東大門購物總整理

Hello，大家好，我哋係由韓國人每日提供最新韓國旅行資訊嘅Creatrip。

東大門係唔少人嚟韓國都會去嘅景點之一，呢度有唔少大型購物中心，同時係一個有好多配飾、服裝同鞋嘅批發同零售市場，無論朝早定夜晚都係咁多嘢行，今日就等小編逐一為大家介紹呢度有咩行啦！

東大門吃喝玩樂總整理

東大門購物總整理

1. DOOTA（두타몰）

DOOTA係東大門地區最大購物中心之一，總共有7層（包括3個地下室），147間時裝店、配飾店、家居用品店，加上呢度係喺主要十字路口，所以好容易搵得到。

喺DOOTA入面有Adidas、Nike、MLB、New Balance、GUESS等眾多知名品牌，每一層樓都分得好仔細，要行相當方便，好多品牌喺年底、夏季或黑色星期五都會有折扣。

如果需要買化妝品，可以去B2嘅Olive Young，呢度有好多化妝品可以揀，同時仲有唔少餐廳同Cafe、No Brand超市等。

DOOTA（두타몰）

• 地址：서울 중구 장충단로 275
• 營業時間：10:30 - 00:00、餐廳營業時間：撳我參考
• 小Tips：東大門站8號出口行198m

2. 現代百貨免稅店 東大門店（현대백화점면세점 동대문점）

現代百貨位於DOOTA同棟6樓至13樓，呢度係一間免稅店，由高級時裝、流行時裝到首飾、香水、化妝品等都有，不過提提大家，嚟到一定要帶埋護照同電子機票。

6樓有LONGCHAMP、COACH、MICHAEL KORS、MOSCHINO、VERSACE等世界知名品牌，如果想買韓國本地品牌可以去9樓同10樓，如果要買手錶同珠寶可以去8樓。

7樓有國外香水同化妝品，例如ESTEE LAUDER、Dior、MAC、TOM FORD等，但如果想果韓國國化妝品就要去12樓。

現代百貨免稅店 東大門店（현대백화점면세점 동대문점）

• 營業時間：서울 중구 장충단로 275, 6 - 13F
• 營業時間：12:30 - 21:00
• 小Tips：東大門站8號出口行198m

3. Hyundai city outlets（현대시티아울렛 동대문점）

Hyundai city outlets正正喺DOOTA同現代百貨免稅店後面，呢度可以用超平價錢，入手好多國內/外品牌。

特別係呢度嘅手袋最多人買，最多會平到去6折！而且款式仲要係靚同夠潮，之前小編見到₩69,000就可以入手。

呢度嘅皮鞋最平₩79,000起，有興趣嘅朋友一定要嚟睇吓。

Hyundai city outlets（현대시티아울렛 동대문점）

• 地址：서울 중구 장충단로13길 20
• 營業時間：星期一至四 10:30 - 21:00、星期五至日 10:30 - 21:30、餐廳（9樓）10:30 - 21:30
• 小Tips：東大門歷史文化公園站14號出口行283m

4. Migliore（밀리오레）

Migliore係東大門最早時期購物中心之一，呢度唔單止可以零售，同時仲係一個批發地方，唔少遊客都會嚟呢度Shopping，價錢唔貴，一買就會買好幾件走。

好多女性嘅衫都可以買到，恤衫同冷衫只要₩10,000以上，雖然平但唔保證每件都係咁好。

最近韓國好流行著成套運動衫同牌，一Set都只係₩15,000。

Migliore（밀리오레）

• 地址：서울 중구 장충단로 263
• 營業時間：10:30 - 02:00、逢星期一休息
• 小Tips：東大門歷史文化公園站14號出口行208m

5. Hello APM（헬로에이피엠）

Hello APM同Migliore一樣都係可以零售或者批發，好多流行緊嘅商品都可以喺度搵到。

一套睡衣大約係₩10,000 - ₩15,000， 平得嚟又夠可愛！

呢度嘅價錢標得好清楚，加上開得晏，夜晚慢慢行都冇問題。

Hello APM（헬로에이피엠）

• 地址：서울 중구 장충단로 253
• 營業時間：10:20 - 04:20、逢星期二休息
• 小Tips：東大門歷史文化公園站14號出口行135m

6. Good Morning City（굿모닝 시티）

Good Morning City就係喺Hello APM隔離，呢棟係一座綜合樓，包括桑拿、婚慶廳、戲院、保齡球場等，如果想Shopping，可以去1樓至3樓，雖然因為疫情好多間都執咗笠，不過其實都算仲多嘢睇。

2樓有Evisu男裝、女裝、童裝。

同時呢度仲有一啲中年女性嘅衫，有好多唔同款式，小編見到一件冷衫大約係￦20,000左右。

Good Morning City（굿모닝 시티）

• 地址：서울 중구 장충단로 247
• 營業時間：10:30 - 01:00、逢星期二休息
• 小Tips：東大門歷史文化公園站14號出口行5m

7. Belpost（벨포스트）

Belpost係東大門出名批發中心之一， 有4層高（包括1個地下室），呢度3樓係男性服裝賣場，比起其他地方呢度款式會多好多。

唔同年齡風格嘅衫都可以喺度搵到，冷衫同運動褲等單品通常都係￦10,000左右，價格算係OK，不過質地普通。

每一層開放時間都會唔一樣，建議大家去之前可以先check吓。

Belpost（벨포스트）

• 地址：서울 중구 마장로 19
• 營業時間：20:00 - 05:00、星期六及公眾假期休息
• 例外情況：一樓開放，除咗星期一至五 09:00 - 17:00、星期六 09:00 - 16:00
• 小Tips：東大門站7號出口行435m

8. DDP Fashion Mall（DDP패션몰）

呢間就係喺正DDP隔離，所以要去超方便，因為專門做批發，所以呢個地方由夜晚做到凌晨，呢度特別多韓國本土品牌，衣服質地都係偏好。

呢度總共有3層，主要銷售女裝同飾物，由簡約到可愛、復古風等都可以喺度搵到。

雖然係批發市場，但都有啲鋪頭係可以單買，一件恤衫￦29,000，屬於中等價位，但如果係多買，價錢相對會再平啲啲。

DDP Fashion Mall（DDP패션몰）

• 地址：서울 중구 마장로 22
• 營業時間：20:00 - 05:00、星期六及公眾假期休息
• 小Tips：東大門歷史文化公園站1號出口行364m

9. APM Place（에이피엠 플레이스）

APM Place 有8層，同樣都係由夜晚開始到朝早，所以夜晚想搵地方行，嚟呢度就最好不過。

呢度嘅服飾由OL、街頭、運動裝都可以喺度搵到，唔少老闆都會包裝得好好放喺門口等熟客嚟自己拎。

當時小編去好多鋪頭都做緊優惠，好似圖中嘅冷衫都只係￦25,000。

APM Place（에이피엠 플레이스）

• 地址：서울 중구 을지로 276
• 營業時間：20:00 - 05:00（星期六休館、星期日19:00開始營業）
• 小Tips：東大門歷史文化公園站10號出口行36m

10. 東大門其他批發市場

沿住清溪川，東大門附近仲有好多其他市場同批發中心，營業時間通常係夜晚20:00 到第二日凌晨5:00。

同啱啱介紹嘅批發市場相比，呢度空間相對細啲，而且行路可能會逼啲，設計亦都可能會冇咁時尚，不過勝咗價錢會平啲，有時好彩話唔定仲可以執到寶。

好似小編手上拎住嘅襪咁，款式都幾可愛，一對都只係￦1,000。

以下係東大門一啲市場同批發中心列表，可以參考一吓！

東大門設計廣場（DDP）

去東大門一定要去嘅地方仲有DDP，DDP個名有Dream、Design、Play嘅意思，定期會有展覽、Fashion Show、研討會、會議、國內外活動等。

DDP比想像中多嘢行，同時仲分咗五大場館，當中包括藝術廳、文化中心、設計實驗室、創意市場和東大門歷史文化公園。加上外觀精緻嘅曲線同大膽造型吸引唔少人嚟打卡，以下有3間鋪頭推薦大家嚟行。

ddp Design Store

• 營業時間：10:00 - 20:00

喺呢度可以搵到好多韓國本土品牌有趣產品，由家具到廚具、文具同服裝都有。

好似呢款咗可愛嘅蠟筆，一套係￦18,000起。

SMTOWN &STORE

• 營業時間：10:30 - 22:00

如果你係Sm家族嘅Fans，咁就唔可以錯過由SM官方經濟嘅SMTOWN &STORE啦！裡面有好多偶然Album、相、卡片、手機殼等。

NCT《UNIVERSE》專輯都只係賣緊￦11,600！

KAKAO FRIENDS

• 營業時間：10:30 - 22:00

Kakao Friends Store就係有一種魅力，只要經過都忍唔住要入去。

呢度有買好多公仔、飾物、文具等，好似圖中春植著住粉紅色褲一隻都只係￦15,000。

東大門設計廣場（DDP）

• 地址：서울 중구 을지로7가143
• 注意：每個區域開放時間都會唔一樣

DDP入面有咩好買？

東大門特色市場

1. 東大門綜合市場（동대문종합시장）

DDM MALL

東大門綜合市場總建築面積達66,000平方米，擁有超過4,300間鋪頭，每日接近200,000名人到訪，呢度睇到同買嘅嘢相當多，一入到去可能好易會蕩失路。

呢度有好多布料買，另外一邊仲有羊毛區，想冬天暖笠笠，有讀設計嘅朋友都可以喺度買啲返去發揮創意。

5樓係飾品零件批發區，可以用超平嘅價錢買到唔同款式材料，製作出屬於你嘅首飾！之前小編都有寫過一篇文章去介紹，有興趣嘅朋友，可以撳我參考。

東大門綜合市場（동대문종합시장）

• 地址：서울 종로구 종로 266
• 營業時間：每月第2、4個星期日休息
• 布料/配飾：08:00 - 18:00（星期日休息）
• 配件：09:30 - 19:00（星期日休息）
• 家具：08:00 - 19:00（星期日休息，部分鋪頭會喺第 1、3、5 個星期日營業
• 餐廳區：N洞 平日 07:00 - 18:00、 星期六 07:00 - 17:00、星期日休息 / B洞 08:00-19:00、星期日休息
• 小Tips：東大門站8號出口行135m

2. 東大門文具玩具街（동대문 문구완구거리）

呢度係韓國最大嘅文具同玩具市場，嚟到會令人諗返起細個嘅回憶，好似平時仲係會見到嘅測謊機，大約係￦19,000一個。

如果有帶小朋友嚟，相信絕對係佢哋嘅天堂，或者如果要買手信俾小朋友，呢度都係一個唔錯嘅選擇。

東大門文具玩具街（동대문 문구완구거리）

• 地址：서울 종로구 종로52길 36
• 營業時間：平日 8:00 - 19:00、週末未定
• 小Tips：東大門站4號出口行230m

東大門化妝品店

1. Olive Young（올리브영 동대문역사문화공원역점）

因為疫情嘅關係，東大門好多化妝品店都冇開，如果需要可以去現代百貨，或者Olive Young買。東大門有兩間Olive Young，一間係喺Doota入面，另一間係喺東大門歷史文化公園站14號出口附近。

呢度唔單止咗好多化妝同護膚品，同時仲有韓國最近大熱嘅減肥產品。

東大門文具玩具街（동대문 문구완구거리）

• 地址：서울 중구 장충단로 251
• 營業時間：10:00 - 23:00
• 小Tips：東大門歷史文化公園站14號出口行82m

2. Tony Moly（토니모리 동대문점）

因為係喺主街，所以好易就會搵到。

呢度好多產品都係賣緊一送一，最受歡迎嘅係防曬、洗面奶同面膜。

好多護膚套裝都做緊半價優惠，買嚟自用或者送禮都好唔錯！

Tony Moly（토니모리 동대문점）

• 地址：서울 중구 장충단로 257
• 營業時間：10:00 - 22:00
• 小Tips：東大門歷史文化公園站14號出口行148m

以上係2022年最新東大門購物嘅介紹，希望可以幫到大家啦！