韓國韓文日嘅起源

Hello，大家好，我哋係由韓國人每日提供最新韓國旅行資訊嘅Creatrip。

每年嘅十月九日就係紀念韓文誕生嘅韓文日，亦都係韓國五個法定假期之一。我哋今日就會同大家介紹韓文，即係訓民正音嘅起源，同埋呢啲望落好似一樣嘅字到底點發音！

韓文日嘅起源

韓文嘅起源可以追溯到1446年，世宗大王宣布「訓民正音」嘅日子，呢一日就象徵韓文嘅誕生。雖然當時嘅韓國人都係講韓文，但嗰陣佢哋仲未有屬於自己嘅文字，書寫上係用漢字溝通，不過基本上淨係得兩班（韓國嘅貴族）先識睇中文。

世宗大王發明韓文「訓民正音」就係為咗促進唔同社會階級知識嘅傳播，自1928年起，韓國政府為左對世宗大王表達感激，就訂立每年十月九日為五個國家法定節日之一——韓文日。

韓文係由世宗大王同埋一班當時嘅學者喺集賢殿，一間國王建立嘅皇家研究所發明嘅。韓流文化令到越嚟越多人學韓文，咁到底大家知唔知韓文嘅起源係點？

咩係「訓民正音」？

訓民正音係喺世宗大王執政第28年嘅時候頒布嘅，喺發明訓民正音之前韓國人主要用漢字進行書面上嘅交流，但其實基本上淨係得上層階級嘅人先識點讀同埋寫漢字。喺發明韓文之後，就開始咗韓文同漢字共用嘅時期。「訓民正音」意思就係「教導人民正確嘅發音」，呢份文件記錄咗韓文創作嘅目的、起源同埋方法。世宗大王可能係世界上唯一一個為自己嘅平民創作文字嘅國王！

韓文誕生嘅故事

上面就有講過，以前韓國書面上主要透過漢字傳送訊息。不過韓文嘅口語同書寫嘅漢字完全唔同，所以都幾令人困惑。

喺以前，文盲好難先可以吸收信息同真相，就算佢哋犯咗罪，但因為唔識睇漢字，所以根本就唔知自己犯咗咩罪同埋點樣觸犯呢個罪行，更加重要嘅係唔識點樣上訴。世宗大王憐憫平民百姓，所以喺在位期間一直好努力去發明一般百姓都可以好容易學習到嘅文字。

世宗大王結合發音、天文同語言學唔同領域進行咗大量嘅研究，甚至因為咁樣而幾乎變盲，就算佢嘅視力嚴重受損，佢都仲係堅持不懈為人民創造韓文。

喺當時就算世宗大王好努力推動韓文嘅誕生，但就喺準備正式面世嘅時候受到貴族階層嘅反對，呢一班人擔心下層人士透過韓文吸收更多知識同智慧嘅時候，喺未來會越嚟越難控制，世宗大王要排除萬難先發表到韓文，令韓文成為世界上最新嘅語言之一。

韓文係點樣運作？

訓民正音有19個子音同21個母音總共40音，只要學識40音，任何人都可以讀韓文，所以韓文係相對上非常簡單同方便。

ㄱ(g)、ㄴ(n)、ㅁ(m)、ㅅ(s)、ㅇ(ng)，呢五個音就係根據發音嘅時候器官嘅運作發明，連其它子音都係以呢幾個音為基礎創造嘅。

母音ㆍ(a)、ㅡ(eu)、ㅣ(ee) 就係以天、地、人嘅形象創造，混合呢3個音就可以組合到21個母音。

因為韓文嘅運作就係將40個子音母音混合組合埋一齊，所以韓文都係世界上最容易學習嘅文字之一，就算初學者都可以好快上手。對於韓國人嚟講，呢個係唯一透過國家系統發明嘅文字，亦都係少數有自己獨特嘅風格嘅語言，所以韓國人對於韓文係非常自豪。

韓文嘅發明令韓國文盲率減少到只有1.7%，隨住年輕一代接受更多嘅教育，相信呢個數字會繼續減少，韓文更加被聯合國教科文組織挑選為世界遺產。由於書寫方便，有部分少數民族都將韓文指定為自己嘅官方語言。

漢化

大家可能都知道，雖然已經好少，但漢字仍然會出現喺媒體、新聞同廣告入面。下面就係一啲韓國仲用緊嘅漢字：

SBS

其實唔少韓國嘅老一代都識得睇部分漢字。1948年大韓民國政府成立之後，好長時間漢字同韓文都係混合咁用，喺以前嘅舊報紙見到呢種混合嘅用法。

呢份1946年6月24日出版嘅《京鄉新聞》就見到標題同正文都用咗大量漢字。1971年起，韓國政府喺中小學嘅教育體制入面刪除咗漢字學習；1988年廢除所有漢字，正式進入去漢化時期，直至1999年先取消部分禁止漢字嘅禁令。

全面禁止漢字令韓文好多同音異義嘅字造成混亂，喺韓國剩低嘅文盲入面發揮咗顯著嘅負面影響。例如「기사」可以解報紙上面嘅報導「記事」，亦可以解做揸巴士、的士、或者係火車提供公共交通工具駕駛服務嘅司機「技士」。因為呢個原因，有啲人開始支持漢字教育，高中同大學課堂都開始會教育漢字。

唔知大家睇完上面嘅文章之後會唔會想學韓文？小編覺得韓文真係算易上手嘅語言，學識韓文仲可以唔需要字幕就睇得明韓劇，唔使成日等翻譯出咗先睇到最新一集，嚟韓國旅行又可以更加方便，所以大家可以考慮下學韓文啊！

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購