東大門汗蒸幕 | SPAREX（東廟店）
SPAREX全新開幕分店！東大門附近設施超新汗蒸幕！
Hello，大家好，我哋係由韓國人每日提供最新韓國旅行資訊嘅Creatrip。
一場嚟到韓國旅行，梗係要體驗正宗韓國文化啦！相信大家睇“以前嘅”韓劇經常都會見到主角去汗蒸幕，今日就等小編介紹一間最近新開冇耐嘅汗蒸幕 —— SPAREX 東廟店俾大家啦！（同東大門最出名嗰間係同一個brand！）
撳我睇價錢&預約詳情👇🏻
東大門「SPAREX汗蒸幕（東廟店）」基本資訊
- 地址：서울 종로구 지봉로 19 12F
- 營業時間：00:00-24:00
東大門「SPAREX汗蒸幕（東廟店）」實地探訪
.
SPAREX呢間汗蒸幕喺東大門好出名，最近佢哋喺東廟開咗一間新分店，一齊跟住小編去睇吓啦！
喺櫃檯出示預約記錄之後，職員會俾一套衫、毛巾同儲物櫃鎖匙你，之後大家就可以按照鎖匙上面嘅號碼搵返對應嘅鞋櫃同儲物櫃，記住一定要好好保管條鎖匙啊！
入到去之後首先會見到有個小賣部，如果大家冇自備洗頭水同護髮素等等嘅洗漱用品都可以喺度買。
再行入少少就會去到儲物櫃同更衣室，入面環境勁闊落，而且仲有可以地方可以坐低休息同吹頭（不過要注意風筒需要俾錢先用得）！
正式入汗蒸幕同埋走之前大家可以喺呢度沖涼。呢度分成站立式同坐式area，韓國人通常會先企喺度沖身，然後去坐低洗臉同搓澡。
東廟SPAREX有幾款水池，包括溫度適中嘅暖湯、室溫嘅AQUA湯、同可以幫手冷卻身體嘅冷湯。
而上面呢度係乾式桑拿，入去坐一陣就會幫你排汗同暖身，不過唔係個個都可以入去，身體本身唔太好嘅話就要避免去啦。
有好多韓國人都鍾意專登去汗蒸幕搓澡，「SPAREX」都有一個搓澡嘅地方，專業嘅搓澡師會幫你搓走身上嘅老泥，令皮膚變得更加嫩滑！
而呢度就係SPAREX東廟店嘅招牌火爐蒸房啦！SPAREX嘅蒸房唔係用電，而係直接用柴火燒熱內部。大家可以喺石頭上面淋水，水蒸氣蒸發之後室內溫度會變得更加高，幫你出多啲汗排毒。
火爐蒸房附近有條樓梯，沿住樓梯行落去就會去到汗蒸幕區！韓國汗蒸幕好特別嘅係會好似上面張相咁有一個個窿，其實係俾大家入去瞓低休息！SPAREX東廟店係小編去過嘅汗蒸幕當中最多呢種瞓教位嘅地方，入面仲有插頭添啊！
黃土木炭汗蒸幕環境闊落，而且溫度適中唔會太熱。
出一身汗之後就可以去冰房冷卻一下，不過大家記住唔好一出蒸房就入冰房，要等身體無咁熱之後先再入去啊！
而呢間就係扁柏山林浴室，入到去可以聞到好香好療癒嘅扁柏香味，大家可以喺度睇電視，或者同朋友細細聲傾計。
最後呢間係岩鹽房，係小編最鍾意嘅地方！呢度有一塊用鹽整嘅牆，色彩繽紛好靚！雖然比起其他房溫度會更加高，但係可以順便排毒都唔錯！
外面公共區域仲有按摩椅，俾₩3,000就可以按15分鐘，排完毒順便舒筋活絡，超舒服！
喺SPAREX東廟店仲可以睇到N首爾塔（南山塔），因為鋪頭位於13樓，所以仲可以俯瞰首爾城市景，大家可以喺度chill吓影吓相。
SPAREX東廟店入面仲有一個food court，連五花肉都有得食！大家可以直接用自助點餐機叫嘢食，不過要注意呢度唔會有職員幫你上菜，餐點準備好之後需要自己去攞，記住要攞埋餐具啊！
今次小編同朋友叫咗辣炒豬肉、嫩豆腐湯同韓式拌飯，三款都係經典韓國料理，而且都好高質，同喺一般餐廳食嘅冇咩分別，唔會話係food court就係頹飯XD
SPAREX東廟店入面亦都有個健身房，入面設施勁齊全，而且環境好闊落，就算有其他人同場都唔會覺得逼狹！而家透過Creatrip預約嘅朋友們仲可以用優惠價購買健身房使用券，記住唔好錯過啦！
除此之外，SPAREX東廟店仲有一個室內高爾夫球練習場，所有裝備同鞋都可以喺現場俾錢租，唔需要自備，相當方便。
小編冇諗過原來汗蒸幕入面連人生四格都有得影！大家記住學韓國人咁用毛巾整返個羊咩咩頭，揀好鍾意嘅嘅道具之後同朋友一齊合照啦！
大家仲可以去小賣部買杯麵同飲品，推薦大家飲韓國人去汗蒸幕必飲嘅甜米露，甜甜地又涼爽！
Creatrip評論優惠 - 汗蒸幕雞蛋
而家喺Creatrip預約體驗後填寫評論，每人即可獲得1隻汗蒸幕雞蛋，記住唔好錯過啦！
如果大家都想體驗韓國傳統汗蒸幕文化，或者因為未可以check in/飛機太夜而需要搵地方休息，推薦大家嚟新開嘅SPAREX汗蒸幕東廟店！
東大門「SPAREX汗蒸幕（東廟店）」前往方法
東廟站（동묘앞역）6號出口出。
SPAREX東廟店位於出口右邊大廈。
行入去搭𨋢上13樓就到SPAREX東廟店啦！
撳我預約👇🏻
以上係東大門「SPAREX汗蒸幕（東廟店）」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Mail：help@creatrip.com