弘大美食 | 太初排骨
超juicy原條牛仔骨啖啖肉超滿足,弘大入口站行2分鐘就到!
Hello,大家好,我哋係由韓國人每日提供最新韓國旅行資訊嘅Creatrip。
通常大家食韓牛都係一塊塊肉咁燒,最近弘大站附近開咗一間食炭燒原條牛仔骨同韓牛排骨肉嘅餐廳叫做「太初排骨」,開張冇耐網上就已經有好多人討論緊,今日就等小編分享真實食評俾大家知啦!
撳我睇Menu&預約詳情👇🏻
弘大「太初排骨」基本資訊
- 地址:서울 마포구 어울마당로 122 2F
- 營業時間:12:00-23:00(Last Order 22:00)
弘大「太初排骨」實地探訪
小編今日嚟到位於距離弘大入口站9號出口2分鐘路程嘅韓牛專門店「太初排骨」!因為新開冇耐,所以餐廳非常新淨,裝修以石頭同黑色為主調,夠曬現代新潮之餘空間都夠闊落!
「太初排骨」嘅招牌Menu係碳燒原條韓牛牛仔骨!廚師會先幫大家用炭火燒一燒牛仔骨表面,咁做可以鎖住肉汁同增添一層炭香味~
平時去食韓燒都會遇到一個問題,就係食完飯之後外套同衫都會有勁大陣燒肉味XD 不過「太初排骨」會提供一個大膠袋俾大家,大家可以將外套同隨身物品放入去,然後放落櫈底,咁就唔怕會整污糟+外套會索味啦!
韓牛排骨肉
正式開餐啦!小編同朋友叫咗唔少嘢食,首先想同大家介紹嘅係韓牛排骨肉。排骨肉油花分佈靚,而且非常新鮮,唔會有騷味。
職員推薦小編用葱包住嚟食,燒好嘅葱唔會辣,反而蔬菜甜味會更加出,同牛肉好夾!點埋「太初排骨」嘅特製蒜頭醬會更加惹味,果然冇介紹錯!

原條牛仔骨
跟住就輪到重頭戲——原條牛仔骨!「太初排骨」嘅原條牛仔骨套餐有S、M、L三個份量,大家可以根據人數揀,而小編當日因為係同1個朋友一齊去,所以叫咗S套餐。
好似頭先所講,牛仔骨上枱之前會用炭火炙燒咗外層先,然後再喺客人個火爐度剪開燒熟埋入面。受過培訓嘅職員非常熟手,包保客人可以食到熟度最完美嘅牛肉。
本身小編見到咁大嚿肉都驚會鞋,但係唔單止夠腍,而且都好juicy同充滿炭香味,推薦大家點鹽同Wasabi食!
另外大家仲可以配埋小菜一齊食,泡菜同各種醃製小菜都各有特色,而且酸酸地可以解膩,亦都可以令口感同味道更上一層樓。
辣醬蟹
呢度亦都另外有提供幾款主食同菜式可以叫,而家透過Creatrip預約「太初排骨」嘅所有客人都可以免費叫一份嚟食,小編就揀咗辣醬蟹(原價要成₩19,000!),蟹肉夠飽滿之餘醬汁夠惹味,配飯一流!
韓牛大醬湯飯
如果想飽肚啲,或者想食啲比較暖胃嘅嘢,推薦大家叫呢款韓牛大醬湯飯!入面有好多蔬菜、豆腐同韓牛,非常足料,配埋小菜一齊食一流!
韓牛水刺身
通常生牛肉都係就咁食,好少會見到會用整水刺身嘅方法去整!調味甜甜辣辣,而且涼浸浸夠清新!
韓牛生牛肉拌飯
鍾意食生牛肉嘅朋友們記住唔好錯過呢個生牛肉拌飯!生牛肉、蔬菜、白飯加埋「太初排骨」秘製辣椒醬,味道夠惹味,小編同朋友都食到停唔到口!
伯爵茶Highball / 覆盆子Highball
想一邊食飯一邊飲杯嘅話推薦大家叫Highball飲,上面兩款都非常容易入口。
如果大家想食返餐豪啲又高質嘅燒肉,推薦大家嚟弘大「太初排骨」食新鮮韓牛!
弘大「太初排骨」前往方法
弘大入口站(홍대입구역)9號出口出。
轉左。
直行。
上圖紅框就係「太初排骨」所在位置。
行樓梯上2樓就到弘大「太初排骨」啦!
撳我預約👇🏻
以上係弘大美食「太初排骨」嘅介紹,有任何問題請先詳讀呢篇文章。
如果睇完之後有任何問題,或者我哋語意、標示唔清嘅話,麻煩請send email告知,以方便我哋改進 。
如果有更多想知嘅內容,都可以隨時留言或者dm話俾我哋知:)
Mail:help@creatrip.com