忠清北道「堤川」必去景點&旅行攻略
「堤川」有咩景點必去，去旅行又有咩要注意？韓劇拍攝景點、人氣觀光景點、旅行攻略一次過幫你整理好！
Hello，大家好，我哋係由韓國人每日提供最新韓國旅行資訊嘅Creatrip。
忠清北道「堤川」四面環山，更加有一望無際嘅湖景同豐富文化遺產，去旅行真係超治癒！到底「堤川」有咩景點必去，去「堤川」旅行又有咩要注意？記住要睇完今日篇blog啦！
想輕鬆玩轉堤川？👇🏻
忠清北道「堤川」必去景點
義林池(의림지)
- 地址：충북 제천시 모산동 241
義林池係韓國其中一個歷史悠久嘅人工水庫，歷史價值深遠。湖水邊有一大排松樹同柳樹，景色優美，連《Running Man》同韓劇《惡鬼》都有去過拍攝！
大家沿住湖水行就會去到義林池必去打卡點之一嘅龍湫瀑布，瀑布上面更加有個玻璃觀景台，想享受刺激體驗，喺另一個角度欣賞呢個咁壯觀嘅瀑布嘅話，推薦大家一定要上去睇！
另外呢度仲有義林池歷史博物館同義林池游樂園，非常推薦一家大細嚟玩！
💡小貼士：參加堤川私人包車的士之旅可以免費入場義林池歷史博物館！
飛龍潭水庫(비룡담 저수지)
- 地址：충북 제천시 모산동
如果大家平時有follow開韓國IG，大家應該會見過呢個地方！飛龍潭水庫係韓國最近新興嘅打卡景點之一，而且因為位於龍湫瀑布附近，大家可以順便去埋參觀！
大家記住要去呢個被稱為魔法之城嘅地方影相打卡，因為景色優美，入夜之後有好多附近居民都會喺散步。
附近仲有一條義林池韓方治癒森林路，秋天去仲可以睇到一大片五顏六色嘅樹林，超推薦大家去散步！
清風湖畔纜車/單軌列車(청풍호반 케이블카/모노레일)
- 纜車
- 地址：제천시 청풍면 문화재길 166
- 營業時間：09:30~18:00
- 單軌列車
- 地址：제천시 청풍면 청풍명월로 879-17
- 營業時間：星期二至日 09:30~16:30（12~2月暫停開放）
形容山水靚嘅時候，韓國有個成語叫清風明月(청풍명월)，而清風湖畔就係呢個成語嘅出處！清風湖畔被譽為內陸之海，規模非常大，係堤川最有代表性嘅湖泊。
想睇到最靚嘅清風湖畔，最推薦大家上飛鳳山山頂俯瞰景色。如果鍾意做運動，大家可以行山上去（約2.3km），如果想舒服啲，可以選擇搭纜車或者單軌列車！
纜車係上山頂最快嘅方法，車廂四面都係玻璃，可以360度睇到堤川嘅自然景色。
而單軌列車就會帶大家遊覽飛鳳山，雖然比起纜車慢，不過比想像中斜，而且可以享受悠閒，都幾刺激下XD
💡小貼士：登記電子觀光證可以用優惠價買到飛，詳情記住睇到最後啦！
上到觀景台可以睇到清風湖之餘，仲有雞鳴山、月岳山、雉岳山等等韓國出名嘅山峰。
呢度亦都有唔少打卡位，大家記住學小編咁用清風湖做背景影相留念啦！
玉筍峰吊橋(옥순봉 출렁다리)
- 地址：충북 제천시 수산면 옥순봉로 342
- 營業時間：
- 3~10月 | 09:00~18:00
- 11~2月 | 10:00~17:00
- 逢星期一休息
如果想玩比較刺激嘅活動，推薦大家去堤川玉筍峰吊橋！小編自己比較細膽，一開始都比較驚，不過吊橋非常安全，而且行到中間仲可以睇到超壯觀嘅玉筍峰山景！
除此之外，仲可以見到附近有人搭遊覽船同玩獨木舟，大家有興趣都可以去埋玩！小編去嘅當日好可惜落雨，如果冇落雨可以睇到第二張圖嘅景色，相當靚！
💡小貼士：只要購買玉筍峰吊橋入場券，就即刻可以得一張可以喺堤川餐廳同Cafe用嘅₩2,000現金券，記住唔好錯過啦！
舟論聖地(배론성지)
- 地址：충북 제천시 봉양읍 배론성지길 296
- 營業時間：09:00~17:00（Break Time 12:30~13:30）
「舟論聖地」係韓國羅馬天主教會嘅聖地，村莊嘅溪谷因為似船底而得名。韓國最早嘅近代式教育機構「舟論神學院」都係位於呢個地方，大家嚟到可以瞭解到韓國天主教歷史。
呢度唔單止可以瞭解韓國宗教文化，仲可以欣賞由一望無際嘅草地同宏偉嘅大樹組成嘅超靚自然景色，特別係好多人會秋天專程嚟睇紅葉！
入去之前記住去辦事處攞返份指南，根據上面推薦嘅路線行會更加容易搵到一定要去嘅位！
清風文化財園區(청풍문화재단지)
- 地址：충북 제천시 청풍면 청풍호로 2048
- 營業時間：09:00~18:00（11-2月會營業時間會縮短1小時）
「清風文化財團區」係一個保留興建忠州水壩前被淹沒嘅村落面貌嘅民俗村，大家可以看睇到高麗同朝鮮時代嘅各種文化遺產同生活遺物！
喺呢度更加可以體驗到平時睇韓劇會見到嘅傳統遊戲同刑罰，如果鍾意睇韓劇嘅話一定唔可以錯過！
忠州湖清風渡口觀光船(청풍나루 충주호크루즈)
- 地址：충북 충주시 동량면 지등로 882
- 營業時間：09:00~18:00（詳細班次請參考官網）
想近距離欣賞清風湖靚景？推薦大家去清風渡口搭忠州湖觀光船！呢架船來回清風渡口同丹陽長淮渡口，全程大約90分鐘。行程當中會經過清風大橋同玉筍大橋，更加可以欣賞到丹陽八景之一！
觀光船室內座位夠闊落，而且仲有室外位，無論天氣好壞都可以舒服欣賞到最靚景色！
亞熱帶智能溫室(아열대 스마트온실)
- 地址：충북 제천시 봉양읍 미당리 200
- 營業時間：星期二至日 10:00~17:00
覺得熱門觀光景點都太多人，想去啲比較少人知道嘅秘密景點？咁小編會推薦大家去營業唔夠1年嘅堤川新景點亞熱帶智能溫室！呢個溫室有自動溫度調節系統，大家可以喺度見到喺韓國好少見嘅榴蓮同芒果！
而且最正嘅係呢度唔需要任何入場費，建議大家冬天嘅時候嚟，暖笠笠得嚟又多嘢睇！
忠清北道「堤川」旅行攻略
電子觀光證
如果大家打算去堤川，旅行前記住一定要先登記定電子觀光證，咁就可以喺堤川各大觀光景點、餐廳同體驗享用獨家優惠！
登記方法
STEP 1. 下載“대한민국 구석구석” APP
STEP 2. 跟住下面幾張圖撳，填寫資料
入到去之後就要喺1號揀自己住邊（就算唔係住喺韓國都可以），然後喺2號揀堤川市，最後撳3號就搞掂啦
STEP 3. 掃描QR CODE，領取優惠
大家喺堤川玩嘅時候如果發現到呢個QR CODE，就可以scan。
你會得到一份優惠證明書，向職員出示就可以獲得獨家優惠！
主要優惠
清風湖畔纜車 | 減₩2000 |
清風湖畔單軌列車 | 減₩2000 |
清風渡口觀光船 | 減₩3000 |
義林地歷史博物館 | 免費 |
堤川私人包車的士之旅 | 減₩5000 |
堤川城市之旅 | 減₩3000 |
堤川私人包車的士之旅
堤川面積同首爾差唔多，不過因為冇地鐵，而且巴士班次都比較少，如果想舒舒服服旅行嘅話超推薦大家預約堤川私人包車的士之旅。
呢個的士觀光行程會由親切嘅堤川的士司機帶大家去堤川人氣景點，有5小時同8小時行程任君選擇！
參加呢個的士觀光行程嘅話仲可以用優惠價參觀堤川必去景點，最多仲可以享有50%優惠！
⭐️各路線真實體驗 ⭐️
撳我睇價錢&預約詳情👇🏻
如果有更多想知嘅內容，都可以隨時留言或者dm話俾我哋知：）
Mail：help@creatrip.com