南怡島ITX-青春號攻略
唔想跟團去南怡島？教你點喺首爾搭ITX-青春號列車去！
Hello，大家好，我哋係由韓國人每日提供最新韓國旅行資訊嘅Creatrip。
南怡島係好多人嚟韓國都一定會去嘅地方，不過因為距離首爾都有一段距離，所以有時候想自己去都會怕唔識搭車。今日小編就整理咗有關ITX-青春號嘅資料，最近諗住去南怡島嘅朋友記住mark低，咁就唔洗焗住跟團啦！
南怡島ITX青春號攻略
ITX-青春號基本資訊
- 途經：龍山、玉水、往十里、清涼里、上鳳、退溪院、思陵、坪內好坪、磨石、清平、加平（南怡島）、江村、南春川、春川
ITX-青春號係來往南怡島嘅代表交通工具，由首爾市中心出發，開往加平、春川一帶，係去到南怡島嘅火車之中最快嗰條線。ITX-青春號會途經龍山、玉水、往十里、清涼里等等比較大嘅站，不過因為唔係每班車都會站站停，所以都係建議大家喺龍山站或者清涼里站搭會比較方便。
ITX-青春號車費/所需時間
| 龍山 ⇄ 加平 | 清涼里 ⇄ 加平 | |
| 所需時間 | 大約1個鐘 | 大約45分鐘 |
| 單程票價 | ₩6,900 | ₩5,700 |
要去南怡島，大家需要搭到加平站（가평역）落車，班次方面平日會係1個鐘1班，而週末同公眾假期每2個鐘大概會有3班車，大家plan行程嘅時候要睇清楚時間啦。
接住落嚟小編會教大家點喺網上同埋現場買飛，有需要嘅朋友記住save低啦！
ITX-青春號買飛方法
要買飛，最重要就係知道自己出發同目的地嘅站名，大家可以參考以下呢個表，到時候無論係網上買定現場買飛都可以對住嚟睇。
主要車站名（中文） | 主要車站名（韓文） | 主要車站名（英文） |
龍山 | 용산 | Yongsan |
清涼里 | 청량리 | Cheongnyangni |
加平 | 가평 | Gapyeong |
ITX-青春號網上買飛方法
- 買飛網址：Korail官網
- 可訂班次：由買飛日期起計1個月內嘅班次
ITX-青春號同KTX一樣都需要劃位，所以建議大家confirm咗會去南怡島玩之後就儘早去Korail官網買飛啦！其實買ITX-青春號車飛同買KTX車飛差唔多。
Step 1. 揀起點/終點站，確認時間同人數 |  |
Step 2. 喺時間表度揀想要嘅班次 |  |
Step 3. 完成付款之後就可以得到一個QR Code | |
俾完錢之後會出一個QR Code，嗰個就係大家張車飛啦！以前搭ITX唔需要打印張車飛出嚟，但最近改咗新制度，規定一律需要嘟完QR Code先可以入閘上車。所以大家記住要cap低個QR Code save喺手機度，或者如果係用Korail App買嘅話，到時候直接打開個App就可以搵到個QR Code！
ITX-青春號現場買飛方法
如果大家唔sure幾點會喺南怡島走，想當日先喺現場買回程車飛都冇問題。只要喺車站入面搵到賣飛嘅機器（可以轉做英文），或者行去櫃檯就可以買到飛！
現場買嘅話你會攞到一張卡，上面會有一個QR Code。好似頭先所講，搭ITX-青春號嘅時候一定要嘟咗呢個QR Code先可以入閘，千祈唔好整唔見張飛啦！
ITX-青春號搭車位置
上面呢張圖就係ITX-青春號嘅車身設計，上面會寫住「ITX」，仲有「青春」兩個字。而要注意嘅係ITX部分月台係同京春線一齊用，所以大家上車之前一定要check清楚埋站嗰架車係邊條線。
另外，因為ITX係劃位坐嘅，所以大家需要搵返張飛上面顯示嘅編號對應嘅座位，大家搭車之前可以確認吓地下個車廂編號同你張飛上面顯示嘅一唔一樣。
再次提醒大家，如果你買唔到ITX坐位嘅飛，都一定要買返張企位嘅飛，如果冇買被人捉到嘅話會罰錢㗎！
清涼里站由地鐵轉乘ITX-青春號方法
如果大家係先搭地鐵去到清涼里站，再轉ITX-青春號嘅話，只要跟住上面圈住嗰個青綠色嘅logo或者「ITX」呢個字，一直行就可以行到落火車月台。不過喺清涼里站轉火車要行好多樓梯同經過好多條通道，所以小編建議可以喺龍山站搭嘅話，去龍山站會比較方便。
搭完地鐵之後轉車嘅朋友們記住一定要喺搭ITX之前拍一次卡，代表你搭完地鐵。車站入面會有上圖呢部機，大家記住要喺B，即係「하차용（下車用）」呢個位嘟一次卡。
如果係直接入清涼里火車站嘅朋友們就唔需要咁做，直接用車飛上面嘅QR Code入閘就得。
落到月台，大家記住check多次指示牌上面有冇「가평（加平）」呢個字，有嘅話就代表你去啱地方啦！
由加平站（南怡島）返首爾
結束南怡島嘅行程之後，喺加平站搭ITX-青春號返首爾市區不會有太大問題。如果大家去到清涼里車站或者龍山站之後，會再轉地鐵嘅話，首先要搵返頭先嗰部機，喺A嗰邊嘟一次卡，再跟住指示牌行就可以㗎啦。
以上就係「ITX青春號」列車嘅買飛同搭乘方法，有問題嘅話歡迎喺下面留言話俾我哋知。如果大家喺江南一帶，而又plan住去南怡島，不妨撳我預定來往江南同南怡島嘅接駁巴士，會方便好多。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
