首爾秋天必去打卡點
只要一到秋天，韓國人都鍾意去呢幾個地方影相？跟住去影相呃Like冇難度！
Hello，大家好，我哋係由韓國人每日提供最新韓國旅行資訊嘅Creatrip。
只要講到韓國秋天大家第一時間會諗到咩呢？當然就係要睇紅葉同銀杏啦！今日小編想同大家介紹幾個只要到秋天，一定有好多人去打卡嘅景點！
首爾秋天必去打卡點
天空公園(하늘공원)
- 地址：서울 마포구 하늘공원로 95
雖然好多人都會覺得，秋天就係要睇銀杏或者紅葉，但其實芒草一樣都好靚，想影到靚相一定要去天空公園！
天空公園最出名嘅係波斯菊同蘆葦芒草，波斯菊大約喺夏天結束時盛開，而芒草海就係初秋時期最靚。首爾紫芒節（서울억새축제）就喺天空公園舉辦，基本上喺10月舉行為期一星期。
INSTAGRAM：JOOPIC / OJU626
喺首爾真係好難見到咁靚嘅景色，唔少情侶，家人只要到秋天就會嚟打卡，可以被芒草或波斯菊團住，真係好療癒。
奧林匹克公園(올림픽공원)
- 地址：서울 송파구 올림픽로 424
平時奧林匹克公園好多韓國人會嚟呢度散步，但當入秋之際，波斯菊盛開，呢到就會變成一個夢幻秘境。
因為喺蠶室附近嘅夢村土城站，交通方便，只要一到秋天就好多人嚟打卡。奧林匹克公園因為地處廣大，四季都有唔同景色，喺十一月初左右，紅葉就會完全盛開，真係好靚！
楊州NARI公園(양주 나리공원)
- 地址：경기도 양주시 광사로 131-66
位於首爾近郊楊州Nari公園，近幾年成為好多韓國人同旅客，喺秋天必去嘅花海景點。雖然唔喺首爾市中心，但由首爾站搭地鐵1號線大約一個鐘車程，就會到楊州站（양주역），再轉巴士，就可以見到咁靚嘅粉紅花海。
無論係波波草（掃帚草）、粉紅亂子草，或是大波斯菊、千日紅等等，都可以喺揚州公園一覽無遺。
楊州Nari公園可以望到好多唔同色彩嘅花海，每個位都好適合打卡！如果覺得喺首爾太多人好逼，不如去遠少少嘅楊州Nari公園？
南怡島(남이섬)
- 地址：강원도 춘천시 남산면 남이섬길 1
相信大家一定對南怡島呢個地方唔陌生，好多人嚟到韓國都會去嘅韓國首爾近郊景點。而且講到秋天，南怡島嘅紅葉同銀杏景色真係令人念念不忘。
雖然好多人都去，但一定會搵到一個空曠嘅地方影出人生照。
南怡島之所以會咁吸引咁多人去，係因為四季都有唔同景色可以睇！之後都嚟南怡島留一個美好回憶啦！
首爾各大學
慶熙大學
梨花女子大學
首爾必去秋天景點又點少得慶熙大學同梨花女子大學呢？除咗睇春天睇櫻花靚之外， 秋天亦都係睇紅葉嘅好地方！紅葉滿林之時，更能襯托出學校建築嘅美，就算冇錢去歐洲都唔緊要！喺韓國大學都可以體驗到！
延世大學
延世大學只要一到秋天就會轉成鮮紅色，完全就似入咗童話故事世界咁。
成均館大學
如果比起紅葉，大家更加鍾意影銀杏，成均館大學隔離就有棵銀杏樹，只有有微風吹過，銀杏葉就會跟住飄落，大家即刻可以成為韓劇男/女主角。
以上呢幾個景點都係一到秋天好多韓國人會去打卡嘅地方！想影靚相就要Mark底啦！
如果有更多想知嘅內容，都可以隨時留言或者dm話俾我哋知：）
Mail：help@creatrip.com