Hello，大家好，我哋係由韓國人每日提供最新韓國旅行資訊嘅Creatrip。
正所謂小賭怡情，唔少朋友每逢大時大節都會同親戚朋友打牌/買六合彩等等，去到澳門或者拉斯維加斯呢啲賭城都會去體驗賭場文化，但係韓國人全部都唔做得？
韓國賭博文化
韓國人賭博犯法？
생생비즈
唔講唔知，雖然韓國有幾十間賭場，但係韓國人係唔可以賭錢㗎！根據韓國刑法第246條第1項，如果以增加資產為目的參與賭博，或者慣性賭博都屬於犯法，參與賭博人士會被罰款最多1,000萬韓幣（約10000000），慣性賭博就會被監禁3年以下或罰款2,000萬韓幣（20000000），但係如果只係單純娛樂嘅話就不受此限。
강원일보
而且因為韓國法律屬於屬人主義，換句嚟講即係比起行使罪行地點，韓國法律會根據當事人國籍決定當事人法律地位同權利義務。所以如果喺其他國家以增加資產為目的賭博，即使喺嗰個國家/地區呢件事合法都好，持韓國國籍人士都會被判賭博罪。
서울경제
呢個時候大家可能就會問，咁所謂嘅「單純娛樂」定義又係咩呢？要判斷一個人賭博係為賺錢定係只係為娛樂，將會比較呢個人本身擁有嘅資產同佢喺賭博當中所用嘅金額，如果法官認為呢個人所用嘅錢遠超過自己可以負擔嘅金額，將會判為賭博罪。
有邊幾種賭博喺韓國係合法嘅？
일간스포츠
不過喺韓國都有幾種賭博活動被視為合法，當然要得到許可認證嘅地方先得啦！呢幾種活動包括六合彩(樂透)、鬥牛、賽馬、賽艇、競輪、體育賭博（籃球、足球、棒球、排球、高爾夫球）同賭場賭博。
인더스트리뉴스
上述呢幾種活動都有指定投注金額，而賽艇同競輪純收益嘅100%同六合彩收益嘅65%都會用於公益用途！
韓國唯一開放俾韓國人入場嘅賭場？
MS TODAY
上面講到話韓國允許賭場賭博，不過其實韓國人可以入嘅賭場得一個，呢個地方就係位於江原道嘅「江原樂園賭場（강원랜드）」！呢個賭場隔離就係High1滑雪場，由同一個母公司一同管理，仲有消息話2027年會開設新嘅賭場大樓。
한국경제
因為呢度係韓國人唯一一個可以去嘅賭場，所以客人有99%都係韓國人！而且為咗令附近居民唔好因為近成日去而導致賭博成癮，每個月只可以入去1次。本身允許韓國人出入嘅期限得10年，但係期限不斷被延長，暫時去到2045年。
如果有更多想知嘅內容，都可以隨時留言或者dm話俾我哋知：）
Mail：help@creatrip.com
