梨泰院咖啡廳總整理
梨泰院13間隱藏Cafe推薦，每間唔同風格，你最鍾意邊一種？
Hello，大家好，我哋係由韓國人每日提供最新韓國旅行資訊嘅Creatrip。
梨泰院可能一直俾人覺得只係多酒吧，而且係多外國人聚集嘅地方，不過其實呢度有唔少隱藏嘅Cafe，好多韓國人只要一到週末都會去打卡，今日不如就跟住小編睇吓最近有咩打卡點啦！
梨泰院咖啡廳總整理
1. The Baker’s Table（더베이커스테이블）
位於梨泰院嘅The Baker’s Table可以話係唯一一間！開張至今已經有10年，每日朝頭早10點開門，有唔同新鮮嘅麵包等住大家，只要一到週末仲要大排長龍等位入去添！
呢度麵包選擇多，每一款都可以買嚟試吓，有啲麵包仲指明係for素食主義者！
除咗麵包之外，呢度嘅湯同埋早午餐都好出名，小編當日叫咗佢哋嘅Daily Soup蘑菇湯，好濃郁，佢哋唔係用罐頭湯，而係自己去將蘑菇絞碎，趁熱飲超好味！另外佢哋嘅早午餐「Bratwurst」，德國腸係佢哋廚師用特有嘅配方去整，好香啖啖都係肉，配埋佢哋嘅酸菜同薯蓉（或者可以揀炸薯條）一齊食好正！麵包方面小編揀咗Rye Rolls，係用咗20%黑麥同80%嘅小麥、牛奶同酵母去整，點湯嚟食幾唔錯！而蘋果汁甜甜地，同所有食物都好夾。
The Baker's Table（더베이커스테이블）
- 地址：서울 용산구 녹사평대로 244-1
- 營業時間：08:00 - 21:00
- 價格：蘑菇湯（오늘의 수프 - 버섯）₩7,500、Bratwurst（부랏부어스트）₩17,500、Rye Rolls（N/A）₩1,500、蘋果汁（사과 쥬스）₩4,000
- 小Tips：由綠莎坪站2號出口行485m
2. Wafille（와필레）
只要經過綠莎坪好難唔會俾呢一間窩夫店吸引，紅白格仔配上薄荷色外牆設計，係人經過都忍唔住想打返張卡！
入到去Cafe，枱同櫈都用咗薄荷色設計，成個感覺俾人覺得好可愛，而且每一張枱都有一段距離，坐得都算舒服。
最後小編窩夫揀咗Chocolate Filled同Itaewon Scallion Butter口味，飲品方面揀咗橙汁同芙蓉檸檬梳打。Chocolate Filled雖然細細個，但朱古力味超濃，不過有少少偏甜，Itaewon Scallion Butter係令小編最驚喜！雖然只睇表面好似同原味冇分別，不過佢上面原來搽咗大蒜醬，甜甜鹹鹹好正！橙汁唔會太甜或太酸，芙蓉檸檬梳打夠清爽，兩款同窩夫一齊食都夾！
Wafille（와필레）
- 地址：서울 용산구 녹사평대로 222
- 營業時間：12:00 - 20:00
- 價格：Chocolate Filled（초코 필링 클로플）₩3,800、Itaewon Scallion Butter（이태원 쪽파 파터 클로플）₩3,800、橙汁（오렌지쥬스）₩3,500、芙蓉檸檬梳打（히비스커스 레몬에이드）₩3,700
- 小Tips：由綠莎坪站2號出口行335m
3. Cafe Beyond Moon （비욘드문）
梨泰院附近好似周圍都係得酒吧，俾人感覺好嘈，當中係咪冇啲靜小小嘅地方？梗係唔係啦！呢間Beyond Moon係一個好隱藏嘅位置，一個唔小心可能就會經過唔見，不過一入到去，大家可能就會愛上！
Cafe內部俾人一種好舒服乾淨嘅感覺、但位置唔多，而且當日小編去到幾乎係坐滿（除咗一張長枱）。
因為當日天氣都幾唔錯，最後揀咗坐室外唯一一張枱。小編叫咗佢哋主打Rare Toast，喺多士上面放咗粒牛油同時淋咗好多肉桂糖，麵包好軟熟，食嘅時候覺得超幸福（不過卡路里就好高 ），飲品方面亦都叫咗佢哋代表Moon Latte，上面有一層黑芝麻cream下面係咖啡，飲嘅時候一啲都唔覺得苦，反而覺得好香濃甜甜地。而士多啤梨鮮奶係佢哋嘅季節性（只到3月）飲品，而家韓國冬天，完全係士多啤梨當造，飲嘅時候會覺得好甜，超推薦！
Cafe Beyond Moon （비욘드문）
- 地址：서울 용산구 회나무로13길 14-10
- 營業時間：星期二至五10:00 - 21:00、週末11:00 - 21:00、逢星期一休息
- 價格：Rare Toast（N/A） ₩8,900、 Moon Latte（N/A） ₩6,500、 士多啤梨鮮奶（N/A） ₩6,500
- 小Tips：由綠莎坪站2號出口行695m
4. Noop Cafe （눕카페）
梨泰院出名就係多露天Cafe！小編當然都唔可以錯過，去咗一間最近IG都好多人打卡嘅Noon Cape！
呢間Cafe除咗係露天夠特別之外，仲有四個圓形玻璃球物體，其實係俾大家坐入去慢慢嘆咖啡，好有自己個人空間，特別推薦大家黃昏時候去，晏晝同夜晚去景色完全超唔同！
提提大家：搭lift/行樓梯上去會見到係一個篤波地方，大家可能會以為去錯地方，只要同職員講去Cafe，佢就會帶大家出去。
不過老實講句，雖然呢度好有feel，但飲品同甜品小編都唔太推薦。青提子梳打飲落有啲似藥水味，水蜜桃冰茶算係中規中矩，另外紅蘿蔔蛋糕唔知係咪因為雪得太耐，有啲太硬，好似有少少變味。
Noop Cafe （눕카페）
- 地址：서울 용산구 신흥로26길 20 5F
- 營業時間：10:00 - 04:00
- 價格：青提子梳打（청포도에이드）₩7,000、水蜜桃冰茶（복숭아 아이스티）₩6,000、紅蘿蔔蛋糕（당근케이크）₩6,500
- 小Tips：由綠莎坪站2號出口行1.2km
5. Graddhyllan（그레트힐란）
「Graddhyllan」2樓至3樓係休息區，4樓要預約先用到，二五樓就係露台，佢哋出名睇梨泰院全景。
露臺上仲掛滿瑞典達拉木馬鑰匙扣，聽講呢個鑰匙扣會帶嚟幸運添！
天氣好嘅話坐出露台，飲杯嘢同朋友傾吓計，相當舒服！
Graddhyllan（그레트힐란）
- 地址：서울 용산구 회나무로 60-1
- 營業時間：10:00 - 21:00（中秋及新年當日休息）
- 價格：N/A
- 小Tips：由綠莎坪站2號出口行923m
6. r.about（아러바우트）
如果只係睇外觀，真係好難令人相信係一間cafe，不過如果喺IG打梨泰院，好多時都會見到r.about嘅出現，喺門口已經可以聞到好香嘅咖啡味，佢哋好多咖啡豆都係國內進口。
雖然外觀係韓屋設計，不過入到去就有少少似係工業風？每一個位都要睇得出店主嘅精心設計。
當中佢哋嘅布朗尼超出名，好多人為咗食佢而去，鍾意食朱古力嘅朋友更加唔好錯過！ 厚實得嚟又夠鬆軟，令人忍唔住食完一啖有一啖，澳式白咖啡苦中帶香，同布朗尼一齊食超夾！有興趣嘅朋友之後去可以用我哋提供嘅優惠券，可以享有九折優惠添㗎！
r.about（아러바우트）
- 地址：서울 용산구 대사관로8길 15
- 營業時間：11:00 - 21:00
- 價格：澳式白咖啡（플랫화이트）₩5,000、布朗尼（브라우니）₩5,000
- 小Tips：由梨泰院站3號出口行697m
7. one in a million（원인어밀리언）
如果啱啱介紹嘅布朗尼大家唔啱，咁嚟緊呢一間佢哋主打嘅白雪Tiramisu話唔定會啱你！
Cafe內部擺滿咗好多植物，好多人嚟到都會覺得好放鬆而且療癮，聽講好多廣告同電視劇都曾經嚟過取景。
白雪Tiramisu上面層cream係用咗馬士卡彭芝士同忌廉去整，同下層濃縮咖啡麵包一齊食，真係好soft，兩個加埋一齊食真係好夾！以佢哋嘅holiday咖啡都係佢哋招牌飲品，係椰漿做底嘅甜咖啡。
one in a million（원인어밀리언）
- 地址：서울 용산구 이태원로54길 31
- 營業時間：星期一至六 11:00 - 22:00、星期日11:00 - 23:00
- 價格：白雪Tiramisu（화이트 티라미수）₩7,000、Holiday（홀리데이）₩7,000
- 小Tips：由漢江鎮站3號出口行388m
8. Old Ferry Donut（올드페리도넛카페）
最近冬甩可以話係風魔全韓國，好多人為咗食冬甩而會瘋狂排隊，到底呢間Old Ferry Donut又有咩特別呢？
INSTAGRAM：oldferrydonut
因為當日小編去嘅時候人太多，頂唔到太多相，大家可以參考佢哋IG，裝修係工業風，俾人一種好舒服嘅感覺（但因為人多會有少少嘈）。
呢度超多唔同口味嘅冬甩，最後小編揀咗花生醬牛油口味，以及冬甩鮮奶咖啡雲呢拿rooibos Kusumi茶，全部都幾唔錯。
Old Ferry Donut（올드페리도넛카페）
- 地址：서울 용산구 한남대로27길 66
- 營業時間：11:00 - 22:00、逢星期二休息
- 價格：冬甩鮮奶咖啡（튜브라떼）₩6,500、花生牛油冬甩（피넛버터도넛）₩5,000、vanilla rooibos Kusumi Tea（N/A）₩5,800
- 小Tips：由漢江鎮站3號出口行157m
9. LE MONTBLANC（르몽블랑）
唔講唔知原來呢間Cafe前身係一間有20年歷史嘅針織工廠，之後改變成而家嘅LE MONTBLANC。門口就可以見到經典甜品毛冷球慕絲蛋糕招牌。
呢度總共有3層，其中2樓以五顏六色嘅線同乾燥花嘅配搭做裝飾。
本身都怕呢度嘅蛋糕只係得個造型味道唔好，點知試過之後發現係小編覺得係諗多咗，好濃郁伯爵茶味，配埋荔枝酸梅梳打一齊飲超涼爽！
LE MONTBLANC（르몽블랑）
- 地址：서울 용산구 신흥로 99-4
- 營業時間：星期二至五 12:00 - 19:00、週末 12:00 - 20:00、逢星期一休息
- 價格：伯爵茶冷球慕絲蛋糕（얼그레이 무스케이크）₩9,500、荔枝樹莓梳打（리치라즈베리 에이드）₩7,000
- 小Tips：由綠莎坪站2號出口行1.2km
10. Butter Book（버터북）
位於解放村嘅Butter Book由開張到而家一直超有人氣，之前好多KOL都去過打卡，最近佢仲喺釜山海雲台開咗新鋪。
呢度好多甜品都係主打，冬甩仲係超搶手！
樹莓冬甩係呢度嘅招牌冬甩，只要打開IG幾乎會見到十個嚟到有八個都會叫，食嘅時候會覺得酸酸甜甜，令人好開胃！雪糕最近好多地方都鍾意加入黑芝麻口味，好濃郁，小編個人好推薦！濟州柑橘味雪糕食嘅時候會食到一粒粒嘅柑橘，一樣都係好好味。 奶茶一打開樽蓋已經聞到好濃嘅伯爵奶茶味，質感好滑，同香港嘅絲襪奶茶有得揮！
Butter Book（버터북）
- 地址：서울 해방촌 용산구 신흥로15길 20
- 營業時間：星期二至星期日 11:00 - 20:00、逢星期一休息
- 價格：樹莓冬甩（라즈베리도넛）₩4,500、雪糕（黑芝麻+濟州柑橘）젤라또（흑임자,한라봉） ₩5,300、伯爵樽裝奶茶（보틀밀크-밀크티）₩5,000
- 小Tips：由綠莎坪站2號出口行1km
11. Cuevamatera（꾸에바마테라）
只睇門口係咪好有一種神秘感呢？入去就好似一個衣櫃咁。
入到去可以見到座位真係唔多，大約只得4-5張檯，但每一個位都可以成為打卡位，可以睇得出老闆花咗唔少心機。
呢度嘅西柚梳打比其他店更多西柚肉，飲嘅時候更加有口感。黑芝麻鮮奶小編第一次飲超濃郁，上面再加咗少少黃豆粉，撈埋一齊飲真係超滑超香！Raspberry達克瓦茲唔會太甜亦唔會太酸，味道啱啱好。
Cuevamatera（꾸에바마테라）
- 地址：서울 용산구 소월로20길 28-1
- 營業時間：星期二至五12:00 - 20:30、週末12:00 - 21:00、逢星期一休息
- 價格：西柚梳打（자몽에이드）₩6,000、黑芝麻鮮奶（흑임자라떼） ₩6,000、Raspberry達克瓦茲（다쿠아즈 - 라즈베리피스타치오）₩3,500
- 小Tips：由綠莎坪站2號出口行1.2km
12. Tape（테이프）
如果只睇外觀可能唔會太顯眼，但其實佢係梨泰院區一間超受歡迎嘅Cafe之一。
入到去有一種夢幻嘅感覺，佢哋總共有分兩層，超多位，不過當日小編去到天台已經閂咗，有啲可惜唔可以帶大家欣賞到梨泰院嘅景色。
首先綠茶鮮奶相對比較偏甜，如果鍾意飲甜嘅朋友應該會幾鍾意，而水果茶好香果味，酸酸地同蛋糕一齊食會好夾！榛子朱古力蛋糕（左）食第一啖已經令人超有驚喜！超濃味食食吓會覺得有啲似金莎？ 而士多啤梨芝士蛋糕（右）睇外表已經夠吸睛！而味道都好唔錯！
Tape（테이프）
- 地址：서울 용산구 이태원로14길 21 2F
- 營業時間：12:00 - 22:00
- 價格：綠茶鮮奶（말차라떼）₩6,500、水果茶（N/A）、士多啤梨芝士蛋糕（딸기크림치즈크림케이크）₩4,500、（헤이즐넛초코 조각）₩7,500
- 小Tips：由梨泰院站4號出口行364m
13. THE PARLOUR SEOUL（더팔러서울）
「THE PARLOUR SEOUL」雖然外觀睇落似係一間好細又平平無奇嘅Cafe，但行入去就會發現其實入面好大，而且仲裝修得非常新潮！
入面主要以紫色同綠色燈光裝飾，俾人一種好夢幻又勁新潮嘅感覺，聽講每個weekend仲會有DJ表演！
呢度提供各種各樣嘅飲品、小食同甜品，無論係非酒精飲品定cocktail、啤酒、紅酒都一應俱全！
THE PARLOUR SEOUL（더팔러서울）
- 地址：서울특별시 용산구 이태원로 164
- 營業時間：星期二至日 15:00 - 02:00（逢星期一休息）
- 價錢：THE PARLOUR Sundae ₩5,000、THE PARLOUR Ale ₩7,000、芝士爆谷 ₩5,000
- 小Tips：梨泰院站（이태원역）4號出口行145m
之後去梨泰院，唔好以為只係得Club同酒吧，可以試吓行啲小巷，話唔定會發現好多隱藏Cafe！
如果有更多想知嘅內容，都可以隨時留言或者dm話俾我哋知：）
Instagram：creatrip.hk