韓國國立公園行山指南2026 | 行山禮儀、免費安全裝備租借、常見問題
第一次去韓國行山都唔怕！一次過整理韓國國立公園行山禮儀、四季注意事項、免費安全裝備租借方法，同埋外國旅客最常問嘅30條問題。
去韓國旅行，大家通常會先諗起美食、購物、K-POP、Cafe或者韓服體驗。不過對好多韓國人嚟講，行山同去國立公園其實都係好日常嘅旅遊方式。由首爾近郊嘅北漢山，到江原道嘅雪嶽山、五台山，再到可以結合歷史行程嘅慶州國立公園，去韓國旅行嘅時候其實都可以將行山同自然體驗排入行程之中！
但如果你係第一次喺韓國行山，可能會發現同香港或者其他地方有少少唔同。韓國嘅山路好多時會有石級、斜坡、岩石路段，加上當地行山文化、基本規則同安全習慣都未必同你平時接觸嘅一樣，所以今次就等小編一次過幫大家整理一份韓國行山實用指南，希望可以幫到有興趣去韓國行山嘅你！
✍🏻睇完呢篇文章你可以瞭解更多關於...
- 點解咁多人都會去韓國行山
- 去韓國國立公園前要留意嘅禮儀同規則
- 初學者同有經驗登山客適合去邊啲行山地點
- 去韓國行山前有咩要準備
- 30條外國旅客最常問嘅韓國行山問題
- 外國旅客專屬韓國行山獎賞活動等
※本文內容以2026年6月資料為準整理，實際開放情況、行山管制、裝備租借安排等，出發前建議再到官方渠道確認。
點解最近咁多人都會專程去韓國行山？
近年越嚟越多遊客去韓國旅行嘅時候，都會專程安排時間去行山。當中原因唔單止係因為風景靚，仲因為可以用另一種方式，更深入咁體驗韓國本地生活。就算喺首爾呢類大城市附近，亦可以輕鬆搭公共交通去到山腳；而江原道、慶州呢啲本身已經好受歡迎嘅旅遊地區，附近同樣有景色優美嘅國立公園，好適合排入半日或者一日行程。
另外韓國嘅山四季景色同氛圍都各有特色。春天有清新綠意，夏天有翠綠茂密嘅森林步道，秋天可以欣賞滿山紅葉，冬天就有浪漫雪景。所以，就算係同一座山，或者同一個國立公園，喺唔同季節去，都會有截然不同嘅感受。
不過喺韓國行山並唔等於輕鬆散步！唔少山路都設有樓梯、石路、濕滑岩石同埋較斜嘅上落路段，而且天氣變化亦可以好快。對第一次去嘅遊客嚟講，除咗揀啱行山地點之外，事前了解基本禮儀同安全資訊都同樣重要。
前往韓國國立公園前必知規則及禮儀
➀ 唔好離開指定步道，亦要留意管制區域
喺韓國國立公園行山，最基本就係沿住指定步道前進。離開指定路線唔單止容易盪失路，亦會增加跣親、跌傷等風險。另外有啲區域可能屬於自然保護範圍或者因為需要維修而暫時封閉，如果擅自進入可能會影響生態，亦可能違反園區規定。
➁ 盡量保持安靜，避免大聲講電話或者播歌
去國立公園，多數都係想安靜咁享受風景同運動。如果一路開住藍牙喇叭播歌或者大聲講電話，會好容易影響其他人。尤其係觀景位、休息區或者山頂位置，建議盡量維持低音量，保持禮貌。
➂ 山頂影相打卡要快同互相遷就
去到山頂或者靚景位，相信大家都一定會想影相留念。不過如果長時間企喺中心位、擺好耐姿勢，或者用背囊、腳架阻住人流，就會令後面等緊嘅人唔方便。人多嘅時候，影相最好快少少，影完就讓位，互相遷就。
➃ 垃圾要自己帶走
呢個可以話係最基本嘅禮儀之一，因為韓國國立公園本身就係一個受保護地區，所以零食包裝、飲品樽、紙巾、濕紙巾等，就算好細件，都應該自己帶返落山。建議大家自備一個細膠袋用嚟裝垃圾，連食物殘渣都唔好隨便留低，以免影響野生動物生活。
➄ 嚴禁餵動物、吸煙、煮食、做危險動作等
喺韓國國立公園入面唔可以餵野生動物，亦唔可以吸煙或煮食（尤其吸煙同生火會增加山林火災風險）。另外大家亦都唔應該冒險影相或做危險動作，特別係喺懸崖邊、欄杆外或者濕滑岩石附近真係會好容易受傷甚至係跣低！
推薦初學者同有經驗行山客去韓國邊度行山？
韓國嘅國立公園各有特色，有啲特別適合第一次體驗韓國行山嘅旅客，亦有啲更啱想感受壯觀山景同濃厚登山氣氛嘅人。如果係第一次去，建議唔好淨係睇邊座山最出名，一定要考慮埋交通同登山難度！
推薦人士 | 推薦地點 | 特色 |
初學者 | 北漢山國立公園 | 由首爾搭公共交通都幾方便，係好多旅客第一次體驗韓國行山會揀嘅地方 |
五台山國立公園 | 以森林步道為主，整體感覺比較安靜，適合療癒型行程。 | |
初學者~中級 | 慶州國立公園 | 可以一邊睇歷史遺蹟，一邊行山，較似旅行型郊遊路線。 |
有經驗 | 雪嶽山國立公園 | 山景壯觀，整體感受較有挑戰性，係韓國代表性山岳景點之一。 |
韓國國立公園推薦行山路線👇🏻
[외국인이 가기 좋은 한국 국립공원 트레킹 코스 5곳 블로그 삽입 예정]
喺韓國行山前有咩需要準備？(feat.免費安全裝備租借方法)
📋登山準備物品清單
韓國國立公園嘅山路同平路散步唔同，經常會出現石級、泥路、濕滑岩石同較斜路段。所以拖鞋、涼鞋，或者鞋底太滑嘅休閒鞋，其實都幾危險。最少都建議著一對可以穩定承托雙腳嘅波鞋或者行山鞋。基本建議帶備以下物品：
- 防滑鞋（按路線難度選擇波鞋、越野鞋或者行山鞋）
- 飲用水（就算只係行一兩個鐘都應該帶）
- 簡單小食（例如energy bar、餅乾、朱古力等）
- 手機同行動電源（方便睇地圖，同應付突發情況）
- 薄外套（山上體感溫度可能同市區唔同）
- 帽同防曬用品（夏天可以幫助阻擋紫外線同降低體感溫度）
小編真實經驗：如果係第一次去韓國行山，記住唔好因為覺得只係簡單去行一陣就完全唔做準備，亦都唔建議著牛仔褲、拖鞋、涼鞋就直接上山。而且通常行山時間會長過本身預計時間，建議唔好太遲開始，入夜先落山會好危險！
⚠️登山前注意事項
第一次喺韓國行山嘅話，除咗準備裝備之外，出發前亦建議先檢查自己身體狀況、行程安排同基本安全事項。尤其韓國山路唔少路段都有石級、斜坡同自然風險，事前多留意一步會安心好多。
出發前可以先問自己以下幾個問題：
- 平時有冇服用血壓藥等預防心血管疾病嘅藥物？
- 有冇心肌梗塞相關嘅家族病史？
- 平時有冇試過感到胸口中央位置疼痛？
- 有冇按自己體力訂立合適嘅行山計劃？
- 目前身體狀況是否良好？
- 有冇帶齊適合當季嘅行山裝備？
另外出發當日建議大家要多留意以下幾點：
✅️先睇天氣，再按自己能力規劃路線
出發前先確認天氣，再按自己體力同時間安排選擇合適步道，唔好勉強行超出自己能力嘅路線。
✅️行山前先做簡單熱身
出發前稍為活動手腳同拉筋，可以減少行山途中肌肉繃緊、抽筋或者受傷嘅機會。
✅️留意落石風險警告
如果步道附近有落石風險警告標誌，就唔好靠近相關區域，並盡快離開現場。
✅️使用指定步道
離開指定步道、走入危險區域，或者為咗影相而靠近邊位，都有可能增加意外風險。
✅️留意有毒生物同陌生植物
如果見到蛇經常出沒嘅石堆，或者發現蜂巢，應盡快避開；另外，唔好隨便觸碰唔清楚嘅植物。
✅️最好喺日落前兩小時開始落山
夜間行山風險較高，如果係第一次行或者唔熟路線，更加唔建議太夜先落山。
☀️四季特別注意事項
韓國行山會明顯受季節變化影響。就算係同一座山，夏天同冬天嘅體感難度亦可能有好大差別，因此出發前應按季節準備相應裝備同用品。
春天 | 夏天 |
|
|
秋天 | 冬天 |
|
|
👷🏻♂️韓國國立公園免費安全裝備租借
根據2026年最新資訊，韓國國立公園已經將免費安全裝備租借服務擴展到20個山岳型國立公園，最多人去嘅北漢山、雪嶽山、智異山、五台山等國立公園都有提供！
小編上兩個禮拜同朋友去五台山行山遠足，發現入口附近嘅探訪支援中心就有相關服務，重點係外國人都可以免費租借！只要去到現場同職員講你想租裝備，佢就會俾份申請表你填，填完就可以租到行山鞋、行山杖、背囊、冰爪、護膝、急救包、暖包、坐墊同指示地圖。
※唔同國立公園嘅安排未必完全一樣，實際可借用品、借還位置、服務時間同存貨情況，都有可能因地點同季節而異。
因為小編同朋友都唔係成日去行山，職員都好親切咁介紹裝備要點用、行山時有咩需要注意等等，令上次行山之旅成功安全結束。如果你係第一次去行山，或者無另外自備，真係好推薦大家去免費租借安全裝備！
小編小貼士：因為數量有限，所以建議想租借裝備嘅朋友們要提早去探訪支援中心查詢，用完之後亦都記住去返相同地點歸還，方便下一批行山客使用（特別係冬天同週末熱門時段，裝備可能好快就會被借走曬！）
外國旅客專屬韓國行山獎賞活動
由2026年7月8日到11月30日，Creatrip同韓國國立公園攜手合作舉辦外國旅客專屬韓國行山獎賞活動（K-Trekking Challenge），只要完成指定任務就有機會拎到限定禮品同積分獎賞，如果今次韓國之旅打算安排行山行程，記住唔好錯過！
任務 | 參加方法 | 獎賞 |
國立公園到訪認證 | 於Creatrip免費預約後前往指定認證地點出示QR Code及護照(正本/副本皆可) | 韓國國立公園限定紀念品公仔鎖匙扣 |
社交平台分享任務 | 於個人社交平台上傳附有指定hashtag嘅體驗相關內容後上傳至活動頁面 | ₩30,000P |
分享體驗文章任務 | 於Creatrip網站撰寫與任務地點行山經驗相關之旅韓遊記後上傳至活動頁面 | ₩100,000P |
最佳分享抽獎活動 | 於參加上述分享任務人士中評選出優秀分享內容後進行抽獎 | 社交平台得獎者：₩100,000P Creatrip旅韓遊記得獎者：₩500,000P |
※獎賞名額以先到先得或抽獎形式提供，活動或因現場情況及營運安排而提早結束。
[K-트레킹 챌린지 블로그 삽입 예정]
30條外國旅客最常問嘅韓國行山問題
<韓國行山基本資訊>
| Q1. 外國人可唔可以去韓國國立公園行山？
A：可以。韓國國立公園開放俾外國旅客入內行山。不過出發前最好先確認路線難度、天氣同當日有冇行山管制。
| Q2. 韓國國立公園需唔需要入場費？
A：大部分韓國國立公園基本入園行山本身都係免費。不過停車場、纜車、露營場、避難所或者部分預約設施，就可能要另外收費。
| Q3. 初學者都可以喺韓國國立公園行山？
A：可以。不過建議先由交通方便、路線較短嘅地方開始。因為韓國山路好多石級同岩石位，所以會比一般散步路線難度高少少。
| Q4. 如果想即日來回，首爾附近有邊個國立公園較方便？
A：北漢山國立公園會係好多旅客嘅首選。由首爾出發相對方便，只要搭地鐵就可以去到，適合安排半日或者一日行程。
| Q5. 韓國行山同其他地方有咩分別？
A：韓國山路通常較多石級、岩石路同斜坡，而且好多本地人都會著齊裝備去行山，山頂打卡文化亦比較常見。
| Q6. 一個人去得唔得？第一次去係咪最好搵人一齊？
A：熱門而且相對容易嘅路線，一個人去都可以。不過如果你第一次喺韓國行山，建議揀日頭去，有人同行會更加安心。
<路線選擇與交通>
| Q7. 初學者適合去邊個韓國國立公園？
A：初次體驗最好揀比較短嘅路線，如果比較重視交通方便程度，可以考慮北漢山；如果想行安靜森林路線，可以考慮五台山；如果想結合歷史景點同行山，就可以睇慶州國立公園。
| Q8. 如果本身有行山經驗，去邊個國立公園可以玩得更加開心？
A：如果你想睇更有代表性嘅韓國山景，雪嶽山會係其中一個最受歡迎嘅選擇。
| Q9. 搭公共交通可唔可以去到韓國國立公園？
A：主要國立公園一般都可以利用巴士、地鐵或者長途巴士前往。不過有啲地方未必可以直達山口，班次亦可能疏，所以記得安排行程嘅時候連埋回程車時間一齊睇。
| Q10. 去韓國行山用Google Maps夠唔夠？
A：Google Maps 可以用嚟睇大概位置，但喺韓國搵步行路線、巴士轉乘、登山口位置嘅時候，通常Naver Map或KakaoMap會更實用。
| Q11. 喺韓國國立公園盪失路點算？
A：首先唔好亂行，先確認自己附近有冇路牌、位置編號牌或者官方步道標示，再用地圖app睇返位置。如果情況唔清楚，可以向現場服務中心求助，必要時建議打119緊急求助。
<服裝與鞋履>
| Q12. 著牛仔褲或者平時旅行衫褲去行山得唔得？
A：如果係比較短嘅路線都還可以，但行耐咗或者遇到較多樓梯路段時，活動起上嚟就會冇咁方便。最好都係著啲輕便、透氣易散熱、比較方便活動嘅衫褲。
| Q13. 可唔可以著普通波鞋去行山？
A：如果係較短同相對上容易嘅路線，抓地力唔差嘅波鞋通常都可以。不過如果路線較長，或者有濕滑石路、斜坡，就建議著越野鞋或行山鞋。
| Q14. 著拖鞋或者涼鞋去韓國行山可唔可以？
A：唔建議。韓國山路好多石級、岩石同泥路，如果鞋唔能夠固定雙腳會比較危險，特別係落雨或者比較潮濕嘅時候好容易會跣親或者扭傷。
| Q15. 喺韓國行山點解揀著咩鞋特別重要？
A：因為山路唔係單純泥路，經常會遇到濕石、石級同斜落山路段。鞋底太滑或者支撐唔夠，都會增加受傷風險。
| Q16. 夏天喺韓國行山應該著咩？
A：建議著透氣、快乾嘅衣物，另外準備帽、防曬用品同足夠飲用水。如果驚落雨，建議帶件薄身防水外套。
| Q17. 冬天去韓國行山一定要帶冰爪？
A：韓國山路冬天好多石級同岩石位都會結冰，所以好多情況下都強烈建議帶冰爪。尤其係清晨、陽光照唔到嘅位或者較高海拔路段，防滑裝備會好重要。
<準備物品與現場設施>
| Q18. 第一次喺韓國行山最基本要帶咩？
A：最基本要帶水、小食、手機、尿袋(行動電源)、薄外套、帽同防滑鞋。視乎季節亦可能需要防水外套或者冰爪等裝備。
| Q19. 水同小食要帶幾多？
A：就算短途路線都建議帶水，夏天更加要帶多啲，以防中途脫水。小食方面，一啲方便補充體力嘅energy bar或餅乾就已經夠。
| Q20. 國立公園入口通常有冇洗手間或者便利設施？
A：主要入口或者探訪支援中心附近通常會有洗手間。不過入山之後設施可能會少好多甚至冇，所以最好出發前先去定。
<免費安全裝備租借>
| Q21. 韓國國立公園可以免費借安全裝備？
A：可以。根據2026年最新資訊，韓國國立公園已將免費安全裝備租借擴展至20個山岳型國立公園。不過唔同國立公園嘅安排未必完全一樣，實際可借用品、借還位置、服務時間同存貨情況，都有可能因地點同季節而異。
| Q22. 外國人都可以免費租用安全裝備？
A：可以。不過因為每個地點存貨數量不一，所以建議提早少少去服務中心查詢。
| Q23. 一般去國立公園可以借到咩行山裝備？
A：會視乎季節同公園而定，通常包括行山鞋、行山杖、背囊、冰爪、護膝、急救包、暖包、坐墊同指示地圖。
| Q24. 免費行山安全裝備可以去邊度借？
A：多數會喺探訪支援中心、詢問處或者現場服務站提供。出發前最好先查清楚位置同開放時間。
<規則與安全>
| Q25. 可唔可以喺韓國國立公園大聲講電話或者播音樂？
A：唔建議。咁樣容易影響其他行山人士，亦唔太符合一般國立公園安靜欣賞自然嘅氣氛。
| Q26. 喺山頂影相有咩需要注意？
A：最重要係唔好霸住人氣影相位影太耐，影完就盡量讓位俾後面嘅人，同時唔好用背囊、腳架等物件阻住通道。
| Q27. 如果突然落雨或者天氣變差，仲應唔應該繼續行？
A：要睇實際情況，但如果開始大雨、大風、有雷、起濃霧，建議唔好勉強。尤其岩石路段落雨後會非常滑，必要時應考慮提早落山或者取消行程。
| Q28. 點樣知道有冇封山或者步道管制？
A：可以到韓國國立公園官方管制資訊頁面、現場告示板或者探訪支援中心查詢。山火預防、天氣、落石風險或者步道維修，都有可能令路線臨時封閉。
| Q29. 下晝3~4點先開始上山得唔得？
A：如果係第一次去或者唔熟路線，其實唔建議。韓國山區天黑後能見度會下降得好快，落山時間亦可能比預期長，建議天黑2小時前就要準備落山，所以最好上午或者下午較早時間起步。
| Q30. 如果喺韓國國立公園遇到緊急情況應該點做？
A：首先停低，唔好勉強移動，之後睇附近有冇位置標示牌或者明顯地標。需要時可以打119，亦可以向探訪支援中心或者附近行山人士求助。
喺韓國國立公園行山，唔單止係睇風景咁簡單，亦係感受韓國自然景觀同本地生活節奏嘅好方法。無論你想去交通方便嘅北漢山、環境清靜嘅五台山，定係擁有代表性山景嘅雪嶽山，都可以按自己嘅體力、時間同旅遊步調，選擇最適合自己嘅路線。
與其只係追求去最出名嘅山，不如先揀啱適合自己嘅路線，並做好基本準備同注意安全，咁先可以行得更安心。如果你下次去韓國，想體驗一下唔同於購物同美食嘅行程，不妨考慮安排一次去國立公園行山嘅行程！
[K-트레킹 챌린지 랜딩페이지 삽입 예정]
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
