大邱美食推薦
9間必食大邱美食推薦！位於東城路、半月堂既在地美食清單公開
Hello，大家好，我哋係由韓國人每日提供最新韓國旅行資訊嘅Creatrip。
韓國旅行首選除咗首爾、釜山、濟州島之外，仲有邊個城市地方好玩？其實呢幾年都多咗好多人去大邱玩。所以小編今日要同大家介紹，有「大邱明洞」之稱嘅「東城路」同「半月堂」附近美食同Cafe。等大家之後去韓國大邱旅行嘅時候，都可以輕鬆解決肚餓問題XD。
大邱美食推薦
1. 名家韓式小食（명가분식）
- 地址：대구광역시 중구 봉산동 3-3
似乎離開首爾，越往南方嗰邊，各地嘅特色美食就越嚟越多，對於驚血腸口感，以及豬內臟嘅朋友仔，可能要先skip咗呢間名家韓式小食。
推薦呢間嘅原因，除咗價錢平之外（同首爾比真係差好多），用料十分豐富，對於想要食得飽嘅人嚟講，呢間餐廳絕對可以幫到大家！呢度嘅招牌菜就係辣炒血腸，成盤除咗有血腸之外，仲有豬肝同豬肺，食落去香辣爽口。
當然，如果唔想食血腸嘅朋友，亦可以揀食辣炒年糕、韓式炸捲等小食。佢喺半月堂站附近嘅小巷入面，行到攰有啲口痕嘅話，都可以嚟呢度食完再繼續瘋狂Shopping。
2. 通大通三（통큰통삼）
- 地址：대구 중구 중앙대로81길 55
- 時間：17:00至01:00
0.jpg)
位於半月堂站附近嘅「通大通三」，係一間當地幾出名嘅燒肉放題，一人₩11,400，可以食到多款肉類，係唔係好吸引呢XD？
有五花肉、豬頸肉、豬腸、調味豬排、雞排等，CP值極高。因為佢太有人氣好多時都要等，如果唔想等太耐，都可以揀啲冷門時段去試下！
除咗肉之外，大家仲可以拎年糕、香腸、金菇等配料一齊燒。
3. 國一牛骨湯飯（국일따로국밥）
- 地址：대구 중구 국채보상로 571
- 時間：24小時年終無休
大邱美食「國一牛骨湯飯」由1946年開始營業，歷史悠久，有別於釜山熱賣嘅豬肉湯飯，呢到最出名嘅就係「牛骨湯飯」，有少少辣，有啲似辣牛肉湯。如果平時都鍾意食呢種口味嘅朋友，大家一定會一試愛上。
大邱好多美食都會標示따로국밥（分離湯飯）嘅方式。起源係以前住喺大邱嘅貴族認為，好似庶民一樣將飯浸喺湯食睇落去唔太好，就開始將飯同湯分開嚟食，亦成為現今韓國普遍呢種湯、飯分離嘅食法。
0.jpg)
超過70年以上歷史嘅「國一牛骨湯飯」，佢最自豪嘅就係牛骨清燉12個小時以上而成嘅湯底，所以佢哋只得兩款menu：牛骨湯飯、牛骨湯麵。
4. 無我韓式咖啡廳（한식 카페 무아）
- 地址：대구 중구 종로 38
- 時間：10:30至00:00
「無我韓式咖啡」喺大邱東城路、半月堂一帶，係一間好有質感嘅複合式韓式Cafe。特別之處係佢哋將韓氏古宅直接搬咗過去，將屋頂重新裝修，內部重新設計、裝修，令呢到增添咗唔少趣味情調。
雖然價格有少少偏貴，但喺呢種氣氛食飯，絕對唔會令人覺得有哂錢嘅感覺。
呢到最受歡迎嘅餐點係「包飯定食」，甜品部分係南瓜刨冰。老闆唔會添加太多遮蓋原味嘅調味料。除咗牛肉之外，其他材料都係用韓國產，確實可以令人食到食材原本嘅味道。
就好似店名「無我」意思一樣，呢到係一個可以將自己暫時放下、找回平靜既空間。
5. 元祖刀削麵（원조국수）
- 地址：대구 중구 약령길 34-20
韓國刀削麵（칼국수）標榜係清淡口感，如果大家覺得太淡嘅話，可以根據個人口味再加入老闆自製嘅辣泡菜調味。
小編特別推薦呢間「大丘元祖刀削麵」，因為真係好爽口同好好味！
鋪頭外觀雖然睇落去唔起眼，但佢真係超出名，唔少大邱人都會為咗佢而去食。睇落似清淡，但湯底就超濃郁，配上香辣泡菜，大家絕對可以食得好滿足。
新鮮現切嘅刀削麵，一大碗只要₩6,000，令人再次驚嘆大邱美食之都嘅物價。
6. 八公烤腸（팔공막창）
- 地址：대구 중구 동성로6길 42-5
- 時間：11:00至03:00
大邱美食中，烤腸最為人所知，而大邱烤腸店之中，「八公烤腸」嘅知名度係最高，同時深受好多大邱當地人歡迎。
好多人都話，去大邱旅遊行無食到烤腸，就好似感覺少咗啲咩咁。無錯！所以位於東城路、半月堂一帶，總會有好多烤腸店等住大家去揀，而八公烤腸係受到最多人愛載。
燒到金黃色，色澤令人食指大動，同泡菜一齊食落肚嘅話，享受油脂香氣同泡菜解膩嘅結合，呢種口感完全難以形容，同時只有「八公烤腸」獨有。
7. 長胡同餐廳（진골목식당）
- 地址：대구 중구 진골목길 9-1
呢間大邱美食藏身喺好難搵到嘅진골목길（長胡同）裡面，需要花一大番工夫，先可以喺好多傳統屋入面，認出呢間在地特色美食。
大家鍾唔鍾意食又香又辣嘅辣牛肉湯呢？如果鍾意，咁你一定唔可以錯過！大邱可以話係辣牛肉湯嘅故鄉，呢間店有五十年歷史，只睇店內裝修就可以感受到復古味，好似返咗去古代咁。
0.jpg)
同時尚、充滿年輕人氣息嘅大邱東城路唔同，入到呢一條由紅磚建成嘅石牆路（진골목）之後，會見到一棟傳統屋，出面亦有好多標示，所以唔使驚行錯路。湯底雖然睇落去好辣，但食嘅時候會feel到帶有牛肉嘅甘甜味，美食節目《星期三美食會》亦都介紹過。
鍾意韓國辣牛肉湯或湯飯既朋友，黎到大邱旅遊，一定要去試下呢間餐廳。
8. 三松麵包店（삼송빵집）
- 地址：대구 중구 중앙대로 395
- 時間：08:00至21:00
0.jpg)
全韓國最出名嘅麵包店，莫過於「三松麵包店」，本店位於大邱，分店而家喺韓國各地都搵得到。既然去到大邱旅遊，咁又點可以唔試佢嘅麻藥麵包（粟米麵包）呢？
「三松麵包店」有賣好多唔同口味嘅包，最多人買嘅既口味係麻藥麵包，同奶油乳酪糯米紅豆麵包，呢兩款小編都好鍾意食。
好多人嚟到三松麵包店，都唔會只買一、兩個走，多數都係一打咁買走。呢種令人食上癮嘅口感，難怪佢會稱為麻藥麵包。
因為佢太受歡迎，所以無論幾時去都會有好多人，大家可能都要等一陣。
z
9. 近代胡同紅豆麵包（근대 골목 단팥빵）
- 地址：대구 중구 남성로 60
- 時間：08:00至22:00
將麵包切開一半，裡面嘅忌廉同紅豆餡，就會見到成個麵包都係真材實料，好多人食過一次都會愛上！
雖然歷史唔算悠久，但喺大邱人心目中，「近代胡同麵包店」嘅人氣真係可以同三松麵包店有得比。
呢間麵包嘅特色就係平得嚟又可以食得飽，CP值超高！
佢呢度最主打係忌廉紅豆麵包，當然仲有其他口味（抹茶、士多啤梨，甚至蔬菜麵包等），總共有八種口味，有選擇性困難嘅朋友，可以考慮下買哂八個走XD。
紅豆餡係以古早方式製作而成，唔止年輕人，懷念古早味嘅大邱爺爺奶奶都好鍾意呢種麵包。
老闆同樣標榜住當日製作當日發售，賣唔完嘅麵包就會轉送畀大邱當地孤兒院同養老院，所以大家嚟到大邱旅行，買到嘅麵包100%當日產，而且無添加任何防腐劑。
以上係小編整理出位於東城路、半月堂一帶嘅美食同Cafe。行街之餘大家都可以去呢啲地方坐下，食少少再繼續玩轉大邱！
如果有更多想知嘅內容，都可以隨時留言或者dm話俾我哋知：）
Instagram：creatrip.hk