忠清北道「堤川」美食總整理

Hello，大家好，我哋係由韓國人每日提供最新韓國旅行資訊嘅Creatrip。

忠清北道「堤川」有一望無際嘅湖景同山景，景色超靚，去旅行真係好治癒！不過其實「堤川」唔單止景靚，仲有超多好嘢食！今次小編去「堤川」玩都有幫大家整理好必去餐廳list，記住Save睇呢篇blog啦！

想輕鬆玩轉堤川？👇🏻

忠清北道「堤川」美食總整理

蘋果樹家_{(사과나무집)} 

• 地址：충북 제천시 청풍면 비봉길 2
• 營業時間：星期二至日 09:00~17:00

蘋果樹家係堤川最出名嘅韓國料理專門店，所有菜式都會用蘋果酵素同蘋果汁代替糖同人工調味料，夠曬健康！

呢度招牌Menu係豆腐蘑菇鍋同韓牛烤肉蘑菇鍋，小編當日去咗食豆腐蘑菇鍋，叫咗2人份，但係分量真係超多！而且用料非常十足，豆腐、蘑菇再加上清淡湯底，食完都完全唔會有任何負擔！

食完飯之後老闆仲會送一包蘋果汁，為今餐畫上一個完美句號。呢度老闆夠親切，而且仲有外國人職員，就算唔食講韓文都唔需要太擔心！係啦，餐廳位於清風湖畔單軌列車附近，推薦大家食飯前或後去參觀！

湖畔庭院_{(호반의 뜰)}

• 地址：충북 제천시 청풍면 문화재길 166 2F
• 營業時間：09:00~18:00（Last Order 17:30）

呢間餐廳係小編參加私人包車的士之旅嘅時候司機推薦俾小編嘅餐廳！湖畔庭院位於清風湖畔纜車附近，出名CP值高，價錢唔貴但係餐點味道夠好！

小編叫嘅湖畔庭院定食油超過10款韓國傳統小菜，仲有一份煎鯖魚。魚肉夠juicy而且超送飯，仲有海帶湯、辣炒豬肉等等可以一齊配住食，想體驗正宗韓國菜嘅話記住要嚟啦！

SUN炸豬扒_{(선수제돈까스)}

• 地址：충북 제천시 의림대로 582
• 營業時間：11:00~20:00
  • Break Time：15:30~17:00
  • Last Order：19:40

如果大家會去義林池玩，推薦大家去徒步行5分鐘就可以去到嘅韓式西餐廳SUN炸豬扒！

顧名思義，呢度嘅招牌Menu就當然係炸豬扒啦！小編叫咗芝士炸豬扒，12,000就可以食到2塊酥脆多汁又超多芝士嘅炸豬扒，仲有忌廉湯、飯、沙律同飲品，非常超值！而且醬汁可以揀辣定唔辣，兩款魅力都唔同！

蔡氏家_(채가네)

• 地址：충북 제천시 의림대로11길 4-1
• 營業時間：11:00~20:00

如果大家想食韓國家庭料理，咁就非常推薦大家去蔡氏家，呢度以堤川當地荷葉入菜，製作各種荷葉熟成料理，非常特別！而且餐廳有提供8個預約嘅餐牌，連外國人都可以輕鬆叫嘢食！

小編同朋友叫咗燒五花肉同荷葉飯，燒五花肉會用荷葉包住醃製48小時，非常軟嫩！而荷葉飯亦都充滿荷葉清新想起，入面更加有紅棗、銀杏同多款藥材，夠曬健康！

父成堂_(부성당)

• 地址：충북 제천시 용두천로 47
• 營業時間：09:00 ~ 22:00

有冇人好似小編咁甜品係另一個胃！如果大家想喺堤川食甜品，超推薦大家去父成堂！呢度麵包都係用法國麵粉同高級食材整成，而且麵包師曾經喺法國留學，所以大部份甜品都係正宗法式甜品同Fusion麵包，而且仲係當日凌晨整當日賣！

小編揀咗士多啤梨Kaymak蛋糕同烏龜蜜瓜包，忌廉夠軟化、麵包外脆內軟，小編食完一次之後因為覺得太好食，回程之前仲專登返咗嚟呢度一轉買麵包返首爾！

俾個小貼士大家，如果大家有堤川電子觀光證，去父成堂消費可以享有95折優惠，記住唔好錯過啦！

👉電子觀光證登記方法

堤川夾心餅_{(제천샌드)}

• 地址：충북 제천시 풍양로13길 10-1
• 營業時間：
  • 星期一、二、四、五、六 10:00~19:00
  • 星期日 09:00~18:00

好多韓國人去堤川玩都一定會去堤川夾心餅買手信，呢度嘅夾心餅全部都係用堤川特產製作而成，而且設計以義林池小島為主題，非常有特色！

夾心餅入面有忌廉同堤川蘋果&水蜜桃果醬，味道唔會太甜，而且非常天然，一啲都唔化學。加上外層曲奇餅係用法國高級牛油整成，牛油味香濃口感好，大人細路都會鍾意！

全部餅乾都係獨立包裝，而且包裝夠靚，好啱買返屋企送人！

KOFFEE KIHO_{(커피 기호)}

• 地址：충북 제천시 독순로21길 25
• 營業時間：10:00~21:00（Last Order 20:30）

KOFFEE KIHO係上年開嘅堤川新Cafe，位於堤川站附近！Cafe裝修以木調為風格，玻璃窗出面係粟米田同韓國傳統寺廟，風景好特別！

小編當日叫咗粟米忌廉鮮奶咖啡，濃郁咖啡加上香甜忌廉，粟米味都比想像中夾好多！另外呢度仲有無咖啡因飲品同多款甜品任君選擇，推薦大家嚟呢度休息！

glouglou_{(글루글루)}

• 地址：충북 제천시 수산면 옥순봉로10길 2 2동
• 營業時間：
  • 星期一至五 11:00~18:00
  • 星期六及日 10:00~18:00
  • Last Order：17:50

想睇日落景色嘅話推薦大家嚟位於清風湖畔附近嘅大型Cafe glouglou！俾個貼士大家啦，成間Cafe分成2棟建築，如果大家想睇湖水景可以去本館，而分館就比較多打卡位，裝修都比較靚，大家可以根據喜好自由選擇。

小編揀咗呢度嘅招牌Menu黑芝麻鮮奶咖啡、Affogato咖啡雪糕同一件蛋糕仔，全部都非常有水準！而且老闆話呢度嘅甜品Menu每個月都會轉，建議大家去之前可以參考佢哋Instagram！

如果大家會嚟glouglou，記住一定要同出面個巨型粉紅色木櫈打卡，後面就係清風湖畔，影出嚟效果好靚！

Cafe Neoreun_{(카페 너른)}

• 地址：충북 제천시 청풍면 청풍호로 1684 카페너른
• 營業時間：星期一、二、四至日 10:30~19:00
  • Last Order 18:30

最後要介紹嘅呢間Cafe都係位於清風湖畔附近！Cafe Neoreun有成4層高，面積達2,400坪，每層都有落地玻璃，可以觀賞到清風湖畔嘅無敵靚景，連堤川市民都會專程去！

而且因為老闆係園藝專家，餐廳附近園景都非常靚，而且Cafe右邊更加有一個植物園，大家等嘢飲嘅時候不妨可以入去參觀！

咖啡同甜品味道好，加上景色夠靚、環境夠闊落，推薦一家大細一齊嚟！

同場加映 - 美食之旅

대한민국 구석구석

如果大家想更加盡情享受堤川美食，不妨可以參加由堤川市舉辦嘅美食之旅，2小時內導遊會帶大家去堤川藥膳街同傳統市場，一邊參觀，一邊享受當地美食！

한국관광공사

導遊更加會向大家講解每間餐廳同各款美食背後嘅故事，有興趣就記住撳下面條link預約參加啦！

👉預約堤川美食之旅

如果有更多想知嘅內容，都可以隨時留言或者dm話俾我哋知：）

✨Instagram：creatrip.hk

🔎Facebook：Creatrip 帶你認識韓國每一面 

Mail：help@creatrip.com