前往釜山交通總整理
韓國各地前往釜山攻略！除咗KTX仲有咩選擇？
Hello，大家好，我哋係由韓國人每日提供最新韓國旅行資訊嘅Creatrip。
時隔三年，嚟韓國玩終於唔需要簽證，仲唔使隔離，相信好多朋友都開始plan住飛返轉韓國，玩返夠本。
雖然大部分人嚟韓國玩都會選擇去首爾，但亦都唔少人會將釜山都放埋係schedule入面，由首爾玩到落釜山。今日小編就整理咗喺韓國各地前往釜山嘅交通方式，有需要嘅朋友們可以參考。
前往釜山方法
1. 直航機
釜山係韓國第二大城市，呢度都有一個機場叫「金海國際機場」，無論係國際航班定韓國本地航班都可以去到！之前疫情嚴重嘅時候一度停曬由香港飛釜山嘅航班，不過自從疫情放緩之後就開始加返航班啦！截至小編最近check，暫時得HK EXPRESS（香港快運航空）有提供釜山直航機，大家終於唔洗經首爾嚟啦！
2. KTX/火車/SRT
如果大家會先去首爾玩幾日，去釜山嘅時候就可以揀搭KTX、一般火車或者SRT。
搭KTX去釜山
身處韓國，想要去釜山嘅話，KTX會係最方便嘅方法，喺首爾搭KTX去釜山只需要大約兩個半鐘，非常快。
| 首爾站出發 [需時2個半鐘] | ₩59,800 |
| 大田站出發 [需時1個半鐘] | ₩36,200 |
| 東大邱站出發 [需時1個鐘] | ₩17,100 |
*票價於2023.09.09更新
KTX班次選擇多，亦都會經過首爾、大邱、大田、蔚山呢啲大站，非常方便。不過如果你要由木浦、江陵等等嘅城市去釜山，你就需要先搭車去上述嘅KTX主要車站再轉KTX，或者直接喺當地嘅火車站搭一般火車去釜山。
搭一般火車去釜山
除咗KTX，大家都可以選擇搭車費比較平嘅一般火車去釜山，不過小編就唔太推薦啦。
以無窮花號為例，由首爾去釜山單程只係需要₩28,600，幾乎係KTX車費嘅一半，不過就要搭成5-6個鐘。如果係因為budget唔夠要慳旅費，或者完全唔趕時間，一般火車可能會係一個比較好嘅選擇，但係普通情況下，都會揀KTX。
喺首爾搭SRT去釜山
- 車費：₩52,000
除咗KTX，喺首爾出發嘅朋友們仲可以選擇搭SRT，不過就唔係喺首爾站上車，而係要去到位於首爾東南方嘅水西站（수서역）搭。SRT火車嘅座位空間比較闊，亦都有頭等艙可以揀，最快嘅班次可以用2小時10分鐘就去到釜山。
3. 長途巴士/高速巴士
如果唔想搭火車，大家可以選擇搭長途高速巴士。巴士雖然會慢過KTX同SRT，但車費比較平，亦都會快過一般火車，仲有凌晨出發嘅班次，天光就可以去到釜山。
長途高速巴士嘅車飛價錢會根據車種類型，同埋幾時出發而有所不同，大家訂車飛嘅時候記住要睇清楚。
喺首爾搭高速巴士去釜山
- 車程大約需時4至4.5小時
| 東首爾巴士站 → 沙上 | 優等 | ₩40,700 |
| 高速 | ₩27,300 | |
| 深夜優等 | ₩44,700 | |
| 深夜高速 | ₩30,000 | |
| 首爾京釜 （高速巴士轉運站） → 釜山 | 優等 | ₩39,700 |
| 高速 | ₩26,700 | |
| 深夜優等 | ₩43,600 | |
| 深夜高速 | ₩29,300 | |
| Premium | ₩51,600 | |
| 深夜Premium | ₩56,700 | |
| 首爾京釜 （高速巴士轉運站） → 沙上 | 優等 | ₩40,400 |
| 高速 | ₩27,200 | |
| 深夜優等 | ₩44,400 | |
| 深夜高速 | ₩29,900 | |
| Premium | ₩52,500 | |
| 深夜Premium | ₩57,700 |
*票價於2023.09.09更新
大家要注意，釜山有兩個巴士轉運站，分別係位於釜山地鐵2號線沙上站嘅「釜山西部巴士轉運站」，同埋位於釜山地鐵1號線老圃站嘅「釜山綜合巴士轉運站」。
由老圃站搭地鐵去西面站要30分鐘，但係由沙上站搭地鐵去就只要15分鐘，去海雲台、廣安里等等嘅釜山景點都好近，唔使轉車。所以大家記住要check清楚自己喺釜山嘅行程同住宿位置，去揀喺邊個車站落車。
喺其他城市搭巴士去釜山
| 大田出發 | 約3小時 | ₩18,400 - ₩29,900 |
| 東大邱出發 | 約1-1.5小時 | ₩7,500 - ₩12,100 |
| 光州出發 | 約3小時 | ₩19,400 - ₩40,800 |
| 慶州出發 | 約1小時 | ₩6,000 - ₩8,400 |
*票價於2023.09.09更新
基本上每個城市都有去釜山嘅長途巴士，以上係比較熱門嘅地點，如果大家有想知道嘅資訊，歡迎留言話俾我哋知。
4. 韓國國內線
大家亦都可以直接喺韓國境內搭國內線去釜山，所以大家有時間可以順便睇埋機票網站，有時候來回機票錢可能仲會平過KTX㗎！
| 金浦機場起飛/降落 | 濟州機場起飛/降落 |
| 大韓航空 釜山航空 濟州航空 德威航空 首爾航空 真航空 | 大韓航空 釜山航空 濟州航空 真航空 |
通常由首爾出發去釜山嘅航班都會係喺金浦機場搭，大約1個鐘就會到。而喺濟州去釜山甚至1個鐘都唔使，非常方便，只要喺起飛前1-2個鐘前Check-in就得。
降落釜山機場之後，大家有幾個方法可以出到釜山市區，而搭地鐵去釜山市中心大概需要30分鐘，搭的士就大概20分鐘左右，大家plan行程嘅時候記住要注意啦。
去釜山玩嘅你可能需要...
釜山機場/釜山站接送服務
大部份朋友可能都係第一次落釜山玩，如果係一家大細嚟，拖住咁多行李仲要搵路去住宿都真係幾麻煩。呢個時候可以考慮預約呢個由HANARO Taxi提供嘅接送服務，高級的士由釜山機場/釜山站直接送你去目的地！
以上就係小編今次整理嘅內容，希望可以幫到即將要去釜山玩嘅朋友們，亦都希望大家有時間嘅話不妨離開首爾，去釜山感受吓韓國嘅另一面啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk