弘大美食 | 肉山莊
唔講唔知呢度係弘大！氣氛環境超正嘅森林山莊concept燒肉店！
Hello，大家好，我哋係由韓國人每日提供最新韓國旅行資訊嘅Creatrip。
有時候都真係幾想去郊外露營燒肉，享受悠閒度假氣氛！不過旅行時間有限，而且冇車嘅話會好唔方便... 最近小編喺弘大搵到一間山莊concept嘅燒肉鋪，今日就跟住小編一齊去睇吓啦！
撳我睇Menu&預約詳情👇🏻
弘大「肉山莊」基本資訊
- 地址：서울 마포구 와우산로21길 31-11
- 營業時間：16:30-22:30（Last Order 21:30）
弘大「肉山莊」實地探訪
之前小編同朋友去咗位於弘大入口站附近嘅韓燒餐廳「肉山莊」。同餐廳名一樣，成間餐廳就好似深山入面嘅山莊木屋咁！而且呢度仲有露天位，夜晚嚟嘅話氣氛應該好浪漫！
而室內環境都好闊落，枱同枱之間空間夠大，唔會覺得逼狹。裝修以木材、磚頭做主要材料，營造出山莊氣氛！餐廳中間仲有一塊大鐵板，職員會先喺呢度幫大家燒好肉再上菜。
叫完嘢食之後職員就會幫大家set枱上菜，「肉山莊」嘅配菜相當特別，有芝士、蔬菜串燒、泡菜豆腐同年糕片，醬汁都有成4款！
所有肉都會先燒好再上菜，望住廚師燒肉就好似睇緊表演咁XD
山莊五花肉
五花肉燒到金黃色之後就會放落大家面前嘅烤盤，因為已經燒熟曬+剪成一口大細，大家可以即刻開餐！
「肉山莊」提供好多款醬料，柚子醋夠清新解膩，而特製蒜頭辣椒包飯醬就夠惹味！
呢度仲會提供麵包糠，大家可以先點炸豬扒醬，然後再點落麵包糠，無論係口感定味道都好特別！
另外大家仲可以配埋芝士、年糕片、芽菜同水芹菜一齊食，一次過享受多款口味！
小編同朋友仲叫咗原條牛仔骨，睇落勁奢侈（大家記住要影低留念XD）！
山莊原條牛仔骨
牛仔骨一樣會先燒熟表面鎖住肉汁，放上鐵盤之後會再用火槍燒，加強煙熏香味。
推薦大家可以點牛骨髓食，如果平時唔太鍾意內臟類嘅朋友們可能會有少少唔習慣，但係因為牛骨髓口感香滑，點嚟食嘅話味道會更加香濃，同牛肉好夾。
食牛肉嘅時候會另外上其他醬料，包括可以解膩嘅芥末籽醬同黑松露沙律醬，雖然係食緊韓式燒肉，但係就有種食緊高級西餐嘅感覺！
蔬菜串燒方面有菇、車厘茄、茄子、燈籠椒同大葱，蔬菜甜味加上香濃碳燒味，同肉一齊食會令口感同味道更上一層樓。
韓牛水刺身
「肉山莊」都有提供其他餐點！平時水刺身都係用魚生整，但係呢款水刺身係用韓牛整嘅，酸酸甜甜非常解膩。
韓牛生牛肉
而普通生牛肉調味夠惹味，重點係擺盤夠精緻特別，居然係放喺牛骨上面！
辣雞麵
講起韓國即食麵就當然唔少得辣雞麵啦，加埋半熟太陽蛋食，味道好又夠飽肚。
牛骨大醬湯
食燒肉韓國人都會配大醬湯，呢款大醬湯用料十足，入面仲有原條牛骨，味道香濃。
肉山莊Highball
鍾意飲返一兩杯嘅朋友們記住要叫呢款肉山莊Highball，入面有覆盆子、桑梅同肉桂，酸酸甜甜、果香味濃！
如果大家都想喺市中心就輕鬆食到BBQ，非常推薦大家嚟弘大「肉山莊」，唔單止食物夠高質，氣氛更加係無得彈！
弘大「肉山莊」前往方法
弘大入口站（홍대입구역）9號出口。
轉左。
直行。
繼續直行。
轉右行入弘大主街。
直行。
繼續直行。
過馬路。
直行。
上圖路口轉左。
直行。
轉入小路。
直行。
咁就去到弘大「肉山莊」啦！
撳我預約👇🏻
以上係弘大「肉山莊」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Mail：help@creatrip.com