2024韓國燒酒推薦/介紹
韓國燒酒好難飲？燒酒仲有分地區？酒鬼小編推薦13種韓國燒酒種類，你又最鐘意邊款？
Hello，大家好，我哋係由韓國人每日提供最新韓國旅行資訊嘅Creatrip。
大家應該都知最可以代表韓國嘅酒就係「燒酒（소주）」，呢個都係韓國人最鐘意嘅酒類之一。「飲酒民族」大概都係大家對韓國既定印象，今日小編要介紹常見嘅韓國燒酒俾大家參考，唔知大家最鐘意邊種口味嘅燒酒呢？
未成年請勿飲酒
請勿酒後駕駛
韓國燒酒介紹
1. 初飲初樂原味燒酒（처음처럼）
- 酒精濃度：16.9%
韓國原味燒酒入面，「初飲初樂」同等陣要介紹嘅「真露」最受大眾歡迎。對韓國人嚟講，呢兩個牌子都有唔同嘅擁戴者（小編係真露派），酒精濃度逐年都有下調，最新嘅初飲初樂原味燒酒濃度，竟然同其他韓國燒酒品牌一樣都只係得16.9度。
2. 真露Fresh原味燒酒（참이슬）
- 酒精濃度：16.9%
市佔率最高嘅韓國燒酒「真露」酒精濃度，同其他競爭對手一樣都係16.9度，根據《國民健康增進法》規定，17度以上嘅酒類禁止喺上午7點到晚上10點播廣告，所以酒商都紛紛下調酒精濃度，除咗迎合現代人口味，都可以將代言廣告投放效益最大化。
3. 真露復古藍瓶燒酒（진로）
- 酒精濃度：16.9%
先前推出嘅復古藍樽真露燒酒，用真露最一開始嘅包裝，俘虜咗唔少年輕人嘅心。雖然酒精濃度同樣只有16.9度，但小編覺得復古真露飲落更加易入口，冇一般燒酒咁「辣喉」，唔知道大家有冇飲過呢？
4. 清河燒酒（청하）
- 酒精濃度：13%
同韓國藝人請夏同名嘅韓國燒酒「清河」都有唔少擁戴者，同其他燒酒比，清河嘅口感更加清爽（酒精濃度都低好多），係好多人唔想飲得太醉嘅選擇。
5. 梅花酒（매화수）
- 酒精濃度：12%
飲落有少少淡淡酸甜香氣，被喻為「醉」可怕嘅韓國燒酒「梅花水」，小編個人覺得飲落有啲似藥水味（哈哈），不過都接受到。通常韓國人飲梅花水，都會溝酒飲，聽講呢款酒飲嘅時候冇咩感覺，但第2日嘅宿醉會令你辛苦到懷疑人生。
6. 大鮮燒酒（대선소주）
- 酒精濃度：16.9%
由MAMAMOO代言嘅「大鮮燒酒」一樣都有特定群眾支持，16.9度嘅酒精濃度同其他真露、初飲初樂一樣，但小編喝飲落就覺得係比較濃郁，唔知道飲過嘅朋友有冇一樣嘅感覺，可以同小編分享一下。
7. 好日子Good Day燒酒（좋은데이）
- 酒精濃度：16.9%
如果韓國北部係初飲初樂同真露嘅天下，咁南方嘅釜山就係「好日子燒酒」稱霸。通常對韓國人嚟講，大部分都係初飲初樂、真露二選一（然後通常都係真露贏），但係釜山等慶尚道地區，好日子燒酒可以話係同真露一樣咁有人氣嘅存在，之後去釜山都可以試下㗎。
8. 漢拏山燒酒（한라산소주）
- 酒精濃度：17%/21%
呢款算係濟州島嘅當地特色酒？「漢拏山燒酒」有17度同21度嘅選擇，係濟州島嘅名產之一，所以好多韓國人去濟州島玩，食飯飲酒都會指名要漢拏山燒酒。
9. 水果口味燒酒
- 酒精濃度：13%
市面上有好多水果口味嘅燒酒俾大家選擇，有西柚、青提子、提子、石榴、士多啤梨、蘋果、檸檬等口味，大家買之前睇酒樽上面嘅圖案就可以知道係咩口味。小編個人最鐘意西柚同青提子味！
10. 西瓜口味燒酒（술박주）
- 酒精濃度：9.2%
之前喺GS25上市造成韓國轟動嘅西瓜燒酒。小編之前飲嘅時候，覺得味道都唔錯，雖然西瓜味有啲似藥水，但都令成支燒酒飲落冇咁「辣候」，相當適合喺屋企小飲一兩杯嘅韓國酒類。
11. 蜂蜜口味燒酒（꿀꺽 술）
- 酒精濃度：9.2%
除咗西瓜之外，蜂蜜燒酒都係之前嘅特色口味燒酒名單之一，不過小編真心覺得還好，如果冇飲過都可以買嚟試下，但唔好抱太大期待。
12. 益力多燒酒
- 酒精濃度：12%
益力多燒酒係小編覺得最「奇妙」嘅一款，飲落去感覺……應該係話有啲詭異？益力多配上燒酒唔係好夾，飲落雖然係酸甜偏甜，但係就有種違和感。
13. 密瓜燒酒（메로나 소주）
- 酒精濃度：12%
大家以前嚟韓國都會食嘅密瓜雪條，而家燒酒都有出同樣嘅味！酒精濃度只得12%，而密瓜濃縮液只得0.01%，飲嘅時候冇想像中咁濃郁，同其他水果燒酒一樣，比原味燒酒更加易入口。
14. 啊好酸燒酒（아이셔 소주）
- 酒精濃度：12%
韓國老牌糖果「啊好酸軟糖」，實際變成燒酒，因為係老牌，當時一出已經忍起唔少網民討論。
15. 薄荷朱古力燒酒（민초 소주）
- 酒精濃度：12.5%
薄荷朱古力燒酒只係睇包裝已經覺得好吸引，聞嘅時候好有薄荷香氣，但飲嘅時候就唔太覺，反而係偏甜嘅味道，係薄荷朱古力派嘅你，之後嚟到一定要試吓！
16. 水蜜桃氣泡酒（이슬톡톡）
- 酒精濃度：3%
最後一個要介紹嘅韓國酒，應該好多香港人都知道嘅「水蜜桃氣泡酒」，只有3%嘅超低濃度，人氣好高係好多韓妹小酌嘅首選。
唔知道以上咁多種韓國酒類，大家最鐘意邊款呢？身為酒鬼嘅小編當然就每種都試過，亦都因為咁曾經醉得好慘，之後有機會嚟韓國同小編一齊飲返杯啦哈哈哈。
如果有更多想知嘅內容，都可以隨時留言或者dm話俾我哋知：）
Instagram：creatrip.hk