仁川機場膠囊酒店「閣樓休」介紹
搭凌晨機太早未有得Check-in，唔知去邊度休息好？不如就去仁川機場膠囊酒店「閣樓休」啦！
Hello，大家好，我哋係由韓國人每日提供最新韓國旅行資訊嘅Creatrip。
去旅行為咗可以爭取時間想玩多啲，好多時都會搭凌晨機，但有時太早到酒店又冇得check in，或者有時要搭早機返去，唔知可以去邊短暫休息嘅朋友，今日小編想同大家介紹仁川機場「閣樓休」膠囊酒店，相信可以幫要嚟韓國咁多位！
仁川機場膠囊酒店「閣樓休」
仁川T1
- 位置：1樓交通中心中央
- 營業時間：00:00 - 24:00
仁川T2
- 位置：B1交通中心東邊
- 營業時間：18:30 - 08:30
韓國第一間機場膠囊酒店「閣樓休」，喺仁川機場T1/T2都有，而今次小編去嘅係T1「交通中心1樓」分館。
閣樓休入住價格
| 08:00 - 20:00之間 入住3小時 | 單人（共用廁所） ₩27,000 |
| 單人（獨立廁所） ₩32,000 | |
| 雙人（共用廁所） ₩35,000 | |
| 雙人（獨立廁所） ₩41,000 | |
| 20:00 - 08:00之間 入住12小時 | 單人（共用廁所） ₩62,000 |
| 單人（獨立廁所） ₩72,000 | |
| 雙人（共用廁所） ₩78,000 | |
| 雙人（獨立廁所） ₩84,000 |
喺仁川機場閣樓休附近，有CGV電影院、KFC、便利店等設施，大家唔需要擔心要行好遠先有嘢食。
雖然閣樓休大廳唔算好大，不過都算乾淨，而且仲有分休息區、報章雜誌區、電腦區，如果有大型行李仲可以卜大喺櫃檯。
對於商務旅客嚟講，閣樓休裡面仲有電腦同影印機可以免費用，1人限印10張，相當貼心（超過就要另外俾錢）。
喺休息室大廳仲可以直接確認仁川機場航班出入境情況，等客人休息同時仲可以隨時追蹤班機。
小編個人認為，閣樓休優點係呢度價錢相當透明、公開，有需要可以另外加鐘。
櫃檯隔離有自助Check In機器，系統有中文、英文、韓文同日文揀，唔怕睇唔明，機器只可以用信用卡俾錢，呢點大家要留意吓。
俾完證件同錢之後就會拎到房卡，大家只要跟住地板指示，就可以搵到自己間房。
「閣樓休」總共分成４個GATE，有60間客房，數量比想像中多，內部係以日系灰白色門搭配棕色木牆，俾人好舒服嘅感覺。
小編原本以為單人房可能會好逼，點知入到去發現比想像中大，每一個角落都好乾淨、整齊，隔音效果都唔錯，對於想短暫休息、臨時喺仁川機場過夜嘅遊客嚟講，呢度可以話係物超所值。
小編揀嘅房型係連埋廁所，裡面有淋浴露、洗頭水、毛巾、拖鞋等，但冇提供牙刷同牙膏，如果有需要可能要自備或去到現場買。
洗手同浴室係分開，呢點小編覺得做得幾唔錯，而且好乾淨同整齊。
閣樓休為咗舟車勞頓遊客可以瞓得舒服，特別選用席夢思床褥，令人好滿意。
床頭仲有各式插座同叉電位、風筒、藍牙喇叭、燈等。
閣樓休有分獨立同共用廁所，價錢唔係差好遠。
不過提提大家：共用廁所只係得兩個花曬位，如果夜晚去可能需要等。
如果同其他人一齊用可能會有啲唔方便或尷尬，小編建議加少少錢租獨立廁所房型，等自己舒服啲。
整體嚟講小編覺得幾唔錯，設備、服務、價錢都令人滿意，推薦俾之後有需要嘅朋友。
要點樣先去到閣樓休？
備註：小編介紹嘅係仁川機場T1閣樓休
仁川機場T1往機場鐵路、磁浮鐵道方向行。
行到底之後往右邊扶手電梯落去。
之後就會見到閣樓休㗎啦！
以上就係2024年仁川機場閣樓休資訊，希望可以幫到大家啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
