Hello，大家好，我哋係由韓國人每日提供最新韓國旅行資訊嘅Creatrip。
去一個國家旅行，當然唔希望發生任何唔開心嘅事啦。如果臨走之前touch wood發現自己唔見咗本護照，真係會勁緊張（怕返唔到屋企啊嘛...）。今日就等小編教大家喺韓國整唔見咗護照可以點搵返，趕住返香港嘅時候又可以點做啦！
韓國旅行遺失護照補領方法
STEP 1 | 去你最有可能放低/唔記得攞返本護照嘅地方
雖然呢個方法好似好廢，但係應該係最直接嘅方法！根據小編收到嘅DM同身邊人嘅經驗，最有機會唔見護照嘅地方係免稅店或者可以做退稅嘅鋪頭！可能係因為俾完錢之後淨係攞走咗件貨，或者亦都有可能係職員唔記得還返本護照俾你，所以回想返自己喺邊度買過嘢都係一個辦法！
STEP 2 | 用尋找失物應用程式搵
如果唔sure自己喺邊度整唔見，大家可以去下載「LOST 112」呢個app，呢度會有各種失物，當中包括護照同其他身份證明文件。
不過因為個app得韓文，大家可以跟住上述圖片search！首先撳放大鏡搜尋，然後揀「증명서(證明書)」→「여권(護照)」，之後可以揀埋日期，最後撳藍色掣確認。
如果係護照，通常會寫住你個名嘅頭幾個字，撳入去會見到喺邊度被發現，而家本護照喺邊度等等嘅資訊，唔識韓文嘅朋友們可以用翻譯機翻譯，去返指定地方領取就得。
另外仲有一個叫「Finding All」嘅App，同頭先「LOST 112」有異曲同工之妙，不過就多更多市民(?)幫手登記。只要跟住紅色框撳就可以睇到個list，睇吓有冇自己名。
STEP 3 | 喺韓國報警+聯絡香港入境處
如果都係冇，就要去警局報警！去報警唔代表一定會搵到，而且其實搵到嘅機率微乎其微... 重點係要攞份警察報告副本，然後去領事館搞旅行證/出境紙。建議大家可以打多個電話去香港入境處(+852-1868)報備，到時候去領事館佢哋要check你身份嘅時候會更加快手。
STEP 4 | 去中國駐韓領事館辦理旅行證
- 領事館地址：서울 중구 퇴계로18길 103
- 辦公時間：平日 09:00-11:30、13:30-16:00
- 前往方法：明洞站（명동역）3號出口向南山方向行
首先要記住，去整旅行證件要去嘅係位於南山塔纜車售票處附近嘅中國駐韓領事館，唔係平時去換錢嗰邊嘅大使館！去之前亦都要先準備好 ① 警察報警報告 ② 3張白底證件相（6個月內拍攝）③ 有效香港身份證及副本，去到之後職員就會俾份申請表格你填。
普通需要等4個工作日先會出到份旅行證，如果加快嘅話就需要2個工作日，不過就會比較貴，盛惠₩55,000。小編亦都有見到可以當日攞嘅case，根據現場情況而定。有關辦理旅行證詳情，可以參考中國駐韓領事館官網。
STEP 5 | 處理機票、酒店問題
如果搵到護照又趕到飛機嘅話，就真係好好彩啦，如果唔係就記住要更改航班，甚至係book多一兩晚酒店。如果搵唔到，最後去咗整旅行證，記住要預早少少去到機場！
因為航空公司同韓國海關都係得你本護照嘅資訊，所以航空公司需要向領事部核實你嘅身份，呢一步可能需要比較多時間。另外出境嘅時候就當然要行人工櫃檯，如果手機有護照個人資料嗰頁嘅相可以俾埋職員睇，一次過對返入境記錄同你個樣！
希望大家都唔需要用到今日呢篇文章嘅資訊，整退稅嘅時候記住記住一定要攞返本護照，醒起嘅時候定期check吓本護照有冇跟身！
如果你對文章內容有咩意見或者想查詢更多資訊，可以隨時喺留言區留言，或者透過電郵(help@creatrip.com)聯絡客戶服務中心。想知更多韓國最新資訊，記住follow埋我哋嘅Instagram同Threads啦！
