Hello，大家好，我哋係由韓國人每日提供最新韓國旅行資訊嘅Creatrip。
韓國同香港人一樣都係有個句講個句，性格比較瀟灑，但其實喺呢邊生活耐咗，小編先真係發現韓國同原本生長嘅環境有好大差異。今日小編要同大家介紹嘅，可能係大家都一啲不自覺嘅習慣，唔小心可能會激到韓國人。
韓國旅遊禁忌
1. 唔準對住長輩飲酒
如果你同韓國人（長輩）一齊飲酒。
PS： 長輩 ＝ 老人家以及年紀比自己大幾歲都算長輩
飲杯嘅時候，好似平時飲水正面咁飲嘅話，其實係好冇禮貌。
如果你係晚輩，最有禮貌嘅飲酒方式其實係頭向左或右飲，或者可以用另一隻手擋住、雙手飲會好啲。
2. 俾錢方式
喺韓國俾錢埋單嘅時候，大家一定要用手遞卡俾職員。
如果直接將錢或卡放喺檯到等職員自己拎，職員會好嬲，而且覺得你會好冇禮貌。
3. 周圍對住人影相
韓國人其實好注重個人隱私，好多韓國Blog或者新聞Up上嘅時候，如果唔小心影到其他人，都會打格仔，保護每個人嘅肖像權。
之前有啲遊客因為影相嘅時候，唔小心影到韓國人，或者偷影路人俾人發現、甚至有啲韓國人認為自己入咗鏡，有可能會質問遊客「點解要影我？」同時會要求check相。最差嘅情況，有時可能會誇張到會鬧上警局。
觀光地區可能會相對好少少，因為真係好難避免，但如果喺街見到靚仔OPPA或韓妹想同佢哋一齊影相，一定要保持禮貌去問。唔好成為偷拍狂（所以韓國產嘅手機影相嗰陣，都會有聲）。
4. 坐關愛座
韓國人好敬老，大家應該都聽講過地鐵「關愛座」有幾得人驚，明明地鐵逼好多人，但關愛座好多時都係空咗，好多年青人寧願企，都唔會坐關愛座。
韓國年青人都認為關愛座係只為老人家而設，同時絕大多數嘅韓國老人家，都認為關愛座係為佢哋而設，所以韓國年青人就算幾攰想休息都好，都唔敢去坐。
但係小編坐巴士個陣就發現，如果巴士上冇老人家，通常大家都可以坐關愛座。
5. 巴士上飲食
韓國巴士新規定更新咗一段時間，但仲係有唔少遊客會唔記得，只要帶食物或飲品上車，司機都會拒載。
6. 亂叫阿珠媽
![日常韓國餐廳內部服務的女性，強調對服務人員禮貌稱呼的一瞬間]()
大家一定聽過아줌마（阿珠媽/A-Jum-ma）呢個字，其實喺韓國叫阿珠媽，係好冇禮貌。
韓國人要叫職員嘅時候，基本上都會講呢到（여기요/Yeo-Gi-Yo）、請問（저기요/Jeo-Gi-Yo）」、姨母（이모님/I-Mo-Nim），好少會見到韓國人直接叫職員做阿珠媽。
7. 講半語
多數韓國人知道你係外國人，韓文講得唔好或者亂用都唔太會放喺心，其實好多人啱啱學韓文嘅時候，唔小心同韓國人講咗半語。雖然韓國人表面睇落去唔介意，但其實都係會有啲唔開心。
通常韓國人第一次見面嘅時候，都會問大家幾歲，決定日後相處長幼尊卑，同時會決定日後邊個可以講敬語或者半語。
雖然韓國人知道你係外國人，唔小心講咗半語多數都會體諒，如果係學韓文已經有一定程度，亦唔好輕易認為自己同對方嘅關係已經好到可以講半語。
可唔可以講半語，喺韓國其實要雙方同意，並唔係單方面可以決定。如果你年紀唔係大對方好多，成日講半語，對方可能心會諗「我同你好熟咩……做咩突然講半語？」
8. 嗯嗯
香港人好鍾意以「嗯」或者 「哦」去答朋友，但喺韓國「嗯」係半語。
「嗯（응、웅）」係上對下（長輩對後輩），或者係超friend先可以講半語。
9. 廁所廁紙
韓國好多廁所格都會有垃圾筒喺隔離，大家又知唔知點解呢？
大家平時去廁所都會好自然將廁紙落掉落馬桶，但因為韓國自來水設施水壓普遍偏低，舊建築嘅排水管亦比較舊，如果紙巾掉落馬桶可能會沖唔走。
另外，有啲廁格入面會有衛生用品回收箱，女仔如果咁啱 「嗰日」到，就知道要掉喺邊啦！
10. 過於親暱嘅稱呼
大家應該都知道韓劇主角成日會OPPA OPPA咁叫，某種程度上好似拉近咗兩人距離，但其實對於啱啱識嘅兩個人嚟講，其中一方突然好親暱咁叫OPPA，對方會覺得有啲怪。
基本上女仔叫男仔OPPA，可能會有啲韓仔會覺得「你會唔會有啲隨便？」但如果係買嘢想平啲，叫OPPA係冇問題，對女仔叫언니（onni- 姐姐)亦會比較自然啲。
相反，如果韓仔叫出姐姐做Nuna，韓妹多數都會有種防衛心，加上亦無咩女仔會希望自己年紀大嘅事，周圍俾人講。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
