Hello，大家好，我哋係由韓國人每日提供最新韓國旅行資訊嘅Creatrip。
最近小編去弘大玩嘅時候發現到一間有成8層樓咁高嘅Cafe，每層樓風格都唔同，今日就等小編帶大家入去玩啦！
弘大「ㅎㄷ CAFE」基本資訊
- 地址：서울 마포구 어울마당로 68
- 營業時間：11:00 - 21:00（Last Order 20:30）
弘大「ㅎㄷ CAFE」實地探訪
呢間首爾最大規模嘅弘大Cafe「ㅎㄷ Cafe」位於弘大入口站徒步10分鐘距離，有成8層樓，唔單止每層主題都唔同，包括有LP音樂、KPOP、美術展覽等），最頂層仲有個Rooftop Cafe！（BTW呢度會叫「ㅎㄷ Cafe」係因為「ㅎㄷ」係弘大韓文嘅縮寫XD）
大家只要先上8樓叫嘢飲，就可以去曬其他層。
8樓空間感充足，而且裝修夠新淨。另外Menu都非常多選擇，飲品同甜品種類都多樣化，大家可以根據喜好揀！
小編同朋友就揀咗士多啤梨鮮奶、荔枝冰茶、紅莓冰茶同美式咖啡，甜品方面就叫咗幾款Dacquoise達克瓦茲、朱古力Terrine同原味牛油吉士撻。
士多啤梨鮮奶
士多啤梨鮮奶用料足，每飲一啖都可以食到士多啤梨果肉，酸酸甜甜好幸福！
荔枝冰茶
韓國最近多咗好多荔枝味嘅飲品同甜品，呢款冰茶荔枝味濃郁，大家記住要用飲管攪匀飲！
紅莓冰茶
呢款紅莓冰茶係紅桑莓+士多啤梨味，味道夠清新！
朱古力Terrine
大家可能好少聽Terrine呢款甜品，其實就好似Mousse咁，不過就會比較味道同口感都會比較濃稠，呢款朱古力Terrine朱古力味濃郁，而且入口即融！
朱古力Crookie
韓國呢排流行嘅牛角包曲奇Crookie都可以喺度搵到！外層脆卜卜嘅曲奇+牛油味香濃嘅牛角包+入面軟糯嘅朱古力碎曲奇，鍾意食甜品嘅你一定唔可以錯過！
Dacquoise達克瓦茲
呢度嘅招牌甜品Dacquoise達克瓦茲有幾款口味，包括士多啤梨、海鹽同雙重朱古力，外層香脆又鬆軟，口感非常特別！
雙層Dacquoise達克瓦茲
呢度仲有雙層達克瓦茲，分別係黑芝麻+黃豆粉同抹茶+紅豆，小編個人覺得會回甘嘅抹茶+香甜紅豆最夾！
原味牛油吉士撻
最後呢款原味牛油吉士撻就好似個名咁，牛油味香濃，加上入面嘅吉士醬，會令人聯想起蛋撻！
「ㅎㄷ Cafe」每層都有飲水機，大家可以用隔離備有嘅紙杯飲水，非常貼心！
大家買完嘢飲之後就可以四周圍參觀，小編第一站就去到屋頂Roofop Cafe！上到去可以俯瞰弘大一帶嘅景色，推薦大家日落嘅時候嚟，風景會震撼好多，影相打卡一流！
下一站嚟到7樓K-POP MEDIA，呢度會定期換展品，大家可以睇到各種多媒體藝術作品。
呢度更加有好多沙袋俾大家坐低休息，旅行當中想relax吓推薦嚟呢度！
然後落一層就會去到位於6樓 嘅LP MUSIC區，係小編最鍾意嘅一層！
大家可以揀自己鍾意嘅LP，然後攞俾職員，職員就會幫大家播歌，成個感覺勁chill！
落一層就會去到5樓美術展覽廳，呢度比起其他層更加安靜，而且環境更加闊落，想同朋友一邊休息一邊傾計推薦嚟呢層！
4樓STONE VALLEY裝修以大自然為主題，入去之後會聽到溪水聲，四周圍更加有各種植物。
3樓同4樓差唔多，都係以植物為主要裝修概念，不過呢度全層都係仙人掌，超特別！呢度打卡位非常多，大家記住唔好錯過啦！
呢度地下一樓更加有個表演場地，不過無表演嘅時候就唔會開放。
另外地下一樓仲有一個大型儲物櫃，只要喺Cafe消費就可以免費用，有韓文、中文、英文同日文説明，大家只要跟住畫面指示做就可以存放+領取行李。
去到弘大想搵個地方休息，但係其他Cafe又太多人太逼？推薦大家嚟弘大「ㅎㄷ Cafe」，享受每一層唔同魅力嘅Cafe！而家下載&出示Creatrip優惠券，仲可以免費得到一份指定甜品，大家記住唔好錯過啦！
弘大「ㅎㄷ CAFE」前往方法
撳我下載優惠券👇🏻
以上係弘大Cafe「ㅎㄷ CAFE」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Mail：help@creatrip.com
