首爾站「樂天超市」介紹
首爾站樂天超市就係要咁行！放行李使唔使錢？退稅/寄EMS要點做？
Hello，大家好，我哋係由韓國每日提供最新韓國旅行資訊嘅Creatrip。
嚟韓國掃貨除咗行地下街之外，每一個超級市場都至少可以留1-2個鐘，今日小編就去到首爾站樂天超市，產品超齊全，而家就同大家Update吓2023年有咩必買啦！
首爾站「樂天超市」介紹
- 地址：서울 중구 한강대로 405
- 營業時間：10:00 - 00:00
雖然好多地方都會搵到樂天超市嘅蹤影，但講到最方便同大家最易去到嘅應該就係首爾站嗰一間，因為好多車同地鐵（1號線、4號線、京義中央線同KTX）都會經過。
入去最先會見到嘅就係ATM機，如果大家帶唔夠錢嚟都唔使擔心，呢度可以用海外卡撳錢。
如果怕用卡撳錢要扣手續費，大家入到去右手邊，就會見到有WOW EXCHANGE嘅換錢機，大家可以用港幣換錢，另外機上有唔同語言揀，唔使擔心睇唔明。
換錢機後面會係客服中心，呢度可以換貨同退款等，而且仲有好多儲物櫃，只要喺度消費就可以免費用3個鐘，如果超過3日冇人拎，入面嘅嘢就會被銷毀，大家記住走嘅時候要攞返走啦。
另外如果大家有大件行李，都可以擺喺度寄放，只要喺度消費就可以免費放2個鐘，同職員講佢哋就會俾個號碼牌你㗎啦！
入口左手邊，大家會見到好多美妝店，例如：THE FACE SHOP、MISSHA、the SAEM、IOPE都可以喺度搵到。
右手邊就係賣廚房同清潔用品嘅區域，每件貨都擺放得好整齊，上面嘅指示牌全部都係韓英對照，唔洗怕搵唔到。
繼續直行會見到一間Daiso，呢度麻雀雖小，五臟俱全，甚至最近熱賣緊嘅BTS口罩呢度都有。
大家可以見到每一個架上面都擺滿曬貨，如果有買一送一優惠，仲會有個牌提提大家，有興趣嘅朋友可以再留意吓！不過要注意有部份產品需要有「L.Point」會員身份先可以用優惠價買。
行到去中間位置，大家會見到有一個小食區，呢度有辣炒年糕、魚糕、紫菜包飯等，行到攰或者口痕，都可以嚟呢度醫肚。
想買韓國小菜返香港，唔一定要去傳統市場，呢度都有好多款俾大家揀。
平時嚟韓國食飯餐餐都係多肉少菜，如果覺得唔夠營養，都可以嚟買啲生果返酒店食。
之後就要同大家介紹最期待嘅零食區！呢度有一個超大嘅賣杏仁專區，所有口味都好齊全，好似上圖￦9,900就有30包，買嚟做手信真係幾唔錯！
大家嚟到都會買嘅紫菜，款式應有盡有，而家比卡超喺韓國超紅，唔少產品都有做聯名，就連紫菜都唔例外。
樂天超市嘅零食種類真係超多，有好多款仲超級平，大家去到可能都會忍唔住不斷入手。
雖然香港都有唔少韓國公仔麵賣，不過講到最正宗同好味，一定係喺韓國直接買，款式多得嚟價錢仲要平啲！
小編去嘅時候係10月份，仲有一個區域係擺滿萬聖節零食添！
孔劉Oppa代言嘅KANU咖啡，或者韓國最出名嘅MAXIM咖啡成日都會大減價，同時仲會有好實用嘅贈品，每次嚟韓國絕對必買！
韓國茶類一樣都係唔少人嚟到會入手嘅手信，唔同牌子有超多口味，真係每款都想買嚟試吓！
如果想盡顯孝心，買啲韓國禮盒裝嘅手信俾屋企人，呢度都有唔少人蔘同紅蔘賣，一罌罌嘅柚子茶都好受遊客歡迎。
不過唔好以為樂天超市只得一層，其實中間有一條扶手電梯可以上到2樓。
上到2樓第一眼會見到嘅就係樂天HIMART，如果想睇吓韓國家電都可以去行返個圈。
另外一邊仲有玩具反斗城、MUJI、TOPTEN，同埋一啲賣小朋友服飾嘅鋪頭。
如果大家已經買爆喼唔夠位放，喺2樓都有得買。
行哂所有之後，就可以落返1樓俾錢。
而家韓國唔少超市都會有分自助俾錢同人工收銀處，如果大家之後嚟旅行，想一卡走天下，可以試吓申請NAMANE卡！
只要買滿￦30,000就可以退稅，有需要嘅朋友可以去收銀機附近睇吓，有唔同語言，操作相當簡單。
如果大家嚟嘅時候買太多，都可以用樂天超市提供嘅紙箱（喺賣杏仁嘅正後方），不過佢哋冇提供膠紙同繩，有需要用到紙箱嘅朋友，可能需要自備。
另外大家可能會記得之前首爾站樂天超市係有提供EMS送貨，不過而家停咗，如果之後有更改，小編會再同大家Update返！
睇完小編超詳細嘅首爾站樂天超市介紹，唔知又幫唔幫到大家呢？
首爾站「樂天超市」前往方法
去到首爾站之後，往1號出口方向行。
出到嚟之後搭扶手電梯上去。
上到去之後往右手邊直行。
之後就會見到樂天超市入口。
如果有更多想知嘅內容，都可以隨時留言或者dm話俾我哋知：）
Instagram：creatrip.hk