韓國地名/景點啤酒介紹
韓國原來有唔少以地名而名命嘅啤酒？當中16款特色啤酒，你又飲過邊幾款？
Hello，大家好，我哋係由韓國人每日提供最新韓國旅行資訊嘅Creatrip。
韓國人有幾鍾意飲酒，相信唔使小編講大家都知，不過大家又知唔知其實韓國喺呢幾年，都出咗好多唔同地區、景點而命嘅啤酒呢？因為簡單嘅設計，加上好有特色，所以每次一出都會引嚟唔少人關注，當中大家又知道幾多款呢？或者大家又有冇飲過？今日就等小編逐一為大家介紹啦！
韓國地名/景點啤酒介紹
1. 首爾愛爾啤酒（서울 에일）
- 濃度：5%
講到韓國，第一時間當然會諗到佢嘅首都「首爾」啦！望住佢嘅包裝，大家有認得出幾多個代表景點呢？呢款啤酒飲嘅時候，會覺得有少少苦，如果本身唔鍾意飲甜嘅啤酒，大家可以試吓！
2. 漢江愛爾啤酒（한강 에일）
- 濃度：5.2%
講到漢江，大家會唔會掛住以前喺嗰度野餐呢？邊食炸雞邊飲啤酒真係一大享受！呢款啤酒有少少甜嘅草本味，再加上有淡淡嘅橙香味，夜晚飲番杯，相當之爽啊！
3. 南山愛爾啤酒（남산 에일）
- 濃度：4.5%
講到首爾，又點可以唔提南山塔呢？相信大家以前喺韓國都一定有去過，呢款啤酒有檸檬同橙等水果香氣，飲嘅時候會覺得有少少甜？味道相當特別。
4. 景福宮啤酒（경복궁 에일）
- 濃度：4.5%
景福宮同樣都係嚟首爾必去景點之一，樽身畫上「慶會樓」，啤酒加咗可以荷葉粉，聞嘅時候除咗有荷葉花香之外，仲有淡淡水果香，不過飲嘅時候都係會有啲啲苦，啱晒唔鍾意飲甜味啤酒嘅人。
5. 光化門啤酒 （광화문 에일）
- 濃度：5%
光化門啤酒樽身畫上光化門街道以及發明韓文嘅世宗大王，飲嘅時候會有少少咖啡苦味？但唔少人都推薦飲佢。
6. 首爾林手工拉格啤酒（서울숲 수제 라거）
- 濃度：5.3%
以首爾林命名嘅手工拉格啤酒，只睇樽身已經覺得好有自然嘅感覺，裡面加咗松葉香，飲嘅時候相當清爽，如果係夏天或春天去野餐，飲佢就一定無敵啦！
7. 江西啤酒（강서 맥주）
- 濃度：4.6%
江西係首爾最邊緣嘅地區？樽身用咗嗰度嘅夜景同江西區地區性指標建築「金浦機場」控制塔做設計。呢款啤酒以濃郁果香而出名，當中包括有芒果、橙等水果，鍾意飲水果香啤酒嘅朋友，之後一定要試吓。
8. 濟州wit愛爾啤酒（제주 위트 에일）
- 濃度：5.3%
濟州wit愛爾啤酒以濟州火山為形象設計，同時加咗濟州柑橘香氣，飲嘅時候甜甜地，唔少人都鍾意飲。
9. 濟州pellong愛爾啤酒（제주 펠롱 에일）
- 濃度：5.5%
濟州pellong愛爾啤酒係同wit啤酒同一間公司出產。而喺韓文「펠롱（Pel-Long）」係濟州方言，係指「閃閃發光」嘅意思。樽身簡單得嚟又夠吸引，唔少人都鍾意飲佢。
10. 濟州Slice（제주 슬라이스）
- 濃度：4.1%
濟州Slice亦都係同一間公司出產嘅啤酒，只睇包裝係咪都覺得好有水果香呢？由熱帶水果同啤酒結合，飲嘅時候覺得好爽，度數亦唔算好高，相當易入口。
11. 濟州白鹿潭（제주 백록담）
- 濃度：4.3%
唔知大家有冇去過濟州嘅白鷺潭呢？佢係濟州漢拏山山頂最靚嘅景點，同時亦係出名多海女嘅地方。
12. 海雲台啤酒（해운대 맥주）
- 濃度：4.2%
釜山出名睇海景，當中海雲台亦係每一個遊客必去嘅景點之一，呢款啤酒有淡淡菠蘿香味，夏天嚟到邊曬太陽邊飲番杯，相當之爽啊！
13. 石冰庫拉格啤酒（석빙고 라거）
- 濃度：4.6%
石冰庫係位於慶州嘅歷史古蹟，呢度由新羅時代起就係儲藏冰塊嘅倉庫，而呢款啤酒之所以會出名，就係因為佢夠清爽，唔少人飲過都話正！
14. 東宮與月池啤酒（동궁과 월지）
- 濃度：5%
東宮與月池係慶州最出名遺址之一，同時係新羅時期最靚嘅別宮，嗰度好出名睇夜景，飲嘅時候會聞到有桃味同淡淡花香美麗，唔少女仔都鍾意飲。
15. 達西啤酒（달서 맥주）
- 濃度：4.2%
達西位於大邱，樽身上印上大邱塔，度數唔算好高，如果想簡單咁飲番杯，佢都係一個幾唔錯嘅選擇。
16. 全羅啤酒（전라 맥주）
- 濃度：4.5%
全羅道啤酒只睇樽身圖案，唔知大家會唔會覺得有種豪邁嘅感覺呢？同樣度數唔算好高，簡單飲番杯，佢都係一個唔錯嘅選擇。
唔知今日同大家介紹嘅韓國各地名啤酒，當中大家飲過幾多款呢？如果大家未飲過，之後嚟又會唔會想試吓呢？歡迎大家留言話俾我哋知。
如果有更多想知嘅內容，都可以隨時留言或者dm話俾我哋知：）
Instagram：creatrip.hk