釜山兩日一夜放鬆之旅 | 2026 釜山行程推薦全攻略
小編帶你一次過玩盡釜山美食、Spa 同影樓，行程充實又夠放鬆！
- 釜山兩日一夜療癒之旅應該要點安排行程？
- 第1日：醬油蟹美食同海雲台SPA放鬆行程
- 第2日：海邊列車+頭皮SPA+形象照+當地美食行程
- 釜山療癒·醫美旅遊優惠慶典介紹
- 釜山兩日一夜行程每人要預幾多錢？
- 釜山旅行常見問題FAQ
- 旅程總結
Hello，大家好，我哋係由韓國人每日提供最新韓國旅行資訊嘅Creatrip。
一到週末，就會想簡單執吓行李去一轉釜山。唔算太遠，去兩日一夜啱啱好，又可以輕輕鬆鬆叉足電，所以一直都好受歡迎。
如果你都諗緊去到釜山應該食啲咩、去邊度食，仲有點樣安排路線先可以玩得順又玩得充實，咁呢個行程就啱你喇。今次Creatrip小編團隊親身去咗兩日一夜釜山，由行程路線、美食到SPA都逐樣試過，再將成個行程整理出嚟分享畀大家。
今日文章入面仲整理咗一啲釜山旅途中用得着嘅優惠資訊，所以如果你想慳住玩，又想慢慢享受個旅程，就記得睇到最後啦！
釜山兩日一夜療癒之旅應該要點安排行程？
釜山係韓國第二大城市，香港都有直飛航班可以去到釜山金海國際機場！如果你係喺首爾出發，搭KTX大概2個半鐘至3個鐘左右就到。
雖然即日來回都得，不過小編會推薦大家可以住返一晚，悠閒咁去睇海、食好西，再去啲可以放鬆身心嘅地方叉叉電。今次小編同同事就揀咗「療癒」做主題，第一日會喺海雲台一帶食釜山美食、浸Spa同欣賞夜晚海景；第二日坐完藍線公園海邊列車之後再去西面，做埋頭皮Spa同去影形象照，為今次旅程劃上句號。
行程 | 路線流程 |
第1日 | 釜山站 → 李夏亭醬油蟹 → 海雲台酒店 Check-in → Club D Oasis → 海邊食炸雞 → 返回酒店 |
第2日 | 天空膠囊（尾浦站出發）→ 青沙浦 Cafe → 海邊列車（青沙浦站出發）→ 百歲章魚 → suyb → PN Studio → 李在模披薩 |
接住落嚟就會按時間順序，同大家逐個介紹呢個2日1夜行程入面嘅景點同安排。
第1日：醬油蟹美食同海雲台SPA放鬆行程
11:30ㅣ到埗釜山站後前往水營站
雖然比原定時間遲咗大約15分鐘先到釜山站，不過KTX延誤都好常見！到站之後就即刻出發咗去水營站(수영역)，準備去食好出名嘅醬油蟹。喺釜山站前搭巴士，再喺池谷站(못골역)轉地鐵，大約30分鐘就到。如果你拎住大型喼，擔心搭巴士唔方便，亦都可以選擇全程搭地鐵，喺蓮山站(연산역)轉車，大約40分鐘左右就到。
12:30ㅣ午餐（李夏亭醬油蟹）
今次釜山之旅第一餐就係食醬油蟹！難得嚟到「李夏亭醬油蟹」，我哋叫咗個超值套餐（每人₩45,000），套餐包括醬油蟹、調味辣醬蟹、醬油蝦同鮑魚，可以一次過食到幾款招牌菜式。
醬油蟹蟹肉好彈牙，食落完全冇腥味，調味亦啱啱好，帶少少甜味。而最正宗嘅韓國食法就係將蟹肉唧落白飯，再加埋啲醬汁一齊撈嚟食，諗返起都流曬口水。
而醬油蝦同鮑魚都好多肉，不過調味辣醬蟹就對唔太食得辣嘅小編嚟講有少少辣，大家可以參考返。
「李夏亭醬油蟹」雖然唔喺熱門觀光區，但位置近地鐵站，算係一間值得收藏嘅隱世小店。對於唔想特登去人氣餐廳排隊，但又想穩陣食到好味醬油蟹嘅人，小編會推薦大家去。只不過去到週末或者lunch time都有機會要等位，所以最好都係提前預約定更加保險。
Menu&更多預約詳情👇🏻
14:00ㅣ前往海雲台酒店Check-in
食完lunch之後小編同同事決定先去酒店check-in同放低行李。由水營站(수영역)去海雲台站(해운대역)搭地鐵大概10分鐘，不過因為今次住嘅係海景酒店，所以我哋仲要拖住行李由站行多大約15分鐘先到。
去到酒店搞好Check-in，終於可以坐低抖一抖。休息一陣之後，就準備好替換衣物、護膚品等要帶嘅嘢，正式出發去做SPA。
15:20ㅣClub D Oasis（高級SPA & 水上樂園）
「Club D Oasis」係一間位於海雲台海邊嘅高級SPA同水上樂園，最近網上都有好多人討論！入場之後會先換上專用汗蒸幕衫，之後再去休息室。可惜嗰陣啱啱開始多雲，出面景色冇想像中咁靚，有少少失望……
不過去到汗蒸幕，當然都要整返個經典羊角頭造型，再配埋煙燻蛋同飲品！中途仲發生咗個小插曲——食到最後一啖嘅時候唔小心將啲鹽全部倒晒落去，結果大家即場笑到停唔到，反而變成今次旅行其中一個最難忘嘅回憶。
去到戶外區，仲可以一路望住海，一路歎桑拿同浸腳。上面呢個戶外獨立桑拿都幾搶手，想唔想排太耐，就要一邊浸腳一邊睇準時機。室內亦有鹽房、檜木房、紅土房、玄武岩房同冰房呢5款主題桑拿，另外仲有岩盤浴。我哋最後幾乎逐個都試晒，徹底享受咗一輪桑拿。
今次因為行程比較緊凑，想更加集中去慢慢歎溫泉，所以就冇去到泳池區。簡單沖一沖身、抹走汗水之後，換上泳衣就去咗溫泉區。要注意因為呢度係男女共用區域，所以一定要著泳衣；如果只係想浸腳，着住汗蒸幕衫都可以，不過一坐低就好容易整濕條褲，大家要注意。
天色慢慢暗落嚟之後，成個氣氛會更加好，仲可以以大海做背景影到幾靚嘅相！順帶一提，「Club D Oasis」咁啱係釜山療癒·醫美旅遊優惠慶典嘅合作店舖之一，所以我哋用咗優惠券之後平咗唔少，大家記住唔好錯過限時優惠（文章最後會詳細介紹活動內容同優惠券使用方法）！
門票購買詳情👇🏻
19:30ㅣ望住夜晚海景食炸雞
做完SPA之後，我哋就一邊吹住舒服嘅夜風，一邊喺海邊散咗陣步。晚餐揀咗可以望到海嘅位食炸雞。今日其實冇排到好多行程，主要都係食咗醬油蟹再去做SPA，但同平時嗰種將行程塞到滿嘅旅行唔同，反而覺得更悠閒之餘又好充實。
第2日：海邊列車+頭皮SPA+形象照+當地美食行程
10:00ㅣ藍線公園天空膠囊（尾浦出發）
第二日朝早我哋就去咗搭海雲台天空膠囊，小編上官網買飛嘅時候發現一個月內嘅飛都好多已經賣曬，所以真心建議大家如果想搭嘅話真係要提早預約。
另外同一個時段通常都會有幾組人一齊預約，所以正式上車前可能都要等一陣，安排行程時最好預鬆少少時間。搭大約30分鐘就會到青沙浦，落車之後附近亦有手信鋪可以行下。沿途風景好靚，記住要把握機會影相！
10:30ㅣ青沙浦咖啡店LIBERTA
到咗青沙浦之後，我哋就去咗一間海景Cafe度休息咗一陣。呢個時間都已經有唔少人，想坐窗邊位真係要靠少少運氣。店內有好多款麵包都睇落好吸引，不過因為之後仲要食lunch，所以最後都只係忍手揀咗一個。慢慢享受下朝早嘅Cafe時光，真係幾滿足。
11:30ㅣ搭藍線公園海邊列車（由青沙浦出發）
回程我哋就改搭沿住海岸線行嘅海邊列車。一路望住窗外風景，好快就去到尾浦。去程搭天空膠囊大概要30分鐘，但回程搭海邊列車，體感上真係差唔多只係一半時間。
今次喺官網買來回套票，去程搭天空膠囊、回程搭海邊列車，2個人一共係₩73,000（價錢可能隨時有變，建議參考官網資訊）。
12:30ㅣ午餐（百歲章魚）
午餐我哋一早就決定咗要食釜山特色美食「낙곱새(辣炒章魚+牛腸+蝦仁、簡稱章腸蝦)」，發現酒店附近有一間好出名嘅餐廳，所以搭完海邊列車之後就去返酒店攞行李，再慢慢向餐廳方向行。
「百歲章魚」係一間位於海雲台站主街嘅辣炒章腸蝦專門店，小編同同事去嘅時候入面全部都係韓國客人！
我哋叫咗2人份（₩30,000），如果好似小編咁唔食得辣嘅話記住要同店員講叫要少辣！煮到食材全部熟曬之後就可以𢳂落飯碗，然後撈埋紫菜碎一齊食。加埋酸酸地嘅泡菜更加開胃滿足，一啖接一啖，推薦大家去試！
下載優惠券領取獨家贈品👇🏻
13:30ㅣ海雲台站 → 田浦站
下晝我哋預約咗做頭皮SPA，所以由海雲台站搭咗大約30分鐘地鐵去田浦站(전포역)。因為之後淨返嘅行程都主要喺呢一帶，所以小編就直接先將行李寄存咗喺地鐵站入面嘅儲物櫃。大家可以參考下面呢篇文章，睇邊度有儲物櫃可以用：
14:15ㅣsuyb（頭皮SPA）
今次去咗之前一直好想試嘅田浦人氣隱世salon體驗頭皮SPA。店內氣氛好舒服，又有種好親切嘅感覺，正式開始做頭皮SPA之前，單係頸肩一帶嘅伸展放鬆都已經令人覺得好舒服。
可能因為啱啱食完飯，加上又係第一次做頭皮SPA，好快就放鬆到瞓着咗XD
做完頭皮SPA之後，店員仲幫我簡單整理埋頭髮，真係令人好滿足。我之前其實冇正式做過呢類頭皮SPA，所以今次做完之後，淨係覺得頭皮狀態好咗，連個頭都好似輕咗咁，之後應該會再keep住去做！
更多參考圖片&預約詳情👇🏻
15:30ㅣPN Studio（個人形象照）
最後我哋就去咗朋友推薦嘅Studio影形象照，由頭先間髮型屋行1分鐘就會去到！之前已經聽講過呢度係會準時開始影，所以我哋提早咗大約10分鐘到，順便補一補妝；結果真係一到時間去即刻可以入去影相。
就算係平時自己唔太會擺嘅pose，攝影師都會好溫柔咁一步一步教你點做。影完之後每張相都好滿意，所以用咗唔少時間揀相。執相嘅過程仲可以即場喺隔離睇到，成品質素非常高，可能之後每次去釜山玩都會專程去影返輯相。
更多參考圖片&預約詳情👇🏻
16:30ㅣ李在模披薩
兩日一夜旅程嘅最後一餐，我哋揀咗去食釜山無人不知嘅「李在模披薩(이재모피자)」。煙韌嘅餅底配上滿滿嘅自家製芝士同配料，真係好滿足；而今次充實又療癒嘅釜山之旅，亦都喺呢一餐之中劃上句號。
釜山療癒·醫美旅遊優惠慶典介紹
第1日喺Club D Oasis用到嘅優惠券，其實係釜山觀光公社為外國旅客推出嘅療癒·醫美旅遊優惠之一！呢個優惠只可以喺有「BusanPick」標記嘅產品先可以用到，所以記住參考推廣活動頁面，睇下你想體驗嘅行程有冇得用呢個優惠啦！
活動概覽
優惠日期：2026.05.26 ~ 2026.10.31
適用產品：療癒旅遊（Spa、瑜伽、遊艇、美髮沙龍等）、醫療旅遊（皮膚科、牙科、韓醫院、IV 點滴等）
主要優惠
- 療癒體驗優惠券（最多減₩50,000、最低付款金額為₩5,000）
- 預約釜山外國人友善醫療機構即享雙倍醫美積分回贈
- 每月抽出2位預約後填寫評論之幸運兒，送出價值10萬韓幣之Creatrip積分
更多詳情可以撳下面張圖前往活動頁面👇🏻
※本推廣活動可能會因應營運情況而在未有事先通知下提前結束
釜山兩日一夜行程每人要預幾多錢？
項目 | 內容 | 每人預算 |
KTX（來回） | 首爾 ⇌ 釜山 | 約₩119,600 |
地鐵、交通 | 釜山站 - 水營 - 海雲台 - 田浦 | 約₩5,000 |
午餐（第1日） | 李夏亭醬油蟹 | 約₩45,000 |
Club D Oasis | 週末套票 | 約₩5,000 |
晚餐（第1日） | 炸雞 | 約₩17,000 |
住宿（1晚） | 海雲台酒店（2人1間房） | 約₩60,000 |
釜山藍線公園 | 天空膠囊+海岸列車 | 約₩36,500 |
青沙浦咖啡店 | LIBERTA | 約₩10,000 |
午餐（第2日） | 百歲章魚 | 約₩15,000 |
頭皮SPA | suyb | 約₩130,000 |
個人形象照 | PN Studio 西面店 | 約₩50,000 |
晚餐（第2日） | 李在模披薩 | 約₩15,000 |
合計（每人） | 約₩503,100 |
※以上金額以2026年6月為準嘅預估價錢，實際付款金額可能會有出入。頭皮SPA同形象照費用會因應選項或者套票而有唔同，預約時記得確認返準確金額。
釜山旅行常見問題FAQ
| Q1. 可以喺邊度睇到釜山療癒·醫美旅遊優惠慶典相關資訊？
A：可以喺Creatrip推廣頁面查詢！活動由2026年5月26日至10月31日期間進行，有「BusanPick」標記嘅指定療癒同醫美旅遊商品都可以享有獨家優惠。不過活動有可能因應營運情況而唔提前通知就提早結束，詳情請參考相關頁面。
| Q2. 有冇方法可以由香港直接去釜山？
A：有。香港有直航機直接去到釜山金海國際機場，唔需要經首爾轉機都可以去到釜山！
| Q3. 由首爾去釜山搭 KTX 要幾耐？
A：如果由首爾站出發，通常大約要3個鐘，最快有機會2個半鐘多啲就到。
| Q4. 醬油蟹辣唔辣？外國人會唔會難接受？
A：李夏亭醬油蟹嘅醬油蟹完全唔辣，味道亦比較清爽，所以外國旅客都會幾容易接受。
| Q5. 釜山藍線公園嘅門票可唔可以即日買？
A：可以即場喺櫃位買，不過天空膠囊人氣好高，好多時都會售罄，所以建議最好都係預先喺官網訂票。
| Q6. suyb嘅頭皮SPA可唔可以即日預約？
A：週末或者熱門時段通常都好快滿，所以建議最少提前一日預約定。
| Q7. 海雲台酒店住邊一區會比較方便？
A：如果住喺海雲台海邊附近，去沙灘、Club D Oasis 同埋附近食嘢嘅地方都可以步行到達，會方便好多。
| Q8. 由海雲台去西面大概要幾耐？
A：搭地鐵大約30至40分鐘；今次行程入面，由海雲台去田浦站就大概用咗 30 分鐘。
| Q9. 釜山兩日一夜旅行大概要預幾多 budget？
A：計埋交通、餐飲同體驗活動，每人大約預50萬韓幣左右就已經可以玩得幾充實。如果再善用釜山療癒·醫美旅遊優惠慶典嘅優惠券，仲可以再慳啲。
| Q10. 幾時去釜山旅行最好？
A：如果想睇海景同夜景，6至9月會比較多人去；但如果好似今次咁，以SPA同美食為主、想輕鬆療癒下，會推薦大家趁天氣更舒服嘅春天（4 至 5 月）同秋天（9 至 11 月）去。
旅程總結
釜山就算只係短短兩日一夜，都一樣可以玩得好放鬆、好療癒。今次由海雲台嘅SPA同夜晚海景，到青沙浦嘅海景Cafe，再到頭皮SPA同形象照，本身諗住係一個主打放鬆嘅行程，點知最後連美食、打卡同體驗都一樣冇少，行程都幾充實。
我自己都去過釜山好多次，但今次就特登用外國旅客嘅角度去排行程，連一啲旅行時真係會在意嘅細節都一齊試埋、睇埋。加上今次仲用到優惠，慳返唔少，如果你都準備去釜山玩，不妨參考下呢條路線。
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
