韓國衛生觀念
冇咗呢樣就完美？韓國人吐痰、咳嗽、共食文化要點改？韓國令人驚奇嘅衛生概念總整理
Hello，大家好，我哋係由韓國人話你知每日最新韓國資訊嘅Creatrip。
＃韓國文化＃衛生概念
＃共食＃公共衛生議題
雖然韓國嘅經濟、文化發展令人刮目相看，但係韓國衛生觀念，相較於經濟方面嘅排名，遠遠落後好多，甚至有種「我哋國家真喺咁咩？」嘅諗法出現。
作為韓國人，真係唔想講自己國家嘅衛生習慣低下……
✨馬上Follow我哋IG
instagram.com/creatrip.hk
韓國人衛生概念
Share同一碗食物（共食）
呢一點係眾所周知。雖然根據食物種類會有唔同習慣，但喺韓國通常湯類嘅食物，絕大部分都係share嚟食，就連小菜嘅湯都一樣。
如果係同屋企人或者好朋友一齊吃，其實冇咩問題，但如果同同事一齊食嘅話，真係有啲唔方便。
不過，只要有一個人開始用自己嘅餐具潷嚟吃，大家就會跟住咁做，相當神奇。
其他國家可能有呢種習慣，但好似多數都係叫好多份嘢食，大家每樣食啲，比較少好似韓國人咁，好多人食一份餐點？
雖然呢種共食文化，導致韓國人好容易傳染疾病，例如前掛流行嘅A型肝炎，但都有啲人認為，咁樣可以增加自身抵抗力，係件好事。
小編唔係好鍾意呢種一齊分嚟食嘅嘢食，會自己裝一碗，默默咁食。
但係媽媽睇到就會話：「你都已經同我一齊食飯食咗咁多年，洗唔洗分得咁清啊？」，真係無嘢好講（……）。
韓國人衛生概念
因為焗，所以唔戴口罩
韓國人其實有啲抗拒戴口罩，大部分人即使感冒，都唔會自覺戴口罩。
反而係當霧霾影響嚴重個陣，先會戴口罩。
其實，韓國人從來冇學過「如果感冒，為咗避免傳染畀其他人，一定要戴口罩」嘅概念。
喺韓國，只有極少數感冒比較嚴重嘅人會戴口罩，甚至你戴口罩，其他人會以為係因為你冇化妝⋯⋯
雖然有越嚟越多人因為霧霾戴口罩，但大多都係年輕人。
照道理嚟講，需要戴口罩係因為自己感冒，為咗保護其他人，但喺韓國戴口罩通常都係為咗「保護自己」。
人生有好一大段時間，都係呼吸新鮮空氣嘅中年族群，大部分都唔太在意。
成日都會見到好多大叔、大嬸，喺霧霾非常嚴重嘅天氣行山，同污糟嘅空氣達到渾然一體（？）嘅境界。
小編嘅父母都以鄉下嘅空氣好為理由，唔太介意霧霾或者覺得感冒要戴口罩。
中央日報
十個韓國人有大概六個，喺霧霾非常嚴重個陣，都唔會戴口罩。
🙌 韓國口罩介紹
韓國人衛生概念
隨意咳嗽
小編喺美國生活個陣，最常反省嘅一點就係呢一樣。
有一日突然發現，美國人咳個陣，都會用成隻手遮住塊面。
但係韓國人通常都唔會遮住，或者只係淨係用手遮住嘴。
隨意咳嗽好可能會導致細菌傳染，所以有啲韓國人會用手遮住嘴。
佢哋冇諗到，手上面掂到細菌或者各種微生物，又唔即刻洗手嘅話，掂過嘅書桌、電腦、公共物品都會有細菌。
喺街上咳、打乞嚏，好多人都係打，完全唔在意身邊嘅人。仲有好多韓國人認為唔遮掩咁打乞嚏同咳，唔係一個唔衛生嘅行為。
韓國人衛生概念
醫院嘅衛生觀念係0
急診室護士中有41.5%曾經被感染過 ＠KBS
韓國嘅醫療技術雖然先進，但喺衛生管理方面，就相對落後。
好似前面講到，大部分嘅人喺醫院，幾乎都唔會戴口罩。甚至去探病嘅時候，都覺得冇咩大不了，而唔去保護自己。
雖然近三年間，已經有強制規定急症室入面一定要戴口罩，但都係喺2015年MERS疫情大爆發之後嘅事。
＠Money Today
MERS爆發後，醫院已經制定好多相關制度。例如每次只有一位可以入去探病，而且一定要戴口罩。
不過，目前仲係有好多中小型醫院冇改善到制度。
除咗戴口罩之外，探病個陣冇規定一定要用手部消毒劑（酒精），都相當可怕。手上嘅細菌對於免疫力低下嘅患者嚟講，非常致命。
韓國人仍然對呢一點唔熟悉，教育方面亦冇強調細菌有幾危險，就連醫療人員都唔太用消毒劑。
「韓國對於傳染嘅管理比較遲鈍，係中東國家以外，最多MERS病例嘅國家 （確診病例 186名、38名死亡、全世界第3名），
因為呢一件事，當時觀光客急劇減少，全國人民生活喺恐懼之中。而MERS又係以大型醫院為中心迅速擴散……」
🙌 南韓史上重大意外
韓國人衛生概念
低下衛生概念來源
首爾市每年都會以「首爾市民嘅保健意識形態」為主題調查。
結果顯示，每年都有80至85%嘅首爾市民，認為自己嘅健康狀況係「普通」以上，
好多人抱住「我好健康，所以我絕對唔會危害到其他人」嘅主觀諗法，反而成為隱性嘅危險。
呢個亦係MERS爆發個陣，有一位傳染性極高、需要被隔離嘅韓國人搭乘飛機去香港，令香港人非常憤怒嘅原因。
即使霧霾嚴重，亦唔戴口罩嘅行為，正正係韓國人認為自己唔會病嘅證據。
因為「我好健康，應該冇事」嘅諗法，導致只有注重健康嘅人先會喺平日都戴口罩。
呢個想法都延伸到韓國人嘅性病防治、避孕概念。
多數人認為自己好健康，冇問題嘅時候，反而先係背後可怕嘅隱憂。
韓國人衛生概念
結語
@首爾特別市
韓國人之所以有呢種行為，大概源於危機意識太低。
仔細諗諗喺日常生活入面，韓國有一半以上唔太遵守公共道德嘅人，非常可怕。
例如，韓國人習慣喺路邊停車，導致附近發生火災個陣，消防車好難駛入。
無幾耐之前，有一單汗蒸幕嘅火災，造成20人死亡嘅慘案⋯⋯
即使經過呢件事，韓國人嘅習慣都係冇改變，仍然有「唔會發生喺我哋屋企」嘅安逸諗法。
「其他人咁做，所以我都要咁做」嘅思考方式，最終只會導致更大嘅危害出現。
唯一可以改善呢種現況嘅方法只有教育。
如果學校或者家庭教育可以教識小朋友點樣去體恤其他人、點解要重視保健衛生、點樣遵守公共道德嘅話，相信呢個情況好快就可以改善。
✨馬上Follow我哋IG
instagram.com/creatrip.hk
| 其他延伸閱讀 | |
 韓國粗口總整理 |  韓國酒代言文化 |