東大門「dundun」百貨公司攻略
時隔4年重新開張嘅東大門「dundun」（前LOTTE FITIN）！各層商鋪/餐廳/體驗總整理！
- 營業資訊
- 東大門「dundun」各層簡介
- 東大門「dundun」前往方法
Hello，大家好，我哋係由韓國人每日提供最新韓國旅行資訊嘅Creatrip。
好多人嚟韓國玩都會去東大門shopping，不過之前位於DDP附近嘅LOTTE FITIN商場閉幕，令唔少朋友都少咗個掃貨選擇。時隔四年，呢間商場終於完成翻新，亦都改咗名做「dundun東大門店」，重新開幕！今日就等小編帶大家睇入面有咩好行啦！
東大門附近有咩好做？
dundun東大門店(던던 동대문점)
營業資訊
- 地址：서울 중구 을지로 264
- 營業時間(年初一、中秋節正日休息)：
- 購物中心 | 10:30 - 21:00
- 餐廳 | 11:00 - 21:00
- Cafe&Pub | 10:30 - 23:00
- 健身房 | 06:00 - 24:00
- 官網：撳我
簡介
東大門「dundun」係一間複合式百貨公司，喺2024年9月27日開幕，因為連接住東大門歷史文化公園站，附近更加有DDP同DOOTA、現代百貨公司等等嘅商場，交通夠曬方便之餘可以一次過去曬咁多個地方行街！
東大門「dundun」各層簡介
B2/F | Olive Young、家電、戶外品牌
如果大家係喺地鐵站直接經過地下通道去東大門「dundun」，一入到去就會見到左邊有間Olive Young，規模都唔細，可以一次過買齊護膚品同化妝品！
而入口右邊就有一個叫THE NANO SQUARE嘅區域，由Lotte Hi-Mart開設嘅呢個展示場入面展出各種專為年輕1人家庭而設嘅電器，亦都有唔同主題嘅陳列室，就算唔買嘢齋參觀都可以行一段時間！
另外呢層仲有THE NORTH FACE，冬天如果帶唔夠衫都可以喺度買返件。
B1/F | 便利店、戶外品牌、時裝、家電
東大門「dundun」B1/F有一間明星主題Cafe「WHOSFAN CAFE」，每逢有歌手回歸呢度就會轉一次主題，除咗可以坐低飲嘢同睇相關擺設，呢度仲有一部人生四格相機，相框亦都會定期更新，大家可以間接同明星合照XD
附近仲有個大型BELLYGOM公仔同BELLYGOM主題人生四格相機，鍾意cute cute公仔嘅大家記住唔好錯過啦！
再行過少少就會見到有一間7仔，呢間便利店比普通分店大，而且仲好貼心咁另外分咗一區擺韓國人氣零食同必買手信，大家可以順便喺度買手信返去送俾人。
東大門「dundun」B1/F仲有唔少時裝潮牌，好似Mark Gonzales同nordisk等等，韓國後生仔女衣櫃入面最少會有一件！
1/F | UNIQLO、人生四格
如果大家唔係搭地鐵嚟，係喺1樓（地面）門口直接入嘅話，一入到去就會去到呢間超大嘅UNIQLO，雖然係日本牌子，不過勝在啲衫CP值夠高，相信大家都可以尋到寶！
2/F | 時裝、飾物
上到東大門「dundun」2樓就會見到有韓國時裝品牌 8 seconds 同 MIXXO，好多朋友們嚟韓國玩都會買唔少呢兩個brand嘅衫返去，無論係休閒風定少女/淑女風都有，適合各種年齡層嘅人去掃貨！
另外呢度仲有一間買手機配件嘅鋪頭，手機殼、手機支架、手機膜、吊飾等等都有，而且設計都好cute。
3/F | DAISO
相信唔少人飛韓國都最少會行1次DAISO，而東大門「dundun」嘅3樓就有一間（全層都係DAISO），大家可以參考入口地面痴住嘅平面圖慢慢行！
最近DAISO同幾個美妝&護膚品牌聯手推出咗好多款平價化妝品同護膚品，重點係質素一啲都唔差。呢間分店都有專門幫大家劃分咗一個化妝品zone，方便大家搵想要嘅product。
4/F | 運動品牌、鞋履
ABC MART係韓國一間出名賣鞋同運動服裝嘅連鎖店，喺東大門「dundun」都有新開一間分店。入面有齊Nike、Adidas等運動品牌嘅商品，好彩嘅話仲可以用比香港平嘅價錢買到想要嘅鞋款！
5/F | 時裝、鞋履、運動品牌
上到5樓首先會見到一間時裝鋪，大約佔咗半層樓，喺呢度可以搵到超多牌子同款式嘅衫，運動風、復古風、中性風等等都有，小編當時都忍唔住行咗一陣街XD
東大門「dundun」5樓亦都有各種運動品牌同休閒服裝，無論係男女老少都可以行得盡興。
6/F | 家具、木工、健身房
6樓有傢俬陳列室同木工材料專門店，仲有一間GYM房（因為全部都係玻璃所以可以直接見到入面啲人做運動XD），相對地冇咁啱遊客行。
7/F | 餐廳&Cafe
7樓有間韓國西餐自助餐連鎖店「ASHLEY QUEENS」，呢度餐點選擇多，而且味道都偏中上唔會伏。
最令小編驚艷嘅係呢度居然開咗延茂莊！延茂莊（YEONMUJANG）係一間好出名嘅聖水洞Rooftop Cafe&Pub，雖然東大門呢間分店冇靚景睇，不過就有超多款特色餐點同飲品可以叫，而且裝修都好有復古風，氣氛好好！
8/F | 餐廳、遊樂設施
東大門「dundun」頂層就有一個美食廣場，無論係韓式、中式、西式定輕食都有，而且大部分餐廳門口都會有英文Menu，大家可以參考嚟揀。
行入少少仲會見到有個迷你機鋪，大家可以喺度夾公仔、扭扭蛋同玩遊戲機，一家大細或者情侶閨蜜一齊嚟都可以玩得開心。
東大門「dundun」前往方法
喺東大門歷史文化公園站（동대문역사문화공원역）落車，向11、12號出口方向行。
你會見到呢個入口喺你左邊，跟住箭嘴方向行。
咁就去到東大門「dundun」商場啦！
非常坦白咁講，其實東大門「dundun」商場規模真係唔大，不過可以話係麻雀雖小五臟俱全，無論係時裝、生活用品、娛樂、餐飲都應有盡有，大家如果去開東大門，都推薦可以去行返轉！
如果有更多想知嘅內容，都可以隨時留言或者dm話俾我哋知：）
Mail：help@creatrip.com