永登浦「emart」介紹
之後去永登浦唔好淨係行地下街！超大間emart有排你行！
Hello，大家好，我哋係由韓國每日提供最新韓國旅行資訊嘅Creatrip。
emart係韓國大型超市之一，如果之後嚟韓國 ，想買手信返去送俾朋友同屋企人，都可以嚟呢度睇睇！今次小編去到永登浦店，如果唔想去啲成日多人又逼嘅分店，呢度都係一個唔錯嘅選擇！
永登浦「emart」介紹
- 地址：서울 영등포구 영중로 15
- 營業時間：10:00 - 23:00
Shopping之前，當然就係要拎購物車同籃，近年因為疫情關係，好多時入口都會放消毒洗手液同膠手套等俾大家用，相當貼心！
入到去左手邊最先會見到嘅係紅酒區，世界各地唔同嘅酒都可以喺度搵到。
左手邊就係水果區，平時嚟韓國多肉少菜，買返啲水果返去食都會健康啲！
紅酒區隔離就係No Brand，佢係emart旗下品牌，佢哋出嘅產品，好多都係平得嚟又好用，由日常用品到零食等通通都有！
好多人去到呢一區都會買No Brand嘅紫薯，呢度貨量多，完全唔需要搶！
新鮮嘅三文魚同肉類，擺放得好整齊，如果住緊嘅酒店有煮食爐，喺餐廳食唔夠喉，都可以嚟呢度掃幾包，返去慢慢燒！
同時呢度仲有好多已經煮好嘅小食，大家只要買返去叮一叮就食得！
小菜同壽司應有盡有，每款都超吸引！
呢度嘅蛋糕同麵包都係現場製作，保證大家食到嘅都係最新鮮！
份量多，可以買定做第二日嘅早餐！
每次嚟韓國都會必買香蕉奶！呢度口味多，款又齊，大家會唔會都想買幾款返去酒店慢慢飲呢？
好多公仔麵款香港都冇，同朋友一齊買幾款，再share幾包就可以試到更多口味！
價錢款款都平，不過因為有啲重量，令人會苦惱買邊幾款好
零食有好多都係一盒裝同包裝，揀盒嘅話，入面好多獨立包裝，有時口痕食一包啱啱好！
有零食，當然唔少得嘅仲有飲品啦！茶類、咖啡類包羅萬有！
行到中間會見到有一個event區！呢度就係掃平嘢嘅位！大家千祈唔可以錯過！
隨住疫情影響，大家都更加注重健康，其中一個位係專買健康食品，有興趣嘅朋友都可以去睇吓！
韓國獨居人士越嚟越多，好多時冇時間煮飯，都鍾意買呢啲meal kit返去叮一叮就食得！
冷凍食品一樣多，如果係長居韓國嘅朋友，都可以買嚟試吓！
除咗買食同飲嘅之外，就連化妝品同一啲畫畫用具都可以搵到！
喺超市盡頭，會發現有一個專賣家庭用品嘅區。
而家韓國唔少超市都會有分自助俾錢同人工收銀處，如果買超過₩30,000以上，₩500,000以下就可以喺人工收銀處，向職員出示護照，就可以即時退稅！
就算用自助俾錢都好簡單，只要跟住佢啲Step，一開始將個籃放喺付款前（계산전）。
之後撳開始Scan（스캔 시작하기）。
Scan完之後放喺Scan完（스캔후）。
之後就可以俾錢啦！如果大家之後嚟旅行，想一卡走天下，可以試吓申請NAMANE卡！
收銀附近就有客服中心，如果有任何需要，都可以問職員，佢哋會nice咁答大家。
永登浦emart由首爾站坐1號線，或由弘大搭去都係唔使20分鐘就到，如果當日天氣唔太好，嚟呢間行超市嘅同時，仲可以行埋地下街，一舉兩得！
永登浦「emart」前往方法
搭地鐵去到永登浦站5號出口，直行去地下街。
一直行會見到4號出口영등포동4가（永登浦洞4街）標誌後，轉左係Times Square時代廣場入口。
入到去之後搭扶手電梯落去。
之後一直直行就會見到emart入口。
如果有更多想知嘅內容，都可以隨時留言或者dm話俾我哋知：）
Instagram：creatrip.hk