Hello，大家好，我哋係由韓國人每日提供最新韓國旅行資訊嘅Creatrip。
大家應該都知最可以代表韓國嘅酒就係「燒酒（소주）」，呢個都係韓國人最鐘意嘅酒類之一。「飲酒民族」大概都係大家對韓國既定印象，今日小編要介紹常見嘅韓國燒酒俾大家參考，唔知大家最鐘意邊種口味嘅燒酒呢？
未成年請勿飲酒
請勿酒後駕駛
想體驗韓國夜生活？
2025韓國燒酒推薦
真露Fresh燒酒(후레쉬)
- 酒精度數：16.5%
可以話係韓國最出名嘅燒酒，市面上主要流通嘅真露燒酒大部份係16.5度綠樽蓋嘅Fresh燒酒。
真露Original燒酒(진로 오리지널)
- 酒精度數：20.1%
真露除咗綠樽蓋version，仲有更高濃度咗紅樽蓋版，通常都會喺韓國便利店見到，不過因為濃度高，小心飲一支就醉！
初飲初樂(처음처럼)
- 酒精度數：16.5%
韓國原味燒酒入面，「初飲初樂」同頭先介紹嘅「真露」最為普遍，綠樽蓋嘅「初飲初樂」同「真露」酒精濃度都一樣，而且係最容易搵到嘅燒酒！
初飲初樂 純(처음처럼 순)
- 酒精度數：16%
「初飲初樂」燒酒仲有藍蓋版，濃度比一般常見嘅版本少0.5度。
初飲初樂 津(처음처럼 진)
- 酒精度數：20%
同真露一樣，「初飲初樂」嘅紅色樽蓋version酒精濃度都比一般燒酒高，通常都要喺超級市場或者便利店先會見到。
真露Zero Sugar(진로 제로슈거)
- 酒精度數：16%
真露燒酒跟上復古潮流，採用返最一開始嘅包裝，令唔少韓國年輕人重新關注返呢款燒酒，成為呢幾年韓國最受歡迎燒酒之一（相信大家應該都有見過嗰隻藍色青蛙XD）上年真露復古版更加推出零糖版，飲落更加順口，罪惡感亦都冇咁重。
真露Gold燒酒(진로 골드)
- 酒精度數：15.5%
真露另外喺2024年4月推出咗新版本「真露Gold」，紀念真露100週年。呢款以黃金比例調配出嘅新款燒酒，酒精濃度稍微低少少，不過同樣係零糖，更加易入口。
Saero(새로 소주)
- 酒精度數：16%
「Saero」燒酒係「初飲初樂」旗下新推出嘅燒酒，另一款最近好受韓國年輕人歡迎嘅燒酒，同真露叮噹馬頭，同樣亦都標榜無糖。最近仲有推出杏桃味，比起普通版本會多一陣水果味，不過小編個人就覺得味道有少少太化學..
清河燒酒(청하)
- 酒精度數：13%
韓國清河燒酒都有唔少Fans，同其他燒酒相比更加清爽，而且因為度數比較低，所以唔想飲太醉嘅時候好多人都會揀飲呢款燒酒。
星光清河(별빛 청하)
- 酒精度數：7%
清河亦都有推出呢款氣泡酒「星光清河」，飲落偏甜，度數都比較低，好多韓國女仔都鍾意！
梅花水(매화수)
- 酒精度數：12%
「梅花水」真係好少喺韓國以外地方見，飲落有青梅酸酸甜甜嘅味，亦都因為好容易就會一杯接一杯飲醉XD 不過小編個人就覺得有少少似藥水味，唔太鍾意。
大鮮燒酒(대선소주)
- 酒精度數：16.5%
大鮮燒酒係釜山代表燒酒，度數同真露、初飲初樂一樣，不過小編飲過一次，覺得飲落更加濃，唔知飲過嘅朋友們有冇同感呢？
Good Day燒酒(좋은데이)
- 酒精度數：16.5%
如果話韓國北部係初飲初樂同真露嘅天下，慶尚道地區等南部城市嘅燒酒相信就係由「Good Day燒酒」稱霸！
漢拏山21(한라산21)
- 酒精度數：21%
漢拏山燒酒係濟州島名產之一，所以好多韓國人去濟州島玩，食飯想飲返兩杯都會指定要飲漢拏山燒酒。
漢拏山17(한라산17)
- 酒精度數：17%
如果覺得21度嘅漢拿山燒酒太濃，佢哋仲有度數比較低嘅版本，推薦俾即將要去濟州島旅行嘅朋友們！
Won燒酒Original(원소주 오리지널)
- 酒精度數：22%
由朴載範（Jay Park）親手打造嘅燒酒「Won Soju」雖然市面流通率唔高，不過因為係明星整嘅酒，而且度數偏高，所以受到一班Fans同愛酒人士喜愛。而且仲有24度嘅Spirit（스피릿）版同28度嘅Classic（클래식）版！
水果口味燒酒
- 酒精度數：13%
市面上有非常多水果口味嘅燒酒，最common嘅有青提、西柚、士多啤梨、石榴、蘋果、檸檬等口味，選擇非常多，而且差唔多每個brand都有（不過飲落都差唔多XD）。
水蜜桃氣泡酒(이슬톡톡)
- 酒精度數：3%
如果想試飲韓國酒，但係自認酒量唔太好/唔鍾意酒嘅苦澀味，推薦大家可以飲呢款對香港人嚟講都唔陌生嘅水蜜桃氣泡酒！呢個牌子仲有推出菠蘿味，同樣非常容易入口！
唔知道以上咁多種韓國燒酒，大家最鐘意邊款呢？
如果有更多想知嘅內容，都可以隨時留言或者dm話俾我哋知：）
Mail：help@creatrip.com
