Hello，大家好，我哋係由韓國人每日提供最新韓國旅行資訊嘅Creatrip。
韓國Cafe文化興盛，唔知係咪因為咁，韓國有好多特別主題嘅Cafe，今天要為大家介紹嘅係首爾靚靚韓屋咖啡廳，一齊嚟感受吓呢種傳統美嘅氣氛啦！
首爾韓屋咖啡廳推介
一人一杯(1인1잔)
- 地址：서울 은평구 연서로 534
- 營業時間：星期二至日 10:00 - 21:00、逢星期一休息
- 前往方法：延新川站（연신내역）3號出口搭7211號巴士
大家仲只係會諗到景福宮？咁你就跟唔上韓國潮流啦！而家好多人都轉咗去恩平韓屋村，嗰度有超多間打卡Cafe，當中以「一人一杯」最為出名，落地玻璃窗仲可以望到整個韓屋村！
鋪頭入面本身係以木質裝修為主，完美打造出華麗韓屋風景。除咗內部打卡靚之外，出面都有一個超靚打卡位等住大家嚟影！
新老茶館(신옛찻집)
- 地址：서울 종로구 인사동길 47-8
- 營業時間：
- 星期一 10:00 - 20:00
- 星期二至五 10:00 - 21:00
- 星期六至日 10:00 - 22:00
- 前往方法：安國站（안국역）6號出口行5分鐘
「新老茶館」係一間超過130年歷史嘅韓屋，亦都成為一間非常受當地人歡迎嘅Cafe超過30年。入面有好多植物，同韓屋營造出好特別嘅氣氛，俾人一種好舒服嘅感覺。
小編之前就試咗佢哋嘅紅豆冰同糯米糕，兩款都好味而且打卡都好睇，推薦大家一定要嚟試！
清水堂(청수당)
- 地址：서울 종로구 돈화문로11나길 31-9
- 營業時間：10:30 - 21:00
- 前往方法：鍾路3街站（종로3가역）4號出口行3分鐘
益善洞係好多人嚟到都會去嘅景點之一，呢度都隱藏唔少韓屋Cafe 㗎！呢間「清水堂」喺2020年5月開幕，直到而家都好受歡迎，每次去都會見到排長龍要等位。
呢度氣氛好好，飲品同甜品都好唔錯，想去韓國呢排最熱門嘅Cafe，呢度絕對係其一！
樂園驛(낙원역)
- 地址：서울 종로구 수표로28길 33-5
- 營業時間：11:30 - 22:30
- 小Tips：鍾路3街站（종로3가역）4號出口行2分鐘
Instagram @pbpbvv
位於益善洞嘅樂園驛最特別係有條火車軌，所以吸引到唔少人去打卡，每到lunch time或者weekend都會爆滿，建議大家如果想去嘅話就要早少少啦！
Instagram @hyo_ni125
佢哋嘅招牌飲品有石炭咖啡同花生鮮奶咖啡，有興趣嘅朋友之後都可以試吓。
Baskin Robins 31 三清洞店(베스킨라빈스 삼청마당점)
- 地址：서울 종로구 율곡로3길 74-1
- 營業時間：
- 星期一至四、日 10:00 - 21:30
- 星期五及六 10:00 - 22:30
- 前往方法：安國站（안국역）1號出口行7分鐘
雖然BR本身係一個美國雪糕品牌，不過好多人嚟到韓國都一定會去食，因為佢每個月都會出新口味。原來佢哋喺三清洞仲有一間以韓屋style裝修嘅特別分店！雖然內部唔算好大，入面大約就可以坐到10幾個人，不過既然嚟到，都好推薦大家一定要嚟感受吓呢度嘅氣氛。
小編叫咗凍美式咖啡同窩夫雪糕와와떡，呢個窩夫裡面仲有好煙韌嘅年糕，同雲呢拿雪糕一齊食真係特別好味！食嘅時候會明白點解咁多人都推佢，而且會好有衝動會想再食多個添！
大悟書店(대오서점)
- 地址：서울 종로구 자하문로7길 55
- 營業時間：12:00 - 21:00
- 前往方法：景福宮站（경복궁역）2號出口行8分鐘
「大悟書店」係首爾嘅古老書店，歷史悠久，而家內部仲有埋cafe！各位Kpop迷應該都好熟悉呢個地方，因為之前好多偶像都喺度拍過MV或者嚟打卡，就好似有BTS RM、NCT、Super Junior 藝聲、IU等。
小編叫嘅柚子檸檬茶係之前BTS RM叫過嘅飲品，另外仲叫咗杯凍朱古力，不過兩杯飲品都好甜。但係如果想跟住韓星去打卡，都幾推薦大家嚟返轉！
J.Hidden House(제이히든하우스)
- 地址：서울 종로구 종로 269-4
- 營業時間：12:00 - 18:00
- 前往方法：東大門站（동대문역）10號出口行1分鐘
如果唔想去咁遠，近近地東大門都有一間結合傳統同現代風格嘅「J.Hidden House」Cafe，呢度由1915年興建至今，已經有過百年歷史。無論係室內定室外、早上定係夜晚、任何季節嚟都好，呢度都好適合打卡！
呢度甜品同飲品款式多而且幾好食，重點係價錢唔算貴，大家打完卡都可以悠閒嘆返杯咖啡休息吓。
Onion 安國店(어니언 안국)
- 地址：서울 종로구 계동길 5
- 營業時間：平日07:00 - 22:00、週末 09:00 - 22:00
- 前往方法：安國站（안국역）3號出口行3分鐘
講到韓國最有人氣韓屋Cafe，莫過於景福宮隔離嘅「ONION」，一開始由聖水洞起家，之後再喺安國站開分店，人氣一樣都係爆棚，無論幾時去都係超多人。
鋪頭內、外都裝修得好有韓屋特色，呢度唔單只係一個打卡景點，更加有唔少人為咗呢度嘅甜品而嚟～
CAFE 58.4(카페58.4)
- 地址：서울 성북구 성북로16길 4-13
- 營業時間：
- 星期二至日 10:00 - 22:00
- 逢星期一、每個月最後一個星期二休息
- 前往方法：漢城大入口站（한성대입구역）5號出口行12分鐘
CAFE 58.4 位於首爾地鐵4號線漢城大入口站5號出口附近。戶外露台區有好多位，感覺喺繁忙都市生活中，可以坐低飲杯咖啡好好放鬆。
而室內都係韓屋裝修，推薦大家叫呢度嘅招牌水果飲品，色彩鮮艷影落都靚啲！
喝茶的庭院(차마시는뜰)
- 地址：서울 종로구 북촌로11나길 26
- 營業時間：星期一、三至日 10:00-19:00
- 前往方法：安國站（안국역）1號出口行15分鐘
位於北村韓屋村嘅「喝茶的庭院」同樣都係由韓屋改造而成，呢度俾人一種古代韓國人住家嘅感覺，充滿古典美、家具同茶點令人印象深刻。
嚟到「喝茶的庭院」嘅時候，推薦大家可以坐喺窗邊，一邊望住庭院，一邊嘆返杯茶。
Tea Therapy(티 테라피)
- 地址：서울 종로구 윤보선길 74
- 營業時間：10:00-21:00
- 前往方法：安國站（안국역）1號出口行6分鐘
如果只係普通去韓屋Cafe都覺得仲未夠特別？「Tea Therapy」有埋足浴同韓方茶服務，咁就有哂特色啦！
呢間Cafe藏身喺北村小巷裡面，做完韓方茶諮詢之後，就可以坐喺露天足浴台，享受老闆精心調配嘅足浴配方同韓方茶，係一個相當特別嘅體驗。
Green Mile(그린마일커피)
- 地址：서울 종로구 북촌로 64
- 營業時間：
- 星期一至三 09:00-18:00
- 星期四及五 09:00-19:00
- 星期六及日 10:00-19:00
- 前往方法：安國站（안국역）2號出口行10分鐘
近幾年，韓國越嚟越多Roof Top Cafe，呢一間「Green Mile」更係結合埋韓屋風格，唔少人都會嚟呢度打卡。上到Roof Top雖然會覺得有一種傳統嘅感覺，但其實喺一樓內部會覺得好有現代feel。
佢哋嘅Tiramisu超有人氣，而且價錢唔貴，推薦大家要嚟試！
fritz桃花店(프릳츠 도화점)
- 地址：서울 마포구 새창로2길 17
- 營業時間：平日08:00 - 22:00、週末10:00 - 22:00
- 前往方法：麻浦站（마포역）3號出口行4分鐘
「fritz」係一個喺濟州島起家嘅韓國咖啡品牌，喺首爾都有幾間分店，而桃花店位於孔德站同麻浦站中間，裝修行韓屋風格，只睇外觀已經可以感受到復古氣氛同簡約現代設計。
鍾意飲咖啡嘅朋友們記住一定要試呢度嘅咖啡，而因為呢度係用麵包師一齊開嘅鋪頭，所以每日都會有好多新鮮出爐嘅麵包！
LOW ROOF(로우루프)
- 地址：서울 종로구 북촌로 46-1
- 營業時間：10:00 - 20:00、逢星期一休息
- 前往方法：安國站（안국역）2號出口行7分鐘
Instagram @for_nan2
「LOW ROOF」 係一間位於北村韓屋村嘅Cafe，同時擁有傳統同現代氣氛，超特別！Cafe入面同出面都有座位，兩個地方都有唔少打卡位！
Instagram @skimmed13
除咗有最近流行嘅蛋糕、牛角包等甜品之外，呢度仲有好似藥果咁嘅傳統小食，之後不妨喺度嘆番杯咖啡休息吓啦！
Donut Jungsu昌信店(도넛정수 창신)
- 地址：서울 종로구 창신12길 40
- 營業時間：11:30 - 21:00
- 前往方法：昌信站（창신역）3號出口搭鍾路03號巴士
Instagram @mongguri_.mong
雖然佢係以韓屋Cafe做主題，但主要買嘅係冬甩！冬甩味道融合傳統同現代口味，選擇多之餘外觀夠特別，價錢都算合理。
Instagram @yoongyu.um
呢度總共分咗兩層，2樓有一個落地玻璃窗，可以欣賞到南山同N首爾塔嘅景，黃昏時候去，景色真係超靚！
壽硯山房(수연산방)
- 地址：서울 성북구 성북로26길 8
- 營業時間：
- 星期三至五 11:30 - 17:50
- 星期六 11:30-21:50
- 星期日 11:30-19:40
- 前往方法：漢城大入口站（한성대입구역）6號出口搭 2112/1111號巴士
「壽硯山房」係一間喺城北洞出名安靜同豪華嘅韓屋Cafe，聽講活躍於1930年代小說家李泰俊喺度生活過13年。
Instagram @hyo_82
呢間Cafe建於1933年，雖然聽落好似好古老，不過就有好多人會陷入佢嘅魅力當中。小編推薦可以食佢哋嘅甜南瓜刨冰同飲佢哋嘅大棗茶，價錢雖然偏貴，不過可以搵個地方靜靜地休息都值！
如果有更多想知嘅內容，都可以隨時留言或者dm話俾我哋知：）
Mail：help@creatrip.com
