韓國高速巴士預約教學 | 首爾四大巴士客運站、購票方法全整理（2026年最新版）
由首爾去韓國其他城市，除咗KTX，搭高速巴士都係熱門選擇。今篇一次整理首爾4大巴士總站、即場買飛、官方App預約、乘車流程同常見問題。
- 韓國「高速巴士」同「市外巴士」有咩分別？
- 首爾四大巴士總站要點分？
- 韓國高速巴士座位等級有咩分別？
- 邊度可以買到韓國高速巴士車票？
- 香港旅客搭韓國高速巴士前有咩要確認？
- 韓國高速巴士點搭？乘車流程教學
- 由首爾出發可以搭高速巴士去邊？
- 韓國高速巴士同KTX邊個比較方便？
- 韓國高速巴士常見問題FAQ
Hello，大家好，我哋係由韓國人每日提供最新韓國旅行資訊嘅Creatrip。
由首爾去釜山、江陵、束草、全州等其他韓國城市，通常大家都會揀搭KTX或者高速巴士。而高速巴士價錢通常比KTX平，而且唔少城市用巴士去會更直接。不過，對第一次去韓國自由行嘅香港旅客嚟講，最容易搞亂嘅唔一定係點買飛，而係去錯巴士總站。
今次會由居韓超過10年嘅Creatrip小編幫大家整理韓國高速巴士同市外巴士分別、首爾四大巴士總站分別、購票方法、座位等級、當日乘車流程，同埋香港旅客最常問嘅問題等，等你出發前可以一次過睇清楚。
※以下資訊已按2026年5月公開資料整理，實際班次、票價與預約方式或因路線及營運公司調整，出發前請再確認官方頁面。
韓國「高速巴士」同「市外巴士」有咩分別？
喺韓國，長途巴士大致可以分做「高速巴士(고속버스)」同「市外巴士(시외버스)」。
簡單嚟講，高速巴士多數行主要城市之間嘅長途路線，座位等級相對清晰，旅客最常搭去釜山、大邱、江陵、全州等地時都會接觸到。至於市外巴士，就比較多會去中小城市或者轉駁性質比較強嘅地方路線。
不過對遊客嚟講呢個並唔太重要，最重要嘅係要先確認你搭嘅巴士係由邊個巴士總站出發！喺首爾就已經有四個可以搭長途巴士嘅巴士總站，去錯地方嘅話，就算你買啱車票、準時去到車站，都一樣會趕唔切搭車。
首爾四大巴士總站要點分？
首爾常見嘅長途巴士總站主要有4個，而且唔同方向、唔同路線通常都會需要去唔同地方搭車。
首爾巴士總站比較懶人包
車站名 | 最近地鐵站 | 常見目的地 | 特色 |
|---|---|---|---|
首爾高速巴士客運站 | 地鐵3、7、9號線 | 釜山、大邱、慶州、江陵、束草等 | 首爾其中一個最具代表性嘅高速巴士客運站，京釜線、嶺東線嘅主要路線選擇好多 |
Central City Terminal | 地鐵3、7、9號線 | 全州、光州、木浦、麗水等 | 以湖南線為主，附近有新世界百貨同好多餐廳，等車時間都比較易打發 |
首爾南部客運站 | 地鐵3號線 | 忠清道、全羅道、慶尚道部分中小城市 | 市外巴士路線比較多，去啲地方城市嘅話可以列入考慮 |
東首爾綜合客運站 | 地鐵2號線 | 江原道東海岸、慶尚北道等 | 主打首爾東面同江原道方向，視乎目的地，有時會同時提供高速巴士同市外巴士 |
1.首爾高速巴士客運站(서울고속버스터미널)
如果你打算去釜山、大邱、慶州、江陵、束草呢類熱門城市，大部分巴士都會喺首爾高速巴士客運站開出。呢個總站同地鐵站相連，好容易就可以搵到。
🚌居韓小編小貼士：因為京釜線、嶺東線呢啲主要路線都集中喺度，所以買飛嘅時候可以首先查呢個車站！
因為首爾高速巴士客運站班次多、熱門路線集中，所以呢度設施相對齊全。實際去到現場會發現，附近商場、餐廳、便利店都幾多，出發前買水、買嘢食或者簡單休息都方便。
只不過第一次去首爾高速巴士客運站嘅話，好容易以為自己已經去到客運站就安心，但其實去到之後都仲要行一段路先去到上車月台！
好似頭先所講，去到高速巴士客運站唔代表已經到咗正確乘車位置。地鐵站範圍本身幾大，而首爾高速巴士總站同Central City Terminal雖然喺同一帶，但實際上係唔同嘅車站。如果你係第一次去，最好都預多少少時間！
🚌居韓小編小貼士：熱門路線喺星期五晚、周末、連假特別容易多人，如果你係第一次搭，建議至少提早20至30分鐘到站，避免臨場搵月台時手忙腳亂。
Central City Terminal(센트럴시티터미널)
如果你想去 全州、光州、木浦、麗水 等韓國湖南地區（西南方城市），通常會就要去到Central City Terminal搭高速巴士。
呢個巴士總站同樣位於地鐵高速巴士客運站附近，所以好多旅客一開始都會以為首爾高速巴士客運站同Central City Terminal係同一個地方。其實兩者雖然喺同一區域，但出發樓層、乘車位置同路線安排都唔一樣。
Central City Terminal嘅好處係佢連埋新世界百貨公司，附近又有咖啡店同美食廣場，所以等車嘅時候可以順便食嘢行街，好啱想提早少少到站、又唔想企喺度等車嘅人，或者想順便安排購物行程嘅朋友們。
不過對香港旅客嚟講，最容易出錯嘅地方就係覺得自己明明已經去到高速巴士客運站，點解都仲搵唔到自己班車？好多時原因就係你應該去Central City Terminal，但實際上行咗去另一邊。
所以如果你係去全州、光州方向，記得預約時唔好只睇「高速巴士客運站」幾個字，而係要連埋總站名稱一齊確認。
3. 首爾南部客運站(서울남부터미널)
首爾南部客運站雖然知名度冇首爾高速巴士客運站咁高，但如果你係要去一啲中小城市，尤其係忠清道、全羅道、慶尚道，通常好多巴士路線都會由呢度出發。
同大型巴士總站相比，南部客運站規模較細，所以相對上搵月台、睇指示牌冇咁混亂，對第一次搭韓國高速巴士嘅遊客嚟講都方便。
不過，最大問題係因為佢冇咁出名，所以遊客好容易直接忽略。有啲人會以為所有熱門長途巴士都係由高速巴士客運站出發，但其實去某啲地方時，真正出發點可能係南部客運站，記住一定要check清楚站名！
4. 東首爾綜合客運站(동서울종합터미널)
如果你打算去江原道、東海岸、部分慶尚北道地區，就有機會要去到東首爾綜合客運站搭高速巴士。呢個總站位置同高速巴士客運站唔同，呢度靠近地鐵江邊站，過條馬路就到，所以如果你本身住宿位於首爾東邊一帶，實際上行程安排上有時仲方便。
不過東首爾綜合客運站對遊客嚟講可能會有少少唔方便，因為高速巴士同市外巴士嘅指示會撈埋一齊。容易搞亂，不過如果會去江原道方向，其實去呢度搭分分鐘會舒服過去高速巴士客運站。
🚌居韓小編小貼士：視乎目的地同巴士種類，上車位有機會分喺1樓同2樓唔同位置。當日記住提早少少時間去到，因為搵上車地點可能都要用一段時間，而且建議確認好目的地、月台號碼同巴士種類先上車！
韓國高速巴士座位等級有咩分別？
韓國高速巴士就算係同一路線，都會因應唔同等級而座位闊落程度同車費有分別，而通常都會分成一般、優等同Premium。呢三個等級最大分別係：
等級 | 座位配置 | 推薦對象 |
|---|---|---|
普通 | 2列+2列 | 想盡量慳交通費 |
優等 | 2列+1列 | 想兼顧價錢同舒適度 |
Premium | 2列+1列，空間更闊落 | 長途想坐得舒服啲 |
如果你係第一次喺韓國搭長途巴士，通常最推薦搭優等（우등）。優等高速巴士比起一般座位寬落，而且部分車型座位之間仲會有簾隔住，甚至會提供Type-C或者USB充電位。對於由首爾去江陵、全州，甚至更長車程去釜山呢類路線，坐優等會冇咁攰。
※具體設備會因路線、營運公司同車型可能會有唔同。
🚌居韓小編小貼士：如果你最重視舒適度，可以預約時順便留意座位等級，而唔好淨係睇價錢。Premium等級當然會再舒服啲，但唔係每條路線都有，而且票價都會再高一級。如果你本身已經打算控制交通預算，小編覺得其實搭優等就已經可以搭得舒服。
邊度可以買到韓國高速巴士車票？
遊客喺韓國搭高速巴士，常見買飛方式大致可以分為即場購票、官方網站/App 預約、第三方平台預約。唔同方式各有優缺點，最重要係揀一個自己最容易確認、最唔易出錯嘅方法。
購票方式比較懶人包
購買方法 | 適合對象 | 優點 | 注意事項 |
|---|---|---|---|
即場購票 | 即日先決定行程 | 操作直接 | 週末、連假好易賣曬 |
官方網站/App預約 | 習慣自己查班次、熟韓國預約系統 | 可自行比較時間同等級 | 語言、付款、認證可能對外國人嚟講比較難 |
Creatrip高速巴士 | 想預先留位、直接用繁體中文同港幣預約 | 預約內容易核對 | 要確認清楚適用路線、預約截止時間同改期條件 |
1. 即場購票
最直接嘅方法就係當日去到巴士客運站買飛。如果唔趕時間、行程比較鬆動，或者只係臨時決定去某個地方，唔介意改班次或者等下一班，去現場買飛都冇問題。
首爾巴士客運站會有人工櫃檯，就算你唔太識韓文，多數都可以一路指住城市名，或者俾職員睇你手機畫面咁買到。部分客運站亦都設有自助售票機，直接將語言換成英文就可以簡單買到高速巴士車飛。
🚌居韓小編小貼士：如果想直接去現場買飛，好有可能星期五晚、星期六日、韓國連假、重要節日前後等熱門時段都會冇位！
2. 高速巴士官方網站/App預約
韓國嘅高速巴士可以喺官方預約網站度搜尋同預約。不過雖然可以自己好方便咁比較出發時間、班次、座位等級等等，但對外國遊客嚟講以下呢幾個位都唔太方便：
- 海外信用卡付款未必每次都順利
- 部分流程可能涉及登入、認證或會員註冊
- 介面語言唔一定夠清楚
- 唔同巴士系統之間操作方式有機會唔一樣
如果你本身已經好習慣用韓文或者英文網站處理交通預約，咁可能唔會係一個大問題；如果你係第一次去韓國玩，唔熟悉呢度嘅操作，咁直接用高速巴士官方網站預約未必會係你嘅最佳選擇。
3. Creatrip高速巴士車票預約
如果你係短期旅行，冇韓國電話號碼又唔太識睇韓文，咁Creatrip嘅高速巴士車票預約服務就可以幫到你啦！由首爾出發去釜山、江陵、束草、襄陽、浦項、慶州、全州、清州機場方向嘅班次都好易揾，直接用繁體中文同港幣預約，事先買定仲唔怕會冇位！
🚌居韓小編小貼士：如果你係旺季嚟旅行嘅時候需要搭高速巴士，或者要趕飛機或者轉住其他城市，最好唔好將交通安排留到最後一刻先決定！
香港旅客搭韓國高速巴士前有咩要確認？
韓國高速巴士其實唔算難搭，但第一次搭嘅話通常都會喺以下幾個位出錯。建議大家出發前check一次！
□ 一定要確認出發巴士客運站名
同樣係由首爾出發，去唔同城市時，客運站可以完全唔同。通常去釜山、江陵方向通常係喺首爾高速巴士客運站上車，去全州、光州方向就多數係喺Central City Terminal上車，最安全方法係出發前確認車票上面標示嘅客運站名！
□ 預約後要睇清楚實際上車方式
有啲地方係出示QR Code就可以上車，有啲可能要睇指定憑證或預約頁面，甚至需要換領實體車票。所以預約完之後，建議你出發前再睇一次確認信或使用說明，唔好去到現場先研究。
□ 大件行李通常要放車底行李艙
如果你有大型行李箱，通常都會放喺巴士下層行李艙。至於護照、銀包、手機、行動電源、充電線呢啲貴重物品，建議一定要自己隨身攜帶。
□ 旺季唔好揀去到車站現場先買飛
週末、連假、農曆新年、中秋節好易滿，尤其如果你行程已經排得好緊，建議提早買定車飛，以免影響旅程。
□ 夜車或較晚到站班次要留意後續交通
如果你搭晚班車或者深夜班次，記住check清楚到站後需唔需要轉地鐵、的士或者巴士，同尾班車係幾點開出。特別係去比較細嘅城市嘅時候，真係未必有咁多公共交通工具到深夜都仲提供緊服務。
韓國高速巴士點搭？乘車流程教學
Step 1 | 提早20~30分鐘到達巴士客運站
如果你係第一次去，又或者個站本身比較大，建議預早少少到。尤其首爾高速巴士客運站一帶範圍幾大，由地鐵站行去實際乘車位置都需要一段時間。
去到之後記住check現場電子屏幕上顯示嘅時間表，雖然主要係用韓文顯示，但城市名通常都會有漢字甚至係英文翻譯。對清楚同車票上出發地、到達地、上車月台同座位號碼一唔一樣就得！
🚌居韓小編小貼士：韓國長途巴士大部分都係準時開車，遲一分鐘都未必上到車，所以如果你係第一次去巴士客運站，建議再預多少少時間搵路，寧願早到都唔好遲到！
STEP 2 | 去指定上車月台上車同寄放大型行李
首爾高速巴士客運站同東首爾規模都幾大，所以一定要睇清楚月台號碼。行李通常都係由司機幫你搬上車。貴重物品同護照記得帶喺身，唔好放入行李。
STEP 3 | 按座位號碼上車入座
韓國高速巴士通常有指定座位，所以照住自己張票或者預約資料上車就可以。建議用手機打開車票頁面，或者攞定你打印出嚟嘅電子車票，上車時有可能要掃描QR Code。
由首爾出發可以搭高速巴士去邊？
如果你想由首爾出發去其他城市，高速巴士其實可以去到唔少旅客常見目的地。對香港遊客嚟講，以下幾條路線會特別常見，而且都幾適合自由行時安排。
1. 首爾 → 釜山
釜山一直都係香港旅客最熟悉嘅韓國城市之一。如果你想去睇海景、食海鮮、參觀文化村、搭天空膠囊等等，推薦大家可以喺韓國之旅行程當中抽兩三日落釜山玩。
雖然由首爾去釜山，KTX當然會更快，但如果你想控制預算，咁高速巴士會比較適合你。尤其如果你唔介意車程較長，同時想體驗韓國休息站文化，咁就推薦大家揀高速巴士！
2. 首爾 → 江陵
江陵係韓國東海岸人氣好高嘅旅行地，適合想去海邊、咖啡街、拍靚相同輕鬆散步嘅朋友們。對第一次去江原道方向旅行嘅人嚟講，高速巴士通常都係幾常見同方便嘅選擇。而且由首爾去江陵班次相對多，實際安排上唔算太難。
去到江陵唔知要去咩景點好嘅話，可以直接預約的士包車半日遊：
3. 首爾 → 束草
如果你想去雪嶽山、束草海邊、阿爸村一帶，安排自然景觀、海邊同地方城市行程，好多人都會揀去束草。相比火車，高速巴士喺去束草時往往更直接，所以好多自由行旅客都會優先考慮巴士。
束草同樣有的士包車半日遊，由專業司機帶你去必去景點：
4. 首爾 → 全州
全州對想感受韓屋村、美食同較慢節奏韓國旅行嘅旅客嚟講係一個好值得去旅行嘅城市。如果你鍾意傳統韓國城市風格，又想行程唔止留喺首爾，全州會係好適合加落去嘅一站。通常去全州嘅話都會去Central City Terminal上車，大家記住要睇清楚車票上資訊！
5. 首爾 → 慶州
慶州係韓國代表性歷史文化城市之一，適合對古蹟、文化景點、慢步調行程有興趣嘅旅客。如果你想將韓國旅行由購物、美食延伸到歷史文化面向，慶州係幾值得安排嘅地方。
小編之前自己去慶州係搭KTX，不過如果你本身係想連住附近城市一齊玩，或者想慳交通費，都可以考慮搭高速巴士。
韓國高速巴士同KTX邊個比較方便？
好似開頭所講，如果想去其他韓國城市，除咗高速巴士之外另一個最多人揀嘅交通工具係KTX。呢兩種交通工具都可以去到各大城市，但根據小編經驗，唔係每次搭同一款都一樣咁方便，某啲城市可能搭高速巴士反而會更加舒服！
韓國高速巴士 VS KTX比較表
因素 | 高速巴士 | KTX |
價錢 | 通常較平 | 通常較貴 |
速度 | 較慢 | 較快 |
到達範圍 | 去比較細嘅城市更方便 | 主要大城市較方便 |
行程彈性 | 視路線而定 | 適合鐵路為中心行程 |
適合人士 | 想慳錢、去細城市 | 想慳時間 |
如果你最重視嘅因素係車費，高速巴士通常會比較啱你。特別係去某啲細城市，搭高速巴士可能可以直達，唔洗再轉車之餘仲更加平。
但如果你想快啲去到，就建議你揀KTX。例如去釜山呢類長途路線，KTX速度會明顯快好多，適合行程緊湊或者想將交通時間壓到最短嘅朋友們。
韓國高速巴士常見問題FAQ
| Q1. 韓國高速巴士可唔可以即場買飛？
A：可以，如果有位就可以即場買。但熱門路線、周末、連假時段好容易滿座，如果行程已經定好，建議提前預約。
| Q2. 冇韓國電話號碼同信用卡預唔預約到高速巴士？
A：可以，視乎你用邊個平台。部分服務唔一定需要韓國電話號碼，亦都可能可以直接用海外信用卡付款，但預約前最好先睇清楚條件。Creatrip嘅高速巴士車票預約服務就唔需要韓國電話號碼或者信用卡都可以輕鬆預約到，更加方便！
| Q3. 可唔可以直接用T-money搭高速巴士？
A：唔可以。高速巴士唔似首爾市內巴士或者地鐵咁，唔係一般嘟卡上車模式，通常都要先另外購買車票。
| Q4. 搭高速巴士大件行李可以點放？
A：大件行李通常會放喺巴士下層行李艙。而護照、現金、手機、貴重物品就建議要隨身帶住，以免出現遺失情況。
| Q5. 韓國有冇深夜高速巴士？
A：有，部分熱門長途路線會有深夜或夜間班次。不過班次、票價、座位等級都會因路線而唔同，最好提早查清楚。
| Q6. 唔識韓文可唔可以搭到韓國高速巴士？
A：可以，只要你確認到目的地、月台、班次時間同座位號碼，基本上就可以順利搭到車。
| Q7. 韓國高速巴士小朋友有冇優惠票價？
A：有機會有，但實際年齡限制同適用條件要視乎路線同售票方式。建議預約前再睇一次票務說明。
| Q8. 高速巴士同KTX邊個平啲？
A：大部分情況下，高速巴士會平啲；但KTX通常更快，所以要睇你係優先考慮預算，定係優先考慮時間。
本文內容由長期關注韓國交通資訊更新嘅 Creatrip 團隊整理，並參考最新公開資料編寫。實際班次、票價同預約方式或會調整，出發前建議再確認官方資訊。
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
