乙支路美食總整理
乙支路離明洞超近！想知韓國人都去邊搵食，嚟呢到就冇錯！
Hello，大家好，我哋係由韓國人每日提供最新韓國旅行資訊嘅Creatrip。
喺明洞、忠武路、東大門歷史文化公園附近，就係深受首爾當地人最鍾意嘅乙支路。雖然聽落去有啲陌生，但其實都係非常熱門嘅首爾景點。喺乙支路一帶，有好多不被觀光客打擾嘅美食同咖啡廳。快啲跟住小編嘅腳步，一齊嚟品嚐乙支路美食啦！
乙支路美食總整理
1. 韓唵銅（한암동）
- 地址：서울 중구 을지로 170
- 營業時間：11:30 - 22:00（Break Time 15:00 - 17:00、Last Order 21:00）
- 小Tips：乙支路4街站（을지로4가역）9號出口行1分鐘
「韓唵銅」係一間頂級韓牛專賣店，所有菜式都選用韓國最高級1%嘅母牛，肉質鮮嫩得嚟味道濃郁！而佢嘅乙支路分店就喺乙支路4街站出口附近，裝修非常有韓國古典風情，簡約得嚟俾人一種高級嘅感覺。
嚟到呢度，除咗最招牌嘅火爐炭燒韓牛同鯛魚釜飯，仲有由泡菜達人用30年以上時間研究出嚟嘅「泡菜拼盤」，大家有機會一定要試！大家去之前記住要download定我哋嘅coupon，出示俾職員睇就可以免費得到一碗迷你牛骨湯！
2. 乙支閣樓（을지다락）
- 地址：서울 중구 수표로10길 19 4F
- 營業時間：星期一至五 11:00 - 21:00（Last Order 20:20）、星期六至日 11:00 - 20:30（Last Order 19:50）
- 小Tips：乙支路3街站（을지로3가역）9號出口行4分鐘
乙支路一帶被稱為「Hip支路（힙지로）」，因為呢度嘅小巷外觀雖然睇落好舊，但其實隱藏唔少年青人成日去嘅餐廳，今次小編去乙支閣樓就係由西餐同酒吧結合嘅空間。
蛋包飯同香辣忌廉意粉係佢哋嘅招牌菜，幾乎每個人去到都會叫，有興趣嘅朋友可以試吓！
3. The Ranch Brewing（더랜치 브루잉）
- 地址：서울 중구 을지로12길 11
- 營業時間：星期一至五 17:00 - 00:00、星期六及日15:00 - 00:00
- 小Tips：乙支路3街站（을지로3가역）10號出口行2分鐘
經過嘅時候可能以為只係一個啤酒自動販賣機，但其實呢到係一個餐廳入口，係唔係好特別呢？
入到去好有美式風格，小編叫咗墨西哥烤雞菠蘿口味Pizza，同啤酒一齊食，完全係超爽！
4. Dressing Room（드레싱룸）
- 地址：서울 중구 충무로5길 6-1 3F
- 營業時間：17:00 - 23:00（Last Order 22:20）、 逢星期二休息
- 小Tips：乙支路3街站（을지로3가역）9號出口行1分鐘
呢間餐廳係專賣調酒嘅酒吧，由入口已經感受到一種神秘感。
以天鵝湖更衣室為主題，周圍都加咗鏡、芭蕾舞鞋等表演道具元素裝飾，好新穎同獨特，夜晚嚟到，推薦大家可以叫杯紅酒或調酒，好好享受呢度嘅氣氛。
5. 乙支啤酒屋（을지맥옥）
- 地址：서울 중구 수표로 48-16 2F
- 營業時間：15:30 - 02:00
- 小Tips：乙支路3街站（을지로3가역）11號出口行2分鐘
乙支啤酒屋係一間好出名嘅酒吧，呢度用咗現代霓虹招牌吸引咗好多人注意，只要經過一定會俾佢吸引，入口用咗粉紅色設計，好難令人唔望多幾眼。
呢度嘅啤酒仲會用唔同嘅玻璃杯去裝，相當特別。
6. 萬善HOF（만선호프）
- 地址：서울 중구 을지로13길 19
- 營業時間：12:00 - 00:00
- 小Tips：乙支路3街站（을지로3가역）4號出口行1分鐘
80年代，好多印刷業工人喺乙支路工作，唔少人收咗工之後會約埋一齊飲酒食啲小食，當中佢哋最鍾意食嘅就係用明太魚製成嘅魚乾（노가리）。基於時代背景，乙支路開設咗好多賣魚乾嘅酒吧，亦成為現今「乙支路魚乾街」由來，呢度好有歷史價值，2015年被登記為首爾未來遺產。
咁多間酒吧最出名就係「萬善HOF」，裡面好多小食都好有特色，平時放工都有唔少人去食，有時仲要排隊等添！
7. 乙三田螺（을삼골뱅이）
- 地址：서울 중구 수표로 50
- 營業時間：唔定
- 小Tips：乙支路3街站（을지로3가역）11號出口行1分鐘
除咗魚乾街之外，唔少喺附近工作嘅人都會成日去海螺街，因為海螺同啤酒一齊食意外地夾啊！
東杓乙三田螺餐廳由1962年開始營業，大家睇佢招牌就可以知道佢幾有歷史，大家之後會唔會都想去試吓呢？
8. 永樂海螺（영락 골뱅이）
- 地址：서울 중구 수표로 52
- 營業時間：14:30 - 02:00
- 小Tips：乙支路3街站（을지로3가역）11號出口行1分鐘
永樂海螺入面有少少舊式風格，但入到去俾人一種好乾淨嘅感覺。
小編叫咗一份海螺，裡面加咗好多大蔥、醃蘿蔔同海螺，小菜仲有午餐肉、魚糕湯、雞蛋捲等，份量相當多，加返支燒酒就係完美！
9. 舍廊房刀削麵（사랑방칼국수）
- 地址：서울 중구 퇴계로27길 46
- 營業時間：星期一至六 10:30 - 21:40、星期日 10:30 - 16:00
- 小Tips：乙支路3街站（을지로3가역）9號出口行5分鐘
只要一到Lunch Time，舍廊房刀削麵就會超多人去排隊食（小編都係其中一個 ），呢度CP值超高，天氣凍嘅時候，嚟呢到食返一碗，個人即刻暖笠笠！
呢度由1968年起營業，唔少當地人同電視節目都大力推薦，講到乙支路美食，絕對冇人唔知佢嘅存在！水煮半雞（백숙백반）一份只要₩9,000，配多碗刀削麵（₩7,000）就已經好夠！
10. 又來屋（우래옥）
- 地址：서울 중구 창경궁로 62-29
- 營業時間：11:30 - 21:00（Last Order 20:30）、逢星期一休息
- 小Tips：乙支路4街站（을지로4가역）4號出口行1分鐘
又來屋係專門食平壤冷麵，佢仲我到米芝蓮推薦，鋪頭有分2層，只要一到食飯時間就會爆滿。
雖然呢度價錢偏貴（₩16,000），但係一直以嚟都吸引唔少人嚟食。
11. 平來屋（평래옥）
- 地址：서울 중구 마른내로 21-1
- 營業時間：11:00 - 22:00（Break Time 15:30 - 17:00、Last Order 21:00）
- 小Tips：乙支路3街站（을지로3가역）11號出口行2分鐘
只要一到夏天，佢哋就會推出限定醋雞冷麵，入面有好多雞肉，而且超清新，相信大家一試愛上！
12. 青瓦屋（청와옥 을지로3가직영점）
- 地址：서울 중구 을지로 110
- 營業時間：08:00 - 22:00
- 小Tips：乙支路3街站（을지로3가역）11號出口行1分鐘
由乙支路三街站11號出口出嚟，就可以見到以青瓦砌成嘅青瓦屋。
扁柏套餐係用雞髀菇、大豆芽、牛肉湯、飯蒸製而成嘅料理，營養豐富，味道淡中帶香，令人回味無窮；而用陶碗燉煮嘅血腸湯飯，可以自己加蝦醬、鹽去調味，食完之後超有飽肚感。
13. 五道麵屋（오도면옥）
- 地址：서울 중구 수표로6길 27
- 營業時間：11:00 - 22:00（Break Time 15:00 - 16:30）
- 小Tips：忠武路站（충무로역）6號出口行3分鐘
「五道麵屋」喺乙支路同忠武路中間，係當地人鍾意去嘅燒肉店之一，對於鍾意尋寶美食嘅人嚟講，呢度真係最適合不過啦。
鮮嫩、入味嘅韓牛喺炭火上滋滋聲，食過一次就令人難忘。而且一定要叫佢地嘅冷麵同拌飯，都係大碗又抵食嘅經典料理。
14. 黃牛固執（황소고집）
- 地址：서울 종로구 청계천로 75-1
- 營業時間：10:30 - 21:00、逢星期日休息
- 小Tips：鐘閣站（종각역）4號出口行5分鐘
「黃牛固執」喺清溪川附近，可以話係當地上班族嘅最愛，燒豬肉量多唔再講，各種小菜更放到成枱都係，睇到都覺得非常之吸引。
呢度雖然細細間，但成日都會好多人，Lunch Time只會供應「辣醬烤肉套餐」，入到鋪頭之後同老闆講幾人份就好。
15. 山水甲山（산수갑산）
- 地址：서울 중구 을지로20길 24
- 營業時間：星期一至五 11:30 - 22:00、星期六 11:30 - 21:00、星期日休息
- 小Tips：乙支路4街站（을지로4가역）10號出口行4分鐘
「山水甲山」會咁受韓國人歡迎，唔係無道理㗎！佢位於乙支路三街、四街中間 ，小編之前去就見到唔少一大早嚟飲酒傾偈嘅大叔，通常只要韓國大叔鍾意嘅美食都係代表超好味！
通常一般嘅血腸都係粉絲比較多、豬血比較少，外皮都唔係真嘅豬腸，但呢度嘅血腸確實係滿滿嘅糯米同豬血，敢食嘅朋友一定要嚟試吓啦。
16. 東源家（동원집）
- 地址：서울 중구 을지로11길 22
- 營業時間：星期一至五 09:00 - 22:00、星期六 09:00 - 21:00、逢星期日休息
- 小Tips：乙支路3街站（을지로3가역）9號出口行4分鐘
韓國薯仔湯係唔係令好多人都念念不忘呢？乙支路嘅東源家可以話係最出名嘅薯仔湯。超過40年嘅歷史，香辣、滿足嘅排骨同薯仔係佢哋嘅特徵，係小編食過一次非常難忘嘅味道。
一人份已經會俾勁多料，但大家亦都可以按照個人需求，點非一人份嘅「大、中、小」份，另外一定要叫埋佢哋嘅血腸，配辣醬一齊食先係最好食。
17. 武橋洞乾明太魚湯（무교동 북어국집）
- 地址：서울 중구 을지로1길 38
- 營業時間：星期一至五 07:00 - 20:00、星期六及日 07:00 - 15:00
- 小Tips：市廳站（시청역）4號出口行4分鐘
武橋洞乾明太魚湯一到Lunch Time就會有好多上班族同當地居民去食飯，呢度只賣明太魚湯，用料新鮮，價錢仲要唔貴！
明太魚湯係用牛肉湯同明太魚熬煮而成，味道濃郁，寒冷冬天或酒後第二日食佢就最好不過！
以上就係小編整理好嘅乙支路美食攻略，唔知睇完大家有冇想去邊一間呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
