首爾美食攻略
嚟首爾旅行有咩必食？首爾美食清單大公開！
- 馬場洞韓牛
- 燒肉任食放題
- 普通韓燒餐廳
- 一隻雞
- 蔘雞湯
- 橋村炸雞
- Puradak炸雞
- 烤貝
- 醬油蟹
- 豬腳一條街
- 廣藏市場
- 南大門市場
- 薯仔排骨湯
- Fine Dining/浪漫景觀餐廳
- 烤腸
- 鐘路三街布帳馬車
- 帝王蟹/新鮮海鮮
- 韓定食
- 街頭小食
- 外賣美食
Hello，大家好，我哋係由韓國人每日提供最新韓國旅行資訊嘅Creatrip。
大家嚟韓國玩首選都係去首爾，但係韓國有咁多好嘢食，今次呢轉韓國之旅應該要食啲咩好？等小編今日幫大家整理出首爾必吃美食，記住save呢篇blog，下次plan行程嘅時候參考啦！
首爾旅行前必睇總整理🔎
💃 首爾景福宮精選韓服店
🛍️ 韓國超市/百貨公司休息日
💄 韓星御用首爾髮型屋/化妝Studio
想直接睇首爾有咩必食？
打開目錄就知！
首爾美食攻略
馬場洞韓牛
- 地址：서울 성동구 마장로33길 53
- 營業時間：每間餐廳同肉店都唔同
- 前往方法：龍頭站（용두역）4號出口
韓牛本身就好少輸出去其他國家，就算有都會超貴，所以如果大家有機會嚟韓國，不妨去首爾馬場洞食韓牛！馬場洞畜產品市場又被稱為韓牛市場，呢度有好多間賣高質新鮮韓牛嘅鋪頭，大家可以揀自己鍾意嘅部位，然後直接去附近餐廳燒嚟食。韓牛肉味香濃，而且油脂分佈靚，令人試過返尋味！
燒肉任食放題
- 小貼士：Naver Map搜尋「燒肉任食放題」嘅韓文（고기 무한리필）
- 備註：通常需要2人起，唔可以1個人去食
平時喺香港食韓燒都唔平，有機會嚟韓國就更係要食返夠本！首爾有好多燒肉任食放題餐廳，不過通常都係五花肉放題。小編推薦大家可以去「荒謬的生肉」，好似明洞、弘大等等嘅熱門地區都有，都算可以用比較抵嘅價錢食到唔伏嘅燒肉！
普通韓燒餐廳
- 備註：通常都可以1人去食，不過最少要叫2份肉（因餐廳而異）
如果大家budget比較充裕，比起量更加講求質素，咁就推薦大家去一份份肉單點嗰種韓燒餐廳！通常一份肉（150~180g）大約係₩14,000~18,000，雖然一定貴過食放題，不過會更加高質，而且每間餐廳都有各自嘅特色！
一隻雞
一隻雞睇落平平無奇又白賴晒，到底有咩咁好食？清澈湯頭入面有一隻完整嘅雞，食完嫩滑雞肉之後仲可以用吸飽雞肉精華嘅湯煮粥或者麵，食完暖笠笠又夠飽肚。而首爾最出名嘅一隻雞餐廳係東大門嘅陳玉華一隻雞同明洞一隻雞、仲有梨大嘅孔陵一隻雞，每間餐廳各有擁躉！
蔘雞湯
蔘雞湯係韓國最出名嘅補身料理之一，通常雞入面會包住糯米，雞肉不斷喺充滿營養嘅湯底煮至糜爛，用筷子一夾就會散。雖然入面有人蔘，不過唔會好似中藥咁苦，反而會煮到味道帶甘，想補充體力一定要去食！
橋村炸雞
「橋村炸雞」係韓國最出名嘅炸雞brand之一，喺首爾就有超過幾十間分店！大家可以揀去餐廳堂食，享受熱辣辣嘅炸雞，或者叫炸雞外賣，喺住宿嘆宵夜。小編最推薦大家食蜂蜜炸雞同原味醬油炸雞，每一嚿雞都又脆又惹味！
Puradak炸雞
Puradak炸雞以炸雞界嘅Prada聞名，比起其他炸雞口味更加豐富有高級感，係近期好多人嚟首爾都想試嘅炸雞店，如果大家食過橋村炸雞想試新嘢，不妨可以食Puradak炸雞（小編私心推黑蒜口味）！
烤貝
首爾都有不少烤貝類餐廳，比起價錢貴嘅燒海鮮專門店，小編更加推薦大家食烤貝任食放題，平均一個人₩31,900至₩35,900不等，就可以食盡多款燒海鮮（有時包埋其他韓式美食！），CP值夠高！
醬油蟹
講起韓國美食一定唔少得醬油蟹！醬油蟹有白飯小偷之稱，真係超送飯（小編次次都要食兩碗以上）！首爾有好多出名食醬油蟹嘅餐廳，無論係榮獲米芝蓮嘅真味食堂、大瓦房、花蟹堂，定有唔少遊客推薦嘅阿峴洞醬蟹同弘益醬蟹，每間餐廳調味都唔同，各有千秋，梗有一間啱你口味！
豬腳一條街
韓國有好多OO一條街，喺一條街會聚集勁多賣同一款美食嘅餐廳，而豬腳一條街就係其中一個！韓式豬腳外皮煙韌，肉質嫩滑，而且調味鹹鹹甜甜超惹味！喺首爾孔德市場同東大門昌信洞都有豬腳一條街，如果想食首爾最正嘅豬腳一定要去呢兩個地方！
廣藏市場
- 地址：서울 종로구 창경궁로 88
- 營業時間：每間店鋪唔同
- 前往方法：鐘路五街站（종로5가역）9號出口
首爾最受歡迎嘅傳統市場相信一定係廣藏市場！廣藏市場最出名嘅美食係活章魚、生牛肉、綠豆煎餅同麻藥飯捲，小編每次去都一定會食盡佢！活章魚同生牛肉因為係生嘅，所以建議去名氣、衛生比較好嘅餐廳食；而綠豆煎餅同飯捲就可以喺市場中心地帶嘅攤檔食，夠曬道地！
南大門市場
- 地址：서울 중구 남대문시장4길 21
- 營業時間：每間店鋪唔同
- 前往方法：4號線會賢站（회현역）5、6號出口
南大門市場係首爾最大規模嘅傳統市場，呢度有刀削麵一條街、帶魚一條街同各種韓國傳統小吃可以大飽口福！吃飽之後可以去行下附近攤檔同南大門童裝街，之前有好多人都會買返屋企做手信嘅士多啤梨乾都可以喺度買到！
薯仔排骨湯
薯仔排骨湯都係嚟首爾旅行必食嘅美食之一，可以當正餐之餘，唔少人都會當係下酒菜/解酒湯！排骨肉煮到超軟爛，加上辣辣地嘅湯頭超滿足，想食得飽肚啲嘅話記住加個炒飯啦！
Fine Dining/浪漫景觀餐廳
特別日子想搵返間餐廳撐枱腳？首爾都有唔少氣氛好、景觀靚嘅首爾Fine Dining餐廳，想食返餐浪漫晚餐嘅話，記住要提早預約定啦！
烤腸
如果你夠膽食內臟，小編推薦嚟首爾一定要食烤腸！平時喺香港食內臟通常都係滷水，不過韓國人就鍾意燒嚟食，再配埋啤酒燒酒，真係一流！
鐘路三街布帳馬車
- 營業時間：每間店鋪唔同
- 前往方法：鐘路三街站（종로3가역）5號出口前
布帳馬車可以話係可以體驗最道地韓國酒文化嘅地方，而大部份人都會去位於鐘路三街站嘅布帳馬車一條街！每到weekend就會有超多人喺度飲酒，享受夜生活！
帝王蟹/新鮮海鮮
- 地點：鷺梁津市場
- 營業時間：每間店鋪唔同
- 前往方法：鷺梁津站（노량진역）9號出口
喺首爾想食海鮮，咁就一定要去鷺梁津水產市場！一隻帝王蟹大約只係需要₩200,000（約200000），仲可以即買即蒸超新鮮！不過建議大家要貨比三家同格價，每間鋪頭價錢可能都會差幾遠吓！
韓定食
如果想食經典又傳統嘅韓國菜，或者特別日子需要同長輩們一齊聚餐，推薦大家去食韓定食！一張枱擺滿各式各樣韓國特色小菜，大家可以大飽口福同眼福！
街頭小食
頭先都有介紹到幾個首爾傳統市場，入面有唔少賣辣炒年糕、糖餅、炸雞等等嘅韓國傳統小吃，價錢唔貴，而且可以買完邊行邊食，唔知大家最鍾意食咩韓國街頭小食呢？
外賣美食
如果唔想四周圍頻撲，或者想玩完一日夜晚返酒店食宵夜，外賣絕對係你嘅最佳選擇！首爾有好多美食，而通常大部分餐廳都會提供外賣服務，想食咩都可以叫外賣！
下次嚟首爾玩，記住要食盡上面介紹嘅美食啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com