首爾去仁川機場AREX直通車攻略（2026最新版）

Hello，大家好，我哋係由韓國人每日提供最新韓國旅行資訊嘅Creatrip。

去韓國旅行，最多人都係由仁川機場出入境。如果想由首爾市區去機場，或者由機場快速去到市區，機場快線「 AREX」 直通車會係唔少旅客嘅熱門選擇。AREX直通車由首爾站直達仁川機場T1同T2，中途唔會停其他站，車程快、座位舒服，而且可以放行李，對於趕飛機或者拎住大件行李嘅朋友嚟講都方便好多。

今次小編就幫大家整理咗AREX簡介、時間表、購票方法、首爾站/機場搭車位置、同一般列車嘅分別，仲有小編私藏小貼士。如果你都準備去韓國旅行，記得先bookmark定呢篇文，到時出發就冇咁易手忙腳亂啦。

仁川機場快線AREX直通車攻略

韓國機場快線AREX係咩嚟？

AREX（Airport Railroad Express）即係連接首爾站同仁川機場嘅機場鐵路，當中分為一般列車同直通車。而因為AREX直通車只會停靠仁川機場T1、T2同首爾站，中途唔會停其他站，所以可以慳返好多時間，可以話係由首爾站去仁川機場最快方法之一。

[이미지 슬라이더]     

AREX車廂會比較似港鐵東鐵線頭等車廂咁，座位比較闊落同舒服。而且因為買飛嘅時候需要指定座位，所以包保一定有位坐，仲可以揀同同行人士一齊坐。

另外AREX車廂亦設有大型行李擺放空間，就算拎住大喼都方便上車。車上更有提供免費Wi-Fi同充電插頭，4號車廂仲設有洗手間，整體乘車體驗會比一般列車更舒服。

如果你想用一個更快、更舒服嘅方式往返首爾站同仁川機場，尤其係行李比較多、唔想同人逼一般列車，或者想更容易掌握去機場時間，小編都幾推薦你搭AREX直通車。特別係住喺首爾站附近嘅旅客，搭AREX會更加方便；如果你仲會打算使用首爾站都心機場服務，咁AREX直通車就更加啱你啦！

機場快線AREX特點小總結

AREX同一般機場快線有咩分別？

好多人都可能會問，韓國唔係本身都有條機場快線㗎咩，呢個又同AREX直通車有咩分別啊？一般列車唔需要事先買飛（可以直接嘟交通卡入閘），班次密（大約5~15分鐘一班車），中途亦會停好多其他車站。所以如果你住喺弘大、孔德、數碼媒體城附近，其實一般列車有時反而會更方便。

雖然可以去到嘅地方會多咗（例如最多人去嘅弘大入口站），但係一般列車缺點就係真係超多人搭，返放工時間基本上唔會有位坐，加埋咁多遊客嘅行李，都真係幾逼狹。想坐得舒服啲嘅朋友們建議去搭AREX直通車，然後再喺首爾站轉車，都一樣咁方便。

AREX直通車VS一般機場快線比較表

機場快線AREX直通車時間表

仁川機場 → 首爾站

※最後更新：2026.04，實際可參考AREX官網資訊

首爾站 → 仁川機場

※最後更新：2026.04，實際可參考AREX官網資訊

AREX直通車一般由清晨開始營運，班次大約30至40分鐘一班，不過要注意因為AREX時間表有機會因營運安排、平日/假日班次而調整。

💡小編小貼士：AREX直通車雖然快，但始終唔係幾分鐘一班，所以買飛嘅時候記住一定要預留入閘同落月台時間、機場辦理登機/過海關時間，而且建議你出發前再次確認AREX官網最新時間表；如果你係夜晚班機，尤其要先睇清楚尾班車時間！

機場快線AREX車票點買？（預約方法）

AREX直通車車票可以現場購買，亦可以事先網上預約。小編個人兩種都試過，不過因為AREX直通車係指定座位制，同普通火車一樣，比較熱門嘅時段可能會客滿，所以可能會遇到買唔到飛要等下一班，搞到時間好緊迫嘅情況。所以如果可以嘅話，小編強烈建議大家先上網買定，可以預先安排好時間、流程更順暢。

1. 現場購票

如果你未有事先預約，可以去首爾站B2/F、仁川機場T1同T2嘅B1/F交通中心直通車顧客服務中心購買AREX直通車車票。好似頭先所講，現場買飛雖然方便，但熱門時段未必一定可以買到，所以如果你本身趕時間，最好都係提早網上安排好。

2. AREX官網購票

想事先喺網上買AREX直通車車飛，其中一個方法係可以直接去AREX官網買飛，入到去之後揀出發車站同到達車站，然後輸入日期、時間、人數等資訊同付款就可以預約到AREX直通車車飛。

3. 透過Creatrip預約

如果大家想直接用港幣預約，同時用平過官網同現場嘅價錢買到AREX直通車車飛，推薦大家可以透過Creatrip預約！喺Creatrip預約之後會收到一個預約編號，到時候去AREX官網或者現場自助售票機換領門票嘅時候輸入就唔需要另外俾錢，直接可以攞到AREX車票。詳細預約方法可以參考以下説明：

Creatrip購票&網上換領車票流程

STEP 1 | 輸入相關資訊及付款，購買AREX車票

[스팟] 仁川機場快線AREX直通車票

STEP 2 | 訂單成立後，你將會收到一份電子憑證，你亦可以去我的頁面查看相關訂單

STEP 3 | 有效期（購買後6個月）內前往AREX網站預約使用日期

STEP 4 | 於AREX網站選擇希望預約之日期

• 根據乘搭航班嘅航空公司可以揀T1/T2上落車
• 可查詢出發日期為當日後2個月內嘅日子
• 可以查詢當前時間後面嘅列車時間
• 最多可以預訂12位，包括成人同小童
• 6歲以下小童喺監護人陪同下免費，但冇另外提供座位，如果需要就要另外買車票

STEP 5 | 確認時間後，撳「預約」
※如果你揀嘅時間冇位，將會顯示售罄

STEP 6 | 可以選擇會員預約（需自行加入會員）或非會員預約
※以下步驟將以非會員預約為主

STEP 7 | 進行電子郵件驗證，你會收到一個6位數字驗證碼，然後設定車票確認編號
※車票確認編號係之後用嚟登入確認車票資訊嘅時候嘅密碼

STEP 8 | 座位將會隨機安排，如需換位請選擇「變更座位」；同時請檢查時間同方向，如有需要可以選擇「列車變更」去改班次

STEP 9 | 呢個時候頁面上會顯示原價，請撳「選擇優惠」進入輸入優惠編號頁面

STEP 10 | 於「兌換序號」輸入預約記錄中所示之13位數編號，驗證後結賬金額將變為0，然後撳「確認」

STEP 11 | 成功換領後將會出現AREX電子車票頁面，請列印、截圖或以PDF儲存QR CODE
※下列車票為範例，僅供參考

STEP 12 | 當日請於現場掃QR CODE入閘

• 出發前30分鐘起可以進入閘口
• 最遲要喺出發3分鐘前到達月台
• 由於要對QR Code / 車票、搵月台、確認車卡同座位，最好唔好壓線到

💡小編小貼士：如果搭唔到本身預約時間嘅列車，列車出發前你都可以喺官網更改時間，第一次改免費，但之後每改一次要收取₩1,000手續費（最多只可以改3次）。

Creatrip購票&現場換領實體車票流程

STEP 1 | 輸入相關資訊及付款，購買AREX車票

[스팟] 仁川機場快線AREX直通車票

STEP 2 | 訂單成立後，你將會收到一份電子憑證，你亦可以去我的頁面查看相關訂單

STEP 3 | 有效期（購買後6個月）內前往首爾站、仁川機場T1或T2換領車票

STEP 4 | 前往指定地點，尋找直通車自助售票機器（직통열차 승차권발매기）
※首爾站B2/F、仁川機場T1同T2嘅B1/F交通中心直通車顧客服務中心

STEP 5 | 選擇目的地

STEP 6 | 選擇時間

STEP 7 | 選擇人數及座位

STEP 8 | 撳「Voucher」

STEP 9 | 輸入預約記錄中所示之13位數編號/Scan預約憑證中QR CODE，領取車票

STEP 10 | 前往閘口掃門票上QR Code入閘

• 出發前30分鐘起可以進入閘口
• 最遲要喺出發3分鐘前到達月台
• 由於要對QR Code / 車票、搵月台、確認車卡同座位，最好唔好壓線到

首爾站點樣去AREX直通車月台？（上車位置）

首爾站AREX月台位置

• 往仁川機場方向AREX搭乘處：首爾站B7/F
• 往仁川機場方向AREX搭乘處：首爾站B3/F
  • 大家可以前往其他樓層轉乘地鐵（如果需要搭KTX，請到2/F）

如果你住嘅地方唔係喺首爾站附近，大家可以搭1號線、4號線或者京義中央線去到首爾站再轉AREX。首爾站真係好大，第一次去可能會有少少亂，行到一半可能會懷疑自己係唔係行錯路。下面小編會教大家搭完1號線之後可以點行去搭機場快線，就算大家係搭其他地鐵線，只要跟住「Airport Railroad」、「공항철도」、「仁川國際機場」指示牌都可以輕鬆搵到上車位。

💡小編小貼士：如果住宿喺弘大入口站/2號線地鐵站附近，直接喺弘大入口站轉乘一般機場快線會比較方便！

前往首爾站AREX月台方法

落車之後跟住
Airport Railroad（공항철도）指示牌行

嘟卡出站，然後繼續直行

搭扶手電梯上去

繼續沿住指示牌行

行到尾就會見到
「Airport Railroad」入口

搭扶手電梯落去

最後就會去到B2/F「機場鐵路」閘口

[圖片滑動器]   

去到橙色閘口之後，就可以掃實體車票/電子車票上QR CODE入閘，然後搭升降機落B7/F月台等上車。去到月台之後，睇清楚顯示屏上面嘅上車時間同車卡號碼，跟住去指定位置等列車到達就得！

喺仁川機場點去到搭AREX？（上車位置）

💡小編小貼士：如果會喺仁川機場搭AREX直通車，預約前請睇清楚自己班航班會喺T1定T2降落，避免買錯飛！

仁川機場T1 AREX位置&前往方法

• 閘口位置：B1/F 交通中心
• 直通車顧客服務中心：B1/F
• 月台位置：B4/F

跟住Airport Railroad（공항철도）指示牌行

一般列車係喺藍色區域入閘，
要搭直通車記住要認住橙色區域

掃實體/電子車票上QR CODE入閘，
然後搭電梯落B4/F上車

仁川機場T2 AREX位置&前往方法

• 閘口位置：B1/F交通中心
• 直通車顧客服務中心：B1/F
• 月台位置：B3/F

行到2樓交通中心，
你會見到AREX櫃檯就喺正中間

附近會見到有入閘機，
記住藍色係一般列車、橙色係直通車，
掃描QR CODE後搭電梯落B3/F上車

搭AREX可以去埋首爾站都心機場？

如果你想直接先喺市區完成過關手續，去到仁川機場就可以直接入禁區，大家可以考慮使用位於首爾站B2/F嘅都心機場服務！

而想入都心機場，就需要事先買一張AREX直通車車飛，去到上圖地方向職員出示車飛後就可以入場去櫃枱辦理登機手續同托運行李。攞到機票之後下一步就係過海關，過完關就可以直接搭AREX去仁川機場。去到仁川機場之後唔需要再排平時入禁區條隊，直接行隔離寫住「都心空港」嘅專用通道就可以入禁區。

大家可以參考小編之前喺IG分享過俾大家嘅影片，跟住做就可以唔洗排隊輕鬆入禁區，仲唔洗自己攞住行李周圍走：

Instagram에서 이 게시물 보기

Creatrip 分享最新流行韓國資訊🇰🇷(@creatrip.hk)님의 공유 게시물

不過要注意唔係所有航空公司或者航線都一定可以喺首爾站都心機場辦理手續，根據2026年最新政策，而家首爾站都心機場僅接受乘搭濟州航空(除美洲航線)、德威航空(除美洲及加拿大航線)、易斯達航空、大韓航空、韓亞航空、真航空(除美洲航線)、釜山航空同首爾航空嘅乘客辦理登機同過關手續！

💡小編小貼士：因為入都心機場辦理手續之後就冇得再出返市區玩，所以建議大家已經完成所有行程、買齊手信，可以直接去機場都冇問題嘅時候再買/換領AREX車飛，進入都心機場！

首爾都心機場小總結

機場快線AREX直通車常見問題FAQ

Q1. AREX直通車由首爾站去仁川機場要幾耐？

A：AREX直通車由首爾站去仁川機場T1需要約43分鐘，去仁川機場T2就需要約51分鐘。因為中途唔會停其他站，所以對於想快啲去機場嘅旅客嚟講會方便好多。

Q2. AREX直通車同一般列車有咩分別？邊個會更方便？

A：AREX直通車只停首爾站、仁川機場T1同T2客運大樓，車程較快，而且全車採用指定座位，坐得會舒服啲。一般列車就會停更多站，車費較平，如果你住喺弘大、孔德等沿線站附近，搭一般列車有時反而會更方便。

Q3. AREX直通車會唔會停弘大入口站？

A：唔會。 AREX直通車中途唔停弘大入口站，只會來往首爾站、仁川機場T1同T2客運大樓。如果你目的地係弘大，建議你搭一般列車會更加方便，唔需要再另外轉車。

Q4. 如果住喺弘大附近，搭AREX定一般列車會方便啲？

A：如果你住喺弘大附近，一般列車多數會更方便，因為可以直接喺弘大入口站上落車，唔使特登先去首爾站再轉AREX。不過如果你本身行李比較多，或者想要指定座位、坐得舒服啲，都可以按自己情況考慮AREX直通車。

Q5. AREX車票可以喺邊度買？可唔可以即日先買？

A：AREX車票可以透過AREX官網、Creatrip等合作平台預先購買，亦可以喺車站現場購票。即日通常都可以買，但要視乎當日班次同剩餘座位情況，所以如果你趕時間或者旺季出發，建議都係提早預約會穩陣啲。

Q6. 搭AREX最遲要幾多分鐘前去到車站？

A：根據2026最新官方資訊，乘客一般可以喺 列車出發前30分鐘開始入閘，並且最好喺出發前3分鐘到達月台。如果你拎住行李，或者第一次喺首爾站搭AREX，小編都建議你再預鬆少少時間會比較安心。

Q7. 首爾站AREX直通車喺邊度上車？容唔容易搵？

A：首爾站AREX直通車乘車位置喺首爾站B2/F。到咗首爾站之後，只要跟住「Airport Railroad」、「공항철도」、「仁川國際機場」指示牌行，一般都可以順利搵到，不過因為首爾站本身比較大，第一次去最好都係早少少到。

Q8. AREX可唔可以放大件行李？車上有冇洗手間同Wi-Fi？

A：AREX直通車設有大型行李擺放空間，所以帶住大喼上車都相對方便。除此之外，車上仲提供免費Wi-Fi，而且4號車廂設有洗手間，整體乘車體驗會比一般列車更舒適。

Q9. 如果趕唔切原本嗰班AREX，可唔可以改時間或者退款？

A：如果你趕唔切原本預約嗰班AREX，實際可唔可以改時間或者退款，需要視乎你嘅購票渠道同當時適用規定而定。因為不同平台同票種安排可能有差異，所以建議你買飛前先睇清楚相關條款，出發前亦最好預多少少時間，避免太趕。

Q10.  深夜或者清晨到達仁川機場，冇AREX可以搭時應該點去首爾？

A：如果AREX未開或者已經收車，通常可以選擇機場巴士、的士或者機場接送服務。如果酒店唔喺首爾站附近，機場巴士有時會比AREX更方便，建議按到達時間同住宿地區揀返最適合嘅交通方式。有關仁川機場巴士同夜間交通相關資訊，可以參考以下文章：

[블로그] 2026仁川機場巴士攻略

[블로그] 2025仁川機場夜間交通攻略

以上係小編最新整理有關2026仁川機場快線「AREX」嘅相關資訊，有需要嘅朋友們記住要mark低，下次嚟旅行就知道要點做啦~

即刻撳我買定AREX直通車車飛👇🏻

[스팟] 仁川機場快線AREX直通車票

如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！