首爾新村購物推薦 | 現代百貨新村店必逛品牌與購物優惠整理（2026）
新村行街唔一定只去弘大或江南！今次帶你睇現代百貨新村店本館同U-PLEX有咩購物優惠、必買品牌、退稅服務同休息空間。
- 去新村購物有咩地方好行？
- 現代百貨新村店本館同U-PLEX有咩分別？
- 外國遊客去現代百貨新村店購物有咩特別優惠？
- 小編推薦現代百貨新村店本館必行品牌
- 現代百貨新村店U-PLEX時裝品牌推薦
- 除咗購物現代百貨新村店仲有咩好玩？
- 現代百貨新村店常見問題FAQ
去首爾旅行嘅時候唔知大家都會去邊度行街呢？相信好多人都會揀去弘大或者江南，但如果叫小編介紹其他行街好去處，小編會推薦大家去新村。
小編自己喺韓國住咗7年，以前讀語學堂一直都係住喺新村。新村係一個充滿年輕氣氛同活力嘅地區，平時會見到有好多韓國學生同年輕人去玩。而講起新村必去購物景點就一定唔少得「現代百貨新村店本館」同附近嘅「現代百貨新村U-PLEX」！
而且小編最近發現原來呢兩間商場而家有為遊客提供唔少優惠，今日就嚟同大家介紹一下現代百貨新村店本館同U-PLEX有咩必買品牌、休憩設施同特別活動，如果你想喺新村安排一個可以購物、休息、順便感受韓國年輕氣氛嘅行程，就記住要睇落去啦！
去新村購物有咩地方好行？
新村一向都係首爾幾有代表性嘅大學區之一，成個區感覺年輕、有活力，除咗各種商店之外，附近仲有唔少Cafe同可以慢慢行嘅地方。相比起明洞呢種比較貼近遊客區嘅地方，新村會更有一種貼近韓國人日常生活嘅感覺，所以如果你想感受更在地嘅氣氛，小編會推薦大家去新村玩返轉。
如果大家今次打算去新村行街，小編會幾推薦大家先去「現代百貨新村店」！喺呢度大家可以一次過買到韓國人氣品牌商品，同時享用各種優惠、服務設施同休息空間。
而且因為現代百貨新村店分成比較貼近傳統百貨公司嘅「本館」同更年輕休閒嘅「U-PLEX」，所以既可以感受到新村本身年輕同活躍嘅氛圍，又可以保留百貨公司嗰種舒服又方便嘅購物體驗。就算係第一次去新村，或者想安排一個唔會太攰嘅購物行程，小編都想推薦大家去行下！
現代百貨新村店本館同U-PLEX有咩分別？
「現代百貨新村店」位於首爾地鐵2號線新村站(신촌역)1號出口附近，雖然本館同U-PLEX同樣都係現代百貨新村店嘅一部分，不過兩邊嘅氣氛同進駐店鋪風格都唔一樣。小編自己兩邊都有行過，個人覺得各有各魅力！
分別 | 現代百貨新村店本館 | 現代百貨新村U-PLEX |
商場氣氛 | 較貼近傳統高級百貨公司 | 更年輕輕鬆 |
商場特徵 | 規模較大 品牌類別更齊全 | 規模較集中 主打人氣時尚流行品牌 |
推薦對象 | 想一次過睇多種類別商品 | 想集中睇潮流品牌，同感受新村年輕氣氛 |
外國遊客去現代百貨新村店購物有咩特別優惠？
※下列優惠資訊可能因時間、品牌政策或現場活動而有變動，實際以現場資訊及職員說明為準。
1. 消費滿30萬韓幣送5%現金券
- 換領地點：本館10樓客戶服務中心
外國旅客只要喺現代百貨新村店同一日累積消費金額滿30萬韓幣，就可以領取5%現金券。而且因為無論係喺本館定U-PLEX消費都可以幾張單加埋一齊計，買買下好快就可以達到目標金額。
※5%現金券：最高可獲目標金額（30萬韓幣）之5% = 15,000韓幣現金券
記住要集齊所有當日消費收據，去到本館10樓客戶服務中心之後向職員出示收據同護照（或者護照個人資料頁相片），就可以拎到現金券，下次消費嘅時候用！不過餐飲食肆、酒類消費不計算在內，家電、名牌消費亦只會按50%金額計算，去換領之前要注意啦。
💡小貼士：呢個優惠得新村店有，如果今次去行街會打算盡情掃貨，咁就一定唔可以錯過！不過好似上述所講，唔係所有品牌都可以計算在內，建議大家可以再向現場職員查詢。
2. 出示護照即享Cafe H免費飲品
- 換領地點：本館9樓Cafe H
行街行到咁上下總需要一個可以坐低休息嘅地方，而現代百貨新村店本館9樓就有一間專為現代百貨會員而設嘅Cafe同貴賓區。
而家旅客只需要向Cafe H職員出示護照或者護照個人資料頁相片，就可以免費換到一杯飲品，更加可以去隔離貴賓區坐低休息。
飲品選擇方面都唔少，咖啡、茶、非咖啡飲品都有。小編上次同台灣同事一齊去，分別換咗一杯美式咖啡同檸檬梳打，然後就揀咗窗邊位坐，一邊欣賞新村一帶風景，一邊休息，都真係幾寫意！
💡小貼士：如果加入埋現代百貨H. Point會員，每個月更加可以喺Cafe H免費換多2杯免費飲品，變相加埋上述優惠總共可以獲得3杯飲品！
3. 外國旅客專屬品牌優惠
部分品牌會為外國旅客提供額外優惠，形式可能會係即時折扣，或者係消費滿指定金額送贈品等等。小編6月頭去嘅時候HERA、THE WHOO、ADIDAS、THE NORTH FACE、A.P.C等人氣品牌都做緊旅客專屬優惠，記住唔好錯過！
💡小貼士：想知道最近邊幾個牌子有提供外國顧客專屬優惠，除咗可以喺店鋪門口見到有指示牌，亦都可以去本館10樓攞商場單張參考，安排行街路線更方便！
4. 全球服務中心
- 位置：本館1樓正門附近
無論係第一次去現代百貨新村店想問路或者查詢購物資訊，抑或係行李太多想搵地方暫時寄存、買完嘢需要辦理退稅手續，都可以去位於本館1樓嘅全球服務中心。
大家只要認住上圖「Global Service」字眼就可以搵到，現場有識講中、英文嘅職員，無論係想問清退稅、服務資訊，抑或係想免費寄存行李、申請現代百貨H.Point會員，都可以喺度查詢。
💡小貼士：小編幫大家問過職員，呢度嘅免費行李寄存服務主要係寄存大型行李箱，唔可以淨係寄存幾個袋或者購物戰利品，而且記住要喺夜晚7點半之前拎返行李啊！
5. Tax Refund退稅服務
- 辦理地點：
- 本館1樓全球服務中心、10樓客戶服務中心旁自助退稅機
- U-PLEX B1樓自助退稅機
本館10樓客戶服務中心旁自助退稅機
U-PLEX B1/F自助退稅機
喺韓國行街購物當然要去做退稅！只要喺現代百貨新村店單筆消費滿15,000韓幣以上，就可以辦理退稅手續。大家可以喺店鋪進行即時退稅，或者向職員要求攞事後退稅單，之後一次過搞都得，唔需要花時間去其他地方處理退稅手續。
小編推薦現代百貨新村店本館必行品牌
現代百貨新村店本館有齊潮流品牌服飾、國際名牌、時尚男裝/女裝、童裝/兒童用品、運動同戶外品牌等等，如果每一層都行曬最少都要用半日。小編幫大家精選咗3個最近最受韓國年輕人歡迎嘅時裝同化妝品品牌，下次去可以bookmark定呢幾間鋪頭！
MARITHÉ FRANÇOIS GIRBAUD(마리떼프랑소와저버)
- 位置：本館B2/F
如果你鐘意韓國年輕人日常穿搭風格嘅話，一定有聽過呢個牌子！呢個時裝品牌幾適合新村本身嘅年輕氣氛，整體偏休閒、自然唔浮誇，但又夠韓系同時尚。
「MARITHÉ FRANÇOIS GIRBAUD」有好多百搭嘅時尚單品，無論係衫褲定配飾都好受歡迎，小編自己都有呢個牌子嘅T恤同帽。上次去行嘅時候發現新出咗唔少融合淺藍色間條、碎花等等2026春夏季流行元素嘅衫，鐘意休閒風嘅朋友們一定會買到心頭好！
Matin Kim(마뗑킴)
- 位置：本館B2/F
如果你平時有留意韓國時裝，應該都會聽過「Matin Kim」呢個時裝品牌！無論係剪裁定整體風格都非常貼近韓國潮流，除咗衫之外，好多韓國女仔都會買Matin Kim嘅手袋，設計靚之餘夠實用百搭，返工或者出街孭都好啱。
雖然呢個牌子喺香港都有開分店，但韓國分店會有更多新款，而且價錢會相對平啲，推薦大家去現代百貨行街嘅時候順便去睇埋！
HERA(헤라)
- 位置：本館1/F
外國人獨家消費滿額贈品
現代百貨新村店都有唔少出名嘅高級化妝品品牌進駐，而其中一個就係底妝同唇膏都好出名嘅「HERA」。相信通常大家喺香港都係上網買，就算實體店有賣，種類都會比較少。大家可以直接去現代百貨新村店嘅HERA鋪位親身試色、試質地，揀返最啱自己嘅product！
上次小編去行嘅時候發現呢度做緊外國旅客專屬優惠，買滿3萬韓幣就可以得到一個旅行套裝，入面有調色防曬、粉底同定妝噴霧，平時出去玩都可以帶住去化妝，記住唔好錯過！
現代百貨新村店U-PLEX時裝品牌推薦
講起現代百貨新村店U-PLEX，相信好多人都會第一時間諗起正門對出嘅紅色水管地標，小編以前同朋友見面都會話約喺紅色水管附近等XD
好似頭先所講，現代百貨新村店U-PLEX會更有新村年輕、休閒、新潮嘅氣氛，大家可以搵到更多最近韓國流行嘅時裝同商品。而以下呢幾間都係小編平時自己都鍾意行，而且幾乎每個韓國人都一定會人手一件嘅時裝牌子！
本館4/F連接U-PLEX天橋
本館B2/F連接U-PLEX地下通道
💡小貼士：想喺現代百貨新村店本館去U-PLEX唔需要行出室外，喺本館4/F同B2/F都分別有通道可以行到過U-PLEX。因為兩間商場B2/F係連埋一齊嘅，而且中間都有唔少Cafe同商店，所以小編會建議大家喺本館由上而下行，落到B2/F就可以順便過到去U-PLEX！
MUSINSA STANDARD(무신사 스탠다드)
- 位置：U-PLEX 4/F
想買返幾件夠「韓」、一年四季都可以著又百搭嘅衫褲，推薦大家一定要去行「MUSINSA STANDARD」！佢以中性色調、簡約剪裁同高實穿度單品為主，所以無論你平時着開咩風格都一定可以買到心頭好。
而且因為全部款式都好百搭，男裝、女裝、童裝都有，所以非常受歡迎，小編自己屋企都有幾件。想買比較正式嘅返工衫、平時出街衫，甚或係戶外活動服裝都可以去行返轉！
WONDERPLACE(원더플레이스)
- 位置：U-PLEX 5/F
「WONDERPLACE」係一間可以一次過睇到唔同風格嘅選物時裝店，小編覺得呢度嘅衫會比較街頭風同休閒，而且款式都會更加多樣化，帽等等嘅配飾都會比較多。如果你唔想淨係睇單一品牌，而係想一次過買到唔同風格嘅衫，推薦大家可以去行下！
8Seconds(에잇세컨즈)
- 位置：U-PLEX 1/F
如果大家係喺U-PLEX正門入，就會即刻見到韓國人氣休閒時裝品牌「8Seconds」！
呢個牌子同樣都係主打韓系百搭時裝，不過同MUSINSA STANDARD比較嘅話，8Seconds嘅衫會更加colourful，但唔會話因為要跟上潮流設計就會變得勁誇張。而且因為價錢實惠親民，無論係學生定社會新鮮人都啱著。
FILA(휠라)
- 位置：U-PLEX 7/F
平時風格比較休閒、隨性，或者鍾意運動風嘅話，相信都對「FILA」呢個牌子唔陌生。FILA除咗衫褲，連運動鞋都好出名，經典藍白紅配色嘅運動鞋、跑鞋，甚至係今年好流行嘅Maryjane運動鞋都有！如果今次去現代百貨新村店行街會想買埋鞋，推薦大家可以去FILA睇~
小編早幾日去行見到佢哋推出咗以代表韓國嘅動物老虎做主角嘅首爾限定款式，帽同T恤都好cute！
除咗購物現代百貨新村店仲有咩好玩？
大家可能會覺得百貨公司係一個單純行街嘅地方，但現代百貨新村店其實有好多特別活動同俾大家中途停低休息嘅地方，同時感受新村本身嘅年輕氣氛。所以就算大家唔係打算大買特買，都好推薦大家去行下！
Cafe H & Glass Lounge
- 位置：本館9/F
如果你行到攰想搵個地方坐低，小編推薦大家可以去位於本館9樓嘅Cafe H同Glass Lounge！尤其當你已經買咗幾袋嘢，或者之後仲要去下一站，呢種可以短暫停低、整理行程同休息嘅空間會令整體購物體驗舒服好多。
小編以前一直都冇上過9樓，上次去先發現原來現代百貨新村店有個咁靚嘅貴賓區可以坐低休息！
Glass Lounge有一塊落地玻璃窗，可以180度欣賞到鞍山同延世大學嘅風景。根據韓國風水地理，因為鞍山有嶄新開始嘅好意頭，而且附近嘅文筆峰亦蘊含學問與人才輩出嘅氣場，所以如果大家準備迎接考試、事業等人生新起點，不妨可以去Glass Lounge欣賞靚風景，同時帶走好運氣!
💡小貼士：頭先都有提及到外國旅客可以出示護照換領1杯免費飲品，記住唔好錯過！
Star Square明星廣場音樂表演
- 位置：U-PLEX 1/F對出空地
- 時間：逢星期二、四
每個星期二同四喺U-PLEX 1樓正門對出嘅空地（紅色水管附近）都會有表演可以睇，每次都會邀請地下偶像或者KPOP舞團嚟唱歌跳舞，氣氛非常熱鬧，亦都可以感受到新村年輕嘅氣氛。
小編上次就咁啱遇到地下偶像UGPP嘅成員嚟表演，雖然小編本身唔識佢，但睇完佢一連唱跳幾首歌就覺得佢非常青春有活力，而且表演途中亦都吸引唔少人圍觀，有一種大家都暫時放低忙碌工作/學業，一齊享受自由熱鬧氣氛嘅感覺！
💡小貼士：全年都可以睇到呢個音樂表演，不過每日開始時間都唔一樣，通常都係喺17:00至19:00期間開始！
CAFE Oh!Make(카페오마케)
- 位置：U-PLEX B2/F
如果你本身鍾意睇動漫，咁就一定要去CAFE OH!MAKE！呢間Cafe經常會同人氣動漫或者遊戲角色合作，唔單止有周邊商品賣，成間Cafe都會掛滿角色嘅圖畫，亦都會推出限定飲品同甜品，比粉絲們影相留念。
小編上次去咁啱遇上《元氣少女緣結神》嘅限定主題，有唔少人都排隊影相同買小卡。建議大家去之前可以參考CAFE OH!MAKE嘅Instagram，睇下會唔會遇上你鍾意嘅動漫角色啦！
Pop-up Store
- 位置：U-PLEX B2/F
CAFE OH!MAKE對面就有一個Pop-up區，平時呢度會不定期搞活動。上次小編去係做緊時裝減價活動，可以用更平嘅價錢買到SATUR等人氣品牌商品！大家下次去可以去睇下做緊咩活動，可能有機會尋到寳！
現代百貨新村店常見問題FAQ
| Q1. 現代百貨新村店同其他現代百貨有咩唔同？
A：最大分別係新村店本身更貼近新村商圈氣氛，整體會比其他分店更有年輕、休閒、貼近日常穿搭嘅感覺。而且新村店除咗本館之外仲有U-PLEX，可以一次過睇埋最近人氣時裝品牌，想買流行韓系時裝推薦去現代百貨新村店。
| Q2. 現代百貨新村店本館同U-PLEX有咩分別？
A：本館規模較大，品牌分類更細，旅客服務、優惠同休息空間都比較齊全；U-PLEX就較集中，主打人氣時尚品牌，氣氛亦更年輕輕鬆。想睇得全面啲可以先行本館，想集中睇潮流品牌就可以去埋U-PLEX。
| Q3. 外國旅客可以喺現代百貨新村店拎到咩優惠？
A：根據2026年最新資訊，現代百貨新村店有為外國旅客提供消費滿額送現金券、免費換領飲品、指定品牌限定優惠/贈品等相關禮遇。不過每次活動內容都可能會唔同，建議以現場説明或者最新宣傳單張資訊為準。
| Q4. 喺現代百貨新村店購買可唔可以退稅？
A：可以。只要單筆消費超過15,000韓幣，就可以去本館1樓全球服務中心、10樓客戶服務中心旁自助退稅機同U-PLEX B1樓自助退稅機辦理退稅手續。
| Q5. 現代百貨新村店可唔可以寄存行李？
可以。新村店本館1樓全球服務中心可以免費寄放大型行李，大家可以去到先寄存行李，然後再開始行街，更加舒服方便。相關詳情可以向現場職員查詢。
| Q6. 去現代百貨新村店應該優先睇邊啲品牌？
A：如果係本館，可以先睇MARITHÉ FRANÇOIS GIRBAUD、Matin Kim同HERA；如果係 U-PLEX，就可以集中睇 MUSINSA STANDARD、Wonder Place、8seconds同FILA。呢幾個組合已經可以幾完整咁體驗到而家首爾年輕購物氣氛。
| Q7. 現代百貨新村店有冇可以休息嘅地方？
A：有，推薦大家去本館嘅Cafe H同Glass Lounge，環境夠開揚之餘仲可以欣賞到新村一帶景色。而家外國人出示護照更加可以換領一杯免費飲品，加入現代百貨H.Point會員每個月仲可以再換領多2杯，記住唔好錯過！（優惠可能隨時有變，請參考官網同現場資訊）
如果大家想喺新村搵一個方便又好行嘅購物地點，現代百貨新村店都幾值得加入行程。呢度唔單止可以買嘢，仲可以一次過睇埋購物優惠、退稅服務、人氣品牌同休息空間，整體行程會方便好多。
小編覺得現代百貨新村店最吸引嘅地方係可以同時感受到新村年輕熱鬧嘅氣氛，同百貨公司舒服又易行嘅購物體驗。如果你想喺新村輕鬆行下街，順便睇下而家韓國流行緊咩風格，呢度會係一個幾唔錯嘅選擇。
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
