韓國特別嘅地鐵文化
韓國地鐵文化！搭車嘅時候放張紙喺你腳上面係咩意思？ 你又有冇遇過？
Hello，大家好，我哋係由韓國人每日提供最新韓國旅行資訊嘅Creatrip。
大家嚟到韓國旅行最常用嘅交通工具應該就係地鐵，不過唔知道大家有冇喺搭嘅時候發現一啲韓國特有地鐵文化，同香港好唔同呢？甚至有時遇到啲咁嘅狀況，可能會嚇親。今日就要帶大家了解一下韓國嘅地鐵文化，睇下大家有冇遇過呢啲情況呢？
韓國地鐵文化
1. 等車月台有舖頭
韓國地鐵雖然冇禁止飲食（但儘量唔好影響到其他人），而喺入閘之後嘅月台，竟然都仲會有小型店鋪營業，如果係冬天就會成日見到好多韓國人喺呢度飲魚糕湯取暖。呢啲都係合法營業，當然嗰種自己攞塊布鋪喺地下賣嘅攤販，就係違法會被趕走。
另外，喺比較大型嘅地鐵站入面都會有好多店鋪，但又同地下街唔太一樣。大家有機會嘅話，不妨都可以留意下。
2. 地鐵站名可以俾錢買
雖然係「弘大入口站」，𣎴過俾錢買都可以將副站名變成「Creatrip站」，一般只要俾錢就可以買落幾年時間，俾上落車嘅廣播加入新名，但主要站名係唔會變。
目前雖然唔係每個地鐵站都有賣呢種副站名，但首爾一帶都有唔少。
3. 喺車廂入面叫賣
有時候搭地鐵，成日都會遇到拖住推車直接喺車廂入面叫賣嘅人，佢哋會逐一介紹產品、價格、使用方式，最常見嘅大概就係抹布、襪、雨衣等呢類生活雜物。
喺韓國地鐵入面，大家唔係睇手機就係發呆，出現呢類叫賣嘅人的話，通常會吸引唔少人目光（小編自己都好鐘意睇），但通常都冇乜人買，或者只有老人家先會捧場，不過偶爾都有啲唔錯嘅產品，小編有次就買咗抹布用到而家。
4. 喺車廂入面乞討
地鐵上除咗叫賣仲會見到有人乞討。佢哋會喺車廂入面徘徊，手上可能仲會攞住一疊紙，上面寫自己可憐身世，再逐一放到乘客嘅腳上面。
大家記得，遇到呢種情況千祈唔好以為係廣告傳單，直接忽視就好，佢派完之後冇人理就會再收返。如果你將紙收起，就代表你有意願捐助佢。
5. 喺地鐵入面傳教
通常喺地鐵站都係禁止進行募款、演講等公眾行為，但係喺韓國嘅地鐵站，唔少人會隨機搭訕試圖宣揚佢哋嘅宗教。大家遇到都唔洗驚，只要忽視佢哋就可以。
呢啲喺韓國地鐵上傳教嘅人有啲會派傳單，有啲會喺車上面大聲誦讀俾車廂嘅人聽，或者係突然問你「你信唔信？」之類嘅説話，大家只要無視就可以。
6. 飲醉酒嘅人
有啲人飲到醉曬仲會影響到其他人，甚至有人會嘔喺地鐵度。
7. 無人坐嘅關愛座
韓國都有關愛座，雖然大家可能會覺得平時坐關愛座等到有需要嘅人出現讓位就可以，但係喺韓國地鐵，年輕人主動坐關愛座嘅比例可以話係少之有少，有時明明已經好迫好多人，但關愛座都仍然係空。
韓國關愛座主要俾「老人家、殘疾人士、孕婦」先可以坐嘅刻板印象，加上韓國仍然係老人嘅天下，只要年輕人去坐，就會承受巨大嘅壓力，所以大家就算冇位都唔會去坐。
8. 鍾意打尖嘅老人家
韓國人普遍敬老尊賢，但有時持住自己年紀大，倚老賣老嘅人似乎都好黑人憎。最常見嘅就係地鐵入閘嘅時候突然出現打尖嘅老人家。
雖然仲係有好慈祥和藹嘅長者，但多數韓國人似乎都習慣咗「敬老」、「長幼有序」嘅思想文化，先無意間縱容咗呢啲行為。
9. 趕尾班車同首班車嘅人
地鐵因為喺假日會比較早收，所以有啲人都會趕住坐尾班車，萬一冇搭到直達，都會諗辦法搭上區間車去近屋企一啲嘅地鐵站。
相反首班車喺梨泰院、江南、弘大等夜生活興盛嘅地區就會見到一班年輕人坐喺月台嘅人，如果有去過韓國club嘅朋友，可能都有睇過呢個畫面？
以上係嚟韓國一定會遇到嘅「地鐵文化」，唔知道大家有冇感同身受呢？如果仲有其他同地鐵有關嘅文化想問，大家都可以留言㗎。
如果有更多想知嘅內容，都可以隨時留言或者dm話俾我哋知：）
Instagram：creatrip.hk