2026首爾北村韓屋村必做體驗 | 雪花秀北村韓屋之家

Hello，大家好，我哋係由韓國人每日提供最新韓國旅行資訊嘅Creatrip。

嚟到北村韓屋村，好多人第一時間就會諗到行下散步、影相、感受下韓屋街景。不過真係行咗一轉之後，你可能會覺得北村雖然好靚，但如果只係影幾張相就走，好似仲差咗少少更深入嘅體驗。 如果你想揾個地方，可以一邊欣賞韓屋之餘，又可以順便感受到真正充滿韓國傳統文化美感嘅空間，小編好推薦你去「雪花秀北村之家」行下。

雪花秀（Sulwhasoo）係韓國具代表性嘅專櫃美妝品牌之一，多年嚟一直以韓國人參研究作為基礎，結合韓方護膚靈感同現代護膚科技，打造出深受歡迎嘅韓系護膚產品。亦因為品牌形象高級，又充滿韓國特色，直到而家都仍然係唔少人去韓國旅行時會揀嘅人氣手信同送禮品牌。

而位於北村嘅呢間韓屋旗艦空間，更加將1930年代嘅韓屋同1960年代嘅洋屋連接埋一齊，等大家可以一邊感受建築同空間本身嘅魅力，一邊更深入認識雪花秀嘅品牌歷史同美學。

「雪花秀Sulwhasoo」品牌特色 

提到韓國專櫃護膚品牌，唔少人第一時間就會諗起雪花秀（Sulwhasoo）。雪花秀係愛茉莉太平洋旗下嘅韓國高級護膚品牌，以超過60年嘅韓國人參研究作為核心，將東方草本哲學、現代護膚科技同韓式美學融合，塑造出極具代表性嘅品牌形象。所以，唔少韓國女生無論係想寵愛自己，定係送禮畀長輩，雪花秀（Sulwhasoo）都絕對係送禮人氣排行榜上嘅熱門之選。

對好多海外旅客嚟講，雪花秀（Sulwhasoo）早已唔止係一個「韓國護膚美妝品牌」，更加係一個可以同時感受到韓式美學、高端護膚同韓國文化魅力嘅代表性品牌。除咗產品本身一直備受關注之外，雪花秀所傳遞嘅品牌理念同東方美學氛圍，亦吸引咗唔少人專程去朝聖。因此，雪花秀旗艦店呢類實體空間，亦成為咗好多旅客去韓國旅行時想親身體驗嘅人氣景點之一。就好似小編今次親身探訪位於北村韓屋村嘅「雪花秀北村之家」，呢度唔單止係購物空間，仲結合咗韓屋、洋屋、品牌歷史同文化體驗，令人可以更完整咁了解雪花秀想傳遞嘅韓式奢華美學。

「雪花秀北村韓屋之家」係咩地方嚟？ 

• 地址：서울 종로구 북촌로 47
• 時間：星期二至日 10:00-19:00
• 交通：安國站(안국역)2號出口

雪花秀北村之家最吸引嘅位唔係因為佢喺北村韓屋村，或者雪花秀本身好出名，而係雪花秀真係將品牌想傳達嘅「韓國傳統奢華風格」做成一個可以實際體驗、可以行入去感受嘅地方。

雪花秀（Sulwhasoo）官方一直用「不被時間定義的美麗」同「Holistic Beauty 全方位美學」做品牌核心理念。佢哋將1930年代嘅韓屋同1960年代嘅洋屋打通連接，令成個空間唔止保留到建築嘅歷史感，仲將品牌想講嘅故事一齊放入去。對外國旅客嚟講，呢度唔單止係打卡位，仲係一個可以喺旅程入面同時感受到韓國傳統、空間設計，同韓國人氣專櫃品牌文化嘅地方。

如果你有參加導覽行程，呢度亦會係認識成個雪花秀空間故事嘅第一站。而且喺呢度唔單止可以透過空間設計感受到雪花秀呈現嘅韓國奢華美學，仲可以自由試用雪花秀全系列護膚產品，甚至買到旗艦店限定組合，所以亦係唔少韓國美妝迷嚟北村韓屋村一定會順路朝聖嘅人氣空間。

更重要係仲有旗艦店限定嘅包袱布包裝服務，如果你本身都打算買韓國護膚品，雪花秀北村韓屋之家真係好值得行下（而且仲可以即場退税！）

韓屋 Hanok

• 工作室（공작실）

行入雪花秀北村之家之後，最先接觸到嘅就係韓屋區。呢一區保留咗好濃厚嘅韓屋氣氛，但又唔係純粹展示傳統建築，而係透過品牌自己嘅美學，令成個空間更有層次。特別係呢區更感受到雪花秀點樣將傳統工藝感、藝術同品牌故事融合埋一齊。鍾意空間設計或者展覽式陳列嘅朋友，真係好值得停低慢慢睇。

• 裝飾室（단장실）

呢區就更接近「扮靚同體驗」嘅概念。呢度展示咗雪花秀以前推出過嘅經典品牌設計，由品牌故事同空間氣氛一路睇到嚟呢度，注意力都會更自然拉返去雪花秀本身嘅護膚同彩妝世界。

• 美展室（미전실）

一入到美展室，第一時間就聞到雪花秀最出名嘅人蔘香氣。呢度偏向五感體驗、氣氛型空間，透過陳列、燈光同展示設計安排，將雪花秀想傳達嘅韓式美感呈現得好完整。小編特別推薦本身鍾意睇展覽嘅朋友，如果你嚟北村、安國一帶，真係好值得抽時間嚟感受一下雪花秀專屬嘅韓國人蔘（滋陰蔘）傳統之美。

行完之後都唔好忘記參加雪花秀北村韓屋之家獨有嘅吊飾DIY製作。只要填份問卷，就可以即場體驗同帶走屬於你嘅旅行紀念，令你更完整咁體會到雪花秀想傳達俾大家嘅傳統經典氛圍。

小編都幫大家確認過，呢個活動預計做到2026年8月，如果你趁暑假嚟韓國玩，又有排安國、北村一帶行程，真係唔好錯過。

雪花秀北村韓屋之家最令人印象深刻嘅一點，就係佢唔係淨係睇完韓屋就完，而係會一路接去洋屋同庭園。由傳統韓屋行去近代洋屋呢個轉場，本身已經好有意思，亦令你更清楚感受到雪花秀想表現嘅唔係將傳統同現代分開，而係令兩個唔同年代嘅美感喺同一個地方自然共存。

洋屋 Yangok

• 精品店YUN（부티크 윤）

[圖片滑動]  

「精品店YUN」呢區可以一次過試到雪花秀多款人氣護膚品同旗艦店限定包裝組合，令你實際感受到專屬雪花秀嘅傳統之美。呢區好適合對雪花秀唔太熟，或者想揾啲夠代表性雪花秀產品嘅朋友。

另外，而家仲有象徵雪花秀品牌特色嘅傳統蓋印服務。如果你本身有寫手帳習慣，或者想留個紀念，記得唔好錯過蓋返個特色印章，留低到此一遊嘅記錄。

• 精品店ONE（부티크 원）

[圖片滑動]  

「精品店ONE」就好似一個可以更完整認識雪花秀彩粧同護膚世界觀嘅地方。現場亦有當季檔期限定商品同齊全綵粧色號，平時如果你只係喺免税店或者百貨專櫃見過雪花秀，嚟到雪花秀北村韓屋之家會更有機會慢慢睇、好好試。

• 智函褓（지함보）

智函褓係雪花秀好有代表性嘅包裝方式之一，靈感來自韓國傳統送禮文化入面嘅「褓巾（보자기）」。佢唔單止係包住產品嘅外包裝，仲包含心意、祝福同東方美學精神，亦展現出雪花秀重視細節同儀式感嘅品牌特色。而家喺韓國，呢類包袱布送禮包裝文化成日會同精緻禮盒一齊用，係非常受歡迎嘅送禮選擇，同時亦係一種好優雅、好有韓國傳統味道嘅送禮藝術文化。

雪花秀亦透過呢個傳統文化傳達出品牌特別嘅心意同獨有嘅品牌藝術，尤其係智函褓嘅包裝服務只喺雪花秀品牌旗艦店先可以體驗到。無論你係買嚟送禮定自用，如果你想體驗韓國傳統文化，真係好值得留意。

• 雪花沙龍（설화살롱）

行上二樓，你會更感受到雪花秀北村韓屋之家同一般品牌旗艦店嘅分別，呢度唔會一路催你買嘢，而係俾你用一個比較舒服嘅節奏去感受品牌。呢個空間本身就好適合停低慢慢睇。甚至小編呢日去參觀嘅時候，仲聽到現場啲韓國長輩一坐低張椅就即刻驚歎好坐，會更感受到雪花秀喺做品牌體驗呢個部分，真係落咗好多心機。

另外如果你有預約到雪花秀專屬嘅人蔘DIY導覽體驗，亦會喺呢一區進行。不過因為名額真係好少，每次一開放預約基本上都係即刻full曬，小編自己都實際搶過，真係超難搶。

有興趣嘅朋友建議直接追蹤Creatrip最新消息，而家暫時只開韓文課程，之後預計會推出英文同中文課程。之後開班消息會透過Creatrip再同大家更新。

• 雪花庭院（설화정원）

[圖片滑動]  

最後行到雪花庭院，呢度有60年樹齡嘅香樹同新植栽一齊共存。由韓屋、洋屋一路行到庭園，收尾真係好靚，亦令成條參觀動線多咗一種沉靜、放鬆嘅感覺。

小編自己特別鍾意雪花秀北村韓屋之家，係因為呢度每一季嘅陳列商品同空間設計都會有少少唔同，跟住季節變化，韓屋同植栽帶出嚟嘅氣氛亦會有唔同風格。就算你本身冇打算購物，都好值得嚟參觀下，認識一下雪花秀呢個韓國人氣專櫃品牌。

「雪花秀北村人蔘DIY課程」實地探訪分享 

• 課程內容：空間導覽、人蔘香包&浸浴劑DIY課程
• 所需時間：50分鐘
• 預約方式：每月中旬開放預約下個月名額，而家只提供韓語課程（英文、中文課程預計之後會開放）

除咗可以自由參觀空間，雪花秀北村韓屋之家另一個重點就係人蔘DIY課程同導覽體驗。會直接帶你由1930年代嘅韓屋一路睇到1960年代嘅洋屋，透過導覽更完整咁認識空間同品牌哲學，之後再親手DIY製作，令你更深刻感受到雪花秀想傳達嘅品牌理念同特色，最後再食埋韓式傳統點心，為呢趟美好嘅韓屋傳統體驗畫上句號。

呢種體驗最加分嘅位係，唔係淨係坐喺度聽介紹，而係可以透過氣味、觸感、手作過程同產品體驗，更深入咁感受雪花秀多年以人蔘研究做基礎打造出嚟嘅護膚科技同品牌理念，成個過程都會更加有投入感。

首先會整一個屬於自己嘅人蔘花香香包。你可以自己揀唔同帶有雪花秀代表意象嘅印章去裝飾香囊外包裝，再將人蔘花香氣滴入袋入面，完成你專屬嘅香囊。成個流程節奏都幾慢，完全唔使驚跟唔上，而且導師講解都好清楚，對唔識韓文嘅外國人嚟講，其實都唔使太擔心體驗會有問題。

呢個體驗特別之處係，佢唔係淨係做件手作紀念品，而係會先俾大家瞭解雪花秀代表嘅「人蔘」本身有幾稀有，同埋背後嘅象徵意義。據介紹，人蔘花要生長4至6年先會開花，而且花期好短，所以雪花秀亦由呢種特質延伸出香氣靈感，再深入研究人蔘，做出多款有助延緩老化同鬆弛嘅專櫃級護膚品。

雪花秀種植嘅人蔘實際聞落去，唔係一般想像中好濃重嘅藥材味，而係有種細緻、優雅、偏花香調嘅氣息，會令你對「人蔘」呢個原料有完全唔同嘅印象。好多人可能本身只知韓國人蔘好出名，但透過呢類課程內容，你會更具體感受到雪花秀點樣將傳統素材轉化成有現代感嘅實際體驗。

之後整嘅係人蔘浸浴包。會用預先準備好嘅滋盈生人蔘粉末等材料，將材料裝入袋入面，就完成屬於自己嘅浸浴包。呢部分做起上嚟唔算難，但因為素材本身同香氣都好有特色，所以成個過程都幾令人印象深刻。

另外，雪花秀一直落實嘅環保理念，連課程入面用嘅材料都同樣以可回收、可重複利用嘅方式去規劃設計。導師仲有提到佢自己都成日整人蔘浸浴包，浸完之後就將入面嘅內容物掉咗，淨係留返外包裝當起泡沐浴球咁反覆用，真係幾環保。

亦因為導師咁樣分享，令小編更覺得呢個體驗課程真係同雪花秀長期強調嘅人蔘研究同韓式養膚概念有關，唔會令人覺得只係為咗影相打卡而設計，而係真係有將品牌核心放入體驗流程入面。而且完成之後帶返屋企嘅香囊或者浸浴包，都唔係嗰種離開現場就冇意思嘅小物，而係返到酒店，甚至返到香港之後，都仲可以繼續用，回味返呢段體驗。

[圖片滑桿]  

課程尾聲會配人蔘茶同韓式傳統茶點，幫成趟行程完整收尾。由前面嘅導覽同空間認識，到手作同產品體驗，再到最後坐低慢慢飲茶，個節奏會令你有種真係「行完一段雪花秀傳統精研旅程」嘅感覺。

如果你本身就鍾意雪花秀嘅產品，呢個體驗會令你更瞭解品牌核心概念。不過唔好唔記得，呢個體驗名額真係好有限，連韓國人都好難搶到預約，建議有興趣嘅朋友一定要提早透過Creatrip預約，先至有機會順利體驗到。

小編行完之後覺得，就算你本身只係去安國、北村韓屋村順路想入去睇下，都好可能行完之後對雪花秀留低比想像更深嘅印象。對想喺首爾安排一個更有質感嘅韓國文化同美粧護膚體驗行程嘅人嚟講，雪花秀北村韓屋之家真係值得留返啲時間慢慢行。

雪花秀北村之家常見問題FAQ

Q1. 雪花秀北村之家點去？

A：喺首爾地鐵3號線安國站2號出口出嚟之後，一路直行大概7至10分鐘就到「雪花秀北村之家」。因為位置就喺北村韓屋村一帶，如果你本身已經計劃咗安國站、三清洞或者北村散步行程，順路一齊排就最方便。

Q2. 雪花秀北村之家可唔可以碌卡、有冇得退税？

A：「雪花秀北村之家」可以用信用卡付款，同時支援Tax Refund退税。呢度係店內即時退税，唔使去機場搞，結帳嗰陣直接用退咗税嘅金額付款，買嘢流程會輕鬆方便好多。

Q3. 雪花秀北村之家嘅人蔘DIY課程同導覽要點預約？

A：根據官方資料，雪花秀北村之家嘅人蔘課程同導覽體驗通常會喺每月中旬開放預約下個月時段。不過目前只提供韓文服務，建議出發前先去官方頁面睇返相關活動內容，盡早預約。中文同英文課程預計之後會推出，到時會透過Creatrip公佈最新消息！

Q4. 有冇得雪花秀北村之家先可以買到嘅限定商品？

A：去「雪花秀北村之家」可以搵到季節限定包裝，同埋旗艦店專屬發售嘅高級限定套裝，另外仲特別提供雪花秀旗艦店限定嘅韓國傳統包袱布包裝。如果你本身想揾啲更有紀念價值嘅雪花秀產品，或者有質感嘅韓國手信，好值得嚟呢度行下。

Q5. 參觀雪花秀北村之家要預幾多時間？

A：如果只係自由參觀雪花秀北村之家，睇下空間同產品，建議起碼預留40分鐘到1個鐘。若果另外有預約人蔘課程同導覽，官方體驗時間約50分鐘，整體建議預1至1.5個鐘會更鬆動，亦比較可以慢慢感受韓屋、洋屋同庭園空間。

Q6. 雪花秀北村之家可唔可以影相？

A：好多旅客去到雪花秀北村之家都會影相留念，尤其韓屋、洋屋同庭園空間都好有質感。不過因為唔同區域或者活動展覽內容，現場可能會有唔同拍攝規範，所以建議以現場公告同工作人員講解為準。如果想影人物相或者細影產品，入場時先確認清楚會更安心。

Q7. 外國旅客都適合去雪花秀北村之家？應該要點安排路線？

A：非常適合。雪花秀北村之家唔止係購物空間，仲可以俾旅客由建築、品牌故事同體驗活動入手，更深入感受韓國傳統美學同韓國高級專櫃護膚品牌嘅魅力。如果第一次嚟首爾，推薦可以安排安國站→雪花秀北村之家→北村韓屋村→三清洞Cafe呢條半日路線，節奏啱啱好。

Q8. 雪花秀北村之家附近仲有咩地方好去？

A：雪花秀北村之家喺安國、北村韓屋村附近，附近好適合一齊安排嘅景點包括北村韓屋村、三清洞、仁寺洞、景福宮、昌德宮等等。如果你鍾意散步、影相、行選物店或者Cafe，呢一帶好易排成半日到一日行程，亦好適合第一次嚟首爾自由行嘅旅客。

※ 實際營業時間、體驗內容、預約方式、商品發售同退税規定，仍然有機會因應品牌現場營運政策而調整，建議出發前再確認官方公告。

如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！