弘大美食總整理

Hello，大家好，我哋係由韓國人每日提供最新韓國旅行資訊嘅Creatrip。

Hello，大家好，我哋係由韓國人每日提供最新韓國旅行資訊嘅Creatrip。

無論係遊客定係韓國人，都好鍾意去充滿年輕氣息嘅弘大玩！小編相信大家嚟韓國玩，都一定會將弘大放入行程入面。但係呢度實在有太多舖頭，有時候一時之間唔知道有咩好食，今日小編就整理咗最新2025版本嘅弘大餐廳攻略，之後大家嚟弘大玩可以參考吓！

弘大美食總整理

一片鰻魚_{(일편장어)}

• 地址：서울 마포구 양화로16길 15 2F
• 營業時間：12:00-23:00
  • Break Time 15:00-17:00
  • Last Order 22:00
• 前往方法：弘大入口站（홍대입구역）9號出口行6分鐘

「一片鰻魚」嚴選韓國頂級淡水鰻魚，所有鰻魚都係即叫即劏，新鮮之餘size比想像中大，放上火爐上面嘅時候鰻魚仲識郁！職員全程都會幫手燒鰻魚，大家只要等食就得~ 鰻魚有咬口又唔腥，而且油脂分佈適中，推薦大家學韓國人咁點鹹鹹甜甜嘅醬再加薑絲，仲會用生菜或者蘇子葉包起食，食落味道會更加多層次同清新！

🔎「一片鰻魚」詳細介紹

[스팟] 一片鰻魚（弘大總店）

一片里脊_{(일편등심)}

• 地址：서울 마포구 홍익로6길 52 2F & 3F
• 營業時間：12:00 - 23:00
  • Break Time：15:00 - 17:00
  • Last Order：22:00
• 前往方法：弘大入口站（홍대입구역）8號出口行1分鐘

韓牛專門店「一片里脊」嘅總店位於弘大，一入門口就會見到超多韓國明星嘅簽名！「一片里脊」提供嘅韓牛全部都經過21日低溫熟成，味道肉質更上一層樓！提供多款牛肉部位,每款味道同口感都唔同最正嘅係會用炭火燒，可以食到香濃肉味之餘仲有淡淡碳香！

🔎弘大「一片里脊」詳細介紹

[스팟] 一片里脊（弘大總店）

夏威夷烤貝殼_{(하와이조개 홍대점)}

• 地址：서울 마포구 와우산로21길 19-8 B1F
• 營業時間：12:00 - 00:00
• 前往方法：弘大入口站（홍대입구역）9號出口行9分鐘

有冇朋友嚟韓國玩都鍾意去食燒貝殼呢！夏威夷風嘅裝修配上韓式燒貝殼超特別，而且因為餐點份量都好大+高質，所以好受韓國年輕人歡迎！小編覺得呢度其中一個最大優點係唔需要開瓶費，而且仲有免費即食麵，大家可以盡情飲飽食醉！

🔎弘大「夏威夷烤貝殼」詳細介紹

太初排骨_{(태초갈비)}

• 地址：서울 마포구 어울마당로 122 2F
• 營業時間：12:00-23:00
• 前往方法：弘大入口站（홍대입구역）9號出口行1分鐘

超誇張碳燒原條韓牛牛仔骨，新鮮juicy得嚟夠惹味，而且職員全部都好熟手，包你可以食到熟度最完美嘅牛肉！呢度仲有各種主食，想試韓式料理都可以一次過食埋！

🔎弘大「太初排骨」詳細介紹

[스팟] 太初排骨（弘大店）

申美京弘大炒辣雞_{(신미경홍대닭갈비)}

• 地址：서울 마포구 서교동 364-22
• 營業時間：11:00 - 22:40（Last Order 21:50）
• 前往方法：弘大入口站（홍대입구역）9號出口行9分鐘

「申美京弘大炒辣雞」雖然位置唔顯眼，但好多人嚟到弘大都會專程嚟呢度食炒辣雞！小編最推薦嘅係「芝士蔬菜炒辣雞」，辣炒雞肉配上芝士，香口得嚟可以中和到辣度，食到差唔多叫多份炒飯就唔怕食唔飽啦！食唔到辣嘅朋友們都唔洗驚，呢度可以調整餐點嘅辣度~

Vanga炭烤雞排_{(반가 숯불 닭갈비)}

• 地址：서울 마포구 어울마당로 147-1
• 營業時間：11:00-02:00
• 前往方法：弘大入口站（홍대입구역）8號出口行3分鐘

炭火烤雞扒其實就係雞肉版燒肉，除咗有基本鹽味之外，仲會有用韓國辣椒醬醃製嘅雞扒，用炭火燒到外層微焦，非常香口！「Vanga炭烤雞排」嚴選100%韓國本地產雞肉，用高質炭火燒製而成，除咗雞扒，仲有雞柳、雞腳，加上自家秘製調味，選擇多又夠惹味！

🔎弘大「Vanga炭烤雞排」詳細介紹

[스팟] Vanga 炭烤雞排（弘大）

飽肚烤腸_{(배떼기곱창 홍대점)}

• 地址：서울 마포구 양화로18안길 26-6
• 營業時間：星期一、三至日 15:00 - 00:00（Last Order 23:30）
• 前往方法：弘大入口站（홍대입구역）8號出口行3分鐘

「飽肚烤腸」係弘大其中一間非常出名嘅烤腸店，曾經有好多電視台都嚟訪問過。呢度裝修得非常local，亦都有種復古嘅感覺。呢間餐廳最出名嘅就係呢個「雪花烤腸」啦！搽滿香辣醬汁嘅烤腸上面堆滿好似一座雪山咁多嘅芝士，簡直係天衣無縫嘅組合。因為芝士會中和返啲辣味，所以就算唔太食得辣都唔洗太擔心啊！

給豚的男人_{(돈주는남자)}

• 地址：서울 마포구 잔다리로6길 34-9
• 營業時間：
  • 星期一至五 13:00 - 23:00（Break Time 15:00-17:00、Last Order 22:00）
  • 星期六及日 13:00 - 23:00（Break Time 15:00-16:00、Last Order 22:00）
• 前往方法：弘大入口站（홍대입구역）9號出口行9分鐘

「給豚的男人」喺條巷仔入面，雖然外觀睇落其貌不揚，但係佢喺弘大連續八年攞第一！呢度嘅烤盤係用鐵煲蓋，而且會先喺外面用炭火燒熟豬肉外皮，咁做可以鎖住肉汁之餘仲會多一陣碳香！食嘅時候推薦大家可以點中間嘅特製麻藥醬汁，甜甜辣辣好惹味！而家外國人都終於可以喺網上預約啦！

🔎「給豚的男人」詳細介紹

肉山莊_(육산장)

• 地址：서울 마포구 와우산로21길 31-11
• 營業時間：16:30-22:30（Last Order 21:30）
• 前往方法：弘大入口站（홍대입구역）9號出口行9分鐘

之前小編同朋友去咗位於弘大入口站附近嘅韓燒餐廳「肉山莊」，同餐廳名一樣，成間餐廳就好似深山入面嘅山莊木屋咁！五花肉燒到金黃色之後就會放落大家面前嘅烤盤，因為已經燒熟曬+剪成一口大細，大家可以即刻開餐，而且仲有好多款醬料，可以自由mix & match！

🔎弘大「肉山莊」詳細介紹

[스팟] 肉山莊（弘大）

二代祖薯仔排骨湯_{(이대조 뼈다귀)}

• 地址：서울 마포구 동교로 196
• 營業時間：10:00 - 23:00
• 前往方法：弘大入口站（홍대입구역）2號出口行2分鐘

二代祖薯仔排骨湯係弘大最受歡迎嘅薯仔排骨湯餐廳之一，相信好多人都有食過！雖然佢而家轉咗做唔係24小時營業，但係嘢食味道同水準依然冇變！排骨肉燉得非常軟熟，而且湯底夠惹味，食到咁上下想加肉、炒飯或者麵都得！如果係自己一個人去，都可以去食一人石鍋版！

有見到想去嘅餐廳？🤤

翁多來燉雞_{(옹다래찜닭)}

• 地址：서울 마포구 양화로 122
• 營業時間：
  • 星期一至六 11:00 - 23:00
  • 星期日 11:00 - 22:00
• 前往方法：弘大入口站（홍대입구역）9號出口行5分鐘

「翁多來燉雞」位於弘大入口站9號出口附近，喺弘大超出名，價錢平得嚟份量又夠多，CP值好高。雞肉完全唔會腥，而且非常滑，加埋惹味醬汁，真係令人停唔到口。食完雞之後仲可以用剩底嘅醬汁撈飯食，食完超滿足。

🔎弘大「翁多來燉雞」詳細介紹

荒謬的生肉 弘大店_{(엉터리생고기 홍대점)}

• 地址：서울 마포구 어울마당로 118 2F
• 營業時間：11:00 - 23:00
• 前往方法：弘大入口站（홍대입구역）9號出口行1分鐘

講起韓國燒肉，相信大家應該都會諗起主打韓燒任食放題嘅「荒謬的生肉」，唔單止係遊客，連韓國人都非常鍾意嚟呢度！呢間燒肉鋪賣嘅全部都係新鮮豬肉，即叫即切，食落都安心啲。不過大家要做好心理準備午餐同晚餐時段都一定要等位，記住預多少少時間啦！Download埋我哋嘅coupon仲可以享有全單95折優惠！

🔎弘大「荒謬的生肉」詳細介紹

弘大風川鰻魚_{(풍천장어)}

• 地址：서울 마포구 동교로27길 39
• 營業時間：11:30 - 22:20（Break Time 15:00 - 16:30、Last Order 21:30）
• 前往方法：弘大入口站（홍대입구역）2號出口行6分鐘

小編當日係平日中午時間去「風川鰻魚」，開門冇幾耐就已經有好多客人，一樓更加已經坐滿曬！一入到就已經聞到超香碳烤味，職員會幫大家燒，仲會燒埋蒜頭俾大家可以配住一齊食。呢度嘅鰻魚口感同小編之前食過嘅唔太一樣，比起滑嫩嘅魚肉，呢度嘅鰻魚偏彈牙，而且味道都好惹味！

🔎「風川鰻魚」詳細介紹

[스팟] 弘大風川鰻魚代客預約服務

胖胖豬烤肉_{(통통돼지뽈살)}

• 地址：서울 마포구 어울마당로 126-1 1F, B1F
• 營業時間：11:00 - 02:00（Last Order 01:00）
• 前往方法：弘大入口站（홍대입구역）9號出口行2分鐘

「胖胖豬烤肉」位於弘大主街，喺弘大入口站行2分鐘就到。呢度大部分人都會叫套餐食，小編去嘅時候就叫咗包豬大腸同五花肉、豬頸肉同豬臉頰肉嘅set，可以同時食到幾款肉唔洗十五十六XD 推薦大家一定要叫多份招牌豬臉頰肉！

🔎「胖胖豬烤肉」詳細介紹

[스팟] 胖胖豬烤肉（弘大）

弘大貓頭鷹_{(홍대씨부엉)}

• 地址：서울 마포구 서교동 358-39
• 營業時間：11:00 - 00:00
• 前往方法：弘大入口站（홍대입구역）9號出口行9分鐘

「弘大貓頭鷹」係一間專門食炒年糕嘅餐廳，雖然地方唔大，但非常乾淨企理。鋪頭入面仲有賣弘大學生創作嘅藝術作品，賣出之後得到嘅收益會俾返學生們，大家有興趣可以支持吓佢哋。呢度嘅招牌菜係「海鮮炒年糕」 ，辣炒年糕上面擺滿曬八爪魚、扇貝、青口，仲有各式各樣嘅炸物同麵，睇到呢個賣相都覺得震撼，嚟到大家應該都會相機食先！

江南豬肉商會 弘大店_{(강남 돼지상회 홍대점)}

• 地址：서울 마포구 서교동 355-28
• 營業時間：11:30 - 00:00
• 前往方法：弘大入口站（홍대입구역）9號出口行6分鐘

唔知道大家有冇聽過「江南豬肉商會」呢間燒肉鋪呢？餐廳內部非常乾淨，不過油煙味會有少少重，介意嘅朋友們要注意啦。呢度最特別嘅地方係除咗燒肉，仲有炸雞任食！而燒肉放題嘅部位就包括冷凍五花肉、豬頸肉、豬皮同肥牛，一定有一種啱你口味。

弘大仲有邊度有韓燒放題食？

[블로그] 2025弘大燒肉任食放題推薦

橋村炸雞 弘大店_{(교촌치킨 홍대점)}

• 地址：서울 마포구 서교동 371-3
• 營業時間：12:00 - 02:00
• 前往方法：弘大入口站（홍대입구역）9號出口行6分鐘

相信有關注韓國，或者有嚟過韓國玩嘅朋友們應該都會聽過，甚至食過「橋村炸雞」。弘大呢間分店空間非常大，仲有露台位，天氣好嘅時候大家不妨可以去呢度食炸雞。呢度最受歡迎嘅就係「橋村Combo」同「橋村蜂蜜炸雞Combo」，未試過嘅記住mark低下次試！

🔎弘大「橋村炸雞」詳細介紹

兔子停_{(토끼정 홍대점)}

• 地址：서울 마포구 잔다리로2길 13
• 營業時間：11:30 - 22:00
• 前往方法：弘大入口站（홍대입구역）9號出口行10分鐘

「兔子停」係一間結合日韓風格嘅連鎖餐廳，而弘大呢間分店就有三層，裝修好靚，仲有落地玻璃，啱曬鍾意影相打卡嘅朋友們。忌廉咖哩烏冬係呢度最受歡迎嘅Menu，小編次次去都見到每枱最少會有一碗。另外呢度仲有好多非常適合相機食先嘅Menu，唔止睇得，仲好好食添啊！撳埋下面個掣領取優惠券，就可以得到9折優惠！

🔎弘大「兔子停」詳細介紹

牛雅_{(우아하게)}

• 地址：서울 마포구 동교로 185
• 營業時間：11:30 - 22:00（Break Time 15:00 - 16:30、Last Order 21:30）
• 前往方法：弘大入口站（홍대입구역）1號出口行2分鐘

牛雅主打用100%純牛肉炮製而成嘅韓式漢堡扒，仲有各款燒肉同海鮮。因為有定食，所以就算係自己一個人去都冇問題！而且因為會即場喺你面前用炭火燒，有得影又有得食XD

自己一個去旅行都想食盡好西？

[블로그] 首爾一人餐廳推介

味工房_{(미공방 홍대본점)}

• 地址：서울 마포구 동교로 185
• 營業時間：11:30 - 22:00（Break Time 15:00 - 16:30、Last Order 21:30）
• 前往方法：弘大入口站（홍대입구역）1號出口行3分鐘

如果想食比較特別嘅韓國菜，大家可以考慮去「味工房」！呢度嘅招牌美食全部都係喺其他餐廳搵唔到嘅餐點，五花肉經過恆溫慢煮3小時後用高溫油炸，外脆內嫩非常惹味。出示以下優惠券仲可以免費得到一碗蓬坪紫蘇油蕎麥拌麵，千祈唔好錯過！

[스팟] 味工房（弘大總店）

豬腳小姐 弘大總店_{(미쓰족발 홍대본점)}

• 地址：서울 마포구 어울마당로 123-1
• 營業時間：
  • 星期一及二 16:00 - 00:00
  • 星期三至日 12:30 - 00:00
• 前往方法：弘大入口站（홍대입구역）9號出口行2分鐘

有嚟過弘大嘅朋友們，相信都曾經路過，甚至去過「豬腳小姐」。呢間餐廳位於弘大主街，非常容易搵到。小編之前去嗰陣就叫咗一份中size嘅蒜味豬腳，份量非常多，唔好睇佢上面好似好多醬，好似會好鹹咁，其實呢個蒜蓉醬甜甜地，辟到肉腥味之餘仲非常惹味！不過食到最後唔多唔少都會有啲膩，建議3個人share食就啱啱好~

🔎弘大「豬腳小姐」詳細介紹

Amazing Nongkhai_{(어메이징 농카이)}

• 地址：서울 마포구 동교로 156-11
• 營業時間：11:00 - 20:30（Break Time: 15:20 - 17:00、Last Order 19:45）
• 前往方法：弘大入口站（홍대입구역）1號出口行6分鐘

講起弘大嘅泰國菜，一定唔少得「Amazing Nongkhai」，呢度有好多其他地方食唔到嘅特色泰國料理，而且好多明星都有嚟過，例如GOT7有謙同Bam Bam、仲有韓國著名廚師洪錫天都有到訪過，可想而知由幾好食啦！小編上次去叫咗4個主菜，仲食埋甜品，全部都非常地道，連泰國同事都有認證，鍾意食泰國料理嘅朋友們絕對唔可以錯過！

🔎弘大「Amazing Nongkhai」詳細介紹

弘's小章魚_{(홍스쭈꾸미 홍대본점)}

• 地址：서울 마포구 어울마당로 146
• 營業時間：11:30 - 23:00
• 前往方法：弘大入口站（홍대입구역）8號出口行3分鐘

「弘's小章魚」鋪頭門面睇落好似平平無奇，但小編去嘅時候，1樓同2樓已經坐滿曬！小編叫咗呢度最受歡迎嘅五花肉辣炒章魚，見到都流曬口水。食到差唔多，店員仲會幫大家炒個蟹籽炒飯，真係好好食（價錢入面包埋㗎！）。不過美中不足嘅係同價錢相比，份量唔算多，性價比唔太高，但鍾意食辣炒章魚嘅朋友不妨可以去試吓。

🔎弘大「弘's小章魚」詳細介紹

弘益醬蟹_{(홍익게장)}

• 地址：서울 마포구 성산동 232-12
• 營業時間：11:30 - 21:30（Break Time 15:50 - 17:00）
• 前往方法：弘大入口站（홍대입구역）1號出口行12分鐘

講起韓國特色美食，當然唔少得醬油蟹啦！而位於弘大嘅「弘益醬蟹」係一間非常出名嘅醬油蟹任食放題餐廳，入面有分一般坐席跟地席，小編去嘅時候係坐地席嘅，非常有傳統嘅感覺。其實小編一開始都唔夠膽食醬油蟹，但喺呢度食過一次之後，真係令人非常難忘。特別適逢秋冬天係蟹當造嘅季節，蟹肉非常鮮甜。呢個價可以食到高質嘅海鮮放題，真係好抵！

🔎弘大「弘益醬蟹」詳細介紹

想食醬油蟹？

[블로그] 2025首爾必食醬油蟹餐廳總整理

魂_(얼)

• 地址：서울 마포구 와우산로38길 4 1F
• 營業時間：
  • 星期一、二、三、四 17:00-01:00（Last Order 00:30）
  • 星期五 17:00-02:00（Last Order 01:30）
  • 星期六 16:00-02:00（Last Order 01:30）
  • 星期日 16:00-01:00（Last Order 00:30）
• 前往方法：弘大入口站（홍대입구역）6號出口行3分鐘

「魂」係一間充滿韓國傳統氛圍嘅酒吧，呢度出名Highball調酒種類多，而且下酒菜都好高質。餐廳內部裝修同樣都有沿用到韓國傳統建築元素，連Highball都係用韓國傳統酒同食材炮製而成，夠曬韓！

🔎弘大「魂」詳細介紹

[스팟] 魂（弘大）

以上就係小編整理出嘅2025最新弘大美食攻略，嚟到弘大唔知食咩好嘅話不妨可以參考吓~ 亦都歡迎大家留言話俾小編知你最鍾意邊間弘大餐廳！

如果你對文章內容有咩意見或者想查詢更多資訊，可以隨時喺留言區留言，或者透過電郵(help@creatrip.com)聯絡客戶服務中心。想知更多韓國最新資訊，記住follow埋我哋嘅Instagram同Threads啦！

如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！