首爾1人SPA/搓澡專門店總整理
唔想大庭廣眾捽老泥同浸浴？不如去做最近韓國超受歡迎嘅1人SPA/搓澡啦！
- 韓式搓澡係咩嚟？
- 私人搓澡有咩咁特別？
- 私人搓澡體驗流程係點？
- 首爾精選1人搓澡&SPA12
- 韓國1人搓澡&SPA常見問題FAQ
Hello，我哋係由韓國人每日提供最新韓國旅行資訊嘅Creatrip。
講起搓澡，大家可能會諗起汗蒸幕幫你捽老泥嘅阿珠媽，但其實最近韓國而家多咗好多可以獨享私人時光嘅1人SPA/搓澡專門店！想去除老廢物質、促進血液循環、令皮膚更白滑，同時療癒身心靈嘅話，不妨參考今日小編幫大家整理嘅呢篇blog啦！
韓式搓澡/按摩介紹&推薦
韓式搓澡係咩嚟？
搓澡韓文叫做「세신」，變返做漢字就係「洗身」，係一種好傳統嘅韓國美容方法。做法係先喺熱水浸到成身暖笠笠，之後用專用手套慢慢搓走皮膚表面嘅老廢物同角質。
呢個方法唔單止可以促進血液循環、加快新陳代謝，仲可以令皮膚即時變得白淨，所以好多韓國人都會定期去做，係一種自我提升/護理嘅療程。
而家仲有啲新派嘅私人搓澡專門店，裝修夠靚之餘感覺就好似去咗Spa一樣咁舒服，吸引咗唔少遊客同埋注重美容嘅女仔去試！
私人搓澡有咩咁特別？
頭先都有提到，傳統嘅韓國搓澡通常會喺汗蒸幕搵到。但係要大庭廣眾剝光豬，唔少朋友應該會覺得好尷尬，而且同「relax」呢個字都距離頗遠，所以最近就韓國就開咗好多行預約制嘅1人搓澡/SPA專門店，等大家可以安心搓澡，同時享受舒服嘅時光。
私人搓澡專門店優點
- 全部都係獨立房同預約制，完全唔洗擔心會俾人望住
- 一對一專人服務，仲會根據你皮膚狀況同喜好做最啱你嘅treatment
- 會用更加高級嘅保濕鎮靜產品
- 幫你準備買洗頭水、護膚品、毛巾、風筒等等，唔洗自己準備
- 就算係孕婦或者皮膚敏感嘅人都可以做專用療程
仲有，啲Salon好多都好注重燈光同裝修，成個環境好似Spa咁舒服，真係好療癒。私人搓澡唔單止係美容護理，仲係一種放鬆自己、獎勵自己嘅享受，絕對值得一試！
私人搓澡體驗流程係點？
| ① 事先預約 |
大部分私人搓澡體驗都需要提前預約，預約當日記住準時去到，之後可能要填一份簡單問卷，或者check下身體狀況。
| ② 淋浴&浸浴 |
房入面有自己專用嘅淋浴間或者浴缸，等大家可以先暖水沖涼或者浸浴，令成個身體可以變暖之餘仲可以打開毛孔，之後死皮同老廢物都可以容易啲搓走！
| ③ 搓澡護理（大約30~50分鐘） |
療程師會用專用嘅搓澡手套（搓澡巾）幫你慢慢捽走老廢角質同污垢，亦會根據你皮膚情況調整力度，所以怕痛嘅人都唔使擔心。
| ④ 特別護理（可自選項目） |
有唔少鋪頭仲會將做facial或者洗頭服務都包埋喺套餐入面，之後仲可以加精油按摩、敷mask、保濕護理等等，用嘅產品都係天然草本或者高級精華，美容效果一流！
| ⑤ 梳洗&休息時間 |
成個療程完咗之後可以再沖個涼，好多地方都會提供基礎護膚品、lotion、風筒等等，自己唔帶嚟都冇問題（當然如果你本身皮膚比較敏感都可以帶自己用開嘅product）。之後仲可能會提供熱茶同茶點俾大家盡情放鬆同休息！
首爾精選1人搓澡&SPA
1. DANPOONG(단오풍정)
總店
- 地址：서울 성북구 고려대로13길 10-3
- 前往方法：安岩站（안암역）1號出口
韓屋店
- 地址：서울 성북구 동소문로25길 13
- 前往方法：誠信女大站（성신여대역）6號出口
最近「DANPOONG」韓屋店超受歡迎，除咗鋪頭係古典嘅韓屋建築，呢度仲會好貼心咁根據你想護理嘅部位幫你安排客製化服務，手勢又細心！仲可以自己揀鍾意嘅香薰精油嚟按摩，或者用麻糬泡泡搓澡，成個人由內到外都可以放鬆~ 一齊睇下小編之前去體驗嘅記錄啦：
[스팟] DANPOONG（韓屋店）
[스팟] DANPOONG（總店）
2. Seian(세이안)
弘大延南店
- 地址：서울 마포구 동교로29길 64 2F
- 前往方法：弘大入口站（홍대입구역）3號出口
東橋店
- 地址：서울 마포구 동교로 197 2F
- 前往方法：弘大入口站（홍대입구역）2號出口
「Seian」兩間分店都位於弘大入口站附近，鋪頭入面嘅燈光、香味、音樂全部都好治癒，成個環境超級放鬆。仲為各位女士們準備咗M巾同棉條，就算M到都可以安心去做，真係好細心！香薰按摩可以揀上半身或者下半身，腳部護理仲有清涼成分，幫你消腫同趕走疲勞，做完一身輕。
[스팟] Seian（弘大延南店）
[스팟] Seian（東橋店）
3. ONA(온아)
明洞1號店
- 地址：서울 중구 명동4길 31 B1F
- 前往方法：明洞站（명동역）6號出口
明洞2號店
- 地址：서울 중구 명동8가길 6 3F
- 前往方法：明洞站（명동역）6號出口
位於明洞嘅「ONA」提供1對1度身訂造嘅護理療程，而且只會用瑞士高級香薰品牌JUST、有機荷荷巴油等頂級原料，就算皮膚敏感或者有濕疹都可以安心體驗！最重要係環境乾淨企理，可以輕鬆享受只屬於自己嘅時間。
[스팟] ONA（明洞）
[스팟] ONA（明洞2號店）
4. DAILY&SPA(데일리앤스파)
- 地址：서울 관악구 봉천로 446 2F
- 前往方法：首爾大入口站（서울대입구역）6號出口
「DAILY&SPA」嘅最特別之處就係可以根據你皮膚類型、當日狀態同心情，自己揀用咩產品同護理方法，打造屬於你自己嘅個人SPA體驗。搓澡種類、洗頭水、浴鹽、面膜等等都可以自由配搭，加上療程師專業手勢同細心服務，做完成個人都超級放鬆！
[스팟] DAILY&SPA（首爾大入口）
5. Spa Bidan(스파 비단)
- 地址：서울 강서구 화곡로44가길 39 B1F
- 前往方法：禾谷站（화곡역）3號出口
「Spa Bidan」套餐選擇超多，用嘅產品全部都係精挑細選，例如死海天然浴鹽、瑞士天然草本油、德國高濃度美容精華油等等，高質又溫和，護膚效果一流。而且位置位於金浦機場附近，距離仁川機場都只係45分鐘左右，推薦大家可以到埗/離開韓國之前去！
[스팟] Spa Bidan（江西）
6. DAMDA(담다)
- 地址：서울 마포구 양화로7길 70 4F
- 前往方法：合井站（합정역）2號出口
「DAMDA」將韓國傳統搓澡文化現代化，帶嚟特別療癒體驗！唔單止可以搓澡，仲可以浸浴，夠曬暖笠笠仲可以洗走疲勞同壓力，身心都可以refresh！而且環境夠安靜療癒，可以享受屬於自己嘅休息時間，徹底放鬆！
[스팟] DAMDA（弘大望遠）
7. Sooryeon(수련)
- 地址：서울 중구 다산로36길 11 2F
- 前往方法：新堂站（신당역）6號出口
「Sooryeon」好重視私人空間嘅舒適度，而且所有護理都係專為女士設計，服務夠貼心。搓澡師經驗豐富，唔會痛之餘效果顯著！
[스팟] Sooryeon（新堂）
8. Spa Heum(스파 헤옴)
- 地址：서울 강남구 언주로 311 로즈1타워 B1F
- 前往方法：漢堤站（한티역）6號出口
療程當中用嘅所有產品都係自家製，有效補濕、鎮靜，就算係敏感肌都可以安心！療程師全部都經驗豐富，手勢好之餘夠細心！仲可以調節溫度，怕凍或者係孕婦都可以安心去做。
[스팟] Spa Heum（江南）
9. Slick(슬릭)
- 地址：서울 은평구 은평로 137 B호
- 前往方法：鷹岩站（응암역）4號出口
Slick係得到恩平區廳認證嘅「優秀浴場」，衛生同服務都通過嚴格標準。熱水浴加搓澡按摩可以促進血液循環，搓老泥去角質，皮膚變得又滑又清爽，平時積聚嘅疲勞都會一掃而空！呢間比較特別嘅係男女都可以去體驗，男士們都可以去搓泥鬆一鬆！
[스팟] Slick（恩平）
韓國1人搓澡&SPA常見問題FAQ
Q1. 基本搓澡價錢大概幾多？
A：首爾1人搓澡SPA基本療程一般約為₩80,000-150,000(80000-150000)，如果會加購精油按摩或者面膜等療程，通常會再貴₩20,000-50,000(20000-50000)左右，視乎店舖同療程內容而定。
Q2. 做療程時需唔需要除曬衫？身體會露出到咩程度？
A：大多數情況下需要除衫進行療程，不過通常會按流程遮蓋部分身體，盡量減少尷尬情況。
Q3. 會唔會提供即棄內褲或浴袍嗎？
A：部分店舖會提供即棄內褲、浴袍或者毛巾，建議預約前確認。
Q4. 脫毛後可唔可以即刻去搓澡？
A：一般唔建議脫毛後即刻做搓澡，最好等皮膚冇咁敏感之後先進行。
Q5. 可唔可以要求避開某啲唔想做嘅部位？
A：可以，大部分店舖都可以按要求避開特定部位，預約或者療程前講清楚就可以。
Q6. 沖涼用品或者護膚品要自己帶嗎？
A：多數店舖會提供基本沖涼用品，但護膚品未必齊全，如果有慣用產品，建議自己帶。
Q7. 生理期或者懷孕期間都可以做嗎？
A：因為大部分韓國1人SPA/搓澡專門店主要客群都係女性，所以就算嚟M都會有相對應療程可以提供；另外唔少鋪頭都有提供孕婦專用搓澡SPA療程，但一定要預約時提前講明，並按身體狀況決定適唔適合做。
Q8. 有冇男士都可以去嘅搓澡店？
A：有，雖然數量比較少，但好似上述介紹嘅SLICK都會同時接受男士預約！
Q9. 最遲幾日前要預約？
A：如果係人氣高嘅店舖，一般建議最少提前1星期預約。大家可以透過Creatrip直接用繁體中文同港幣預約，唔需要自己再另外聯絡店鋪咁麻煩！
Q10. 可唔可以用中文/英文溝通？
A：視乎店舖而定，不過比起中文服務，店鋪提供英文服務嘅機會比較大！大家透過Creatrip預約時可以參考頁面資訊，睇下有冇你需要嘅翻譯服務。
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
