Hello，大家好，我哋係由韓國人每日提供最新韓國旅行資訊嘅Creatrip。
雖然1月發生嘅釜山航空飛機着火事故起因仍然未確實，但係為咗緩解市民不安，韓國政府決定加強航空安全相關規定。國土交通部喺今個月13號宣佈，由3月1日起所有行動電源/外置充電池（尿袋）同電子煙都唔可以放喺登機行李入面保管！
韓國登機行動電源最新規定
동아일보
根據韓國政府最新政策，所有乘客登機前都需要將行動電源同電子煙攞出嚟，放入密實袋/膠袋入面，或者用絕緣膠布貼住充電位（以免接觸到其他金屬），然後隨身攞住或者放喺座位下面。另外亦都要注意唔可以喺飛機幫尿袋同電子煙充電。
경향신문
最新政策實行之後，各大韓國航空公司計劃會喺Check-in櫃檯放置透明膠袋俾大家放尿袋同電子煙，就算冇另外準備都唔需要太擔心。
而可以帶上機嘅行動電源數量都有限制：
容量 | 最多可攜帶數量 |
100Wh以下 (普通行動電源) | 5個 |
100Wh~160Wh (大容量行動電源) | 2個 ※需得到航空公司許可 |
160Wh或以上 (露營電池等大型充電池) | 無法攜帶 |
通常大家用嘅行動電源容量都係以mAh單位表示，如果要計返做Wh，就需要睇埋電池嘅電壓。例如20,000mAh嘅電池，當電壓係3.7V嘅話，Wh就會係20,000*3.7/1000=74Wh。而普通尿袋容量都會低過20,000mAh，所以最多可以帶5個上飛機。
可能會有人問，咁又可唔可以寄艙呢？答案係唔可以！同以往規定一樣，無論充電容量係幾多都好，所有行動電源同電子煙都唔可以放喺寄艙行李入面。
한겨레
不過今次新增嘅規定只係適用於韓國航空公司，乘搭其他非韓國本地航空嘅飛機唔需要，不過如果頭先提到嘅事故最終被查出係因為行動電源而發生，韓國國土交通部將會同國際民用航空組織（ICAO）密切討論，檢討需唔需要再加強相關管制。
大家之後嚟韓國玩嘅時候如果係搭韓國航空公司飛機，記住要將行動電源（尿袋）同電子煙攞出嚟啦！
如果有更多想知嘅內容，都可以隨時留言或者dm話俾我哋知：）
Mail：help@creatrip.com
