2024最新明洞街頭小食實測/推薦
明洞小食街而家有咩好食？係唔係一定要用現金？
- 明洞小食街喺邊？
- 明洞小食街可唔可以碌卡？
- 明洞最近有咩小食？
Hello，大家好，我哋係由韓國人每日提供最新韓國旅行資訊嘅Creatrip。
好多人去韓國玩都一定會去明洞，而明洞除咗換錢同shopping，最吸引人嘅相信一定係超豐富嘅街邊小食！最近明洞有咩小食必食，又可唔可以碌卡？想知就千祈唔好錯過今日呢篇blog啦！
明洞旅行攻略
2024明洞街頭小食推薦
明洞小食街喺邊？
明洞出名多小食攤檔，而大家平時喺網上見到嗰條小食街就係喺15/18號出口附近，由地鐵站出口去到明洞藝術劇場前面都有好多檔攤！
明洞小食街可唔可以碌卡？
由2024年2月起，韓國觀光公社表示明洞小食攤檔為咗避免出現殺價或者任何唔公平嘅情況，將會提供碌卡服務。不過大部分都只會接受NAMANE卡或者現金俾錢（如果有韓國銀行戶口都可以過數），其他信用卡目前仍然都用唔到，所以建議大家準備定現金啦！
明洞最近有咩小食？
麻藥粟米
呢種燒粟米會被叫做「麻藥粟米」係因為味道會令人上癮，忍唔住一啖接一啖咁食！粟米外面會搽一層牛油燒，然後撒上特製調味粉同辣椒粉，鹹鹹甜甜非常惹味（如果大家唔食辣可以叫老闆唔好加辣椒粉）！
燒龍蝦
冇錯，而家喺明洞街邊都可以食到龍蝦！小編2024年11月去嘅時候一份要₩20,000，雖然唔平，但係身邊有好多遊客都人手一份！燒好嘅龍蝦肉會重新放返落個殼度，然後加埋芝士同醬汁，炭燒香味真係好吸引！
芝士年糕串
明洞仲有賣呢種燒芝士+年糕串，芝士燒到金黃色，加埋煙煙韌韌嘅年糕，相當香口。如果有煉奶嘅話記住淋少少一齊食啊！
雞蛋包
講起明洞小食，小編最推薦嘅係雞蛋包！味道同口感就似熱香餅+原隻雞蛋，有啲鋪頭仲會加埋芝士𠻹！冬天嘅時候買一個嚟食，暖笠笠又可以充飢！
梳乎厘班戟
2024年最受歡迎嘅明洞小食一定係呢款梳乎厘班戟！充滿空氣感之餘口感軟身，加埋忌廉一齊食勁幸福！而且分量都幾大，建議大家可以同朋友一齊share嚟食~
辣炒年糕&魚糕
嚟韓國點可以唔食辣炒年糕同魚糕呢？特別係冬天嘅時候企喺路邊飲返杯魚糕湯，真係非常舒服！
牛油燒大蝦
呢款牛油燒蝦小編個人覺得非常一般，雖然唔係唔好食，不過調味唔夠入味，而且同想像中味道唔同，如果要買嘅話不如買上面介紹嘅燒龍蝦仲好XD
芝士泡菜五花肉捲
明洞小吃街大約有三、四間賣芝士泡菜五花肉捲嘅攤檔，不過味道一般般，芝士都比較少，如果大家想食肉嘅話，直接去燒肉鋪食會更加抵食！
芝士香腸串/年糕香腸串
這款都係韓國相當常見嘅路邊小食，串起香腸仔同年糕/芝士/牛肉年糕卷，係一款好難會伏嘅明洞小食！
糖餅
如果想試韓國傳統甜品，推薦大家可以喺明洞小食街搵賣糖餅嘅鋪頭（CGV前面就有一間）！韓國糖餅外層會經過煎炸，然後入面就係熱辣辣嘅肉桂黑糖糖漿，仲會有唔少果仁，諗起都流曬口水！
酥皮鯽魚餅
呢款明洞小食融合咗普通鯽魚餅同牛角包，餡料方面有紅豆、番薯、Cream Cheese同朱古力，比起普通鯽魚餅會多咗陣牛油味，口感都更加特別（不過價錢比較貴..）！
羊肉串
如果大家鍾意食羊肉，推薦大家可以試埋明洞嘅羊肉串，喺超遠就可以聞到羊肉串+孜然粉嘅香味！
雞肉串
雞肉串可以話係其中一樣最容易見到嘅韓國小食，而明洞都有唔少雞肉串攤檔！通常都會有幾款口味可以揀，最common嘅有鹽味、照燒醬、辣醬等等，大家可以按照喜好揀，或者同朋友一齊share都唔錯！
水果糯米糍
明洞街頭都有唔少買水果糯米糍/大福嘅地方，以前通常都只係得士多啤梨，而家仲會有埋奇異果、香印提子、柑、芒果等等其他口味，推薦大家趁冬天士多啤梨當造嘅時候去食！
明洞仲有咩好食/好玩？
如果有更多想知嘅內容，都可以隨時留言或者dm話俾我哋知：）
Mail：help@creatrip.com