嚟越傾向請番本地人。
另外，因為同中國之間嘅「薩德問題」，導致中國觀光客急劇減少。
「外國人唔再帶嚟經濟效益」嘅諗法喺韓國社會越嚟越強烈。
加上最近武漢肺炎（新冠狀肺炎）嘅影響，中國旅客嚟韓國嘅人數再減少60%。
朝鮮日報
外國人移民者對韓國經濟有幫助嘅睇法減少咗5%，「一半一半」、「反對」嘅睇法就有所增加。
對伊斯蘭呢？
MBC採訪在韓居住嘅外國人
韓國人見到穆斯林就會諗到「恐怖份子」，唔單止受到同韓國親近嘅美國影響，亦因為電視新聞成日報導伊斯蘭宗教團體嘅激進行為所致。
而且，韓國同伊斯蘭文化圈可以話係毫無交流。
小編都係去美國exchange嗰陣，先第一次遇到穆斯林。
韓國人都係透過電影、新聞形成對穆斯林嘅負面睇法，可以話係到咗有穆斯林恐懼症（Muslim phobia）嘅程度。
韓國人之所以會對伊斯蘭覺得恐懼同厭惡，同韓國嘅代表宗教「基督教」都有一定關係。
比起其他國家嘅基督教，韓國嘅基督教對於其他文化嘅排他性更嚴重。
三個韓國人入面就有一個係信奉基督教嘅。基督教同韓國嘅保守主義結合，不斷製造、助長同其他文化間嘅矛盾同社會框架（Frame）。
尤其係嗰啲冇經歷過伊斯蘭文化嘅韓國人，會好容易就相信宣教嘅內容。
話好討厭伊斯蘭嘅留言內容：
葉門人係「奇特嘅種族」，好可怕
網路上可以見到對伊斯蘭嘅極端睇法，關於穆斯林移民者嘅假新聞，更係滿天飛。
冇經歷過嗰種文化嘅韓國人雖然半信半疑，但過多一段時間就會完全相信。
比起排他，更似係...
對於成個韓國社會都隱約有嘅排他性，對小編嚟講，更似係韓國一種莫名嘅自卑。
小編喺國外生活個陣，透過學習國外嘅文化、融入當地，發現到有更多可能性。
可惜，韓國並唔會咁樣，韓國對於外國人有根深柢固嘅偏見，例如講中文嘅都係中國人、日本人就一定有皇民思想、穆斯林代表作惡份子……
就算台灣香港旅客嚟韓國玩，穆斯林喺韓國安分生活，但都係會面對韓國社會嘅偏見；
韓國會相當排斥同自己生得唔一樣嘅人，即使你識韓文，對佢哋嚟講就有種「非我族類」嘅感覺。
即使係韓國混血，就算健康毫無問題，到而家都係唔畀佢哋當兵。
因為韓國人認為呢種差異，可能會令事故發生或者妨礙團體生活。
咁樣嘅氣氛下，外國移民者或者旅遊嘅朋友，雖然因為鍾意韓國而嚟到呢度，但喺韓國人嘅差別待遇之下，移民者同「純」韓國人之間嘅矛盾只會越嚟越大。
✨馬上Follow我哋IG
instagram.com/creatrip.hk
| 其他延伸閱讀 | |
 脫北作家專訪 |  住韓國真的好嗎 |
 韓國生活真實面 |  韓上調危機警報 |