韓國高速巴士教學指南
嚟韓國唔知點搭高速巴士？小編整理好哂巴士種類、購買方法、搭巴士方法！
Hello，大家好，我哋係由韓國人每日提供最新韓國旅行資訊嘅Creatrip。
如果由首爾想去韓國其他地區，除咗KTX之外，今次小編想教大家搭高速巴士，價錢相對會平啲，而且可以去到唔同地區，基本上除咗公眾假期之外，大部份時間都唔會太塞車，今日就等小編為大家介紹各種巴士種類、價錢，同點預約車飛啦！
* 如果冇韓國手機號碼，需要去到現場直接買車飛。
韓國高速巴士使用指南
1. 巴士種類
韓國高速巴士總共有分三類：一般（일반）、優等（우등）同埋Premium（프리미엄），當然越高級就會越貴，而且仲可以瞓住咁樣去其他地區。
1） 一般（일반）
通常一般嘅高速巴士，座位都係比較窄，而且比較密集，由首爾去到釜山，都只係₩25,000！價錢唔算好貴，但小編比較建議如果坐短程搭佢會好，搭得耐反而好攰。
2) 優等（우등）
優等巴士係最多人搭，而且班次都會比較多，價錢合理，坐得又舒服，就算係去長途旅行都冇問題，如果由首爾去釜山，價錢大約係₩36,000。
3) Premium（프리미엄）
價錢同KTX一樣都係貴，不過相對嚟講佢會坐得舒服啲，如果由首爾去釜山，價錢大約係₩46,800，佢最好嘅就係可以瞓住去。
Premium巴士每個座位都有窗簾，而且仲可以睇電視、聽收音機、手機叉電等！座位可以傾斜180°，好似瞓咗喺飛機上嘅商務艙咁！
大家之後可以根據個人喜好，再揀搭邊一款巴士！
如果下次仲係唔知搭KTX、一般、優等定係Premium巴士，可以再參考以下呢個圖：
單程 | KTX | Premium | 優等 | 一般 |
| 首爾 ↔ 釜山 | ₩59,800 | ₩46,800 | ₩36,000 | ₩24,200 |
| 首爾 ↔ 江陵 | ₩27,600 | ₩28,900 | ₩22,300 | ₩15,200 |
| 首爾 ↔ 大田 | ₩23,700 | ₩19,600 | ₩15,100 | ₩10,300 |
| 首爾 ↔ 大邱（東大邱） | ₩43,500 | ₩35,300 | ₩27,200 | ₩18,400 |
| 首爾 ↔ 全州 | ₩34,600 | ₩ 26,100 | ₩20,100 | ₩13,800 |
*除咗去全州（由首爾高速巴士站（京釜 嶺東線）出發）之外，由首爾Central City Terminal（湖南線）出發唔同時間去，價錢都會有變。
大家可以考慮到佢快唔快 VS 舒唔舒服 VS 平唔平去決定。
2. 高速巴士車飛購買方法（網上&App&現場）
同KTX唔同，高速巴士需要用韓國電話號碼（唔需要認證）先可以喺網站，或韓國電話號碼認證先可以App預約 不過巴士啲位通常都仲有淨（除咗假期），就算冇電話號碼都可以直接去現場買。
1) 網站
網站有提供四個語言（韓文、英文、中文、日文）去預約，所以唔需要太擔心，不過大家記住買完之後，一定要將佢Print出嚟，之後再去兌換實體車飛。
1. 先去高速巴士網站（撳我），喺右上角揀語言。
2. 揀完之後就可以去預約車飛（*可以預約出發一小時前嘅巴士）。
3. 如果用中文頁面揀完之後，揀完日期同時間，最右邊就會見到淨約多個位。
4. 之後就可以揀幾多個人去，同埋想坐邊（小朋友係由6歲起至12歲）。
5. 之後就會有一個登入頁面嘅畫面，只要跟非會員購買就可以。
6. 揀好晒之後再check清楚電話同埋卡Number啱唔啱，之後可以俾錢。
7. 如果想知預約成唔成功，可以撳「付款明細查詢」。
8. 去之前記住要Print低預約記錄，之後去到現場再換實體車飛。
9. 同時記得要向櫃檯出示返你碌嘅信用卡。
如果係用其他方法去俾錢，去到現場只要講返自己電話號碼，或者出生日期，都可以換到實體車飛。
2) 高速巴士Tmoney App（고속버스 티머니 앱 ）
如果係用APP買車飛嘅話，去到現場唔需要換實體票，都可以喺出發前5分鐘買到！不過就一定要韓國手機號碼認證，而且要用韓國信用卡，另外冇提供其他語言服務，所以比起遊客用，喺韓國生活耐嘅外國朋友用會比較方便啲。
1. 首先down咗個app先。
2. 之後揀單程（편도）定係來回（왕복），之後再揀地區。
3. 之後揀時間同想揀咩巴士。
4. 就算唔係會員都可以買到飛，但需要韓國手機認證（會send kakao message俾你）。
5. 揀好哂就可以俾錢，但記住只可以用韓國卡。
6. 預約完成即刻可以睇到車飛（唔使喺現場換車飛，上車時用QR Code掃完就可以）。
3) 現場購買
如果冇手機號碼，其實去到現場買都一樣方便，只要唔係放假嘅日子，基本上都仲有好多位。
NEWSIS
去到高速巴士站只要搵到TICKETS位，就可以同職員講底想幾時出發同目的地，唔識講韓文，用簡單英文都冇問題。
MBC
另外如果唔想排隊，都可以搵呢啲冇人機器（有4個語言），如果喺網上預約要換實體門票，都可以用呢部機解決。
3. 搭巴士方法
由而家開始小編會逐一為大家介紹點做，無論係網上預約定係現場買，都一要去到TICKETS或無人機器換車飛。
이노션 (서울고속버스터미널)
換完車飛之後，就可以睇清楚喺幾號月台上車，如果唔係好清楚，可以請職員幫手。
只要喺出發前5至10分鐘，就可以見到巴士已經到咗，上車之前可以再確認多一次啱唔啱，同埋向司機出示車飛，或者如果用手機app預約，可以掃QR code就得。
上車嘅時候搵返自己當初揀嘅位置，座位上面可以擺行李，之後再坐低繼續去旅行。
4. 主要高速巴士總站位置
首爾高速巴士站（京釜 嶺東線）
- 韓文名：서울 고속 터미널 (경부 영동선)
- 地址：서울 서초구 신반포로 194
- 小Tips：高速巴士客運站1號出口行77m (跟住嶺東線標誌行)
首爾Central City Terminal（湖南線）
- 韓名名：서울 센트럴시티 터미널 (호남선)
- 地址： 서울 서초구 신반포로 176
- 小Tips：高速巴士客運站2號出口行94m（跟住湖南線標誌行)
大田複合客運站
- 韓文名：대전복합터미널
- 地址：대전 동구 동서대로 1689
釜山綜合巴士客運站
- 韓文名：부산종합버스터미널
- 地址：부산 금정구 중앙대로 2238
- 小Tips：老圃站3號出口行42m
全州高速巴士客運站
- 韓文名：전주고속버스터미널
- 地址：전라북도 전주시 덕진구 가리내로 70
東大邱站複合轉乘中心
- 韓文名：동대구역복합환승센터
- 地址：대구광역시 동구 동부로 149
- 小Tips：東大邱站2號出口行168m
唔知今次小編整理好嘅高速巴士使用指南，又幫唔幫到大家呢？嚟旅行除咗去首爾之外，不如就試吓搭巴士去其他地區啦 ！
如果有更多想知嘅內容，都可以隨時留言或者dm話俾我哋知：）
Instagram：creatrip.hk